Jésus Christ—L’influence ki so message finn ena

“Pena doute ki temoignage ki finn dure pli longtemps lor sa zom sage ki sorti Capernaüm-la c’est ki par so l’influence . . . li pé contigne touche leker ek l’esprit bann dimoune.”a—GREGG EASTERBROOK.

BANN mot ena enn grand pouvoir. Bann parole ki ena sagesse ek ki finn bien choisir, kapav touche leker bann dimoune, donne zot l’espoir, ek change zot la vie. Okenn zom pa finn ena bann parole aussi puissant ki Jésus Christ. Enn zom ki ti tann Jésus faire so Sermon ki bien celebre, ti ecrire plitar: “Kan Jésus ti fini dire sa bann parole-la, l’effet ki sa ti ena c’est ki bann la foule ti impressionné par so fason enseigné.”—Matthieu 7:28.

Ziska zordi, partout dan le monde bann dimoune konn bien plusieurs parole ki Jésus ti dire. Anou guette deux-trois sa bann parole ki ena beaucoup signification-la.

“Zot pa kapav travail couma bann esclave pou Bondié ek pou la Richesse toulé-deux.”—Matthieu 6:24.

“Alors, tou kitsoz ki zot envie bann dimoune faire pou zot, zot aussi, zot bizin faire pareil pou bannla.”—Matthieu 7:12.

“Rann César bann kitsoz ki pou César, mais rann Bondié bann kitsoz ki pou Bondié.”—Matthieu 22:21.

“Ena plus bonheur kan donné ki kan recevoir.”—Actes 20:35.

Mais Jésus ti faire plus ki zis dire bann parole ki pa kapav blié. Message ki li ti preché ti ena pouvoir parski li ti enseigne la verité lor Bondié, li ti enseigne bann dimoune couma zot kapav trouve enn vrai sens dan zot la vie, ek li ti montré dan enn fason clair ki c’est grace a Royaume Bondié ki tou souffrance bann dimoune pou disparette. A mesure ki nou examine sa message-la lor bann page ki suive, nou pou trouvé kifer Jésus ‘so l’influence pé contigne touche leker ek l’esprit’ bann million dimoune.

[Note]