Kifer Nou Bizin “Kontign Veye”?

 1. Servi enn lexanp pou explike kifer li inportan ki nou pran kont ler ek seki pe arive otour nou. (Get zimaz dan koumansman lartik.)

LASANBLE pre pou koumanse. Frer ki fer prezidan mont lor lestrad ek swet zot tou bienveni. Lamizik pre pou koumanse. Lasistans kone ki zot bizin asize. Zot anvi ekout sa zoli lamizik-la ek zot pe atann pou ekout bann diskour. Me kitfwa ena sertin pa pran kont prezidan-la ouswa pa rann zot kont ki lamizik pe zwe. Alor zot pa realize ki lasanble pre pou koumanse, ek zot ankor pe mars-marse ouswa pe koz avek zot bann kamarad. Sa sitiasion-la montre nou seki kapav arive si nou pa pran kont ler ouswa seki pe arive otour nou. Se enn leson bien inportan pou nou parski biento pou ena enn pli gran levennman ki pou koumanse, ek nou bizin prepar nou pou sa. Ki sa levennman-la sa?

 2. Kifer Zezi ti dir so bann disip “kontign veye”?

² Zezi Kris ti averti so bann disip konsernan linportans pou res lor zot gard ek pou prepar zot pou “konklizion sa sistem-la.” Li ti dir zot: “Kontign fer atansion, kontign veye, parski zot pa kone kan letan fixe pou arive.” Apre sa, li ti dir zot plizir fwa: “Kontign veye.” (Matie 24:3; lir Mark 13:32-37, NW.) Seki Matie osi inn ekrir fer nou konpran ki plizir fwa Zezi ti averti so bann disip pou kontign veye. Li ti dir zot: “Alor, kontign veye parski zot pa kone ki zour zot Segner pe vini.” Ek ankor enn fwa li ti donn zot sa lavertisman-la: “Montre ki zot inn pare, parski se dan enn ler ki zot pa atann, ki Garson limanite pe vini.” Lerla li ti redir zot: “Alor, kontign veye, parski zot pa konn ni zour-la, ni ler-la.”​—Matie 24:42-44; 25:13, NW.

 3. Kifer nou pran kont lavertisman Zezi?

³ Bann Temwin Zeova pran kont sa lavertisman ki Zezi ti done la. Nou kone ki nou pe viv dan “lepok lafin” ek ki “gran detres” pou koumanse biento! (Daniel 12:4; Matie 24:21, NW.) Parey kouma Zezi ti predir, pep Zeova pe pres bon nouvel lor Rwayom Bondie lor later antie. Anmemtan, nou trouv lager, maladi, tranbleman-de-ter, ek lafaminn dan boukou landrwa. Ena konfizion dan bann relizion, ek deplizanpli, krim ek violans pe ogmante. (Matie 24:7, 11, 12, 14; Lik 21:11) Asterla nou pe atann avek inpasians kan Zezi pou vini ek pou realiz proze so Papa.​—Mark 13:26, 27.

 4. (a) Kifer nou kapav panse ki asterla Zezi kone kan Armagedonn pou vini? (b) Mem si nou pa kone kan gran detres pou koumanse, ki kitsoz nou kapav sir?

⁴ Kan nou al enn lasanble, nou kone ki ler sak sesion pou koumanse. Selman, li inposib nou kone kan gran detres pou koumanse. Kan Zezi ti lor later, li ti dir: “Ki zour, ki ler, personn pa kone, ni bann anz dan lesiel, ni mem Garson Limanite, zis papa la tousel kone.” (Matie 24:36) Se Zezi ki pou pran latet dan lager Armagedonn, alor li posib ki asterla li kone kan sa lager-la pou koumanse. (Revelasion 19:11-16) Me nou, nou pa kone ki dat ouswa ki ler lafin pou vini. Akoz sa, li bien inportan ki nou kontign veye. Zeova inn fini deside kan exakteman gran detres pou koumanse, ek sak zour li pe vinn deplizanpli pre. “Li pa pou an-retar!” (Lir Abakouk 2:1-3.a) Kifer nou kapav sir?

 5. Donn enn lexanp pou montre ki bann profesi Zeova touletan realize zis dan moman ki Li’nn prevwar.

⁵ Touletan bann profesi Zeova finn realize zis dan moman ki Li’nn prevwar! Par exanp, reflesi lor zour ki Li ti delivre so pep depi Lezip. Sa ti arive le 14 Nizan dan lane 1513 avan Zezi Kris. Plitar Moiz ti ekrir konsernan sa zour-la: “Ver lafin sa 430 an la, sa zour-la mem, tou bann larme Zeova ti sorti dan pei Lezip.” (Exod 12:40-42) Le 14 Nizan lane 1943 avan Zezi Kris, exakteman 430 avan ki bann Izraelit ti delivre, promes ki Zeova ti fer pou beni desandans Abram ti rant anviger. (Galat 3:17, 18) Enn tipe apre, Zeova ti dir Abram: “To bizin kone ki to desandan pou vinn bann etranze dan enn pei ki pa pou zot ek bann dimounn dan sa pei-la pou fer zot vinn bann esklav ek pou maltret zot pandan 400 an.” (Zenez 15:13; Zistwar Bann Apot 7:6) Sa 400 an la ti koumanse lane 1913 avan Zezi Kris, kan Yishmael ti koumans fer dominer ar Izaak. Sa 400 an la ti termine zour ki Zeova ti delivre bann Izraelit depi Lezip. (Zenez 21:8-10; Galat 4:22-29) Plizir santenn lane alavans, Zeova ti fini dir kan exakteman Li ti pou delivre so pep!

 6. Kifer nou kapav sir ki Zeova pou sap so pep?

⁶ Zozie ti enn parmi bann Izraelit ki ti delivre depi Lezip. Plizir lane apre, li ti fer bann Izraelit rapel enn kitsoz kan li ti dir zot: “Zot bien kone avek tou zot leker ek tou zot nam ki dan tou bann bon promes ki Zeova zot Bondie inn fer, pena enn sel ki pa finn akonpli. Tou finn realize pou zot. Pena enn sel parol ladan ki pa finn akonpli.” (Zozie 23:2, 14) Zeova finn promet pou delivre so pep pandan gran detres ek pou donn zot lavi pou touletan dan lemond nouvo. Ek nou kapav sir ki so promes pou realize. Alor, si nou anvi rant dan lemond nouvo, nou bizin kontign veye.

7, 8. (a) Dan lepase, ki rol enn gardien ti ena, ek ki leson nou kapav tire? (b) Donn enn lexanp pou montre seki kapav arive kan enn gardien gagn somey dan so travay.

⁷ Nou kapav tir enn leson ar bann gardien lavil dan lepase. Boukou parmi sa bann lavil-la, par exanp Zerizalem, ti antoure ar bann miray bien ot pou ki bann lennmi pa reisi rant andan. Bann gardien ti debout lor sa bann miray-la, ek lor la, zot ti kapav trouv toutotour lavil. Bann lezot gardien ti debout devan bann laport lavil. Sa bann zom-la ti bizin veye lanwit-lizour, ek si zot ti trouv bann lennmi pe vini, zot ti bizin averti bann dimounn dan lavil. (Izai 62:6) Zot ti kone ki kantite sa ti inportan ki zot pa dormi ek vey bien seki ti pe pase. Si zot pa ti fer sa, boukou dimounn ti riske mor.​—Ezekiel 33:6.

⁸ Josèphe, ki ti ekrir lor zistwar bann Zwif, ti explike kouma bann Romin ti reisi rant dan Zerizalem an 70 apre Zezi Kris. Bann ki ti pe gardien enn parti sa lavil-la ti gagn somey. Akoz sa, bann solda Romin ti reisi rant dan lavil. Zot ti al dan tanp ek zot ti met dife laba, ek zot ti detrir Zerizalem an-antie. Sa ti dernie parti dan pli gran detres ki nasion Zwif finn kone.

 9. Ki kitsoz laplipar dimounn pa kone azordi?

⁹ Laplipar bann gouvernman azordi protez zot frontier avek bann solda ek bann sistem sekirite ki servi bann dernie teknolozi. Sa bann gouvernman-la veye ki ninport ki dimounn ouswa ninport ki kitsoz ki kapav menas sekirite zot pei pa reisi rantre. Me zot pa realize ki ena enn gouvernman pli pwisan dan lesiel ki dirize par Zezi Kris. Biento sa gouvernman-la pou lager kont tou bann gouvernman lor later. (Izai 9:6, 7, not; 56:10; Daniel 2:44) Nou pe atann avek inpasians sa zour-la ek nou anvi pre pou sa. Alor nou pran kont bann profesi Labib ek nou kontign servi Zeova avek fidelite.​—Psom 130:6.

10, 11. (a) Ar ki kitsoz nou bizin fer bien atansion, ek kifer? (b) Ki kitsoz konvink twa ki Lediab finn inflians bann dimounn pou ki zot pa pran kont bann profesi Labib?

¹⁰ Imazinn enn gardien ki’nn veye enn lanwit. Li pli difisil pou li veye pandan bann dernie ler parski li extra fatige. Li parey pou nou, nou pe viv dan bann dernie zour sa lemond-la. Ek amezir ki lafin pe koste, li pou vinn pli difisil pou nou res lor nou gard. Li pou bien tris si nou pa kontign veye! Anou examinn trwa kitsoz ki kapav anpes nou res lor nou gard.

¹¹ Lediab tronp bann dimounn. Limem “gran sef” sa lemond-la. Enn tipe avan so lamor, Zezi trwa fwa ti rapel so bann disip sa verite-la. (Zan 12:31; 14:30; 16:11) Lediab finn servi fos relizion pou anbet bann dimounn. Akoz sa, boukou dimounn azordi pa pran kont bann profesi Labib ki montre dan enn fason bien kler ki lafin sa lemond-la bien pre. (Sefania 1:14) Li kler ki Satan finn “avegle lespri bann ki pa’le krwar.” (2 Korintien 4:3-6) Akoz sa, kan nou esey dir bann dimounn ki lafin sa lemond-la bien pre ek ki Kris pe regne asterla, boukou parmi zot pa anvi ekoute. Souvan zot dir: “Mo pa interese.”

12. Kifer fode pa nou les Lediab anbet nou?

¹² Mem si boukou pa interese ar bann profesi Labib, fode pa nou les zot latitid dekouraz nou. Nou kone kifer li inportan nou kontign veye. Pol ti dir so bann frer: “Zot bien kone ki zour Zeova pe vini.” Li ti azoute: “Parey kouma enn voler dan lanwit.” (Lir 1 Tesalonisien 5:1-6, NW.) Zezi inn averti nou: “Zot bizin pare, parski ler ki Garson Limanite pou vini personn pa pou atann.” (Lik 12:39, 40) Biento, Satan pou anbet bann dimounn kan li pou fer zot krwar ki ena “lape ek sekirite” dan lemond. Lerla, zour Zeova pou vini enn kout koumsa, ek zot pou gagn sok. Ki nou kapav dir lor nou? Si nou anvi pre pou sa zour-la, nou bizin “res lor nou gard ek gard nou bon sans” pou ki nou pa les Satan anbet nou parey kouma li anbet lezot dimounn. Se akoz sa ki nou bizin lir Parol Bondie toulezour ek medit lor seki Zeova dir nou.

13. Kouma lespri sa lemond-la pe inflians limanite, ek kouma nou kapav evit sa linflians danzere-la?

¹³ Lespri sa lemond-la inflians fason panse bann dimounn. Azordi, boukou dimounn panse ki zot pa bizin konn Bondie. (Matie 5:3) Zot prefer servi laplipar zot letan ek zot lenerzi pou gagn boukou kitsoz ki sa lemond-la ofer zot. (1 Zan 2:16) Azordi, plis ki avan, bann divertisman atir bann dimounn ek ankouraz zot pou kontan lamizman ek pou satisfer ninport ki dezir zot ena. (2 Timote 3:4) Sa bann kitsoz-la distrer bann dimounn ek zot nepli pran kont seki pli inportan, ni zot reflesi lor zot relasion avek Bondie. Akoz samem Pol ti rapel bann Kretien ki zot bizin “sorti dan somey” ek pa pas zot lavi pou satisfer zot bann dezir.​—Romin 13:11-14.

14. Ki lavertisman nou trouve dan Lik 21:34, 35?

¹⁴ Nou anvi ki lespri Bondie inflians nou fason panse, pa lespri sa lemond-la. Atraver so lespri, Zeova finn ed nou pou konpran bien seki pou arive biento. (1 Korintien 2:12)^[1] (Get not alafin lartik.) Me nou bizin fer atansion. Mem bann sinp ti kitsoz kapav distrer nou ek fer nou aret servi Zeova. (Lir Lik 21:34, 35.) Lezot kapav dir nou ki nou bet parski nou krwar ki nou pe viv dan bann dernie zour sa lemond-la. (2 Pier 3:3-7) Me fode pa nou les zot dekouraz nou. Nou ena bann prev bien solid ki lafin bien pre. Si nou anvi ki lespri Bondie inflians nou, regilierman nou bizin asiste bann renion avek nou bann frer ek ser.

15. Ki ti ariv Pier, Zak, ek Zan, ek kouma sa kapav ariv nou osi?

¹⁵ Nou bann febles anpes nou res lor nou gard. Zezi ti konpran ki bann dimounn inparfe ek ki zot ena bann febles. Reflesi lor seki ti arive lanwit avan so lamor. Mem si Zezi ti parfe li ti kone ki, pou li kapav res fidel, li ti bizin priye so Papa pou demann Li so led. Zezi ti demann so bann zapot, Pier, Zak, ek Zan pou res lor zot gard pandan ki li ti pe priye. Me bann zapot pa ti realize ki kantite sa ti inportan ki zot res lor zot gard. Zot ti fatige, ek zot ti dormi. Zezi osi ti fatige, me li ti res lor so gard ek li ti priye so Papa. Bann zapot osi ti bizin pe priye dan sa ler-la.​—Mark 14:32-41.

16. Dapre Lik 21:36, kouma Zezi ti ansegn nou pou “res lor [nou] gard”?

¹⁶ Ki kitsoz pou ed nou “res lor [nou] gard” ek prepar nou pou zour Zeova? Nou bizin ena enn gran dezir pou kontign fer seki drwat. Me pa zis sa. De-trwa zour avan so lamor, Zezi ti dir so bann disip ki zot bizin kontign priye Zeova pou demann Li so led. (Lir Lik 21:36, NW.) Pou ki nou res lor nou gard dan sa lepok lafin-la, nou osi nou bizin kontign priye Zeova.​—1 Pier 4:7.

17. Kouma nou kapav fer sir ki nou pre pou seki pou arive biento?

¹⁷ Zezi ti dir ki lafin pou vini “enn ler ki [nou] pa atann.” (Matie 24:44, NW.) Alor nou bizin touletan pre. Asterla se pa enn ler pou nou esey viv dan fason ki lemond Satan pe propoz nou ek ki sipoze pou fer nou ere. Se zis enn rev. Okontrer, atraver Labib, Zeova ek Zezi finn dir nou kouma nou kapav kontign veye. Alor, anou pran kont bann profesi Labib ek kouma zot pe realize. Ek anou kontign vinn pli pros ar Zeova ek met so Rwayom an premie dan nou lavi. Lerla nou pou pre kan lafin vini. (Revelasion 22:20) Nou lavi depann lor la!