Ki zot Oui vedir Oui

 1. Ki Jésus ti dire concernant bann serment, ek kifer?

EN GENERAL, bann vrai chretien pa bizin faire serment parski zot obeir seki Jésus ti dire: “Ki zot Oui vedir Oui.” Li ti pé rod dire ki enn dimoune bizin tini so parole. Avant ki Jésus ti donne sa l’ordre-la, li ti dire: “Pa faire serment ditou.” Li ti dire sa pou condamne l’habitude ki beaucoup dimoune ena pou faire bann serment toulé-jour dan zot conversation. Zot faire serment lor tou kitsoz sans mem ki zot ena l’intention pou faire seki zot dire. Kan zot dire kitsoz ki “en plus” ki enn simple Oui ou-soit Non, sa montré ki pa kapav faire zot vrai-mem confiance. Sa montré aussi ki zot enba l’influence “sa kikenn ki mauvais-la.”​—Lire Matthieu 5:33-37.

 2. Expliké kifer li pa touletan mauvais pou faire serment.

² Eski bann parole Jésus vedir ki li mauvais pou faire bann serment? Non. Kifer? Parski, couma nou finn aprann dan lartik avant, Jéhovah ek so serviteur fidele, Abraham, ti faire bann serment dan bann l’occasion important. Ek aussi, la Loi Bondié ti demann bann Israélite pou faire serment pou reglé certain probleme. (Ex. 22:10, 11; Nomb. 5:21, 22) Alors, kitfois li necessaire pou enn chretien faire serment pou dire la verité kan li pé temoigné devant la cour. Ou-soit, dan bann l’occasion bien rare, enn chretien kapav trouve sa necessaire pou faire enn serment pou faire enn kitsoz, ou-soit ki li pé dire la verité pou reglé enn probleme. En realité, kan par enn serment, grand pretre ti demann Jésus pou reponn, Jésus pa ti refusé, li ti dire la verité devant Sanhédrin. (Mat. 26:63, 64) Mais jamais Jésus pa ti bizin faire serment ar personne. Kan-mem, pou montré ki so message ti vrai, souvent li ti commence so bann parole par: “Oui, vrai-mem [litteralement: “Vrai-mem, vrai-mem,” note] mo dire zot.” (Jean 1:51; 13:16, 20, 21, 38) Anou guetté seki nou kapav aprann encore ar l’exemple Jésus, Paul ek lezot dimoune ki zot Oui ti vedir Oui.

 3. Ki promesse Jésus ti faire dan enn la priere, ek couma so Papa dan le ciel ti reponn li?

³ “Guetté! Mo finn vini . . . pou faire to volonté, ah mo Bondié.” (Héb. 10:7) Jésus ti dire sa bann parole important-la kan li ti presente li-mem devant Bondié pou faire tou seki ti annoncé lor Descendance ki Bondié ti promette, ek ti mem laisse Satan ‘blesse li dan so talon.’ (Gen. 3:15) Okenn lezot dimoune jamais pa finn porte-li volontaire pou prend enn grand responsabilité coumsa. Depuis le ciel, Jéhovah ti dire ki Li ena enn confiance total dan so Garson, mem si Li pa ti demann Jésus faire serment pou tini so parole.​—Luc 3:21, 22.

 4. Ziska ki point Jésus inn faire ki so Oui vedir Oui?

⁴ Jésus ti touletan faire seki li ti dire kan li ti faire ki so Oui vedir Oui. Li pa ti laisse nanyé detourne so l’attention ar mission ki so Papa ti donne li. Li ti preche la bonne nouvelle lor Royaume Bondié ek li ti faire bann disciple parmi tou bann dimoune ki Bondié ti attire vers li. (Jean 6:44) La Bible decrire ziska ki point Jésus ti dire la verité par sa bann parole ki nou bien koné-la: “N’importe ki quantité promesse ki Bondié inn faire, zot inn vinn Oui par so moyen.” (2 Cor. 1:20) Li clair ki Jésus li-mem pli grand l’exemple enn kikenn ki finn tini promesse ki li ti faire envers Bondié. Asterla, anou examine l’exemple enn dimoune ki finn faire tou seki li kapav pou imite Jésus.

 5. Ki l’exemple Paul inn laisse nou?

⁵ “Ki mo bizin faire Seigneur?” (Actes 22:10) C’est seki Paul, ki avant ti appel Saul, ti dire pou montré ki li ti accepté direction ki Jésus Christ ti donne li. Dan enn vision, Jésus ti demann li pou arrete persecute so bann disciple. Apré ki li ti gagne sa vision-la, Saul ti repenti, li ti change so conduite, li ti prend bapteme ek li ti accepté mission special ki Jésus ti donne li pou rann temoignage lor Li dan tou nation. Depuis sa lepok-la, Paul ti contigne appel Jésus so “Seigneur,” ek li ti obeir li ziska la fin so la vie lor la terre. (Actes 22:6-16; 2 Cor. 4:5; 2 Tim. 4:8) Paul pa ti pareil couma sa bann dimoune ar ki Jésus ti dire: “Kifer zot appel moi ‘Seigneur! Seigneur!’ mais zot pa faire bann kitsoz ki mo dire?” (Luc 6:46) Oui, Jésus attann ki tou bann ki accepté li couma zot Seigneur, tini zot parole, pareil couma l’apotre Paul.

6, 7. (a) Kifer Paul ti change plan ki li ti faire pou ré-visite Corinthe, ek kifer bann ki ti critik li pa ti ena raison pou mette so parole en doute? (b) Couma nou bizin considere bann ki finn etabli pou prend la tête parmi nou?

⁶ Avek zele, Paul ti preche message lor Royaume Bondié partout dan l’ouest l’Asie ek en Europe. Li ti etabli beaucoup congregation ek li ti ré-visite zot. Dan certain l’occasion, li ti trouve necessaire pou faire serment ki seki li ti ecrire, ti vrai. (Gal. 1:20) Kan certain dan Corinthe ti dire ki pa kapav faire Paul confiance, li ti ecrire sa bann parole-la pou defann li: “Aussi vrai ki Bondié Li fidele, parole ki nou finn annonce zot, li pa Oui ek pourtant Non.” (2 Cor. 1:18) Kan Paul ti ecrire sa, li ti fini quitte Éphèse ek li ti pé traverse Macédoine pou al Corinthe. Mais avant ki li ti decidé pou al Macédoine, li ti ena l’intention pou al direct Corinthe. (2 Cor. 1:15, 16) Mais, pareil couma sa arrive bann surveillant itinerant zordi, parfois zot bizin change zot programme. Zot pa faire sa bann changement-la pou bann raison personnel, egoïste, mais a cause bann situation urgent. Dan cas Paul, kan li ti retarde so visite dan Corinthe, c’est congregation-mem ki ti tire bann bienfait. Couma?

⁷ Enn tipé apré ki li ti faire plan pou al Corinthe, Paul ti gagne bann mauvais nouvelle. Li ti tann dire ki pa ti ena l’unité dan congregation Corinthe ek zot ti pé tolere l’immoralité. (1 Cor. 1:11; 5:1) Pou corrige sa situation-la, li ti ecrire so premier lettre congregation Corinthe kot li ti donne so bann frere bann conseil bien ferme. Lerla, au lieu ki li ti prend bateau dan Éphèse pou al direct Corinthe, Paul ti decidé pou donne zot le temps pou applik so bann conseil pou ki, kan li arrive la-bas, so visite kapav plus encourageant. Pou faire zot koné ki c’est a cause sa ki li ti change so bann plan, Paul ti ecrire dan so deuxieme lettre: “Mo prend Bondié couma temoin kont mo prop nâme ki c’est pou zot prop di-bien ki mo pa’nn vinn Corinthe.” (2 Cor. 1:23) Fodé jamais nou ressemblé bann dimoune ki ti critik Paul; au contraire, anou montré enn grand respé pou bann ki’nn etabli pou prend la tête dan congregation. La verité, c’est ki nou bizin imite Paul pareil couma li ti imite Jésus.​—1 Cor. 11:1; Héb. 13:7.

 8. Ki l’exemple Rébecca inn laisse nou?

⁸ “Mo d’accord pou allé.” (Gen. 24:58). C’est seki Rébecca ti dire so mama ek so frere pou montré ki li ti disposé pou quitte so lakaz sa jour-la-mem pou voyage 800 kilometre avek enn etranger, pou marié avek Isaac, garson Abraham. (Gen. 24:50-58) Kan Rébecca ti dire Oui, so Oui ti vedir Oui. Li ti vinn enn femme fidele pou Isaac ek li ti ena la crainte pou Bondié. Apré sa, toute longue so la vie, li ti reste enba bann la tente couma enn etranger dan la Terre promise. Jéhovah ti recompense li pou so fidelité kan li ti vinn enn parmi bann ancetre Jésus Christ, Descendance ki Bondié ti promette.​—Héb. 11:9, 13.

 9. Couma Ruth ti tini so parole?

⁹ “Non, mais nou pou retourne avek toi vers to peuple.” (Ruth 1:10) Ruth ek Orpa, deux veuve moabite ti contigne dire sa bann parole-la zot belle-mere Naomi, ki ti veuve li aussi, ek ki ti pé quitte Moab pou retourne Bethléhem. Finalement, apré ki Naomi ti suppliye zot pou retourne dan zot pays, Orpa ti allé, mais Ruth ti dire Non, ek so Non ti vedir Non. (Lire Ruth 1:16, 17.) Li ti reste attaché ar Naomi, li ti abandonne net so famille ek fausse religion ki li ti pé pratiké dan Moab. Li ti reste enn adorateur fidele Jéhovah, ek Jéhovah ti recompense li kan li ti vinn enn parmi sa cinq femme ki Matthieu ti mentionné dan la liste bann ancetre Jésus.​—Mat. 1:1, 3, 5, 6, 16.

10. Kifer Isaïe ti enn bon l’exemple pou nou?

¹⁰ “Ala mo la! Envoye moi.” (Is. 6:8) Avant ki Isaïe ti dire sa, dan enn vision extraordinaire, li ti trouve Jéhovah pé assize lor So trone lor temple Israël. Dan sa vision-la, Isaïe ti tann Jéhovah dire: “Kisannla ki mo pou envoyé, ek kisannla ki pou al pou nou?” Par sa bann parole-la, Jéhovah ti pé demandé kisannla pou vinn so porte-parole pou annonce So message ar So peuple rebelle. Isaïe ti accepté sa mission-la ek so Oui ti vedir Oui. Pendant plus ki 46 an, li ti servi avek fidelité couma enn prophete, li ti annonce bann message severe ki ti denonce bann dimoune, ek li ti annonce bann promesse extraordinaire concernant vrai l’adoration ki ti pou retabli.

11. (a) Kifer li important ki nou tini nou parole? (b) Cite l’exemple bann dimoune ki pa finn tini zot parole.

¹¹ Kifer Jéhovah finn faire ecrire sa bann recit-la pou nou dan so Parole? Eski li vrai-mem important ki nou Oui vedir Oui? La Bible averti nou ki bann dimoune ki “pa respecté zot l’engagement,” zot parmi bann ki “merite la mort.” (Rom. 1:31, 32) Pharaon l’Égypte, Tsidqiya le roi Juda, Ananias ek Sapphira, zot parmi bann mauvais l’exemple ki pa finn faire zot Oui vedir oui. Zot tou ti paye bien cher zot bann mauvais action. Zot mauvais l’exemple c’est enn l’avertissement pou nou.​—Ex. 9:27, 28, 34, 35; Ézék. 17:13-15, 19, 20; Actes 5:1-10.

12. Ki pou aide nou pou tini nou parole?

¹² Nou pé vive “dan bann dernier jour,” ek nou entouré ar bann dimoune ki “pa pou fidele” ki “pou faire coumadir zot attaché ar Bondié, mais zot pou trahir so pouvoir.” (2 Tim. 3:1-5) Autant ki possible, nou bizin evite bann mauvais frequentation coumsa. Nou bizin plutot frequente regulierement bann dimoune ki faire zeffort pou ki zot Oui vedir oui.​—Héb. 10:24, 25.

13. Ki Oui pli important enn disciple Jésus Christ kapav dire?

¹³ Promesse pli important ki enn dimoune kapav faire, c’est kan li voué so la vie ar Bondié. Dan trois l’occasion precis, bann ki renié zot-mem pou vinn disciple Jésus, ena possibilité pou dire Oui kan pose zot question concernant zot l’intention. (Mat. 16:24) Kan deux ancien faire enn ti reunion avek enn dimoune ki envie vinn enn proclamateur non-baptisé, zot demann li sa question-la: “Eski vrai-mem ou envie vinn enn Témoin de Jéhovah?” Plitar, kan sa dimoune-la inn faire plus progré ek demann pou prend bapteme, bann ancien pou demann li pendant enn bann reunion ki zot pou faire avek li: “Eski ou-mem, ou finn voué ou la vie ar Jéhovah dan la priere?” Finalement, jour bapteme, chaque candidat bapteme bizin reponn sa question-la: “Lor base sacrifice Jésus Christ, eski ou finn repenti ar ou bann peché ek eski ou finn voué ou la vie ar Jéhovah pou faire so volonté?” Alors, devant bann temoin, sa bann candidat bapteme-la dire Oui pou montré ki zot respecté promesse ki zot faire pou servi Bondié pou touletan.

14. Ki bann question li bon nou pose-nou-mem souvent?

¹⁴ Mem si ou fek prend bapteme ou-soit ou pé servi Bondié depuis plusieurs dizaine l’année, ou bizin examine-ou-mem souvent ek pose-ou bann question couma par exemple: ‘Eski pareil couma Jésus Christ, mo pé contigne respecté Oui pli important ki mo finn dire? Eski mo pé contigne obeir Jésus kan mo preché ek aide bann dimoune pou vinn so bann disciple ek faire sa vinn priorité dan mo la vie?’​—Lire 2 Corinthiens 13:5.

15. Dan ki domaine ou la vie li important ki ou Oui vedir oui?

¹⁵ Respecté voeu ki nou finn faire, vedir ki nou bizin aussi reste fidele dan lezot kitsoz important. Par exemple: Eski ou marié? Alors, contigne respecté sa voeu important ki ou finn faire pou content ek pou prend soin ou conjoint. Eski ou finn signe enn contrat pou enn business ou-soit ou finn rempli enn forme pou enn privilege theocratik? Alors, respecté ou bann l’engagement ek seki ou finn promette. Eski ou finn accepté l’invitation pou mangé kot enn dimoune ki pena beaucoup moyen? Alors, pa change l’idée si enn lot dimoune faire ou enn l’invitation ki parette pli interessant. Ou-soit eski ou finn promette enn dimoune ki ou finn zwenn dan predication pou retourné ek pou aide li lor plan spirituel? Alors, faire tou seki ou kapav pou ki ou Oui vedir Oui, ek Jéhovah pou beni ou ministere.​—Lire Luc 16:10.

16. Si nou pa finn reussi tini nou parole, ki nou kapav faire?

¹⁶ La Bible dire ki en tant ki bann dimoune imparfait, “souvent nou faire erreur,” surtout avek nou la langue. (Jacq. 3:2) Ki nou bizin faire si nou realisé ki nou pa finn reussi tini nou parole? Dan la Loi ki Bondié ti donne peuple Israël, ti ena enn disposition pou enn dimoune gagne pardon, si li ti coupable parski li’nn “kozé avek so la levre sans reflechi.” (Lév. 5:4-7, 11) Zordi aussi ena enn disposition pou bann chretien ki finn faire enn peché coumsa. Si nou confesse sa peché-la avek Jéhovah, Li pou pardonne nou avek misericorde, a travers nou Grand Pretre, Jésus Christ. (1 Jean 2:1, 2) Selman, pou nou contigne gagne faveur Bondié, nou bizin faire bann action ki montré ki nou finn repenti. Sa impliké ki nou bizin arrete pratik sa peché-la. Nou bizin aussi faire tou seki nou kapav pou repare n’importe ki di-tort ki nou finn faire parski nou finn kozé sans reflechi. (Prov. 6:2, 3) Bien sur, li pli bon ki nou pa faire bann promesse ki nou pa pou kapav tini.​—Lire Ecclésiaste 5:2.

17, 18. Ki l’avenir extraordinaire pé attann tou bann ki pé faire tou seki zot kapav pou ki zot Oui vedir Oui?

¹⁷ Enn l’avenir extraordinaire pé attann tou bann adorateur Jéhovah ki faire zeffort pou ki zot Oui vedir Oui! Pou bann 144,000 chretien oint, c’est enn la vie immortel ki pé attann zot dan le ciel, kot “zot pou regne couma bann le roi avek [Jésus] pendant mille an” dan so Royaume. (Rév. 20:6) Plusieurs million lezot dimoune pou gagne bann bienfait dan enn paradis lor la terre, kan Royaume Christ pou dirigé. Zot pou gagne l’aide ki bizin pou vinn parfait lor plan mental ek physik.​—Rév. 21:3-5.

¹⁸ Si nou reste fidele pendant l’epreuve final a la fin Regne mille an Jésus, jamais nou pa pou ena okenn raison pou doute parole n’importe kisannla. (Rév. 20:7-10) Tou bann Oui pou vedir Oui, ek tou bann Non, Non. Tou bann ki pou vive lor la terre dan sa lepok-la pou imite dan enn fason parfait nou “Bondié la verité,” Jéhovah.​—Ps. 31:5.