Seki Jéhovah inn faire pou delivré ou, eski sa ena valeur pou ou?

“Mo beni Jéhovah Bondié Israël, parski Li’nn prend compte so peuple ek Li’nn delivré li.”—LUC 1:68.

1, 2. Ki l’exemple nou kapav servi pou montré ki nou situation bien grave, ek ki bann question nou pou examiné?

MAZINÉ ki ou pé allongé lor enn lili l’hopital. Ou dan enn la salle kot tou dimoune gagne mem maladie, enn maladie mortel ki pena okenn guerison. Kan ou aprann ki enn docteur pé dirige bann recherche pou trouve enn remede, ou gagne enn l’espoir. Ou attann avek impatience pou koné ki bann nouveau progré li’nn faire. Enn jour, ou aprann ki li finn reussi trouve enn remede! Sa docteur ki finn faire sa decouverte-la, finn faire bann grand sacrifice pou reussi trouve sa remede-la. Ki sentiment ou pou ena? Surement ou pou ena enn grand respé ek enn grand reconnaissance pou sa docteur ki finn trouve enn moyen pou delivré ou ek beaucoup lezot dimoune ar la mort-la.

² Sa situation-la kapav parette exageré, mais en realité, li decrire bien situation kot nou été zordi. Sakenn parmi nou, nou dan enn situation ki encore pli pire ki seki nou finn decrire. Nou bien bizin enn kikenn pou delivré nou. (Lire Romains 7:24.) Jéhovah finn faire bann grand sacrifice pou kapav delivré nou. So Garson aussi finn faire bann grand sacrifice. Alors, anou examine quatre question important. Kifer nou bizin delivrance? Ki nou delivrance finn coute Jésus? Ki sa finn coute Jéhovah? Ek couma nou kapav montré ki delivrance ki Bondié finn faire ena valeur pou nou?

Kifer nou bizin delivrance?

 3. Dan ki sens peché li pareil couma enn l’epidemie mondial?

³ Dapré enn estimation ki’nn fek faire, enn parmi bann pli pire l’epidemie mondial ki finn ena dan l’histoire l’humanité c’est la grippe espagnole en 1918 ki ti touye plusieurs dizaine million dimoune. Ena lezot maladie ki dan enn certaine sens pli dangereux. Alors ki zot kapav infecté pli tigit dimoune, zot touye la plupart dimoune ki zot infecté.a Mais, ki nou kapav dire si nou compare peché avek enn l’epidemie mondial coumsa? Rappel bann parole ki trouve dan Romains 5:12: “Par enn sel zom, peché finn rente dan le monde ek peché finn amenn la mort, ek coumsa tou dimoune passe par la mort parski zot tou ti’nn faire peché.” Cent pour cent population mondial infecté par peché, parski tou dimoune imparfait faire peché. (Lire Romains 3:23.) Ki quantité dimoune mort a cause peché? Paul ti ecrire ki peché faire “tou dimoune” mort.

 4. Ki Jéhovah pensé lor quantité le temps ki nou vive, ek couma seki Li pensé bien different ar seki beaucoup dimoune pensé zordi?

⁴ Beaucoup dimoune zordi pensé ki peché ek la mort zot bann kitsoz normal. Zot tracassé kan zot trouve enn dimoune mort trop jeune, mais kan enn dimoune mort parski li vié, zot considere sa couma enn kitsoz “naturel.” Li trop facile pou bann dimoune blié seki nou Createur Li, Li pensé lor nou la vie. Nou la vie beaucoup pli courte ki seki Jéhovah ti’nn prevoir pou nou. En realité, okenn dimoune pa’nn vive mem “enn jour” pou Jéhovah. (2 Pierre 3:8) Alors, Parole Bondié dire ki nou la vie li courte pareil couma la vie enn brin l’herbe ou-soit couma souffle ki sorti dan nou la bouche. (Ps. 39:5; 1 Pierre 1:24) Nou bizin garde sa dan nou l’esprit. Kifer? Si nou comprend ki sa “maladie” ki’nn affecté nou-la li bien grave, nou kapav apprecié pli bien valeur so “guerison,” setadir nou delivrance.

 5. Ki consequence peché finn ena lor sakenn parmi nou?

⁵ Pou nou kapav comprend bien ki quantité peché ek so consequence zot bien grave, nou bizin essaye comprend ki nou finn perdi a cause peché. Kitfois au commencement sa kapav difficile parski peché inn faire nou perdi enn kitsoz ki jamais nou pa ti ena avant. Au commencement, Adam ek Ève ti ena enn la vie parfait. Zot ti ena enn l’esprit ek enn lekor parfait, alors, zot ti kapav choisir pou controle zot pensée, zot sentiment, ek zot action. Sa vedir ki en tant ki bann serviteur Jéhovah zot ti kapav contigne developpe bann bon qualité. Mais zot, zot ti rejette sa don ki Bondié ti donne zot-la, setadir enn la vie parfait. Zot ti choisir pou faire peché kont Jéhovah, ek c’est a cause sa ki zot ti perdi la vie ki Jéhovah ti’nn prevoir pou zot ek pou zot bann descendant. (Gen. 3:16-19) En mem temps, zot ti mette lor zot ek lor nou, sa “maladie” terrible ki nou finn mentionné-la. Alors, Jéhovah ti ena raison pou condamne zot. Mais pou nou, Jéhovah offert l’esperance enn delivrance.—Ps. 103:10.

Ki nou delivrance inn coute Jésus?

6, 7. (a) Au commencement, couma Jéhovah ti montré ki nou delivrance ti pou coute beaucoup? (b) Ki nou kapav aprann ar bann sacrifice ki Abel ek bann chef famille ki ti vive avant la Loi mosaïk, ti offert?

⁶ Jéhovah ti koné ki sa ti pou coute beaucoup pou delivré bann descendant Adam ek Ève. Dan prophetie ki trouve dan Genèse 3:15, nou aprann seki sa delivrance-la ti couté. Jéhovah ti pou envoye enn “descendance,” setadir enn sauveur ki enn jour ti pou detruire Satan, oui tire li net. Selman, avant ki sa arrivé, sa sauveur-la ti pou souffert, li ti pou coumadir blessé dan so talon. Nou comprend ki sa kapav faire li souffert ek faire li vinn faible, mais ki sa representé? Ki sa Kikenn ki Jéhovah ti choisir-la, ti pou bizin enduré?

⁷ Pou ki sa sauveur-la sauve bann dimoune ar peché, li ti pou bizin donne enn kitsoz ki ti pou couvert zot peché, enn moyen ki ti pou tire consequence peché ek coumsa reconcilié zot ar Bondié. Ki sa ti pou impliké? Boner dan l’Histoire, ti ena bann signe ki ti montré ki ti pou bizin enn sacrifice. Kan Abel, premier zom fidele ti offert Jéhovah bann zanimo en sacrifice, li ti gagne faveur Bondié. Plitar, bann chef famille ki ti ena la crainte pou Bondié couma Noé, Abraham, Jacob, ek Job ti offert bann sacrifice coumsa ek sa ti faire Bondié plaisir. (Gen. 4:4; 8:20, 21; 22:13; 31:54; Job 1:5) Plitar, la Loi mosaïk ti aide bann dimoune pou comprend pli bien kifer ti bizin bann sacrifice.

 8. Ki grand pretre ti faire pendant jour Propitiation?

⁸ Parmi bann sacrifice ki ti pli important ki la Loi ti demandé, ti ena bann sacrifice ki ti offert pendant jour Propitiation enn fois par an. Sa jour-la, grand pretre ti faire enn serie action ki ti ena enn signification symbolik. Li ti offert Jéhovah bann sacrifice pou couvert bann peché—d’abord, pou bann pretre, apré, pou bann tribu ki pa pretre. Grand pretre ti rente dan Très-Saint tabernacle ou-soit temple, kot li tousel ti gagne droit rentré zis sa jour-la dan l’année. La-bas li ti fann-fann inpé di-sang sa bann sacrifice-la devant l’arche de l’alliance. La haut, lor sa coffre sacré-la, parfois ti ena enn nuage ki ti brillé, ki ti represente presence Jéhovah.—Ex. 25:22; Lév. 16:1-30.

 9. (a) Jour Propitiation, kisannla grand pretre ti representé, ek bann sacrifice ki li ti offert, ki sa ti representé? (b) Kan grand pretre ti rente dan Très-Saint, ki sa ti representé?

⁹ L’apotre Paul ti inspiré pou faire nou konn signification sa bann action symbolik-la. Li ti dire ki grand pretre ti represente le Messie, Jésus Christ, ek kan ti offert bann sacrifice, sa ti represente la mort Christ en sacrifice. (Héb. 9:11-14) Sa sacrifice parfait-la ti pou couvert vrai-mem bann peché deux groupe dimoune—groupe 144,000 pretre, bann frere Christ ki finn oint ar l’esprit saint ek bann “lezot brebis.” (Jean 10:16) Kan grand pretre ti rente dan Très-Saint, li ti represente Jésus Christ ki ti pou rente dan le ciel pou presente valeur so sacrifice devant Jéhovah.—Héb. 9:24, 25.

10. Dapré bann prophetie la Bible, par ki l’epreuve le Messie ti pou passé?

¹⁰ Oui, li clair ki delivrance bann descendant Adam ek Ève ti pou coute beaucoup. Messie ti pou bizin sacrifié so la vie! Bann prophete ki’nn ecrire bann l’Écriture hébraïques ti donne plus detail lor la. Par exemple, prophete Daniel ti dire dan enn fason direct ki “Messie le Guide” ti pou “mort,” pou kapav “couvert bann faute.” (Dan. 9:24-26) Pou li kapav sarié peché bann dimoune imparfait, Isaïe ti annoncé ki le Messie ti pou bizin passe par sa bann l’epreuve-la: bann dimoune ti pou rejette li, persecute li, ek blesse li, setadir touye li.—Is. 53:4, 5, 7.

11. Dan ki fason Garson Jéhovah ti montré ki li ti disposé pou sacrifié-li-mem pou nou gagne enn delivrance?

¹¹ Avant li ti vinn lor la terre, Garson ki Bondié inn crée direct ti koné ki quantité nou delivrance ti pou coute li. Li ti pou bien souffert ek apré, so bann l’ennemi ti pou touye li. Kan so Papa ti enseigne li sa bann kitsoz-la, eski li ti capitulé, ou-soit eski li ti rebellé? Non au contraire, li ti soumette volontairement ar bann instruction so Papa kan li ti accepté seki so Papa ti enseigne li. (Is. 50:4-6) Pareil aussi kan Jésus ti lor la terre, li ti faire volonté so Papa avek obeissance. Kifer? Li ti donne enn reponse kan li ti dire: “Mo content le Père.” Li ti donne enn lot reponse kan li ti dire: “Personne pena enn pli grand l’amour ki sa: ki enn kikenn donne so nâme pou so bann camarade.” (Jean 14:31; 15:13) Alors, si nou pou gagne enn delivrance, c’est en partie grace a l’amour Garson Jéhovah. Mem si li ti’nn bizin donne so la vie parfait, li ti content pou faire sa pou ki nou kapav gagne enn delivrance.

Ki nou delivrance inn coute Jéhovah?

12. La ranson ti montré volonté kisannla, ek kifer li finn donne sa?

¹² C’est pa Jésus ki ti decidé ki ti bizin donne enn ranson ou-soit couma pou donne sa ranson-la. Sa moyen pou delivré bann dimoune-la ti enn partie important dan volonté Jéhovah. L’apotre Paul ti dire ki l’autel ki ti ena dan temple, lor ki bann sacrifice ti offert, ti represente volonté Jéhovah. (Héb. 10:10) Alors, sa delivrance ki nou gagné a travers sacrifice Christ-la, c’est avant tou ek surtout enn kitsoz ki nou doit Jéhovah. (Luc 1:68) C’est enn fason ki Li montré so volonté ki parfait, ek so grand l’amour pou bann dimoune.—Lire Jean 3:16.

13, 14. Couma l’exemple Abraham aide nou pou comprend seki Jéhovah inn faire pou nou?

¹³ Ki sa ti coute Jéhovah pou montré so l’amour pou nou dan sa fason-la? Li difficile pou nou pou comprend sa. Selman, ena enn recit dan la Bible ki kapav aide nou pou comprend sa pli bien. Jéhovah ti demann Abraham, enn zom fidele, pou faire enn kitsoz extra difficile—offert so garson Isaac en sacrifice. Abraham ti enn bon papa. Kan Jéhovah ti koz Isaac ar li, Jéhovah ti dire: “To sel garson ki to bien content.” (Gen. 22:2) Mais kan-mem sa, Abraham ti trouvé ki faire volonté Jéhovah ti pli important ki so l’amour pou Isaac. Abraham ti faire seki bizin ek li ti obeir Jéhovah. Selman, Jéhovah pa ti laisse Abraham faire seki Li-mem Li ti pou faire enn jour. Bondié ti envoye enn ange pou arrete Abraham zis avant li sacrifié so garson. Abraham ti’nn tellement decidé pou obeir so Bondié dan sa l’epreuve difficile-la, ki li ti sur ki sel fason pou li retrouve sa jeune homme-la vivant c’est par moyen enn resurrection. Mais li ti ena enn la foi total ki Bondié ti pou faire sa resurrection-la. Oui, Paul ti dire ki Abraham ti vrai-mem regagne Isaac par moyen enn resurrection “ek ki sa ti servi couma enn l’exemple.”—Héb. 11:19.

¹⁴ Eski ou kapav mazinn souffrance Abraham a mesure ki li ti pé prepare-li pou sacrifié so garson? Dan enn sens, l’experience ki Abraham ti faire montré l’exemple Jéhovah kan Li ti sacrifié sa kikenn ki Li ti appel “mo Garson ki mo bien content[-la].” (Mat. 3:17) Mais rappel ki souffrance Jéhovah ti beaucoup pli grand. Li ek so Garson ti’nn passe plusieurs million l’année kitfois mem plusieurs milliard l’année ensam. Garson Jéhovah ti travail dan la joie avek so Papa couma “so zouvrier qualifié” ki Li bien content, ek couma “la Parole,” setadir so Porte-parole. (Prov. 8:22, 30, 31; Jean 1:1) Seki Jéhovah ti enduré kan so Garson ti pé souffert, kan bann dimoune ti bouffonne li ek kan li ti mort couma enn criminel, sa c’est enn kitsoz ki nou pa kapav mem maziné. Nou delivrance inn coute Jéhovah beaucoup! Alors, couma nou kapav montré ki sa delivrance-la ena enn grand valeur pou nou?

Couma ou kapav montré ki nou delivrance ena valeur pou ou?

15. Couma Jésus ti complete sa grand action pou couvert nou peché-la, ek ki sa inn rann possible?

¹⁵ Apré ki li ti’nn ressuscité pou al dan le ciel, Jésus ti complete sa grand action pou couvert nou peché-la. Aster ki li ti retrouve so Papa, li ti presente Li valeur so sacrifice. Sa ti amenn bann grand benediction. Asterla li ti pou possible pou gagne enn pardon complet pou bann peché, d’abord peché bann frere oint Christ, apré, peché “le monde entier.” Grace a sa sacrifice-la, zordi tou seki repenti avek tou zot leker ek vinn bann vrai disciple Christ, kapav ena bann bon relation avek Jéhovah. (1 Jean 2:2) Couma sa concerne ou?

16. Ki l’exemple nou kapav prend pou montré kifer nou bizin reconnaissant pou delivrance ki Jéhovah inn rann possible pou nou?

¹⁶ Anou retourne ar l’exemple ki nou ti prend au commencement. Supposé ki sa docteur ki finn trouve enn remede pou ou maladie-la, approche bann patient dan la salle kot ou été ek faire sa proposition-la: Tou patient ki accepté sa traitement-la ek suive regime ki mo donne li, pou gueri sans faute. Ki pou arrivé si la plupart patient refuse pou suive bann instruction ki sa docteur-la donné ek zot dire ki li pou trop difficile pou prend sa medecine-la ou-soit pou suive sa regime-la? Eski ou pou faire pareil couma zot, mem si ou sur ki traitement-la vrai-mem marché? Non, jamais! Pena doute ki ou pou remercié docteur-la pou so remede ek ou pou suive bien so bann instruction, kitfois mem ou pou dire lezot ki choix ou finn faire. Dan enn sens beaucoup pli large, sakenn parmi nou bizin envie montré Jéhovah ki quantité nou reconnaissant pou sa delivrance ki Li’nn rann possible grace a sacrifice so Garson.—Lire Romains 6:17, 18.

17. Dan ki fason ou kapav montré ou reconnaissance pou seki Jéhovah inn faire pou delivré ou?

¹⁷ Si nou reconnaissant pou seki Jéhovah ek so Garson inn faire pou delivré nou ar peché ek la mort, nou pou montré sa. (1 Jean 5:3) Nou pou lutte kont tendance ki nou ena pou faire peché. Jamais nou pou tombe dan piege pou pratik peché volontairement ek lerla, couma sa arrivé souvent, amenn enn double la vie ki hypocrite. Si nou ena enn conduite coumsa, c’est coumadir nou pé dire ki la ranson pena okenn valeur pou nou ek ki nou pa reconnaissant envers sa disposition-la. Au contraire, nou pou montré nou reconnaissance kan nou travail dur pou reste pur devant Bondié. (2 Pierre 3:14) Nou pou montré sa kan nou partage avek lezot l’esperance extraordinaire concernant nou delivrance, pou ki zot aussi zot kapav ena bann bon relation avek Jéhovah ek l’espoir pou vive pou touletan dan l’avenir. (1 Tim. 4:16) Pena doute, Jéhovah ek so Garson merite tou ti le temps ek la force ki nou kapav consacré pou loué zot! (Marc 12:28-30) Reflechi lor la: nou kapav attann lepok kan nou pou delivré net ar peché! Nou pou kapav vive enn la vie pareil couma Bondié ti prevoir, enn la vie parfait, pou touletan—tousala grace a seki Jéhovah inn faire pou delivré nou!—Rom. 8:21.

[Note]

Couma ou pou reponn?

• Kifer ou bien bizin enn delivrance?

• Couma seki Jésus inn faire pou sacrifié li-mem, touche ou?

• Ki sentiment ou ena concernant sa don ki Jéhovah inn faire kan Li’nn donne la ranson?

• Kan ou pense seki Jéhovah inn faire pou delivré ou, ki sa pousse ou pou faire pou remercié Li?

[Zimage lor page 30]

Pendant jour Propitiation, grand pretre en Israël ti represente le Messie

[Zimage lor page 31]

Abraham ti disposé pou offert so garson, sa aprann nou beaucoup lor pli grand sacrifice ki Jéhovah inn faire