Parole Jéhovah vivant

Point biblik interessant dan livre Isaïe—II

ISAÏE pé accompli so mission en tant ki prophete Jéhovah avek fidelité. Bann jugement ki li’nn annoncé kont royaume dix tribu Israël inn fini realisé. Asterla seki li ena pou dire concerne l’avenir Jérusalem.

La ville Jérusalem pou detruire ek so bann habitant pou vinn prisonnier. Mais la ville pa pou reste abandonné pou touletan. Apré enn certaine lé-temps, vrai l’adoration pou retabli. En gros sa-mem message ki ena dan Isaïe 36:1–66:24.a Beaucoup prophetie ki ena dan sa partie-la, pé konn zot l’accomplissement principal, ou-soit final, dan nou lepok ou-soit zot pou realisé dan enn l’avenir bien proche. Alors li dan nou l’interet ki nou examine seki sa bann chapitre-la dire. Dan sa partie livre Isaïe-la, ena aussi bann prophetie bien interessant concernant le Messie.

“GUETTÉ! LE TEMPS PÉ VINI”

(Isaïe 36:1–39:8)

Dan 14^eme l’année règne Hizqiya (732 a.n.l.), bann Assyrien attak Juda. Jéhovah promette ki Li pou defann Jérusalem. Menace bann Assyrien arreté kan enn ange Jéhovah li tousel touye 185,000 soldat assyrien.

Hizqiya tombe malade. Jéhovah reponn so la-priere ek gueri li, ek Li ajoute 15 an encore ar so la-vie. Kan le roi Babylone envoye so bann representant pou felicite li, sans ki li bien reflechi, Hizqiya montré zot tou so bann tresor. Isaïe faire Hizqiya konn enn message ki sorti kot Jéhovah ek ki dire: “Guetté! Le temps pé vini, ek bann dimoune pou prend tou seki dan to lakaz ek seki to bann ancetre inn ramassé ziska zordi, ek vrai-mem zot pou amenn sa Babylone.” (Isaïe 39:5, 6) Sa prophetie-la ti realisé enn tipé plus ki 100 an plitar.

Reponse pou bann question biblik:

38:8—Ki ti été sa “bann marche” kot l’ombrage ti reculé-la? Dan huitieme siecle a.n.l., dan l’Égypte ek dan Babylone, bann dimoune ti pé servi cadran solaire, enn system kot ti kapav suive mouvement soleil pou konn l’heure. Alors li possible ki Ahaz, papa Hizqiya, ti ena enn cadran coumsa, ek ki bann marche ti kapav bann different position ki ti ena lor la. Kitfois aussi ti ena enn l’escalier dan palais ek a coté l’escalier-la, ti ena enn colonne. Li possible ki l’ombrage sa colonne-la ti apparette doucement-doucement lor bann marche l’escalier, ek sa ti faire koné ki l’heure ti été.

Bann leson pou nou:

36:2, 3, 22. Shebna ki ti en charge palais le roi ti perdi so position. Mais li ti contigne servi le roi en tant ki secretaire sa dimoune ki ti remplace li-la. (Isaïe 22:15, 19) Si pou kit raison, nou perdi certain responsabilité dan l’organisation Jéhovah, eski nou pa bizin contigne servi Bondié dan n’importe ki place kot Li mette nou?

37:1, 14, 15; 38:1, 2. Kan nou dan difficulté, li bon ki nou tourne-nou vers Jéhovah dan la priere ek ki nou mette tou nou confiance dan Li.

37:15-20; 38:2, 3. Kan bann Assyrien ti pé menace pou attak Jérusalem, Hizqiya ti tracassé surtout parski sa ti pou sali nom Jéhovah si bann Assyrien ti reussi prend Jérusalem. Kan li ti koné ki li ti pou mort a cause so maladie, Hizqiya pa ti tracassé zis pou li. Seki ti pli fatigue so l’esprit, c’est ki li ti pé al mort sans laisse enn heritier, ek a cause sa ti pou nepli ena descendant le roi David pou contigne regné. Li ti aussi tracassé kisannla ti pou dirige sa la-guerre kont bann Assyrien-la. Pareil couma Hizqiya, fodé ki pou nou, sanctification nom Jéhovah ek realisation so projet pli important ki nou prop delivrance.

38:9-20. Sa cantik ki Hizqiya ti chanté-la montré nou ki dan la vie, nanyin pa pli important ki possibilité ki nou ena pou loué Jéhovah.

“POU RECONSTRUIRE LI”

(Isaïe 40:1–59:21)

Dé-suite apré ki li’nn annoncé ki Jérusalem pou detruire ek ki so bann habitant pou al en captivité dan Babylone, Isaïe prophetise lor retablissement Jérusalem. (Isaïe 40:1, 2) Dan Isaïe 44:28, nou lire: “Pou reconstruire li [Jérusalem].” Pou sarié bann zidole bann bondié Babylone couma “bann bagage.” (Isaïe 46:1) Babylone pou tombé. Tousala vrai-mem arrivé 200 an plitar.

Jéhovah pou etabli so serviteur couma “la lumiere pou bann nation.” (Isaïe 49:6) “Le ciel” Babylone, setadir so bann dirigeant, pou “fané ek pou disparette couma la fumée,” ek so peuple “pou mort couma enn moustik”; mais ‘tifi Sion ki prisonnier pou tire bann la-chaine ki serre so licou.’ (Isaïe 51:6; 52:2) Jéhovah dire avek bann ki vinn vers Li ek ki ecoute Li: “Sans hesité mo pou faire enn l’alliance avek zot, ki pou dure pou touletan concernant tou l’amour fidel ki durable, ki mo’nn manifesté envers David.” (Isaïe 55:3) Kan nou vive en accord avek seki Bondié demandé, sa faire nou “trouve enn grand plaisir en Jéhovah.” (Isaïe 58:14) Parkont, peché bann dimoune ‘faire enn separation entre zot ek zot Bondié.’—Isaïe 59:2.

Reponse pou bann question biblik:

40:27, 28—Kifer Israël ti dire: “Seki’nn arrive moi finn reste cachiette devant Jéhovah, ek mo Bondié pa pé faire la justice pou moi”? Kitfois certain Juif ki ti dan Babylone ti pensé ki Jéhovah pa ti pé trouve sa bann l’injustice ki ti pé arrive zot-la. Jéhovah ti rappel zot ki Babylone pa trop loin pou Createur la terre, ki pa ni fatigué ni perdi la force.

43:18-21—Kifer Jéhovah ti demann bann ki ti sorti en exil pou ‘pa rappel bann kitsoz avant’? Sa pa vedir ki zot ti bizin blié seki Jéhovah ti faire pou delivré zot dan le passé. Plutot, Jéhovah ti envie ki zot loué Li a cause “enn nouveau kitsoz” ki zot ti pou vive, couma par exemple zot voyage ziska Jérusalem ki ti pou passe sans problem, kitfois par enn chemin dan desert ki pli direct. “Enn grand la-foule” ki sorti dan “la grande tribulation” pou aussi ena bann nouveau raison personnel pou glorifié Jéhovah.—Révélation 7:9, 14.

49:6—Couma eski le Messie, li enn ‘la-lumiere pou bann nation,’ alors ki li ti preché zis avek peuple Israël? C’est a cause seki ti arrivé apré la mort Jésus. La Bible applik Isaïe 49:6 ar so bann disciple. (Actes 13:46, 47) Zordi bann chrétien oint ki gagne l’aide avek enn grand la-foule adorateur Jéhovah, zot enn ‘la-lumiere pou bann nation,’ parski zot eclaire bann dimoune “ziska dan boute la terre.”—Matthieu 24:14; 28:19, 20.

53:10—Couma eski Jéhovah inn prend plaisir pou crase so Garson? Jéhovah ki enn Bondié ki ena sentiment ek ki comprend lezot, inn bizin ressenti enn grand douleur kan Li’nn trouve so Garson ki Li content souffert. Mais mem-sa, Li’nn prend plaisir dan l’obeissance Jésus ek dan tou seki so bann souffrance ek so la-mort ti pou accompli.—Proverbes 27:11; Isaïe 63:9.

53:11—Grace a ki connaissance le Messie ‘pou faire ki beaucoup dimoune pou consideré couma juste’? Sa connaissance-la, c’est connaissance ki Jésus ti gagné kan li ti né lor la terre, li ti vinn enn zom ek kan li ti souffert ziska la mort alors ki li pa ti merite sa. (Hébreux 4:15) C’est coumsa ki li’nn paye enn ranson ki ti necessaire pou aide bann chrétien oint ek la grande foule pou ki considere zot couma bann dimoune juste devant Bondié.—Romains 5:19; Jacques 2:23, 25.

56:6—Kisannla “bann etranger” ek dan ki fason zot ‘saisi l’alliance Jéhovah’? “Bann etranger” c’est “bann lezot brebis” ki Jésus ena. (Jean 10:16) Zot saisi nouveau l’alliance kan zot obeir bann la-loi ki ena enn rapport avek sa l’alliance-la, zot cooperé avek tou bann disposition ki prend a travers sa l’alliance-la, zot gagne mem nourriture spirituel ki bann chrétien oint, ek zot soutenir bannla dan predication ek l’activité pou faire bann disciple.

Bann leson pou nou:

40:10-14, 26, 28. Jéhovah, Li fort ek Li ena la douceur, Li tout-puissant ek Li ena pli grand sagesse, ek so l’intelligence tellement grand ki nou pa kapav comprend.

40:17, 23; 41:29; 44:9; 59:4. Bann l’alliance politik ek bann zidole zot “bann kitsoz ki pa réel.” Li pa servi nanyin pou mette nou confiance ladan.

42:18, 19; 43:8. Kan nou pa prend compte Parole Bondié ek nou refuse ecoute l’enseignement ki Li donne nou par “l’esclave fidel et avisé,” nou vinn bann dimoune ki aveugle ek sourde lor plan spirituel.—Matthieu 24:45.

43:25. Jéhovah efface nou bann peché a cause Li-mem. Li pou libere nou ar l’esclavage peché ek la mort ek Li pou donne nou la vie eternel. Mais sanctification so nom passe avant tou sa.

44:8. Nou ena soutien Jéhovah, ek Jéhovah Li stable ek solid couma enn roche. Fodé jamais nou peur pou rann temoignage lor so nature en tant ki Bondié.—2 Samuel 22:31, 32.

44:18-20. L’idolatrie sa li enn signe ki nou leker inn vinn mauvais. Nanyin pa gagne droit prend place Jéhovah dan nou leker.

46:10, 11. Capacité ki Jéhovah ena pou faire ‘so volonté realisé,’ sa li montré ki pena okenn doute lor so nature en tant ki Bondié.

48:17, 18; 57:19-21. Si nou compte lor Jéhovah pou nou gagne la delivrance, si nou vinn proche avek Li, ek si nou prend compte so commandement, nou la-paix pou vinn beaucoup, autant ki bann de l’eau enn grand la-riviere ki pé coulé ek nou bann action juste autant ki bann vague la mer. Bann ki pa prend Parole Bondié okenn compte, zot couma “la mer kan li mauvais.” Zot pena okenn la-paix.

52:5, 6. Apré seki ti’nn arrive bann Israélite, bann Babylonien ti ena tort kan zot ti croire ki vrai Bondié ti faible. Zot pa ti comprend ki Jéhovah ti’nn laisse so peuple vinn esclave parski Li ti en colere avek zot. Kan lezot gagne bann malheur, li bon ki nou pa pressé pou tire bann conclusion lor raison pou kifer zot pé gagne bann malheur.

52:7-9; 55:12, 13. Nou ena au moins trois raison pou ena la joie kan nou preché ek faire bann disciple. Pou bann ki ena l’humilité ek ki faim lor plan spirituel, nou lipié joli. Nou trouve Jéhovah “lizié dan lizié,” setadir nou ena enn relation bien proche avek Li. Nou aussi prosperé lor plan spirituel.

52:11, 12. Pou nou qualifié pou sarié “bann kitsoz [ki servi dan temple] Jéhovah” (bann disposition ki Li prend pou nou service sacré), nou bizin pur lor plan spirituel ek moral.

58:1-14. Kan nou faire kitsoz zis pou faire croire ki nou ena la foi ek ki nou juste, sa li dan vide. Bann vrai adorateur bizin touletan sincere kan zot montré zot l’attachement pou Bondié ek zot l’amour pou zot frere.—Jean 13:35; 2 Pierre 3:11.

59:15b-19. Jéhovah observe seki bann dimoune faire ek Li pou faire kitsoz dan l’heure ki Li, Li decidé.

LI “BIZIN VINN ENN JOLI COURONNE”

(Isaïe 60:1–66:24)

Isaïe 60:1 annonce retablissement vrai l’adoration dan le temps passé ek aussi dan nou lepok. Li dire: “Levé femme, envoye la lumiere partout, parski to la-lumiere finn arrivé, ek la gloire Jéhovah finn brillé lor toi.” Sion “bizin vinn enn joli couronne dan la main Jéhovah.”—Isaïe 62:3.

Isaïe prié Jéhovah pou bann Israélite ki pou repenti pendant ki zot en exil dan Babylone. (Isaïe 63:15–64:12) Apré ki li’nn koz lor difference ki ena entre bann vrai serviteur Jéhovah ek bann ki fausse, Isaïe dire couma Jéhovah pou beni bann ki servi Li.—Isaïe 65:1–66:24.

Reponse pou bann question biblik:

61:8, 9—Ki été ‘l’alliance ki pou dure pou touletan,’ ek kisannla ki ‘sa descendance-la’? C’est nouveau l’alliance ki Jéhovah inn faire avek bann chrétien oint. ‘Sa descendance-la,’ c’est “lezot brebis,” setadir bann million dimoune ki prend compte zot message.—Jean 10:16.

63:5—Couma grand colere Bondié soutenir Li? Grand colere Jéhovah, li enn colere ki juste mais c’est enn sentiment ki Li controlé. Sa soutenir Li ek pousse Li pou applik so jugement ki juste.

Bann leson pou nou:

64:6. Bann dimoune imparfait pa kapav sauve zot-mem. Nou kapav faire bann action ki juste mais sa pa pou couvert nou bann peché. Sa bann action-la pena plus valeur ki bann linge sale.—Romains 3:23, 24.

65:13, 14. Jéhovah beni so bann serviteur ki fidel; Li donne zot seki zot bizin lor plan spirituel en abondance.

66:3-5. Jéhovah pa content bann dimoune hypocrite.

“Rejouir ek reste dan la joie”

Bann prophetie lor retablissement ti bizin vrai-mem encourage bann Juif fidel ki ti exilé dan Babylone! Jéhovah ti dire: “Rejouir, ek reste dan la joie pou touletan dan seki mo pé crée. Parski ala mo pé crée Jérusalem pou vinn enn cause pou la joie ek so peuple enn cause pou rejouir.”—Isaïe 65:18.

Nou aussi nou pé vive enn lepok kot noirté enveloppe la terre ek kot bann nation zot dan enn brouillard epais. (Isaïe 60:2) Nou pé vive “bann lepok critik ki difficile pou supporté.” (2 Timothée 3:1) Alors, message delivrance ki sorti kot Jéhovah ek ki trouve dan livre Isaïe, li enn grand l’encouragement pou nou.—Hébreux 4:12.

[Note]

[Zimage, page 4]

Eski ou koné pou ki raison principal Hizqiya ti prié Jéhovah pou sauve li ar bann Assyrien?

[Zimage, page 7]

“Ala zot joli lor montagne, lipié enn kikenn ki amenn enn bon nouvel!”