Guetté! Serviteur ki Jéhovah inn approuvé

“Guetté! Mo serviteur . . . ki mo nâme inn approuvé!”—IS. 42:1.

 1. Ki peuple Bondié encouragé pou faire, surtout ki Mémorial pé kosté, ek kifer?

ALORS ki Mémorial la mort Jésus pé kosté, en tant ki peuple Bondié, li bon ki nou suive conseil l’apotre Paul pou “fixé nou lizié lor Jésus, Agent principal nou la foi ek sa Kikenn ki faire nou la foi vinn parfait-la.” Paul ti ajouté: “Oui, reflechi bien lor sa kikenn ki’nn endure sa bann qualité kozé ki contraire-la, ki bann dimoune ki faire peché inn dire kont zot prop l’interet, pou ki zot pa fatigué ek zot pa perdi courage.” (Héb. 12:2, 3) Kan nou examine bien l’exemple fidelité Christ ki finalement inn donne so la vie en sacrifice, sa pou aide bann chretien oint ek zot bann compagnon, bann membre lezot brebis, pou contigne servi Jéhovah avek fidelité ek pou “pa perdi courage.”—Compare avek Galates 6:9.

 2. Ki nou kapav aprann ar bann prophetie Isaïe ki concerne Garson Bondié?

² Jéhovah ti inspire prophete Isaïe pou ecrire plusieurs prophetie ki ti ena enn rapport direct avek So Garson. Sa bann prophetie-la pou aide nou pou “fixé nou lizié lor [Christ] Jésus, Agent principal nou la foi ek sa Kikenn ki faire nou la foi vinn parfait-la.”a Zot faire nou konn so personnalité, bann souffrance ki li’nn gagné, ek couma Jéhovah ti pou eleve li pou donne li la gloire en tant ki nou le Roi ek nou Sauveur. Sa bann prophetie-la pou faire nou comprend pli bien tou seki Mémorial representé, ek sa l’année-la nou pou celebré Mémorial jeudi 9 avril, apré couché soleil.

Nou decouvert kisannla sa serviteur-la

3, 4. (a) Dan livre Isaïe, sa mot ‘serviteur-la’ applik ar kisannla? (b) Couma la Bible faire nou koné kisannla sa Serviteur ki mentionné dan Isaïe chapitre 42, 49, 50, 52, ek 53?

³ Dan livre Isaïe, plusieurs fois nou trouve mot “serviteur.” Parfois sa mot-la applik ar prophete Isaïe li-mem. (Is. 20:3; 44:26) Ena lezot fois, li applik ar nation Israël en entier, ki la Bible appel aussi Jacob. (Is. 41:8, 9; 44:1, 2, 21) Mais kisannla sa Serviteur ki mentionné dan bann prophetie extraordinaire ki trouve dan Isaïe chapitre 42, 49, 50, 52, ek 53? Bann l’Écritures grecques chrétiennes montré dan enn fason bien clair kisannla sa Serviteur Jéhovah ki mentionné dan sa bann chapitre-la. Li interessant pou noté ki sa fonctionnaire éthiopien ki livre Actes mentionné-la, ti pé lire enn parmi sa bann prophetie-la kan l’esprit saint ti dirige Philippe l’evangelisateur pou al koz ar li. Sa fonctionnaire-la ti’nn fek lire sa passage ki zordi nou kapav trouvé dan Isaïe 53:7, 8 ek li ti demann Philippe: “S’il te plait, dire moi, lor kisannla sa prophete-la pé dire sa? Lor li-mem ou-soit lor enn lot dimoune?” Desuite Philippe ti explik li ki Isaïe ti pé koz lor le Messie, Jésus.—Actes 8:26-35.

⁴ Alors ki Jésus ti encore enn tibaba, l’esprit saint ti pousse Siméon, enn zom juste pou dire ki ‘Jésus, sa tibaba-la’ ti pou vinn “enn la lumiere ki pou tire voile lor bann nation,” pareil couma Isaïe 42:6 ek 49:6 ti annoncé. (Luc 2:25-32) En plus, dan la nuit kan ti juge Jésus, maniere ki so bann l’ennemi ti traite li, ti bien abaisse li ek sa aussi ti annoncé dan prophetie Isaïe 50:6-9. (Mat. 26:67; Luc 22:63) Apré la Pentecôte l’an 33 nou lepok, l’apotre Pierre ti dire dan enn fason bien clair ki c’est Jésus ki sa “Serviteur” Jéhovah-la. (Is. 52:13; 53:11; lire Actes 3:13, 26.) Ki nou kapav aprann ar sa bann prophetie ki koz lor Messie-la?

Jéhovah forme so Serviteur

 5. Ki formation sa Serviteur-la ti gagné?

⁵ Enn parmi bann prophetie Isaïe ki concerne sa Serviteur Bondié-la faire nou comprend ki ti ena enn relation bien proche entre Jéhovah ek so Garson premier-né, kan sa Garson-la ti pé vive dan le ciel. (Lire Isaïe 50:4-9.) Sa Serviteur-la li-mem faire nou koné ki Jéhovah ti pé forme li touletan, li ti dire: “Li ouvert mo zoreille pou mo kapav tendé pareil couma bann ki’nn enseigné [“bann disciple,” note].” (Is. 50:4) Pendant tou sa le temps-la, Serviteur Jéhovah ti ecoute so Papa ek ti aprann ar Li, ek sa ti faire li vinn enn disciple ki soumette. Li ti ena vrai-mem enn grand privilege: Createur l’univers Li-mem ki’nn enseigne li!

 6. Couma sa Serviteur-la ti montré ki li ena enn soumission parfait pou so Papa?

⁶ Dan sa prophetie-la, sa Serviteur-la appel so Papa “Souverain Seigneur Jéhovah.” Sa montré ki li ti reconette ki Jéhovah Li-mem Li Souverain l’univers. Pou montré ki li ena enn soumission parfait pou so Papa, li ti dire: “Souverain Seigneur Jéhovah Li-mem inn ouvert mo zoreille, ek moi mo pa’nn rebellé. Mo pa’nn tourne dan enn lot direction.” (Is. 50:5) Li ti “vinn couma enn zouvrier qualifié a coté” Jéhovah dan creation l’univers materiel ek dan creation bann dimoune. Sa “zouvrier qualifié[-la]” ti “touletan dan la joie devant [Jéhovah], [li] ti dan la joie concernant bann place kot dimoune resté lor So la terre, ek bann kitsoz avek ki [Garson Bondié] ti bien attaché, ti avek bann dimoune.”—Prov. 8:22-31.

 7. Ki montré ki sa Serviteur-la ti ena confiance dan soutien so Papa pendant so bann l’epreuve?

⁷ Sa formation ki sa Serviteur-la inn gagné ek so l’amour pou bann dimoune inn servi li kan li ti vinn lor la terre ek kan li ti gagne enn grand l’opposition. Mem kan li ti gagne enn grand persecution, li ti contigne trouve la joie pou faire volonté so Papa. (Ps. 40:8; Mat. 26:42; Jean 6:38) Pendant bann l’epreuve ki li’nn gagné lor la terre, Jésus ti touletan sur ki li ti ena faveur ek soutien so Papa. Pareil couma prophetie Isaïe ti annoncé, Jésus ti kapav dire: “Sa Kikenn ki dire ki mo juste-la, Li pré. Kisannla ki kapav laguerre ar moi? . . . Guetté! Souverain Seigneur Jéhovah Li-mem pou aide moi.” (Is. 50:8, 9) Pena doute, Jéhovah ti aide so fidele Serviteur toute longue so ministere lor la terre, pareil couma enn lot prophetie Isaïe annoncé.

Ministere sa Serviteur-la lor la terre

 8. Ki preuve nou ena ki Jésus ti ‘sa kikenn ki Jéhovah ti’nn choisir-la,’ couma Isaïe 42:1 ti annoncé?

⁸ La Bible raconte seki ti passé kan Jésus ti prend bapteme en l’an 29 nou lepok: “L’esprit saint ti desann lor li . . . ek enn la voix ti sorti dan le ciel ek ti dire: ‘To mo Garson ki mo bien content; mo finn approuve toi.’ ” (Luc 3:21, 22) Coumsa, Jéhovah ti faire koné dan enn fason bien clair kisannla sa ‘kikenn ki Li ti’nn choisir’ ki mentionné dan prophetie Isaïe. (Lire Isaïe 42:1-7.) Pendant so ministere lor la terre, Jésus ti realise sa prophetie-la dan enn fason extraordinaire. Dan so l’Evangile, Matthieu ti cite passage Isaïe 42:1-4 ek ti applik sa ar Jésus.—Mat. 12:15-21.

9, 10. (a) Couma Jésus ti realise Isaïe 42:3 pendant so ministere? (b) Couma Christ ti “amenn la justice,” ek kan eski li pou “etabli la justice lor la terre”?

⁹ Bann chef juif ti meprise bann ti-dimoune ki ti parmi zot. (Jean 7:47-49) Zot ti traite le peuple dan enn fason bien dur; nou ti kapav compare le peuple ar ‘bann roseau ki’nn crasé,’ ek ar ‘bann la meche’ ki preské nepli ena la flamme. Pourtant Jésus li, li ti manifesté compassion pou bann dimoune misere ek pou bann ki dan la peine. (Mat. 9:35, 36) Li ti faire zot enn l’invitation encourageant: “Vinn vers moi, zot tou ki pé rinté ek ki ena fardeau lor zot, ek moi mo pou reconforte zot.” (Mat. 11:28) En plus, Jésus ti “amenn la justice,” kan li ti enseigne bann principe Jéhovah concernant le bien ek le mal. (Is. 42:3) Li ti montré aussi ki bizin applik la Loi Bondié dan enn fason raisonnable ek avek misericorde. (Mat. 23:23) Jésus ti aussi manifesté la justice kan li ti preche avek bann dimoune riche ek misere toulé-deux, sans ki li ti’nn fini juge zot a l’avance.—Mat. 11:5; Luc 18:18-23.

¹⁰ Prophetie Isaïe ti annoncé aussi ki ‘sa kikenn ki Jéhovah ti choisir-la’ ti pou “etabli la justice lor la terre.” (Is. 42:4) C’est seki li pou faire bientot kan, en tant ki le Roi dan Royaume messianik, li pou detruire tou bann gouvernement ek pou remplace zot par so domination ki juste. Li pou etabli enn le monde nouveau kot “pou ena la justice.”—2 Pierre 3:13; Dan. 2:44.

“Enn la lumiere” ek “enn l’alliance”

11. Dan ki sens Jésus ti “enn la lumiere pou bann nation” dan premier siecle, ek couma li encore toujours sa la lumiere-la zordi?

¹¹ Pou realise prophetie Isaïe 42:6, Jésus ti vrai-mem montré ki li “enn la lumiere pou bann nation.” Pendant so ministere lor la terre, li ti amenn la lumiere spirituel surtout pou bann Juif. (Mat. 15:24; Actes 3:26) Mais Jésus ti dire: “Mo-mem la lumiere le monde.” (Jean 8:12) Li ti vinn enn la lumiere pou bann Juif ek aussi pou bann lezot nation pa zis kan li ti eclaire zot lor plan spirituel mais aussi kan li ti donne so la vie parfait en sacrifice pou tou l’humanité. (Mat. 20:28) Apré so resurrection, Jésus ti donne so bann disciple enn mission: zot ti bizin vinn so bann temoin “ziska dan region pli loin lor la terre.” (Actes 1:8) Pendant zot ministere, Paul ek Barnabas ti cite l’expression “la lumiere pou bann nation” ek ti applik sa ar l’activité predication ki zot ti pé faire parmi bann non-Juif. (Actes 13:46-48; compare avek Isaïe 49:6.) Sa l’activité-la encore pé faire zordi parski bann frere oint Jésus ki lor la terre ek zot bann compagnon pé preche la bonne nouvelle ek pé aide bann dimoune pou ena la foi en Jésus, ki enn “la lumiere pou bann nation.”

12. Dan ki sens Jéhovah ti donne so Serviteur “couma enn l’alliance pou bann peuple”?

¹² Dan sa mem prophetie-la, Jéhovah ti dire so Serviteur ki Li ti choisir: “Mo pou protege toi ek mo pou donne toi couma enn l’alliance pou bann peuple.” (Is. 42:6) Satan ti contigne faire bann zeffort pou detruire Jésus ek pou empeche li fini so ministere lor la terre, mais Jéhovah ti protege li ziska ki arrive ler ki ti’nn fixé pou li mort. (Mat. 2:13; Jean 7:30) Apré sa, Jéhovah ti ressuscite li ek ti donne li couma “enn l’alliance,” setadir couma enn garantie, pou bann dimoune lor la terre. Sa promesse officiel-la donne enn garantie ki sa Serviteur fidele Bondié-la ti pou toujours couma “enn la lumiere pou bann nation,” ek ki li ti pou delivré bann ki dan noirté lor plan spirituel.—Lire Isaïe 49:8, 9.b

13. Dan ki fason Jésus ti delivré “bann ki pé assizé dan noirté” pendant so ministere lor la terre, ek couma li pé contigne faire sa?

¹³ En accord avek sa garanti-la, sa Serviteur ki Jéhovah ti choisir-la, ti pou “ouvert lizié bann aveugle, tire enn prisonnier dan cachot,” ek delivré “bann ki pé assizé dan noirté.” (Is. 42:7) Pendant so ministere lor la terre, Jésus ti faire sa kan li ti denonce bann fausse tradition ki bann religion ti pé enseigné ek kan li ti preche la bonne nouvelle lor Royaume Bondié. (Mat. 15:3; Luc 8:1) C’est coumsa ki li ti’nn delivré bann Juif ar l’esclavage spirituel ek zot ti vinn so bann disciple. (Jean 8:31, 32) Li ti faire pareil pou plusieurs million non-Juif. Li ti donne l’ordre so bann disciple pou “allé ek faire bann disciple parmi bann dimoune dan tou bann nation” ek li ti promette ki li pou avek zot “ziska la fin sa systeme-la.” (Mat. 28:19, 20) Depuis so position dan le ciel, Jésus Christ pé dirige sa l’activité ki pé faire partout lor la terre entier-la.

Jéhovah ti eleve so “Serviteur”

14, 15. Kifer ek couma Jéhovah inn eleve so Serviteur?

¹⁴ Dan enn lot prophetie concernant so Serviteur messianik, Jéhovah dire: “Guetté! Mo serviteur pou agir avek discernement. Li pou dan enn position bien haute, oui, Bondié pou eleve li ek li pou gagne enn grand la gloire.” (Is. 52:13) Jéhovah ti eleve so Garson parski Jésus ti soumette avek fidelité ar so souveraineté ek li ti reste fidele dan pli pire l’epreuve ki li’nn gagné dan so la vie.

¹⁵ L’apotre Pierre ti ecrire concernant Jésus: “Li dan coté droite Bondié, parski li’nn al dan le ciel; bann ange, bann l’autorité ek bann puissance inn soumette ar li.” (1 Pierre 3:22) L’apotre Paul aussi ti ecrire: “Li ti abaisse li-mem, ek li ti obeir ziska la mort, oui, la mort lor enn poteau souffrance. Pou sa raison-la-mem ki Bondié finn donne li enn pli grand position ek finn content pou donne li enn nom ki pli grand ki tou lezot nom, pou ki au nom Jésus tou genou pliyé dan le ciel ek lor la terre ek enba la terre, ek dimoune ki koz tou langage reconette en publik ki Jésus Christ, li-mem Seigneur pou la gloire Bondié, nou Papa.”—Phil. 2:8-11.

16. Couma Jésus ti “gagne enn grand la gloire” en 1914, ek ki li’nn faire depuis sa?

¹⁶ En 1914, Jéhovah ti eleve Jésus dan enn position encore pli haute. Jésus ti “gagne enn grand la gloire” kan Jéhovah ti faire li vinn le roi dan Royaume messianik. (Ps. 2:6; Dan. 7:13, 14) Depuis sa, Christ inn sorti pou al “regne parmi [so] bann l’ennemi.” (Ps. 110:2) Pou commencé, li ti faire Satan ek so bann demon soumette, kan li ti jette zot dan voisinage la terre. (Rév. 12:7-12) Apré sa, dan so role en tant ki Grand Cyrus, Christ ti delivré le reste so bann frere oint ki encore lor la terre, ar l’influence “Babylone la Grande.” (Rév. 18:2; Is. 44:28) Li’nn dirige l’activité predication dan le monde entier ek sa inn permette pou rassemblé “le reste” so bann frere spirituel ek apré, plusieurs million “lezot brebis,” ki soutenir sa ‘ti troupeau-la’ avek fidelité.—Rév. 12:17; Jean 10:16; Luc 12:32.

17. Ki nou finn aprann ziska ler ar l’etude bann prophetie Isaïe concernant sa ‘serviteur-la’?

¹⁷ Pena doute ki l’etude sa bann prophetie extraordinaire ki sorti dan livre Isaïe-la inn augmente nou reconnaissance pou nou le Roi ek nou Sauveur, Christ Jésus. Soumission ki li’nn manifesté couma enn garson pendant so ministere lor la terre montré bien ki li’nn gagne enn formation ar so Papa avant li vinn lor la terre. Li’nn montré ki li enn “la lumiere pou bann nation” par so ministere, ek par l’activité predication ki li’nn dirigé ziska zordi. Couma nou pou trouvé dan prochain lartik, enn lot prophetie concernant sa Serviteur messianik-la montré ki li ti pou souffert ek li ti pou donne so la vie pou nou. Sa c’est bann kitsoz lor ki nou bizin “reflechi bien” alors ki Mémorial so la mort pé kosté.—Héb. 12:2, 3.

[Note]

Revision

• Kisannla sa “serviteur” ki mentionné dan bann prophetie Isaïe-la, ek couma nou konn sa?

• Ki formation sa Serviteur-la inn gagné ar Jéhovah?

• Dan ki sens Jésus li “enn la lumiere pou bann nation”?

• Couma sa Serviteur-la inn elevé bien haute?

[Zimage lor page 21]

Philippe ti montré dan enn fason bien clair ki sa “serviteur” ki mentionné par Isaïe-la ti Jésus, le Messie

[Zimage lor page 23]

Jésus, sa Serviteur ki Jéhovah ti choisir-la, ti montré compassion pou bann ki misere ek bann ki dan la peine

[Zimage lor page 24]

Jésus ti glorifié par so Papa ek li ti vinn le Roi dan Royaume messianik