Mariage ek role bann parent dan lepok la fin

“Reste bien tigit lé-temps.”​—1 COR. 7:​29.

 1. (a) Ki bann changement forme partie zordi dan bann kitsoz ki “difficile pou supporté”? (b) Kifer bann bouleversement ki ena dan la famille tracasse nou?

PAROLE Bondié ti annoncé ki “dan lepok la fin” pou ena bann la-guerre, bann tremblement de terre, la famine, ek bann l’epidemie. (Dan. 8:​17, 19; Luc 21:​10, 11) Li ti annoncé aussi ki pendant sa periode important dan l’histoire l’humanité-la, pou ena bann grand changement dan domaine social. Pendant sa bann “dernier jour” ki critik-la, bann bouleversement dan la vie famille pou forme partie dan bann kitsoz ki pou “difficile pou supporté.” (2 Tim. 3:​1-4) Kifer sa bann changement-la tracasse nou? Parski nou trouve zot tellement partout ek zot ena tellement enn grand l’influence lor bann dimoune, ki sa kapav ena enn l’effet lor fason ki bann chretien considere mariage ek role bann parent zordi. Couma?

 2. Couma le monde en general considere mariage ek divorce?

² Zordi, li facile pou divorcé ek beaucoup dimoune faire li. Dan beaucoup pays, quantité divorce pé augmenté bien-bien vite. Selman, sa bizin bien clair dan nou l’esprit ki, fason ki Jéhovah considere mariage ek divorce li bien different avek fason ki en general le monde ki autour nou considere sa. Alors, couma Jéhovah considere mariage ek divorce?

 3. Couma Jéhovah ek Jésus Christ considere mariage?

³ Jéhovah attann ki bann couple reste fidele envers sa voeu ki zot faire kan zot marié-la. Kan Li ti marié premier zom ek premier femme, Jéhovah ti dire ki “enn zom . . . pou bizin attaché avek so madame ek zot pou bizin vinn enn sel la-chair.” Plitar Jésus Christ ti repete sa ek li ti ajouté: “Alors, seki Bondié finn mette enba enn sel joug, fodé ki personne pa separe sa.” Li ti dire aussi: “N’importe kisannla ki divorce avek so femme, excepté a cause fornication, ek marié avek enn lot, commette l’adultere.” (Gen. 2:​24; Mat. 19:​3-6, 9) Sa montré ki Jéhovah ek Jésus considere mariage couma enn lien ki bizin duré toute longue la-vie ek ki fini zis kan enn conjoint mort. (1 Cor. 7:​39) Parski mariage li enn disposition ki sacré, fodé pa nou considere divorce couma enn kitsoz banal. En realité, Parole Bondié dire ki Jéhovah ena la haine pou n’importe ki divorce ki pena enn raison biblik.a​—Lire Malaki 2:​13-​16; 3:⁠6.

Marié kan ou enn adulte responsable

 4. Kifer certain jeune chretien regretté ki zot inn pressé pou marié?

⁴ Nou pé vive dan enn lé-monde ki pa prend compte Bondié ek ki obsedé par sexe. Chaque jour, enn quantité zimage ki ena enn rapport avek sexe passe devant nou lizié. Nou pa kapav faire coumadir sa bann zimage-la pena okenn l’effet lor nou, surtout lor bann jeune dan congregation. Couma bann jeune bizin reagir devant sa mauvais l’influence ki kapav faire zot gagne bann desir sexuel sans ki zot envie? Certain essaye reglé sa probleme-la kan zot marié bien jeune. Zot pensé ki coumsa, zot pa pou tenté pou ena enn conduite immoral. Selman, bien vite, beaucoup regrette enn decision coumsa. Kifer? Parski enn fois ki zot habitué ar la vie mariage, zot realisé ki dan la vie toulé-jour zot pa d’accord avek zot conjoint lor beaucoup kitsoz. Nou comprend ki bann couple ki dan enn situation coumsa, surement zot la-vie pa facile.

 5. Ki pou aide bann couple pou reste fidele envers sa voeu ki zot ti faire kan zot ti marié-la? (Guette aussi note.)

⁵ Sa kapav bien difficile si, apré ki nou’nn marié ar enn kikenn, nou rann-nou compte ki li pa couma nou ti pé attann​—mem si li enn chretien. (1 Cor. 7:​28) Kan-mem, n’importe ki difficulté zot kapav gagné dan zot mariage, bann vrai chretien koné ki enn divorce sans raison biblik li pa enn solution acceptable pou zot reglé bann probleme ki zot gagné dan enn mariage malheureux. Alors, bann ki pé contigne travail dur pou preserve zot mariage parski zot envie reste fidele envers sa voeu ki zot ti faire kan zot ti marié-la, merite nou respé ek l’aide bann membre dan congregation.b

 6. Couma bann jeune chretien bizin considere mariage?

⁶ Eski ou jeune ek ou pankor marié? Si oui, couma ou bizin considere l’idée pou marié? Ou pou kapav evite beaucoup tracas si ou attann ki ou pré lor plan physik, mental ek spirituel pou ou marié avant ki ou engage ou ar enn chretien. Bien sur, la Bible pa dire ki l’age bizin marié.c Mais li montré ki li bon si ou attann ki ou passe sa periode dan la vie kot bann desir sexuel bien fort. (1 Cor. 7:​36) Kifer? Parski sa bann desir-la kapav fausse ou bon jugement ek amenn-ou pou prend bann mauvais decision ki pou faire ou regretté apré. Rappel bien, bann conseil sage ki Jéhovah donné dan la Bible lor mariage zot pou ou bonheur.​—Lire Isaïe 48:17, 18.

Agir couma bann parent responsable

 7. Dan ki situation certain jeune couple retrouve-zot, ek kifer sa kapav crée bann tension dan zot mariage?

⁷ Certain couple ki marié jeune, vinn parent alors ki zot-mem zot encore bien jeune. Avant-mem ki zot gagne assez lé-temps pou zot konn bien zot camarade, zot fini gagne enn tibaba ek zot bizin occupe li 24 heure lor 24. Li normal ki enn mama pou prend compte so tibaba avant tou ek sa kapav faire jeune mari-la enn tipé jaloux. En plus, souvent bann parent passe la nuit pou occupe zot tibaba. Sa kapav faire zot stressé ek crée bann tension dan zot couple. Enn sel coute, zot realisé ki zot inn perdi enn grand partie zot liberté. Asterla, zot nepli kapav al promené ek zot nepli libre pou faire bann kitsoz couma avant. Couma eski zot bizin considere zot nouveau situation?

 8. Couma nou bizin considere nou role parent, ek kifer?

⁸ Pareil couma deux dimoune ki marié bizin prend zot responsabilité, li pareil aussi pou bann ki vinn parent. Zot bizin considere zot role parent couma enn responsabilité ek enn privilege ki Bondié inn donne zot. N’importe ki changement bann parent chretien pou bizin faire kan zot gagne enn tibaba, zot bizin faire tou seki zot kapav pou adapté-zot ar sa bann changement-la ek prend zot responsabilité avek serieux. C’est Jéhovah ki finn donne bann dimoune capacité pou gagne zenfant. Alors bann parent bizin considere zot tibaba couma ‘enn l’heritage ki Jéhovah inn donne zot.’ (Ps. 127:⁠3) Enn papa ek enn mama chretien pou faire zeffort pou prend zot responsabilité ‘parent couma le Seigneur oulé.’​—Éph. 6:⁠1.

 9. (a) Elevé enn zenfant, ki sa impliké? (b) Ki enn mari kapav faire pou aide so femme reste fort lor plan spirituel?

⁹ Sa demann plusieurs l’année sacrifice pou elevé enn zenfant. Bann parent bizin consacré vrai-mem beaucoup le temps ek l’energie pou reussi faire sa. Enn mari chretien bizin comprend ki, apré naissance zot zenfant, pendant plusieurs l’année so femme pa pou kapav suive bien bann reunion ek li pa pou gagne beaucoup lé-temps pou etudié personnellement la Bible ek pou medité. Sa kapav affecté so spiritualité. Enn papa ki responsable, pou faire tou seki li kapav pou occupe so tibaba li aussi. Li kapav koz lor certain point ki so femme inn kapav manké pendant reunion. Li kapav aussi veille tibaba-la pou ki so femme kapav bien participé dan predication.​—Lire Philippiens 2:​3, 4.

10, 11. (a) Couma kapav elevé bann zenfant dan “bann l’avertissement Jéhovah”? (b) Kifer beaucoup parent chretien merite felicitation?

¹⁰ Prend bann responsabilité en tant ki parent c’est pa zis donne bann zenfant mangé, linge, enn lakaz ek prend soin zot la-santé. Zordi dan lepok la fin, li surtout bien important ki bann jeune aprann pou vive dapré bann principe moral depuis bien tipti. Bann parent bizin elevé zot zenfant “dan discipline ek dan bann l’avertissement Jéhovah.” (Éph. 6:⁠4) Sa vedir ki zot bizin mette bann pensée Jéhovah dan l’esprit zot zenfant depuis bien tipti ek contigne faire sa ziska la fin l’adolescence, enn periode ki bien difficile.​—2 Tim. 3:​14, 15.

¹¹ Jésus ti dire bann ki ti suive li, ki zot ti pou bizin faire “bann disciple parmi bann dimoune dan tou bann nation.” (Mat. 28:​19, 20) Surement li ti pé rod dire ki bann parent bizin aide zot zenfant pou ki zot aussi zot vinn bann disciple. C’est pa enn travail facile parski zordi le monde mette bann grand pression lor bann jeune. C’est a cause sa ki bann parent ki reussi elevé zot zenfant ek faire zot vinn bann serviteur voué ar Bondié merite felicitation sincere tou bann membre dan congregation. Par zot la-foi ek zot fidelité, sa bann parent responsable-la inn “gagne victoire” lor l’influence sa lé-monde-la.​—1 Jean 5:⁠4.

Celibataire ou sans zenfant pou enn bon raison

12. Kifer certain chretien decidé pou reste celibataire pendant enn certain temps?

¹² Parski “reste bien tigit lé-temps” ek “scene sa lé-monde-la pé changé,” Parole Bondié encourage nou pou reflechi lor bann l’avantage ki ena kan reste celibataire. (1 Cor. 7:​29-​31) C’est a cause sa ki certain chretien choisir pou reste celibataire tou zot la-vie ou-soit pendant plusieurs l’année avant zot marié. Nou felicite zot parski zot pa profite sa liberté-la pou occupe zot l’interet personnel. Beaucoup reste celibataire pou zot kapav servi Jéhovah “sans ki nanyin distraire zot.” (Lire 1 Corinthiens 7:32-⁠35.) Certain chretien celibataire servi en tant ki pionnier ou Béthélite. Beaucoup rod faire plus pou l’organisation Jéhovah kan zot faire tou pou rempli bann condition pou assisté Lekol formation ministeriel. En realité, bann ki’nn faire service a plein temps pendant enn periode le temps kan zot ti celibataire ek ki plitar inn decidé pou marié, souvent ena sentiment ki bann leson ki zot inn aprann pendant sa periode-la encore aide zot dan zot la-vie mariage.

13. Kifer certain couple chretien decidé pou pa gagne zenfant?

¹³ Dan certain pays, ena enn lot changement ki arrivé dan la vie famille​—beaucoup couple decide pou pa gagne zenfant. Certain prend sa decision-la pou bann raison economik; lezot faire sa parski zot envie pli libre pou poursuive enn carriere professionnel. Parmi bann chretien, ena aussi bann couple ki decidé pou pa gagne zenfant. Selman, souvent zot, zot faire sa pou zot kapav pli libre pou servi Jéhovah. Sa pa vedir ki zot pa amenn enn la-vie mariage normal. Non. Mais, zot envie mette l’interet Royaume Bondié avant certain privilege ki mariage kapav donne zot. (1 Cor. 7:​3-5) Certain parmi sa bann couple-la zot servi Jéhovah ek zot bann frere dan service circonscription, district ou-soit dan Béthel. Ena lezot ki pionnier ou-soit missionnaire. Jéhovah pa pou blié zot travail ek l’amour ki zot montré pou so nom.​—Héb. 6:⁠10.

‘Bann l’epreuve dan zot la-vie’

14, 15. Ki ‘l’epreuve’ bann parent chretien kapav gagné?

¹⁴ L’apotre Paul ti dire bann chretien ki marié ki zot pou ‘gagne bann l’epreuve dan zot la-vie.’ (1 Cor. 7:​28) Sa kapav bann probleme la santé ki touche enn conjoint, zot zenfant ou-soit zot parent agé. Sa kapav aussi bann difficulté ek la peine ki zot gagné en rapport avek l’education zot zenfant. Couma nou finn mentionné au commencement sa lartik-la, la Bible ti annoncé ki dan “dernier jour” pou ena “bann lepok critik ki difficile pou supporté.” Parmi bann kitsoz ki difficile pou supporté pou ena bann zenfant ki “desobeir zot parent.”​—2 Tim. 3:​1-3.

¹⁵ Li pa facile pou bann parent chretien elevé zot zenfant zordi. Nou aussi nou affecté par bann mauvais consequence sa bann ‘lepok critik-la.’ Alors, bann parent chretien bizin contigne combatte kont bann mauvais l’influence ki “sa lé-monde-la” kapav ena lor zot bann zenfant. (Éph. 2:​2, 3) Ek c’est pa touletan ki zot reussi gagne sa combat-la! Kan enn zenfant dan enn famille chretien arrete servi Jéhovah, c’est vrai-mem enn ‘l’epreuve’ pou so bann parent ki finn essaye elevé li dan la verité.​—Prov. 17:⁠25.

“Pou ena enn grand tribulation”

16. Ki “tribulation” Jésus ti annoncé?

¹⁶ Mais, n’importe ki l’epreuve ou-soit tribulation ki nou gagné dan nou mariage ou-soit kan nou pé elevé bann zenfant, sa pou enn nanyin ditou comparé ar enn lot tribulation ki pou beaucoup pli grand. Dan prophetie ki Jésus ti donné lor so presence ek lor conclusion sa systeme-la, li ti dire: “Pou ena enn grand tribulation couma jamais pa finn ena depuis commencement le monde ziska zordi, non, ek ki pa pou ena encore.” (Mat. 24:​3, 21) Plitar, Jésus ti dire ki pou ena enn grand la foule ki pou reussi passe sa ‘grand tribulation-la.’ Mais avant ki le monde Satan fini net, li pou combatte enn dernier coute kont bann Témoins de Jéhovah ki vive en paix. Surement, sa pou enn lepok difficile pou nou tou​—bann adulte ek bann zenfant toulé-deux.

17. (a) Kifer nou kapav ena confiance kan nou pense l’avenir? (b) Ki bizin influence fason ki nou considere mariage ek gagne bann zenfant?

¹⁷ Selman, fodé pa nou peur plus ki bizin pou l’avenir. Bann parent ki ena la crainte pou Jéhovah kapav attann ki Jéhovah pou protege zot ensam avek zot jeune zenfant. (Lire Isaïe 26:​20, 21; Tseph. 2:​2, 3; 1 Cor. 7:​14) Mais asterla, fodé pa nou blié ki nou pé vive enn lepok critik ek sa bizin influence fason ki nou considere mariage ek gagne bann zenfant dan sa lepok la fin-la. (2 Pierre 3:​10-​13) Coumsa, ki nou enn celibataire ou-soit nou marié, ki nou ena zenfant ou non, nou pou amenn enn la-vie ki pou donne la gloire ek l’honneur Jéhovah ek congregation chretien.

Revision

• Kifer fodé pa ki bann jeune chretien pressé pou marié?

• Elevé enn zenfant, ki sa impliké?

• Kifer beaucoup chretien reste celibataire, ou-soit decidé pou pena zenfant si zot marié?

• Ki bann ‘l’epreuve’ bann parent chretien kapav gagné?

[Note]

[Zimage lor page 25]

Kifer li sage ki bann jeune chretien attann avant zot marié?

[Zimage lor page 26]

Enn mari kapav faire beaucoup pou aide so femme pou bien participé dan bann activité spirituel