Rol Bann Fam dan Proze Jéhovah

1, 2. (a) Ki bann kado Bondie ti donn Adam? (b) Kifer Bondie ti donn Adam enn madam? (Get zimaz dan koumansman lartik.)

KAN Jéhovah ti kree later, Li ti ena enn proze. Li “finn form li pou ki dimounn res lor la.” (Is. 45:18) Premie dimounn ki Li ti kree, Adam, ti parfe, ek Bondie ti donn li enn plas extraordiner pou reste​—zardin Éden. Pena dout ki Adam ti apresie bann pie inpresionan, bann ti larivier, ek bann zanimo ki ti ena dan sa zardin-la! Me li ti mank enn kitsoz bien inportan. Jéhovah ti montre ki Adam ti manke kan Li ti dir: “Li pa bon ki zom res tousel. Mo pou fer enn led pou li, enn kikenn ki al bien ar li.” Apre sa, Bondie ti fer Adam rant dan enn profon somey, ti pran enn so bann kot, ek “ti fer enn fam avek sa kot[-la].” Kan Adam ti leve, li ti extra kontan! Adam ti dir: “Anfin, sannla li lezo mo lezo ek laser mo laser. Pou apel li Fam, parski finn tir li dan enn zom.”​—Gen. 2:18-23.

² Kan Bondie ti donn Adam enn fam, sa ti enn kado extraordiner, parski sa fam-la ti pou enn led parfe pou Adam. Sa fam-la ti pou ena osi gran privilez pou gagn bann zanfan. Zisteman, “Adam ti apel so madam Ève, parski li ti pou vinn mama tou dimounn vivan.” (Gen. 3:20; not) Se vremem enn kado extraordiner ki Bondie ti donn premie koup imin! Zot ti ena kapasite pou gagn lezot imin parfe. Gras-a sa, finalman later ti pou vinn enn paradi ranpli ar bann dimounn parfe ki ti pou dominn lor lezot kreatir vivan.​—Gen. 1:27, 28.

 3. (a) Pou gagn benediksion Bondie, ki Adam ek Ève ti bizin fer, me ki’nn arive? (b) Ki bann kestion nou pou examine?

³ Pou gagn sa bann benediksion-la, Adam ek Ève ti bizin obeir Jéhovah ek aksepte ki Li diriz zot. (Gen. 2:15-17) Se zis kan zot ti fer sa ki zot ti pou kapav realiz proze ki Jéhovah ti ena pou zot. Me malerezman, zot ti les zot inflianse par “serpan orizinel,” Satan, ek zot ti fer pese kont Bondie. (Rév. 12:9; Gen. 3:1-6) Ki lefe sa dezobeisans-la finn ena lor bann fam? Ki bann fam fidel dan lepase finn akonpli? Kifer nou kapav konpar bann fam Kretien dan nou lepok ar “enn gran larme”?​—Ps. 68:11.

 4. Kisannla ki Bondie ti konsider kouma responsab pou pese premie koup imin?

⁴ Kan Bondie ti demann Adam bann kont pou so dezobeisans, li ti donn enn exkiz ki pa ti ena pwa. Li ti dir: “Sa fam ki to’nn done pou res avek mwa la, li’nn donn mwa frwi sa pie-la, alor mo’nn manze.” (Gen. 3:12) Adam pa ti rekonet so tor, me li ti zet sa fot-la lor madam ki Bondie ti’nn donn li​—ek lor sa Kikenn ki ti donn li sa madam-la! Adam ek Ève toulede ti fer pese, me se Adam ki Bondie ti konsider kouma responsab. Akoz sa, lapot Paul ti ekrir ki “par enn sel zom [Adam], pese finn rant dan lemond ek pese finn amenn lamor.”​—Rom. 5:12.

 5. Ki sa inn montre kan Bondie inn les bann dimounn diriz zot par zotmem pandan enn tan?

⁵ Satan ti pous premie koup imin pou panse ki zot pa bizin Jéhovah pou diriz zot. Sa ti soulev enn kestion bien inportan konsernan souverennte: Kisannla ki ena drwa dirize? Pou reponn sa kestion-la, Bondie inn les bann dimounn diriz zot par zotmem san so direksion pandan enn tan. Li ti kone ki par lexperyans, bann dimounn ti pou rann zot kont ki zot pa kapav diriz zot san Li. Bann siek ki’nn pase inn montre ki sa fason dirize la inn fer limanite konn bann soufrans enn apre lot. Par exanp, zis dan dernie siek finn ena anviron 100,000,000 dimounn ki’nn mor dan bann lager​—ek parmi ti ena plizir milyon zom, fam, ek zanfan inosan. Alor, deplizanpli ena bann prev ki “enn dimounn ki pe marse pa finn kree pou diriz so pa.” (Jér. 10:23) Kan nou konpran sa verite-la, sa pous nou pou aksepte Jéhovah kouma nou Dirizan.​—Lir Proverbes 3:5, 6.a

 6. Dan boukou pei, kouma bann dimounn tret bann madam ek bann tifi?

⁶ Bann zom ek bann fam toulede pe soufer dan sa lemond ki dan pouvwar Satan la. (Eccl. 8:9; 1 Jean 5:19) Ek enn parmi bann kitsoz pli kriel ki finn ena, se violans kont bann fam. Dan lemond, anviron 30 poursan bann fam dir ki zot gagn bate ar zot konpagnon. Dan sertin sosiete, donn bann garson plis preferans parski dapre bann dimounn kan bann garson grandi, zot pou kontign zenerasion zot fami ek zot pou okip zot bann paran ek zot bann gran-paran dan zot vie zour. Dan sertin pei, konsider bann tibaba tifi kouma indezirab, ek avort pli boukou tibaba tifi ki tibaba garson.

 7. Kouma Bondie ti permet zom ek fam bien koumans zot lavi?

⁷ Pena dout ki Bondie pa kontan kan maltret bann fam. Bondie tret bann fam bien ek Li respekte zot. Nou trouv bien ki Jéhovah ena konsiderasion pou bann fam kan Li ti kree Ève parfe. Jéhovah pa ti kree Ève pou vinn esklav Adam, me li ti ena bann kalite ki ti fer li al bien ar Adam. Se enn bann rezon kifer, apre siziem zour kreasion, Bondie “ti trouv tou seki Li ti fer, ek gete, tou ti bien bon.” (Gen. 1:31) Wi, “tou” seki Jéhovah ti fer ti “bien bon.” Li ti permet zom ek fam toulede bien koumans zot lavi!

 8. (a) Dekrir konportman bann dimounn an zeneral. (b) Toutlong listwar, anver kisannla Bondie inn montre so faver?

⁸ Apre dezobeisans dan zardin Éden, konportman bann zom ek bann fam an zeneral finn deteryore, ek pandan dernie siek, zot konportman inn vinn pli pir. Labib ti anonse ki dan “bann dernie zour” boukou dimounn ti pou ena enn move kondwit. Bann dimounn pe telman fer move kitsoz ki sa lepok-la inn vinn vremem “kritik.” (2 Tim. 3:1-5) Selman, toutlong listwar limanite, “Souverin Segner Jéhovah” inn montre so faver anver bann zom ek bann fam ki’nn fer Li konfians, ki’nn obeir so bann lalwa, ek ki’nn aksepte Li kouma zot Dirizan.​—Lir Psaume 71:5.b

 9. Komie dimounn ti sape kan ti ena Deliz, ek kifer?

⁹ Kan Bondie ti detrir lemond violan dan lepok Noé par enn Deliz, bien tigit dimounn ti sape. Si sa lepok-la bann frer ek ser Noé ti ankor vivan, zot’si zot inn bizin mor dan Deliz. (Gen. 5:30) Me bann madam ki ti sape ti mem kantite ki bann misie. Noé, so madam, so trwa garson, ek zot madam ti gagn lavi sov. Zot pa ti detrir parski zot ti ena lakrint pou Bondie ek zot ti fer so volonte. Bann plizir milyar dimounn ki existe zordi zot bann desandan sa wit dimounn ki ti gagn faver Jéhovah la.​—Gen. 7:7; 1 Pierre 3:20.

10. Kifer Jéhovah ti soutenir madam bann sef fami ki ti fidel?

¹⁰ Plizir lane apre, Bondie ti soutenir osi madam bann sef fami ki ti fidel. Bondie pa ti pou fer sa si sa bann madam-la pa ti ena lakrint pou Li ek ti plengn zot sor dan lavi. (Jude 16) Li difisil pou mazinn Sara, enn madam ki ti respekte so misie, Abraham, pe plengn lor so sor kan zot ti kit tou zot konfor dan Our ek viv kouma bann abitan tanporer dan bann latant dan enn lot pei. Okontrer, “Sara ti obeir Abraham ek ti apel li segner.” (1 Pierre 3:6) Rébecca osi ti enn kado beni pou so misie ek li ti enn bon madam. Sa pa etonn nou ki so misie Isaac, “ti tom amoure ar li, ek . . . ti gagn konsolasion apre lamor so mama.” (Gen. 24:67) Ek azordi, eski nou pa kontan ki parmi nou ena bann fam fidel parey kouma Sara ek Rébecca?

11. Kouma de famsaz Ebre ti manifeste kouraz?

¹¹ Kan bann Izraelit ti an esklavaz dan l’Égypte, zot nonb ti ogmante, ek Pharaon ti donn lord pou touy tou bann garson Ebre kan zot ne. Selman, get lexanp de famsaz Ebre, Shiphra ek Poua, ki paret ti an-sarz bann famsaz. Parski zot ti ena enn gran lakrint pou Jéhovah, avek kouraz zot ti refiz touy bann zanfan. Alor pou rekonpans zot, Jéhovah ti donn zot zot prop fami.​—Ex. 1:15-21.

12. Ki kitsoz extraordiner Débora ek Yaël ti fer?

¹² Dan lepok bann ziz an Israël, Bondie ti soutenir profetes Débora. Sa madam-la ti ankouraz ziz Baraq ek ti ed bann Izraelit pou liber zot ar bann ki ti pe fer dominer ar zot. Me li ti anonse ki se pa Baraq ki ti pou gagn viktwar lor bann Kananeen. Okontrer, se par “lame enn fam” ki Bondie ti pou touy Sisera, sef larme bann Kananeen. Se seki ti arive kan Yaël, enn madam ki pa ti Izraelit, ti touy li.​—Juges 4:4-9, 17-22.

13. Ki Labib dir nou lor Abigaïl?

¹³ Abigaïl ti enn madam extraordiner ki ti viv dan 11^em siek Avan Nou Lepok. Li ti ena enn bon zizman, alor ki so misie, Nabal, ti brit, pa ti vo nanye, ek pa ti enn dimounn ki ti reflesi. (1 Sam. 25:2, 3, 25) David ek so bann zom ti vey lor bann kitsoz Nabal pandan enn tan, me kan zot ti demann li inpe manze, li ti “kriy ar zot ek li [ti] maltret zot” ek li pa ti donn zot nanye. Sa ti fer David bien ankoler ek li ti desid pou touy Nabal ek so bann zom. Kan Abigaïl ti tann sa, li ti amenn manze ek bwar pou David ek so bann zom, koumsa li finn anpes zot fer krim. (1 Sam. 25:8-18) Plitar David ti dir li: “Mo beni Jéhovah, Bondie Israël, ki’nn avoy twa pou vinn zwenn mwa zordi.” (1 Sam. 25:32) Apre lamor Nabal, David ti marye avek Abigaïl.​—1 Sam. 25:37-42.

14. Ki kalite travay bann tifi Shalloum ti fer ek kouma bann fam Kretien imit zot lexanp zordi?

¹⁴ Boukou zom, fam ek zanfan ti mor kan larme Babilonien ti detrir Jérusalem ek so tanp an 607 Avan Nou Lepok. Ti rekonstrir bann miray sa lavil-la an 455 Avan Nou Lepok, ek se Nehémia ki ti siperviz sa travay-la. Parmi bann ki ti donn koudme pou repar sa bann miray-la, ti ena bann tifi Shalloum, enn prins lamwatie distrik Jérusalem. (Neh. 3:12) Volonterman zot ti fer bann travay ki normalman bann tifi prins pa ti pou fer. Zordi nou vremem apresie bann fam Kretien ki avek lazwa pe soutenir dan diferan fason bann proze konstriksion lorganizasion!

15. Ki privilez Bondie ti donn Marie?

¹⁵ Enn tipe avan ek pandan premie siek Nou Lepok, Jéhovah ti beni plizir madam kan Li ti donn zot bann gran privilez. Parmi zot ti ena enn vierz ki ti apel Marie. Alor ki Marie ti fianse avek Joseph, gras-a lespri sin li ti tom ansint. Kifer Bondie ti swazir li pou vinn mama Jésus? Pena dout ki li ti ena bann kalite spiritiel ki ti pou permet li pran swin sa garson parfe la depi so nesans ziska li vinn gran. Sa ti vremem enn gran privilez pou vinn mama pli gran zom ki finn existe lor later!​—Mat. 1:18-25.

16. Donn enn lexanp pou montre latitid ki Jésus ti ena anver bann fam.

¹⁶ Jésus ti bien bon avek bann fam. Par exanp, get seki enn madam ki ti ena enn lemorazi depi 12 an ti fer. Dan enn lafoul li ti apros Jésus par deryer ek li ti tous so linz. Olie Jésus ti kriy ar li, avek bonte li ti dir: “Mo tifi, to lafwa finn geri twa. Al anpe, to’nn geri, to nepli ena sa maladi ki ti pe fer twa bien soufer la.”​—Marc 5:25-34.

17. Ki mirak ti ena zour Pentecôte 33 Nou Lepok?

¹⁷ Sertin fam ki ti bann disip Jésus ti soutenir li ek so bann zapot. (Luc 8:1-3) Pandan Pentecôte 33 Nou Lepok, anviron 120 zom ek osi bann fam ti gagn lespri sin dan enn fason spesial. (Lir Actes 2:1-4.) Jéhovah ti’nn fini anons sa levennman-la par sa bann parol-la: “Mo [Jéhovah] pou avoy mo lespri lor tou sort kalite dimounn, ek vremem zot bann garson ek zot bann tifi pou profetize . . . Ek mem lor bann serviter ek bann servant dan sa lepok-la, mo pou avoy mo lespri.” (Yoël 2:28, 29) Par sa mirak-la, Bondie ti montre ki Li ti’nn aret soutenir Israël ki ti vinn aposta ek Li ti donn so faver “Israël Bondie.” Ek dan “Israël Bondie,” ti ena bann zom ek bann fam toulede. (Gal. 3:28; 6:15, 16) Parmi bann fam Kretien ki ti partisip dan minister dan premie siek ti ena kat tifi Philippe ki ti enn evanzelizater.​—Actes 21:8, 9.

18, 19. (a) An rapor avek vre ladorasion, ki privilez Bondie inn donn bann zom ek bann fam toulede? (b) Ar ki kitsoz enn ekrivin Psaume konpar bann madam ki pe anons bonn nouvel?

¹⁸ Ver lafin 19^em siek, de-trwa misie ek madam ti montre enn gran lintere pou vre ladorasion. Se zotmem ki ti koumans travay ki bann vre Kretien pe fer zordi, setadir predikasion ek realizasion sa profesi Jésus la: “Sa bon nouvel lor Rwayom la pou prese partou kot dimounn reste lor later kouma enn temwaniaz pou tou bann nasion, ek lerla lafin pou vini.”​—Mat. 24:14.

¹⁹ Azordi, sa ti group bann etidian Labib la inn vinn anviron 8,000,000 Temwin Jéhovah. An 2013, plis ki 11,000,000 lezot dimounn ti montre ki zot interese ar Labib ek apresie nou travay kan zot ti asiste Memoryal lamor Jésus ki fer toule lane. Dan laplipar pei, mazorite sa bann dimounn-la se bann madam. Ek osi parmi bann 1,000,000 serviter aplintan ki ena dan lemond, ena pli boukou madam. Wi, Bondie inn donn bann fam fidel privilez pou partisip dan realizasion sa Psaume-la: “Jéhovah donn lord; bann fam ki anons bonn nouvel zot enn gran larme.”​—Ps. 68:11.

20. Ki bann size nou kapav examine dan nou Ladorasion an Fami ek nou letid personel?

²⁰ Pena ase lespas pou koz lor tou bann fam fidel ki ena dan Labib. Me nou tou nou kapav lir zot lexanp dan Parol Bondie ek dan nou bann piblikasion. Par exanp, nou kapav medit lor fidelite Ruth. (Ruth 1:16, 17) Kan nou lir liv ki port nom Larenn Esther ek bann lartik ki koz lor li, sa kapav fortifie nou lafwa. Nou kapav gagn bann bienfe kan nou organiz nou pou etidie bann size koumsa dan nou Ladorasion an Fami. Si nou res tousel, nou kapav etidie zot dan nou letid personel.

21. Kouma bann fam fidel inn montre zot latasman anver Jéhovah dan bann moman difisil?

²¹ Pena dout ki Jéhovah beni travay predikasion bann fam Kretien ek soutenir zot dan bann moman difisil. Par exanp, gras-a So led, bann fam fidel ti gard zot lintegrite kan bann Nazi ek bann Kominist ti pe regne. Boukou parmi zot inn aksepte soufer ek mem perdi lavi parski zot ti obeir Bondie. (Actes 5:29) Zordi parey kouma dan lepase, nou bann ser ek zot bann konpagnon Kretien pe soutenir souverennte Bondie. Ek parey kouma Jéhovah ti fer avek bann Izraelit dan lepase, Li trap zot lame drwat ek dir: “Pa per. Mo pou ed twa.”​—Is. 41:10-13.

22. Ki privilez nou pou gagne dan lavenir?

²² Biento, bann zom ek bann fam fidel pou fer later vinn enn paradi ek pou ed plizir milyon dimounn ki pou resisite pou aprann konn proze Jéhovah. An-atandan, ki nou enn zom ouswa enn fam, anou apresie privilez ki nou ena pou servi Jéhovah “kot-a-kot.”​—Tseph. 3:9.