Kisannla Bondié?

COUMA ou pou reponn sa question-la? Bann dimoune en general croire ki Bondié existé, zot bien devoué dan zot l’adoration pou Li ek zot ena la crainte pou Li. Mais zot konn tigit kitsoz lor Li. Si ou croire dan Bondié, couma ou pou reponn sa bann question-la?

1. Eski Bondié Li enn personne réel?

2. Eski Bondié ena enn nom?

3. Eski Jésus li Bondié Tout-Puissant?

4. Eski Bondié interessé ar moi?

5. Eski Bondié accepté tou forme l’adoration?

Si ou demann bann dimoune en general pou reponn sa bann question-la, surement ou pou gagne beaucoup different reponse. Alors, sa pa etonne nou ki finn ena bann zistoire fausse ek bann mauvais l’idée ki finn developpé lor Bondié.

Kifer li bien important ki nou gagne bann reponse

Pendant ki li ti pé koz avek enn madame ki ti croire dan Bondié ek ki li ti joinde kot enn puit, Jésus Christ ti montré l’importance pou konn la verité lor Bondié. Sa madame-la, ki ti enn Samaritaine, ti reconette ki Jésus ti enn prophete. Mais ti ena enn kitsoz ki ti derange li. Religion Jésus ti different ar seki pou li. Kan li ti dire sa Jésus, Jésus ti dire li franc: “Zot, zot adore seki zot pa koné.” (Jean 4:19-22) Par sa bann parole-la, nou trouvé ki Jésus inn enseigné ki pa tou dimoune ki croire dan Bondié ki vrai-mem konn Bondié.

Eski par sa bann parole-la, Jésus ti pé rod dire ki personne pa kapav konn Bondié vrai-mem? Non. Apré sa, Jésus ti dire sa madame-la: “Bann vrai adorateur pou adore le Père avek l’esprit ek la verité, parski, avredir, le Père pé rod sa bann qualité dimoune-la mem pou adore Li.” (Jean 4:23) Eski ou parmi bann dimoune ki adore Bondié “avek l’esprit ek la verité”?

Li bien important ki ou verifié reponse sa question-la. Kifer? Jésus ti montré l’importance pou ena enn connaissance exact kan li ti faire sa la priere-la: “Sa-mem ki vedir la vie eternel: zot bizin aprann konn toi, sel vrai Bondié, ek celui ki to finn envoyé, Jésus Christ.” (Jean 17:3) Oui, ou l’espoir pou gagne la vie dan l’avenir ena enn rapport direct avek ou connaissance lor la verité concernant Bondié!

Eski li vrai-mem possible pou konn la verité lor Bondié? Oui, li possible! Alors, couma nou kapav trouve sa verité-la? Guette seki Jésus ti dire lor li-mem: “Mo-mem chemin, ek la verité ek la vie. Personne pa kapav vinn vers le Pere sans passe par moi.” (Jean 14:6) Li finn dire aussi: “Personne pa koné kisannla le Pere, a part so Garson, ek sa dimoune ar ki Garson-la envie faire konn so Papa.”—Luc 10:22.

Alors, moyen pou konn Bondié li trouve dan bann l’enseignement Jésus Christ, Garson Bondié. Jésus finn promette nou: “Si zot obeir avek fidelité mo bann l’enseignement, zot vrai-mem mo bann disciple; coumsa zot pou konn la verité ek la verité pou rann zot libre.”—Jean 8:31, 32, Bible en français courant, 1987.

Alors, couma eski Jésus ti pou reponn sa cinq question ki finn soulevé-la?

[Zimage lor page 4]

Eski ou adore enn Bondié ki ou pa vrai-mem koné?