“Kisannla ki ena sagesse ek l’intelligence parmi zot?”

“Kisannla ki ena sagesse ek l’intelligence parmi zot? Ki li montré, par so bon conduite, so bann action avek enn douceur ki la sagesse produire.”—JACQ. 3:13.

1, 2. Ki nou kapav dire concernant beaucoup dimoune ki lezot considere couma sage?

KISANNLA ki ou considere couma enn dimoune ki vrai-mem ena la sagesse? Eski c’est ou bann parent, enn zom agé, enn professeur l’université? Kitfois ou l’opinion lor enn kikenn ki ena la sagesse, li influencé par bann circonstance ek l’environnement kot ou finn grandi. Mais bann serviteur Bondié zot, zot surtout interessé ar fason ki Bondié considere la sagesse.

² Pa tou dimoune ki le monde considere couma sage ki vrai-mem sage dan lizié Bondié. Par exemple, Job ti koz avek bann zom ki ti sur ki zot ti pé dire bann parole sage, mais li ti tire sa conclusion-la: “Mo pa trouve enn kikenn ki sage parmi zot.” (Job 17:10) Concernant certain dimoune ki ti rejette connaissance Bondié, l’apotre Paul ti ecrire: “Mem si zot dire ki zot sage, zot inn vinn fou.” (Rom. 1:22) Ek par prophete Isaïe, Jéhovah Li-mem ti dire franc: “Malheur pou bann ki croire ki zot sage.”—Is. 5:21.

3, 4. Pou ki enn kikenn ena vrai sagesse, ki li bizin faire?

³ Alors, nou bizin bien comprend seki faire enn dimoune vrai-mem sage ek ki lerla faire li gagne faveur Bondié. Proverbes 9:10 aide nou pou comprend sa kan li dire: “La crainte pou Jéhovah, c’est commencement la sagesse, ek connaissance sa Kikenn ki Pli Saint-la, ala seki l’intelligence été.” Enn dimoune ki sage bizin ena la crainte pou Bondié ek respecté so bann principe. Selman, li pa assez ki nou zis reconette ki Bondié existé ek ki Li ena bann principe. Disciple Jacques faire nou raisonne lor sa sujet-la. (Lire Jacques 3:13.) Remark sa l’expression ki li servi-la: “Ki li montré, par so bon conduite, so bann action.” Si enn dimoune ena vrai sagesse, nou bizin trouve sa toulé-jour dan so conduite ek dan so parole.

⁴ Vrai sagesse implik aussi ena enn bon jugement ek servi connaissance ek l’intelligence dan enn fason efficace. Ki bann action ki pou montré ki nou ena vrai sagesse? Jacques donne enn la-liste bann kitsoz ki nou pou trouvé dan fason ki bann dimoune sage agir.a Seki li ti dire kapav aide nou pou ena bann bon relation avek nou bann frere ek soeur, ek avek bann dimoune en dehors congregation. Anou examine seki li ti dire.

Bann action ki montré ki enn dimoune li vrai-mem sage

 5. Couma enn dimoune ki vrai-mem sage pou agir?

⁵ Li bon nou attire l’attention ki Jacques ti associé la sagesse ar enn bon conduite. Parski la crainte pou Jéhovah c’est commencement la sagesse, alors enn dimoune sage faire tou pou li ena enn conduite ki en accord avek fason agir Bondié ek So bann principe. Nou pa né avek sagesse Bondié. Selman, nou kapav gagne li grace a enn l’etude regulier lor la Bible ek par meditation. Sa deux kitsoz-la pou aide nou pou suive conseil ki trouve dan Éphésiens 5:1: “Imite Bondié.” Plus nou agir en accord avek fason ki Jéhovah ti pou agir, plus nou pou manifesté la sagesse dan nou bann action. Bann fason ki Jéhovah agir, zot beaucoup pli superieur ar fason ki bann dimoune agir. (Is. 55:8, 9) Alors, kan nou imite fason ki Jéhovah agir, bann dimoune ki en dehors congregation ki observe nou pou trouvé ki nou different.

 6. Kifer la douceur li enn preuve ki enn kikenn pé imite Jéhovah, ek ki sa qualité-la impliké?

⁶ Jacques montré ki enn fason pou nou imite Jéhovah c’est kan nou ena “enn douceur ki la sagesse produire.” Li vrai ki enn chretien ki ena la douceur, li gentil, mais sa pa empeche li pou montré-li ferme concernant bann principe biblik. C’est sa ki aide li pou agir dan enn fason equilibré. Mem si Li ena enn pouvoir sans limite, Bondié manifesté la douceur, ek nou pa peur pou approche ar Li. Garson Bondié ti reflete tellement bien mem douceur ki so Papa, ki li ti kapav dire: “Vinn vers moi, zot tou ki pé rinté ek ki ena fardeau lor zot, ek moi mo pou reconforte zot. Prend mo joug lor zot ek aprann ar moi, parski mo ena enn caractere doux ek enn leker humble, ek zot pou gagne reconfort pou zot nâme.”—Mat. 11:28, 29; Phil. 2:5-8.

 7. Kifer Moïse li enn bon l’exemple concernant la douceur?

⁷ La Bible donne l’exemple bann lezot dimoune ki ti ena enn douceur ou-soit enn l’humilité extraordinaire. Moïse ti enn parmi sa bann dimoune-la. Li ti ena bann grand responsabilité, pourtant la Bible dire ki li ti “beaucoup pli humble ki tou bann dimoune ki ti ena lor la terre.” (Nomb. 11:29; 12:3) Ek rappel la force ki Jéhovah ti donne li pou faire so volonté. Jéhovah ti content pou servi bann dimoune humble pou accompli so projet.

 8. Couma bann dimoune imparfait kapav manifesté “enn douceur ki la sagesse produire”?

⁸ Li clair alors ki mem bann dimoune imparfait kapav manifesté “enn douceur ki la sagesse produire.” Ki nou kapav dire lor nou-mem? Couma nou kapav manifesté sa qualité-la pli bien? La douceur li forme partie dan fruit l’esprit saint Jéhovah. (Gal. 5:22, 23) Nou kapav prié pou gagne so l’esprit saint ek contigne faire bann zeffort sincere pou manifesté sa fruit-la ek nou sur ki Bondié pou aide nou pou manifesté la douceur pli bien. Nou ena enn bon raison pou faire sa kan nou lire sa psaume-la: “[Bondié] pou enseigne bann dimoune ki humble so fason agir.”—Ps. 25:9.

9, 10. Ki bann zeffort nou bizin faire pou manifesté la douceur ki faire Bondié plaisir, ek kifer nou bizin faire sa bann zeffort-la?

⁹ Selman, kitfois nou pou bizin faire bann grand zeffort pou nou ameliore-nou dan sa domaine-la. A cause fason ki nou finn elevé, kitfois certain parmi nou trouve sa difficile pou manifesté la douceur. En plus, bann dimoune ki autour nou kapav encourage nou pou pa montré la douceur. Zot dire ki enn dimoune bizin “teigne difé par difé.” Mais eski sa l’attitude-la li vrai-mem sage? Si enn ti-difé pé prend kot ou, eski ou pou essaye teigne li avek petrole ou-soit avek de l’eau? Si nou verse petrole lor difé, situation pou vinn pli pire, mais si nou essaye teigne li avek de l’eau, li possible ki nou pou arrivé teigne li. Li pareil aussi pou nou, la Bible donne nou sa conseil-la: “Enn reponse, kan li douce, li faire la colere disparette, mais enn parole blessant faire la colere monté.” (Prov. 15:1, 18) Prochaine fois ki enn situation irrite nou soit endan soit en-dehors congregation, eski nou pou kapav montré vrai sagesse kan nou reagir avek douceur?—2 Tim. 2:24.

¹⁰ Couma nou ti trouvé au commencement sa lartik-la, beaucoup dimoune ki influencé par l’esprit sa lé-monde-la, zot pa gentil, zot pa rod la paix, ni zot calme. Au contraire, nou trouve beaucoup dimoune ki dur ek ki ena l’orgueil. Jacques ti bien konn sa, c’est a cause sa ki li ti averti bann membre congregation pou ki zot pa laisse sa l’attitude-la deteint lor zot. Ki nou kapav aprann encore ar sa conseil ki li ti donné-la?

Couma enn dimoune ki pena la sagesse été

11. Ki bann defaut ki pa en accord avek sagesse Bondié?

¹¹ Jacques ti dire bien franc ki bann defaut ki pa en accord ditou avek sagesse Bondié. (Lire Jacques 3:14.) Jalousie ek enn tendance pou laguerre, c’est bann defaut charnel, pa bann qualité spirituel. Ki arrivé kan c’est enn l’attitude charnel ki dominé? Dan Jérusalem, ena six groupe ki pretann ki zot bann chretien. Sakenn servi enn partie dan l’eglise du Saint-Sépulcre, ki dapré certain, finn construire lor place kot Jésus ti mort ek ti enterré. Ena toujours bann desaccord entre zot. En 2006, magazine Time ti dire ki enn fois, bann moine ti “laguerre pendant beaucoup lé-temps, . . . zot ti batte zot camarade avek bann grand porte la bougie.” Tellement zot pena confiance entre zot ki zot ti donne enn musulman garde la clé sa l’eglise-la.

12. Kan pena la sagesse, ki kapav arrivé?

¹² Fodé pa ki ena sa qualité tendance pou laguerre ziska sa point-la dan vrai congregation chretien. Selman, a cause l’imperfection, parfois certain persisté lor zot prop l’opinion. Lerla sa riské crée bann grand desaccord. L’apotre Paul ti remark sa tendance-la dan congregation Corinthe, alors li ti ecrire: “Oui, parski ena jalousie ek desaccord parmi zot, eski zot pa charnel ek eski zot pa pé marche couma bann zom?” (1 Cor. 3:3) Sa situation bien triste-la ti existé pendant enn certaine temps dan sa congregation premier siecle-la. Alors, nou bizin faire bien attention pou pa laisse sa qualité l’attitude-la rente dan congregation zordi.

13, 14. Donne bann l’exemple couma enn kikenn kapav manifesté enn mauvais l’attitude.

¹³ Couma enn l’attitude coumsa kapav rente dan congregation sans ki nou rann-nou compte? Sa kapav commence par bann ti kitsoz. Par exemple, kan ena construction enn la-Salle du Royaume, kitfois kapav ena bann desaccord lor fason ki travail bizin faire. Enn frere kapav pa content parski lezot pa accepté so suggestion, li possible mem ki li commence dire devant zot tou ki li pa d’accord ar bann decision ki finn prend. Kitfois li kapav al ziska refuse pou contigne travail lor sa construction-la! Si enn kikenn agir coumsa sa vedir ki li blié ki, en general pou ki enn travail ki concerne la congregation reussi, sa depann plus lor la paix ki ena dan la congregation ki lor methode ki servi pou faire travail-la. Seki Jéhovah pou beni c’est la douceur, pa enn l’attitude rebelle.—1 Tim. 6:4, 5.

¹⁴ Anou prend enn lot l’exemple: bann ancien dan enn congregation remarké ki enn ancien ki’nn servi pendant plusieurs l’année, asterla nepli rempli bann condition spirituel pou reste ancien. Sa frere-la inn gagne bann conseil bien precis dan le passé, mais li pa’nn corrige-li. Kan surveillant circonscription passé, li prend sa en consideration ek li accepté recommandation ki college ancien faire pou radié sa ancien-la. Couma sa ancien-la pou reagir? Eski avek l’humilité ek la douceur li pou accepté decision ki college ancien inn prend ensam ek bann conseil biblik ki zot pou donne li? Eski li pou pré pou travail pou rempli bann condition spirituel pou li kapav reservi couma enn ancien? Ou-soit eski li pou developpe rancune ek jalousie parski li’nn perdi so privilege? Kifer enn frere pou faire coumadir li encore qualifié pou servi couma enn ancien alors ki tou bann lezot ancien trouvé ki li pa qualifié? Li pou beaucoup pli sage si li manifesté l’humilité ek li comprend!

15. Kifer ou pensé ki conseil ki’nn inspiré ek ki trouve en Jacques 3:15, 16 li bien important?

¹⁵ Bien sur, enn kikenn kapav manifesté sa l’attitude-la dan lezot fason. Mais n’importe ki situation ki developpé, nou bizin faire zeffort pou rejette sa bann comportement ki nou finn fek mentionné-la. (Lire Jacques 3:15, 16.) Disciple Jacques ti dire ki nou trouve sa bann l’attitude-la “lor la terre” parski zot pa spirituel ditou. Li dire aussi ki c’est bann comportement ki “charnel” dan sens ki zot ressemblé comportement bann zanimo ki pa raisonné. Bann comportement coumsa zot “demoniak” parski zot reflete mentalité bann demon, bann l’ennemi Bondié. Li pa pou bon ditou ki enn chretien ena sa bann comportement-la!

16. Ki bann changement kitfois nou bizin faire, ek couma nou pou kapav reussi faire sa?

¹⁶ Li bon ki chaque membre dan congregation examine li-mem personnellement ek faire zeffort pou elimine sa qualité l’attitude-la. En tant ki bann enseignant dan congregation, bann ancien bizin prend conscience ki zot bizin elimine bann mauvais l’attitude. Li pa facile pou faire sa a cause nou l’imperfection ek l’influence sa lé-monde-la. C’est coumadir nou pé essaye grimpe enn colline kot ena la boue ek ki glissé. Si nou pena nanyin pou attrapé, nou riské glissé ek tombe enba. Mais si nou reste bien attaché ar bann conseil biblik ek avek l’aide ki nou gagné dan l’organisation Jéhovah ki lor la terre, nou pou kapav avancé.—Ps. 73:23, 24.

Bann qualité ki enn dimoune sage faire zeffort pou manifesté

17. Couma enn dimoune sage reagir kan li faire face ar le mal?

¹⁷ Lire Jacques 3:17. Nou pou gagne bann bienfait si nou examine certain parmi bann qualité ki la “sagesse ki sorti la-haut” produire. Enn dimoune ki pur, li montré sa dan so bann action ek so parole. Nou bizin rejette bann mauvais kitsoz desuite. Fodé ki sa vinn automatik pou nou. Kitfois inn deja arrivé ki letan ou’nn al kot enn docteur li’nn tape zis enba ou genou pou testé ou reflexe. Desuite ou lipié inn levé dan enn fason automatik, sans ki ou’nn bizin reflechi. Mem zaffaire bizin arrivé kan nou tenté pou faire le mal. Nou pureté ek nou conscience ki formé par la Bible bizin reagir dan enn fason automatik ek pousse nou pou rejette seki mauvais. (Rom. 12:9) La Bible donne l’exemple bann dimoune ki finn reagir dan sa fason-la, couma Joseph ek Jésus.—Gen. 39:7-9; Mat. 4:8-10.

18. Ki sa vedir (a) ki nou pacifik? (b) ki nou favorise la paix?

¹⁸ Pou nou manifesté la sagesse ki sorti la-haut fodé aussi ki nou pacifik. Sa vedir ki fodé pa ki nou bann dimoune ki violent, ki content laguerre, ou-soit ki faire bann kitsoz pou troublé la paix. Jacques ti donne plus detail lor la kan li ti dire: “La grain fruit la justice li semé dan la paix pou bann ki faire la paix.” (Jacq. 3:18) Remarké ki sa verset-la koz lor “faire la paix.” Dan congregation, eski nou ena reputation pou favorise la paix ou-soit pou troublé la paix? Eski souvent nou gagne probleme avek lezot, nou offense vite ek nou offense lezot aussi? Eski nou insisté ki lezot accepté nou couma nou été, ou-soit eski avek humilité nou travail lor nou bann defaut ki vrai-mem agace lezot? Eski nou ena reputation pou faire zeffort pou toujours favorise la paix, pré pou pardonné ek pou blié bann erreur ki lezot faire? Si nou examine nou-mem personnellement sa pou aide nou pou trouvé si nou bizin progressé pou manifesté la sagesse ki sorti la-haut dan sa domaine-la.

19. Couma enn dimoune gagne reputation ki li raisonnable?

¹⁹ Jacques ti dire ki la sagesse ki sorti la-haut, li raisonnable aussi. Eski dimoune konn nou couma enn kikenn ki pré pou cedé kan pena okenn principe biblik ki impliké ek ki pa insisté pou lezot suive seki nou nou dire? Eski nou ena reputation enn kikenn ki manifesté la douceur ek ki lezot kapav vinn koz ar nou facilement? Tousala montré si nou finn aprann pou vinn bann dimoune raisonnable.

20. Si nou manifesté bann qualité spirituel ki nou finn examiné, ki pou arrivé?

²⁰ Kan bann frere ek soeur faire zeffort pou manifesté encore plus sa bann qualité spirituel ki Jacques ti mentionné-la, ena vrai-mem enn bon l’atmosphere dan congregation! (Ps. 133:1-3) Si nou manifesté la douceur, nou pacifik ek nou raisonnable envers nou prochain, nou pou ena bann pli bon relation avek nou bann frere ek soeur ek tou dimoune pou trouvé ki nou ena la “sagesse ki sorti la-haut.” Dan prochain lartik, nou pou trouvé couma kan nou trouve lezot couma Jéhovah trouve zot, sa kapav aide nou pou manifesté la douceur, pou montré ki nou pacifik ek raisonnable.

[Note]

Eski ou kapav expliké?

• Ki kitsoz ki faire enn chretien vrai-mem sage?

• Couma nou kapav manifesté sagesse Bondié pli bien?

• Ki defaut nou trouvé dan bann dimoune ki pa manifesté “sagesse ki sorti la-haut”?

• Ki bann qualité ou’nn decidé pou developpe encore plus?

[Zimage lor page 25]

Couma kapav arrivé ki ena bann desaccord zordi?