Ki kitsoz ki donne nou la-vie enn vrai satisfaction?

“Ena la crainte pou vrai Bondié ek garde so bann commandement.”​—ECCL. 12:⁠13.

1, 2. Couma livre Ecclésiaste kapav aide nou?

SA MISSIÉ-LA ti parette ena tou kitsoz. Li ti enn chef ki ti bien populaire, li ti enn parmi bann zom ki ti pli riche dan le monde, ek li ti ena plus sagesse ki tou dimoune dan so generation. Mais malgré tou seki li ti’nn reussi faire, li ti encore pé demann li-mem: ‘Ki kitsoz ki donne nou la-vie enn vrai satisfaction?’

² Sa missié-la ti vrai-mem existé ena apepré trois mille an. Li ti appel Salomon. Dan livre Ecclésiaste, li raconte seki li’nn faire pou rod satisfaction dan la vie. (Eccl. 1:​13) Nou kapav aprann beaucoup kitsoz ar l’experience ki Salomon inn faire. Oui, la sagesse ki ena dan livre Ecclésiaste kapav aide nou pou fixé bann l’objectif ki pou donne nou la-vie enn vrai satisfaction.

“Galope derriere di-vent”

 3. Ar ki realité bien triste nou bizin faire face?

³ Salomon expliké ki Bondié inn crée beaucoup joli kitsoz lor la terre. C’est bann kitsoz extraordinaire ki pa fini interesse nou ek pa fini faire nou plaisir. Pourtant, nou pa vrai-mem kapav commence explore creation Bondié parski nou la-vie trop courte. (Eccl. 3:​11; 8:​17) Pareil couma la Bible dire, nou pa vive longtemps ek nou la-vie passe vite. (Job 14:​1, 2; Eccl. 6:​12) Sa realité bien triste-la bizin pousse nou pou servi nou la-vie avek sagesse. Mais li pa facile pou faire sa, parski le monde Satan bien koné couma pou faire nou suive enn mauvais direction.

 4. (a) Ki mot “vanité” impliké? (b) Ki kitsoz nou pou examiné?

⁴ Pou montré danger ki ena kan nou gaspille nou la-vie, Salomon ti servi mot “vanité” plus ki 30 fois dan livre Ecclésiaste. Mot hébreux ki finn traduire par “vanité” faire pense enn kitsoz ki vide, ki pa servi nanyin, ki pena sens ek ki pena vrai-mem valeur. (Eccl. 1:​2, 3) Parfois Salomon servi mot “vanité” ensam avek l’expression “galope derriere di-vent.” (Eccl. 1:​14; 2:​11) Li clair ki tou zeffort ki nou faire pou attrape di-vent, li dan vide. N’importe kisannla ki essaye faire sa, finalement pou trouve so la-main vide. Li pareil aussi si nou essaye galope derriere bann l’objectif ki pa vaut la peine: nou pou bien chagrin apré. La-vie dan sa lé-monde-la li trop courte pou nou gaspille li dan bann kitsoz ki pou laisse nou la-main vide. Alors, pou aide nou pou pa faire sa erreur-la, anou guette deux-trois kitsoz ki en general bann dimoune faire ki Salomon ti mentionné. Premierement, nou pou koz concernant bann plaisir ek bann di-bien. Apré nou pou koz lor travail ki faire Bondié plaisir.

Eski nou pou heureux si nou rod bann plaisir?

 5. Ki kitsoz Salomon ti rodé pou gagne le bonheur?

⁵ Pareil couma beaucoup dimoune zordi, Salomon ti rod bonheur kan li ti amenn enn la-vie rempli ar plaisir. Li ti raconté: “Mo pa ti refuse mo leker okenn la-joie.” (Eccl. 2:​10) Ki kitsoz li ti rodé pou faire-li plaisir? Dapré Ecclésiaste chapitre 2, li ti ‘faire so lekor plaisir avek di-vin’​—mais en mem temps li ti konn control li​—ek li ti faire plusieurs kitsoz: li ti faire bann jardin, bann plan pou faire bann palais, ecoute la musik, ek mange bann bon mangé.

 6. (a) Kifer li pa mauvais ki nou content bann bon kitsoz ki ena dan la vie? (b) En rapport avek bann divertissement, ki l’equilibre nou bizin ena?

⁶ Eski la Bible defann nou passe bann bon moment avek nou bann camarade? Non. Par exemple Salomon ti faire remarké ki prend enn repas dan enn bon l’ambiance apré ki nou’nn travail dur pendant enn journée, c’est enn don Bondié. (Lire Ecclésiaste 2:​24; 3:​12, 13.) En plus, Jéhovah Li-mem invite bann jeune pou ‘trouve la joie ek pou laisse zot leker faire zot di-bien,’ mais zot bizin agir dan enn fason ki montré ki zot bann jeune responsable. (Eccl. 11:⁠9) Nou bizin bann moment pou detann-nou ek ena bann bon divertissement dan nou la-vie. (Compare avek Marc 6:​31.) Selman, fodé pa ki bann divertissement vinn enn priorité dan nou la-vie. Au contraire, bann divertissement bizin couma enn dessert ki nou prend a la fin enn repas, pa repas-la li-mem. Ou pou d’accord ki, n’importe ki quantité ou content bann dessert, si ou mange zis sa tousel, ou pou gagne degout bien vite. En plus, zot pa pou donne ou lekor tou seki li bizin. Mem zaffaire ti arrive Salomon; li ti realisé ki enn la-vie ki basé zis lor plaisir li coumadir pé “galope derriere di-vent.”​—Eccl. 2:​10, 11.

 7. Kifer nou bizin bien choisir nou bann divertissement?

⁷ En plus, pa tou qualité divertissement ki bon. Beaucoup zot bien dangereux lor plan spirituel ek moral. Ena plusieurs million dimoune ki finn tombe dan enn grand desespoir zis parski zot ti ‘envie amusé’​—zot ti prend la-drogue, abuse lalkol ou-soit joué pou gagne l’argent! Avek bonté Jéhovah averti nou ki, si nou laisse nou leker ou-soit nou lizié pousse nou pou faire bann mauvais kitsoz, nou bizin attann pou paye bann consequence.​—Gal. 6:⁠7.

 8. Kifer li sage ki nou medite lor fason ki nou pé amenn nou la-vie?

⁸ Nou kapav dire finalement ki, si nou passe trop beaucoup lé-temps dan bann divertissement, sa kapav empeche nou pou donne priorité bann kitsoz ki pli important. Rappel bien, la vie passe bien vite ek li bien courte, ek pena okenn garantie ki nou pou toujours ena enn bon la-santé ek ki jamais nou pa pou gagne probleme. A cause sa, couma Salomon ti ecrire, nou pou kapav tire plus profit si nou al dan enn l’enterrement​—surtout si c’est l’enterrement enn chretien fidele​—ki si nou al dan enn “lakaz kot ena fête.” (Lire Ecclésiaste 7:​2, 4.) Kifer? Parski kan nou pé ecoute enn discours l’enterrement ek nou medite lor la vie sa fidele serviteur Jéhovah ki’nn mort-la, sa kapav pousse nou pou examine fason ki nou pé amenn nou prop la-vie. Kitfois lerla nou pou trouvé ki nou ena bann changement pou faire en rapport avek nou bann l’objectif pou nou kapav servi nou la-vie dan enn fason pli sage.​—Eccl. 12:⁠1.

Eski bann kitsoz materiel pou donne nou satisfaction?

 9. Ki Salomon ti rann-li compte concernant la richesse?

⁹ Kan Salomon ti ecrire livre Ecclésiaste, li ti enn parmi bann dimoune ki ti pli riche lor la terre. (2 Chron. 9:​22) Li ti ena moyen pou gagne tou seki li ti envie. Li ti ecrire: “Tou seki mo lizié ti demandé, mo pa ti prive zot.” (Eccl. 2:​10) Pourtant, li’nn rann-li compte ki zis bann kitsoz materiel tousel pa kapav donne enn dimoune satisfaction. Li ti tire sa conclusion-la: “Sa kikenn ki content l’argent-la jamais li pa pou assez ar l’argent, ni sa kikenn ki content la richesse-la, ar kass ki rentré.”​—Eccl. 5:​10.

10. Ki kitsoz ki donne nou enn vrai satisfaction ek bann vrai richesse?

¹⁰ Mem si bann kitsoz materiel ena enn valeur temporaire, zot toujours kapav attire nou beaucoup. Dan enn l’enquete ki’nn fek faire en Amérique, 75 pourcent bann zeleve ki dan zot premier l’année l’université inn dire ki zot l’objectif principal dan la vie c’est pou “gagne beaucoup l’argent.” Mais mem si zot reussi zot l’objectif, eski zot pou vrai-mem heureux? Pa necessairement! Bann recherche inn montré ki, kan enn dimoune mette bann kitsoz materiel en premier dan so la-vie, en realité sa empeche li pou trouve vrai bonheur ek satisfaction. Bien longtemps, Salomon ti deja fini tire sa conclusion-la. Li ti ecrire: “Mo ti ramasse aussi beaucoup l’argent ek l’or pou mo-mem, ek bann di-bien ki surtout pou bann lé-roi . . . Ek guetté! tousala ti vanité, ek coumadir pé galope derriere di-vent.”a (Eccl. 2:​8, 11) Parkont, si nou servi nou la-vie pou faire volonté Jéhovah avek tou nou leker ek lerla sa faire nou gagne so benediction, nou pou gagne bann vrai richesse.​—Lire Proverbes 10:⁠22.

Ki qualité travail ki donne enn vrai satisfaction?

11. Ki la Bible dire lor valeur ki travail ena?

¹¹ Jésus ti dire: “Mo Papa inn contigne travail ziska asterla, ek moi aussi mo pé contigne travail.” (Jean 5:​17) Nou sur ki Jéhovah ek Jésus gagne enn grand satisfaction ar zot travail. La Bible montré ki Jéhovah ti satisfait ar so creation kan Li ti dire: “Bondié ti trouve tou seki Li ti faire, ek guetté, tou ti bien bon.” (Gen. 1:​31) Bann ange “ti commence loué Li bien fort” kan zot ti trouve tou seki Bondié ti faire. (Job 38:​4-7) Salomon aussi ti comprend valeur enn travail ki donne satisfaction.​—Eccl. 3:⁠13.

12, 13. (a) Couma deux dimoune inn exprime satisfaction ki zot inn gagné kan zot inn travail dur? (b) Kifer enn dimoune kapav agacé dan so travail?

¹² Beaucoup dimoune comprend l’importance enn travail ki’nn bien faire. Par exemple, José, enn artiste ki ena bien talent, dire: “Kan ou reussi penn lor enn la-toile, zimage ki ou ena dan ou l’esprit, ou ena l’impression ki ou finn reussi grimpe enn montagne bien haute.” Miguel,b enn businessman dire: “Travail donne satisfaction parski sa permette ou donne ou famille seki li bizin. Sa kapav aussi donne ou enn sentiment ki ou finn reussi accompli kitsoz.”

¹³ Parkont, beaucoup trouve zot travail monotone ek zot pa gagne l’occasion servi zot l’imagination pou crée bann kitsoz interessant. Parfois li arrivé ki l’endroit kot nou travail-mem pa donne nou satisfaction ek faire nou agacé, ou-soit li enn place kot ena l’injustice. Pareil couma Salomon ti faire remarké, li kapav arrivé ki enn dimoune ki paresse gagne recompense ki enn lot dimoune ki travail pli dur ti bizin gagné, kitfois parski seki paresse-la inn profite bann relation ki li ena avek bann ki ena l’autorité. (Eccl. 2:​21) Ena lezot kitsoz encore ki kapav faire ki enn dimoune pa satisfait. Li kapav inn commence enn business ki ti parette pou bien prosperé mais apré sa pa’nn marché a cause bann probleme economik ou-soit bann l’evenement ki li pa’nn attann. (Lire Ecclésiaste 9:​11.) Souvent, sa dimoune ki’nn travail dur pou reussi-la, finalement vinn amer kan li rann-li compte ki li’nn “travail dur pou bann kitsoz ki dan vide.”​—Eccl. 5:⁠16.

14. Ki travail ki donne toujours enn vrai satisfaction?

¹⁴ Eski ena kit travail ki jamais pa faire enn dimoune vinn amer? José, sa artiste ki nou ti mentionné avant-la, dire: “Avek le temps, bann tableau kapav perdi ou-soit abimé. Mais sa pa arrivé avek bann kitsoz ki nou faire dan service Bondié. Kan mo’nn obeir Jéhovah ek mo’nn preche la bonne nouvelle, mo’nn participé pou construire enn kitsoz ki pou resté pou touletan, setadir bann chretien ki ena la crainte pou Bondié. Ek sa ena beaucoup-beaucoup valeur.” (1 Cor. 3:​9-​11) Miguel aussi dire ki predication la bonne nouvelle faire li gagne beaucoup plus satisfaction ki so travail profane. Li dire: “Pena nanyin ki kapav remplace sa la-joie ki ou ressenti kan ou enseigne enn dimoune enn verité biblik ek ou senti ki sa inn touche so leker.”

“Envoye to di-pain”

15. Ki kitsoz ki donne la vie enn vrai satisfaction?

¹⁵ En conclusion, ki kitsoz ki donne nou la-vie enn vrai satisfaction? Nou gagne enn vrai satisfaction kan nou servi sa tigit lé-temps ki nou resté pou vive dan sa lé-monde-la pou faire seki bon ek pou faire Jéhovah plaisir. Nou kapav developpe bann bon relation avek Bondié, enseigne nou bann zenfant bann principe biblik, aide lezot dimoune pou konn Jéhovah, ek developpe enn l’amitié solide avek nou bann frere ek soeur. (Gal. 6:​10) Tou sa bann l’objectif-la ena enn valeur durable ek bann ki reussi realise sa, gagne bann benediction. Salomon ti servi enn comparaison interessant pou montré l’importance pou faire seki bien. Li ti dire: “Envoye to di-pain lor de l’eau, parski apré plusieurs jour to pou retrouve li.” (Eccl. 11:⁠1) Jésus ti donne sa conseil-la so bann disciple: “Prend l’habitude donné, ek dimoune pou donne zot.” (Luc 6:​38) En plus, Jéhovah Li-mem promette ki Li pou recompense bann ki faire di-bien envers lezot.​—Prov. 19:17; lire Hébreux 6:⁠10.

16. Kan eski li pli bon pou decidé ki nou pou faire dan nou la-vie?

¹⁶ La Bible encourage nou pou prend bann bon decision alors ki nou encore jeune concernant fason ki nou pou servi nou la-vie. Lerla, nou pa pou regretté plitar. (Eccl. 12:⁠1) Li pou vrai-mem triste ki nou gaspille bann pli bon l’année nou la-vie pou galope derriere bann kitsoz dan sa lé-monde-la ki attire nou ek apré pou trouvé ki nou’nn zis galope derriere di-vent!

17. Ki pou aide ou pou faire pli bon choix dan ou la-vie?

¹⁷ Pareil couma n’importe ki papa ki content so bann zenfant, Jéhovah envie ki ou profite ou la-vie, ki ou faire di-bien ek ou pa souffert pou nanyin. (Eccl. 11:​9, 10) Couma ou pou arrivé faire sa? Fixé bann l’objectif spirituel ek travail dur pou reussi realise zot. Ena environ 20 an, Javier ti bizin choisir pou faire soit enn grand carriere pou vinn enn docteur, soit service a plein temps. Li dire: “Mem si travail enn docteur kapav donne beaucoup satisfaction, nanyin pa ti pou kapav donne moi sa la-joie ki mo’nn gagné kan mo’nn aide plusieurs dimoune pou konn la verité. Service a plein temps finn permette moi pou profite la vie maximum. Sel regret ki mo ena c’est ki mo pa’nn commence pli boner.”

18. Kifer la vie ki Jésus ti amené lor la terre ti ena vrai-mem enn sens?

¹⁸ Alors, ki kitsoz ki ena plus valeur ki tou, ki nou bizin faire zeffort pou gagné? Livre Ecclésiaste dire: “Enn nom vaut plus ki enn bon de l’huile, ek jour la mort vaut plus ki jour naissance.” (Eccl. 7:⁠1) Pena nanyin ki montré sa pli bien ki la vie ki Jésus inn amené. Pena doute ki li’nn faire-li enn reputation extraordinaire devant Jéhovah. Kan li’nn reste fidele ziska la mort, Jésus ti justifié souveraineté so Papa ek li ti donne enn sacrifice ki permette nou gagne la vie sauve. (Mat. 20:⁠28) Pendant sa tigit lé-temps ki li’nn passé lor la terre-la, Jésus ti montré dan enn fason parfait ki été enn la-vie ki ena enn vrai sens. C’est sa l’exemple-la ki nou faire zeffort pou imité.⁠—1 Cor. 11:⁠1; 1 Pierre 2:​21.

19. Ki bon conseil Salomon ti donné?

¹⁹ Nou aussi nou kapav faire enn joli nom devant Bondié. Ena enn bon reputation devant Jéhovah, pou nou sa ena beaucoup plus valeur ki bann richesse. (Lire Matthieu 6:​19-​21.) Chaque jour, nou kapav trouve bann fason pou faire bann kitsoz ki faire Jéhovah plaisir ek ki pou faire nou la-vie vinn pli riche. Par exemple, nou kapav partage la bonne nouvelle avek lezot, fortifié bann relation ki nou ena avek nou conjoint ek avek nou famille, fortifié nou spiritualité par nou l’etude personnel ek kan nou assisté reunion. (Eccl. 11:⁠6; Héb. 13:⁠16) Alors, eski ou envie amenn enn la-vie ki donne ou vrai-mem satisfaction? Si oui, contigne suive conseil Salomon: “Ena la crainte pou vrai Bondié ek garde so bann commandement. Parski c’est sa tou l’obligation ki enn dimoune ena.”​—Eccl. 12:⁠13.

[Note]

Couma ou pou reponn?

• Ki bizin pousse nou pou bien reflechi lor bann l’objectif ki nou fixé dan nou la-vie?

• Couma nou bizin considere bann plaisir ek bann kitsoz materiel?

• Ki qualité travail pou donne nou enn vrai satisfaction?

• Ki kitsoz ki ena vrai-mem valeur nou bizin faire zeffort pou gagné?

[Zimage lor page 31]

Kifer l’activité predication donne nou enn grand satisfaction?