Paran​—Ed To Zanfan pou Kontan Zeova

1-2. Kifer sertin prinsip Labib vinn pli inportan pou nou kan nou sitiasion sanze?

KAN enn koup marye, souvan enn ansien fer enn diskour lor maryaz. Sa koup-la deza konn bann prinsip ki ena dan sa diskour-la. Me asterla, sa bann prinsip-la vinn pli inportan pou zot. Kifer? Parski asterla, zot pou bizin aplik sa bann prinsip-la dan zot lavi maryaz.

² Li parey osi kan enn koup vinn paran. Pandan boukou lane, kitfwa zot finn tann bann diskour ki explike kouma pou elve bann zanfan. Me asterla, sa bann prinsip-la vinn pli inportan pou zot parski zot pou ena zot prop zanfan. Se enn gran responsabilite! Alor, kan nou sitiasion sanze, sertin prinsip Labib vinn pli inportan pou nou. Se pou sa rezon-la ki bann serviter Zeova lir Labib, ek parey kouma bann lerwa dan ansien Izrael, zot medit lor la “toulezour” zot lavi.​—Det. 17:19.

 3. Ki nou pou examine dan sa lartik-la?

³ Paran, to ena enn parmi bann pli gran privilez ki enn Kretien ena, setadir pou ansegn to zanfan pou konn Zeova. Selman, fode pa to zis donn to zanfan bann linformasion lor Bondie. To bizin ed li pou kontan Zeova. Ki to kapav fer pou ed to zanfan pou kontan Zeova? Dan sa lartik-la, nou pou get kat prinsip ki kapav ed bann paran. (2 Tim. 3:16) Nou pou gete osi kouma sertin paran Kretien inn gagn bann bienfe kan zot inn swiv sa bann prinsip-la.

 4. Sit enn prinsip ki kapav ed bann paran pou ansegn zot zanfan pou kontan Zeova. (Zak 1:5)

⁴ Prinsip 1: Rod Zeova so direksion. Demann Zeova lasazes ki to bizin pou ki to kapav ed to zanfan pou kontan Li. (Lir Zak 1:5.) Limem ki donn bann pli bon konsey ki ena. Anou get de rezon kifer. Premierman, Zeova ena plis lexperyans ki ninport ki paran. (Ps. 36:9) Ek deziemman, nou touletan gagn bann bienfe ar so bann konsey.​—Iza. 48:17.

 5. (a) Kouma lorganizasion Zeova ed bann paran? (b) Dan sa video-la, ki to’nn aprann lor fason ki Frer ek Ser Amorim inn elve zot zanfan?

⁵ Atraver Labib ek so lorganizasion, Zeova donn bann paran boukou konsey pou ki zot kapav ansegn zot zanfan pou kontan Li. (Mat. 24:45) Par exanp, to kapav trouv boukou konsey pratik dan seri lartik « De l’aide pour les familles, » ki ti aparet pandan plizir lane dan magazinn Leve! an Franse. Azordi, to kapav trouv sa seri lartik-la lor nou sit Internet osi. Lor jw.org, ena osi boukou video ki kapav ed bann paran pou swiv bann konsey Zeova kan zot pe elve zot bann zanfan.b​—Prov. 2:4-6.

 6. Ki kitsoz enn papa inn dir lor led ki li ek so madam inn gagne ar lorganizasion Zeova?

⁶ Boukou paran dir ki zot bien rekonesan pou led ki Zeova donn zot atraver so lorganizasion. Enn papa ki apel Joe, dir: “Li pa fasil pou elve trwa zanfan dan laverite. Mo madam ek mwa, nou touletan priye Zeova pou ed nou. Ek souvan nou’nn remarke ki enn lartik ouswa enn video inn sorti dan bon moman pou ed nou pou sirmont enn difikilte ki nou ti pe gagne. Nou touletan kont lor bann konsey Zeova.” Joe ek so madam inn trouve ki sa bann lartik-la ek sa bann video-la pe ed zot zanfan pou vinn pros ar Zeova.

 7. Kifer li bien inportan ki bann paran fer zot best pou zot vinn enn lexanp pou zot bann zanfan? (Romin 2:21)

⁷ Prinsip 2: Vinn enn lexanp pou to bann zanfan. Bann zanfan get bien zot bann paran ek souvan zot rod fer parey kouma zot. Biensir, okenn paran pa parfe. (Rom. 3:23) Kanmem sa, bann paran bizin fer zot best pou vinn enn bon lexanp pou zot bann zanfan. (Lir Romin 2:21.) Konsernan so bann zanfan, enn papa dir: “Zot kouma bann leponz ki absorb tou kitsoz. . . . Ek zot pou dir nou kan nou pa fer bann kitsoz ki nou ansegn zot pou fer.” Alor, si nou anvi ki nou zanfan kontan Zeova, zot bizin kapav trouve ki noumem nou bien kontan Zeova.

8-9. Ki nou kapav aprann ar lexanp Andrew ek Emma?

⁸ Ena plizir fason ki bann paran kapav ansegn zot zanfan pou kontan Zeova. Enn frer ki ena 17 an ek ki apel Andrew, dir: “Mo bann paran inn touletan ansegn mwa ki lapriyer bien inportan. Toule aswar, mo papa ti priye avek mwa, mem si mo ti fini fer mo lapriyer. Nou bann paran ti touletan dir nou ki nou kapav koz ar Zeova ninport ki kantite fwa nou anvi. Akoz sa, lapriyer bien inportan pou mwa. Azordi, li fasil pou mo priye Zeova, ek mo santi ki Zeova enn Papa ki bien kontan mwa.” Paran, zame pa bliye ki to lamour pou Zeova kapav ed to zanfan pou kontan Zeova.

⁹ Anou get lexanp Emma. Kan so papa ti kit zot, li ti ena boukou det, ek so mama ti bizin pey sa bann det-la. Emma dir: “Souvan mama pa ti ena ase kas, me li ti touletan explik nou kouma Zeova pran swin so bann serviter. Ek mo ti trouve, par fason ki li ti viv, ki li ti ena konfians ki Zeova ti pou pran li swin. Mama ti fer seki li ti ansegn nou.” Ki leson nou aprann? Bann paran kapav ansegn zot zanfan par zot lexanp, mem kan zot sitiasion difisil.​—Gal. 6:9.

10. Kan eski bann paran Izraelit ti ansegn zot zanfan? (Deteronom 6:6, 7)

¹⁰ Prinsip 3: Koz ar to zanfan regilierman. Zeova ti donn bann Izraelit lord pou zot ansegn zot bann zanfan regilierman. Zot ti bizin ed zot bann zanfan pou aprann konn Zeova. (Lir Deteronom 6:6, 7) Sak zour, bann paran Izraelit ti ena plizir lokazion pou ansegn zot zanfan pou kontan Zeova. Par exanp, enn zenn garson Izraelit kitfwa ti pas boukou letan pou ed so papa dan karo. Ek so ser kitfwa ti pas boukou letan pou ed zot mama pou koud ek pou fer louvraz. Kan bann paran ek bann zanfan ti pe travay ansam, zot ti kapav koz lor plizir size inportan. Par exanp, zot ti kapav koz lor kouma Zeova ti bon anver zot ek kouma Li ti pe ed zot fami.

11. Ki moman bann paran Kretien bizin koz avek zot bann zanfan?

¹¹ Azordi, lavi inn sanze. Dan boukou pei, bann paran pa pas boukou letan avek zot bann zanfan. Bann paran kitfwa bizin al travay ek bann zanfan kitfwa bizin al lekol. Alor, bann paran bizin rod bann lokazion pou koz ar zot bann zanfan. (Efe. 5:15, 16; Fil. 1:10) Ek enn moman ki zot kapav pas ansam se pandan zot ladorasion an fami. Enn zenn garson ki apel Alexander, dir: “Mo papa ti touletan organiz nou ladorasion an fami. Li pa ti les nanye anpes nou fer nou ladorasion, ek nou ti pran letan pou koze apre.”

12. Ki kitsoz enn sef fami bizin rapel kan li pe fer so ladorasion an fami?

¹² Si to enn sef fami, kouma to kapav fer to ladorasion an fami vinn pli agreab? To kapav, par exanp, etidie liv Viv Ere pou Touletan! avek to bann zanfan. Sa liv-la kapav ed twa pou ena bann bon konversasion avek zot. Si to anvi ki zot koz avek tou zot leker, fode pa to servi to ladorasion an fami pou kritik zot ouswa pou koriz zot. Ek fode pa to ankoler si zot dir enn kitsoz ki pa an-akor avek Labib. Okontrer, to bizin kontan ki zot onet avek twa ek to bizin ankouraz zot pou exprim zot santiman. To pou kapav ed to zanfan si to kone seki li ena dan so leker.

13. Ki lezot lokazion bann paran ena pou ed zot zanfan pou vinn pros ar Zeova?

¹³ Paran, rod bann lokazion toulezour pou to ed to zanfan pou vinn pros ar Zeova. Fode pa to ansegn zot lor Zeova zis kan to fer zot letid. Enn mama ki apel Lisa, dir: “Nou servi tou seki ena otour nou dan kreasion, pou ansegn nou bann zanfan lor Zeova. Par exanp, kan nou lisien ti fer enn kitsoz ki fer zot riye, nou ti dir zot ki sa montre ki Zeova Li enn Bondie ki ere, ek ki Li anvi ki nou ere nou osi.”

14. Kifer li inportan ki bann paran ed zot zanfan pou swazir bien zot bann kamarad? (Proverb 13:20)

¹⁴ Prinsip 4: Ed to zanfan pou swazir bien so bann kamarad. Labib dir ki nou bann kamarad kapav ena enn bon linflians ouswa enn move linflians lor nou. (Lir Proverb 13:20.c) Paran, eski to konn bann kamarad to bann zanfan? Eski to’nn zwenn zot ek pas letan avek zot? Ki to kapav fer pou ki to bann zanfan ena bann kamarad ki kontan Zeova? (1 Kor. 15:33) To kapav ed to zanfan pou ena bann bon kamarad, kan to invit bann dimounn ki ena enn bon lamitie avek Zeova pou fer bann laktivite ansam avek to fami.​—Ps. 119:63.

15. Kouma bann paran kapav ed zot zanfan pou ena bann bon kamarad?

¹⁵ Anou get lexanp enn papa ki apel Tony. Li explike kouma li ek so madam inn ed zot bann zanfan pou ena bann bon kamarad. Tony dir: “Pandan plizir lane, mo madam ek mwa nou finn invit plizir frer ek ser ki ena diferan laz kot nou. Nou ti invit zot pou enn repa ek pou nou ladorasion an fami. Sa ti enn bon fason pou aprann konn bann ki kontan Zeova ek ki servi Li avek lazwa. Nou ti invit bann responsab sirkonskripsion, bann misioner, ek lezot frer ek ser pou res kot nou. Nou bann zanfan inn aprann boukou ar zot lexperyans, zot lespri sakrifis, ek bann zefor ki zot inn kontign fer pou servi Zeova. Tousala inn ed nou bann zanfan pou vinn pros ar Zeova.” Alor paran, kontign ed to zanfan pou ena bann bon kamarad.

16. Ki to pou fer si to zanfan dir twa ki li pa anvi servi Zeova?

¹⁶ Me ki to pou fer si, malgre tou to bann zefor, enn parmi to bann zanfan dir twa ki li pa pou servi Zeova? Fode pa to panse ki to pa enn bon paran. Zeova inn donn nou tou, mem to bann zanfan, liberte pou swazir si zot pou servi Li ouswa non. Si to zanfan desid pou kit Zeova, pa perdi lespwar! Kitfwa enn zour li kapav retourne. Rapel parabol garson ki ti perdi. (Lik 15:11-19, 22-24) Mem si sa garson-la ti fer boukou move kitsoz, alafin li ti retourne. Me sertin kapav dir: “Se zis enn zistwar sa. Eski mo zanfan kapav vremem retourn ar Zeova?” Wi, li kapav! Anou get lexanp enn zenn ki apel Elie.

17. Kouma lexanp Elie kapav ankouraz twa?

¹⁷ Konsernan so bann paran, Elie dir: “Zot ti fer zot best pou ansegn mwa pou kontan Zeova ek so Parol, Labib. Selman, kan mo ti vinn adolesan, mo ti koumans rebel kont zot.” Elie ti koumans fer bann move kitsoz an sekre. So bann paran ti esey ed li pou res pros ar Zeova, me li pa ti ekout zot. Apre ki li ti kit lakaz, Elie ti koumans amenn enn move lavi. Kanmem sa, parfwa Elie ti koz lor Labib avek enn parmi so bann kamarad. Elie dir: “Plis mo ti koz lor Zeova avek mo kamarad, plis mo ti pans Zeova. Tigit-tigit, lagrin laverite ki mo bann paran ti fer boukou zefor pou plant dan mo leker, ti koumans pouse.” Plitar, Elie ti retourn ver Zeova.d Sirman so bann paran ti bien kontan ki zot ti fer zefor pou ansegn li depi tipti pou kontan Zeova!​—2 Tim. 3:14, 15.

18. Kouma to bizin konsider bann paran ki fer boukou zefor pou ansegn zot zanfan pou kontan Zeova?

¹⁸ Paran, Zeova inn donn twa enn zoli privilez, setadir pou elve enn nouvo zenerasion bann serviter Zeova. (Ps. 78:4-6) Se pa enn travay ki fasil, ek nou felisit twa pou bann gro zefor ki to pe fer pou ed to zanfan! Si to kontign fer to best pou ed to zanfan pou kontan Zeova ek pou obeir Li, to kapav sir ki to pe fer Zeova plezir.​—Efe. 6:4.