LARTIK LETID 10
Lamour ek Rekonesans Pous Twa pou Pran Batem
“Ki anpes mwa resevwar batem?”—ZIST. 8:36.
KANTIK 37 Servi Zeova Avek Tou To Nam
REZIMEa
1-2. Dapre Zistwar Bann Apot 8:27-31, 35-38, ki ti pous enn ofisie Etiopien pou pran batem?
ESKI to anvi pran batem ek vinn enn disip Zezi? Boukou dimounn inn pran sa desizion-la parski zot kontan Bondie ek zot rekonesan anver Li. Anou get lexanp enn ofisie ki ti pe travay pou larenn l’Éthiopie.
2 Kan sa Etiopien-la ti konpran ki, dapre bann Lekritir, li ti bizin batize, deswit li ti pran batem. (Lir Zist. 8:27-31, 35-38.) Ki ti pous li pou fer sa? Pena dout ki li ti bien kontan Parol Bondie, parski li ti pe lir enn parti liv Izai pandan ki li ti pe ale dan so kales. Ek kan Filip ti koz ar li, sa Etiopien-la ti koumans ena enn gran rekonesans pou seki Zezi inn fer pou li. Me kifer li ti al Zerizalem? Parski li ti fini koumans ena lamour pou Zeova. Kouma nou konn sa? Li ti fek sorti Zerizalem kot li ti al ador Zeova. Sa ofisie-la kitfwa ti sanz so relizion ek ti koumans ador Zeova ar sel nasion ki ti vwe ar vre Bondie. Se so lamour pou Zeova ki ti pous li pou pran enn lot desizion inportan, setadir pran batem ek vinn enn disip Zezi.—Mat. 28:19.
3. Ki kitsoz kapav anpes enn kikenn pou pran batem? (Get lankadre “Ki Ena dan To Leker?”)
3 Lamour pou Zeova kapav pous twa pou pran batem. Me lamour kapav osi anpes twa pou fer sa. Kouma? Anou pran de-trwa lexanp. Kitfwa to bien kontan to bann fami ek to bann kamarad ki pa Temwin, ek to trakase parski to panse ki zot pou deteste twa si to pran batem. (Mat. 10:37, NW) Ouswa li posib ki to kontan sertin pratik ki Zeova deteste, ek kitfwa li difisil pou to abandonn sa bann labitid-la. (Ps. 97:10) Ouswa, kitfwa depi tipti to kontan selebre bann fet ouswa to kontan bann koutim ki ena enn lien ar fos relizion. Li posib ki sa rapel twa bann bon souvenir. Akoz sa, to kapav trouv sa difisil pou abandonn sa bann fet ek koutim ki Zeova pa kontan la. (1 Kor. 10:20, 21) Kestion ki to bizin poz tomem se: “Kisannla ouswa ki kitsoz mo plis kontan?”
KISANNLA NOU BIZIN PLIS KONTAN?
4. Ki bizin pous twa pou pran batem?
4 Avan ki to etidie Labib avek bann Temwin Zeova, kitfwa to ti deza bien kontan Labib ek to ti kontan Zezi. Ek asterla ki to’nn konn bann Temwin Zeova kitfwa to bien kontan pas letan avek zot. Pena dout ki to kontan ek to apresie sa bann bon kitsoz-la. Me sa pa vedir ki otomatikman to lamour pou sa bann kitsoz-la pou pous twa pou vwe to lavi ar Zeova ek pran batem. Rezon prinsipal ki bizin pous twa pou pran batem se to lamour pou Zeova. Kan to kontan Zeova plis ki ninport ki kitsoz, to pa pou les nanye ni personn anpes twa servi Li. To lamour pou Zeova pou pous pou twa pran batem ek pou osi ed twa res fidel ar Li, mem apre to batem.
5. Ki nou pou examine dan sa lartik-la?
5 Zezi ti dir ki nou bizin kontan Zeova avek tou nou leker, tou nou nam, tou nou lespri, ek tou nou lafors. (Mark 12:30) Kouma nou kapav aprann kontan ek respekte Zeova sa kantite-la? Kan nou reflesi lor lamour ki Zeova ena pou nou, sa pous nou pou kontan Li. (1 Zan 4:19) Kan to koumans ena sa kalite lamour-la pou Zeova, ki lezot santiman sa pou fer twa gagne ek ki sa pou pous twa pou fer?b
6. Dapre Romin 1:20, kouma nou kapav aprann konn Zeova?
6 Aprann konn Zeova gras-a so kreasion. (Lir Romin 1:20; Rev. 4:11) Medit lor gran sazes Zeova kan to reflesi lor fason ki Li’nn kree bann plant ek bann zanimo. Reflesi lor fason extraordiner ki Zeova inn kree nou lekor. (Ps. 139:14) Reflesi osi lor pwisans ki Zeova inn met dan nou soley. Anplis, nou soley se zis enn zetwal parmi bann milyar zetwal ki existe.c (Iza. 40:26) Kan to medit lor sa bann kitsoz-la, to respe pou Zeova pou ogmante. To kone ki Zeova ena sazes ek ki Li pwisan, me sa li pa ase pou to vinn so kamarad. Pou ki to lamour pou Zeova vinn pli for, to bizin aprann konn Li pli bien.
7. Pou ki to lamour pou Zeova vinn pli for, ki kitsoz to bizin sir?
7 To bizin sir ki Zeova vremem kontan twa. Eski to trouv sa difisil pou krwar ki Kreater lesiel ek later konn twa personelman ek ki Li gagn to traka? Si to pans koumsa, pa bliye ki Zeova “pa lwin ar sakenn parmi nou.” (Zist. 17:26-28) Zeova “examinn tou bann leker” ek Li promet ki “si to rod Li, Li pou les twa trouv Li.” (1 Kro. 28:9) An realite, si to pe etidie Labib azordi se parski Zeova “finn atir twa ver” Li. (Zer. 31:3) Plis to ogmant to rekonesans pou tou seki Zeova inn fer pou twa, plis to lamour pou Li pou grandi.
8. Kouma to kapav montre Zeova ki to kontan Li?
8 Enn fason ki to montre ki to kontan Zeova se kan to priye Li. To lamour pou Zeova pou grandi kan to dir Li tou seki trakas twa ek to remersie Li pou tou seki Li fer pou twa. Anplis, kan to trouve kouma Li reponn to bann lapriyer, to lamitie avek Zeova pou vinn pli for. (Ps. 116:1) To pou sir ki Li konpran twa. Me pou to vinn pros ar Zeova, to bizin konpran so fason panse. To bizin osi kone ki kitsoz Li anvi to fer. Sel fason pou to konn sa se kan to etidie so Parol, Labib.
Meyer fason pou vinn pros ar Bondie ek pou kone seki Li anvi nou fer, se kan nou etidie Labib (Get paragraf 9)e
9. Kouma to kapav montre ki to kontan Labib?
9 Aprann kontan Parol Bondie, Labib. Se zis dan Labib ki to pou aprann laverite lor Zeova ek lor proze ki Li ena pou twa. To montre ki to kontan Labib kan to lir li toulezour, kan to prepar bien to letid, ek kan to met an pratik seki to pe aprann. (Ps. 119:97, 99; Zan 17:17) Eski to ena enn program lektir Labib personel? Eski to swiv bien to program ek to fer sir ki to lir Labib toulezour?
10. Ki kitsoz to kapav trouve zis dan Labib?
10 Labib rakont zistwar lavi Zezi ek se bann dimounn ki’nn frekant li personelman ki’nn ekrir sa bann zistwar-la. Se zis dan Labib tousel ki to pou trouv sa. Se sel liv ki rakont dan enn fason exakt seki Zezi inn fer pou twa. Kan to aprann seki Zezi inn dir ek fer, sa pou pous twa pou vinn so kamarad.
11. Kouma to kapav aprann kontan Zeova?
11 Aprann kontan Zezi lerla to lamour pou Zeova pou grandi. Zezi inn imit bann kalite so Papa dan enn fason parfe. (Zan 14:9) Alor, plis to aprann konn Zezi, plis to pou konpran ek kontan Zeova. Par exanp, reflesi lor konpasion ki Zezi ti ena pou bann dimounn mizer, malad, ek feb, alor ki boukou ti mepriz sa bann dimounn-la. Reflesi osi lor bann konsey pratik ki li donn twa ek kouma to lavi kapav ameliore si to met zot an pratik.—Mat. 5:1-11, NW; 7:24-27.
12. Kan to aprann konn Zezi pli bien, ki kitsoz sa pou pous twa pou fer?
12 To lamour pou Zezi pou grandi si to medit lor sakrifis ki li’nn fer pou ki nou gagn pardon nou bann pese. (Mat. 20:28) Kan to konpran ki Zezi inn aksepte donn so lavi pou twa, sa kapav pous twa pou repanti ek pou rod pardon Zeova. (Zist. 3:19, 20, NW; 1 Zan 1:9) Plis to kontan Zezi ek Zeova, plis to pou santi twa atire ar bann dimounn ki kontan Zezi ek Zeova zot osi.
13. Ki Zeova kapav donn twa?
13 Aprann kontan bann dimounn ki kontan Zeova. To fami ek to bann kamarad ki pa Temwin kitfwa pa pou konpran kifer to pe anvi vwe to lavi ar Zeova. Kitfwa zot pou anpes twa servi Zeova. Me Zeova pou ed twa ek Li pou donn twa enn fami spiritiel. Si to res pros ar bann frer ek ser, to pou gagn lamour ek soutien ki to bizin. (Mark 10:29, 30; Ebre 10:24, 25) Avek letan, kitfwa bann manb to fami pou koumans swiv bann prinsip Zeova ek servi Li ansam ar twa.—1 Pier 2:12, NW.
14. Ki to’nn aprann lor bann prinsip Zeova dan 1 Zan 5:3?
14 Aprann kontan ek met an pratik bann prinsip Zeova. Avan ki to’nn aprann konn Zeova, kitfwa to ti ena to bann prop prinsip. Me asterla to rann twa kont ki bann prinsip Zeova pli bon. (Ps. 1:1-3; lir 1 Zan 5:3.) Reflesi lor bann konsey ki Labib donn bann mari, bann fam, bann paran, ek bann zanfan. (Efe. 5:22–6:4, NW) Kan to’nn met sa bann konsey-la an pratik, eski to’nn trouv to lavi fami ameliore? Eski to’nn vinn enn pli bon dimounn kan to’nn obeir bann prinsip Zeova ek swazir bien to bann kamarad? Eski to pli ere? (Prov. 13:20; 1 Kor. 15:33, NW) Sirman to pou reponn wi pou sa bann kestion-la!
15. Ki to kapav fer si to pa kone kouma pou aplik bann prinsip Labib?
15 Parfwa, to kapav gagn difikilte pou kone kouma pou aplik bann prinsip Labib ki to pe aprann. Se pou sa rezon-la ki Zeova servi so lorganizasion pou donn twa bann piblikasion ki kapav ed twa pou fer diferans ant seki bon ek seki pa bon. (Ebre 5:13, 14) Kan to lir ek etidie sa bann piblikasion-la, to pou trouv bann konsey bien presi ek pratik, ek to pou anvi form parti dan lorganizasion Zeova.
16. Dan ki fason Zeova inn organiz so pep?
16 Aprann kontan ek soutenir lorganizasion Zeova. Zeova organiz so pep ek Li rasanble zot dan bann lasanble lokal. Li’nn osi etabli so Garson, Zezi, kouma zot sef. (Efe. 1:22, NW; 5:23, NW) Zezi inn donn enn ti group Kretien ki ena lesperans pou al dan lesiel responsabilite pou diriz travay ki li anvi nou fer azordi. Zezi ti apel sa group-la “lesklav fidel ek saz.” Avek tou zot leker, zot asim zot responsabilite pou ed twa vinn pros ar Zeova ek pou protez to relasion avek Li. (Mat. 24:45-47, NW) Enn fason ki lesklav fidel ek saz pran twa swin se kan li etabli bann zom ki kalifie pou vinn bann ansien. Sa bann zom-la kapav ed twa ek protez twa. (Iza. 32:1, 2; Ebre 13:17, NW; 1 Pier 5:2, 3) Bann ansien dispoze pou fer tou seki zot kapav pou twa, pou rekonfort twa, ek pou ed twa vinn pli pros ar Zeova. Me pli inportan, zot ed twa pou ansegn lezot lor Zeova.—Efe. 4:11-13.
17. Dapre Romin 10:10, 13, 14, kifer eski nou ansegn lezot lor Zeova?
17 Ed lezot pou aprann kontan Zeova. Zezi ti demann so bann disip pou ansegn lezot lor Zeova. (Mat. 28:19, 20) To kapav obeir sa komannman-la zis parski to oblize fer li. Me amezir ki to lamour pou Zeova grandi, to pou ena mem santiman ki lapot Pier ek Zan ki ti dir: “Nou pa kapav aret koz lor bann kitsoz ki nou finn trouve ek tande.” (Zist. 4:20, NW) Kan nou ed enn kikenn pou konn Zeova, sa rann nou bien zwaye. Mazinn lazwa ki Filip ti gagne kan li ti ed enn Etiopien pou konn laverite ek pou pran batem! Kan to imit lexanp Filip ek to obeir komannman pou al prese, to montre ki to anvi vinn enn Temwin Zeova. (Lir Romin 10:10, 13, 14, NW.d) Kan sa moman-la arive, parey kouma sa Etiopien-la, sirman to pou demann tomem: “Ki anpes mwa resevwar batem?”—Zist. 8:36.
18. Ki nou pou examine dan prosin lartik?
18 Desizion pli inportan ki to kapav pran dan to lavi, se pran batem. Sa desizion-la telman inportan ki to bizin bien reflesi lor seki sa inplike. Ki to bizin kone konsernan batem? Ki to bizin fer avan ek apre to batem? Dan prosin lartik, nou pou reponn sa bann kestion-la.
KANTIK 2 Zeova Se To Nom
a Sertin kontan Zeova, me zot pa sir si zot pare pou pran batem ek pou vinn enn Temwin Zeova. Si to dan sa sitiasion-la, sa lartik-la pou donn twa bann konsey pratik ki pou ed twa progrese pou pran batem.
b Sak dimounn diferan, alor tou dimounn pa pou aplik bann sigzesion ki ena dan sa lartik-la dan mem lord.
c To pou trouv bann lezot lexanp dan brosir La vie a-t-elle été créée ? ek brosir Cinq questions à se poser sur l’origine de la vie.
d Romin 10:10, 13, 14: “10 Parski avek so leker, enn kikenn montre lafwa pou lazistis, me avek so labous li fer deklarasion piblik pou gagn lavi sov. 13 Parski ‘tou seki apel nom Zeova pou sove.’ 14 Me, kouma eski zot pou apel enn kikenn an ki zot pena lafwa? Ek kouma eski zot pou ena lafwa an enn kikenn, alor ki zame zot pa finn tann koz lor li? Ek kouma zot pou tande si personn pa prese?”
e DESKRIPSION ZIMAZ: Enn ser pe donn enn trak enn madam kan li pe aste legim.