Enn sel troupeau, enn sel berger

“Zot ki finn suive moi, zot aussi, zot pou assize lor douze trone, pou juge douze tribu Israël.”—MAT. 19:28.

 1. (a) Ki relation Jéhovah ti ena avek bann descendant Abraham? (b) Eski sa vedir ki Li pa ti prend compte ditou bann dimoune dan lezot nation?

JÉHOVAH ti content Abraham, a cause sa Li ti manifesté enn l’amour fidele envers so bann descendant. Pendant plus ki 15 siecle, Li ti considere nation Israël, bann descendant Abraham, couma peuple ki Li ti choisir, “so prop di-bien.” (Lire Deutéronome 7:6.) Eski sa vedir ki Jéhovah pa ti prend compte ditou bann dimoune dan lezot nation? Non. Pendant sa lepok-la, Jéhovah ti permette bann ki pa ti Israélite ek ki ti envie adore Li, pou forme partie dan sa nation ki Li ti choisir-la. Sa bann dimoune ki ti’nn converti-la, setadir sa bann prosélyte-la, ti consideré couma bann membre sa nation-la. Bann Israélite ti bizin traite bannla couma zot bann frere. (Lév. 19:33, 34) Sa bann dimoune-la zot, zot ti bizin obeir tou bann la loi Jéhovah.—Lév. 24:22.

 2. (a) Ki declaration etonnant Jésus ti faire? (b) Ki bann question sa faire nou posé?

² Pourtant, Jésus ti faire sa declaration etonnant-la ar bann Juif dan so lepok: “Pou rass royaume Bondié ar zot, ek pou donne sa enn nation ki pou rapporte bann fruit.” (Mat. 21:43) Kisannla ki ti pou forme sa nouveau nation-la, ek ki l’effet sa changement-la ena lor nou zordi?

Sa nouveau nation-la

3, 4. (a) Couma l’apotre Pierre ti identifié sa nouveau nation-la? (b) Kisannla ki forme sa nouveau nation-la?

³ L’apotre Pierre ti faire nou koné kisannla ki sa nouveau nation-la. Li ti ecrire bann chretien dan so lepok: “Zot ‘enn race ki Bondié finn choisir, enn groupe pretre ki pou vinn le roi, enn nation saint, enn peuple ki pou vinn enn di-bien special, pou ki zot annonce bann grand qualité’ sa kikenn ki finn appel zot pou tire zot dan noirté-la ek finn faire zot vinn dan so la lumiere extraordinaire.” (1 Pierre 2:9) Pareil couma ti annoncé, bann Juif ki ti accepté Jésus couma le Messie ti bann premier membre sa nouveau nation-la. (Dan. 9:27a; Mat. 10:6) Plitar, beaucoup dimoune ki pa ti bann Israélite zot aussi zot ti forme partie dan sa nouveau nation-la. C’est seki Pierre ti dire: “Avant, zot pa ti enn peuple, mais asterla zot le peuple Bondié.”—1 Pierre 2:10.

⁴ Mais ar kisannla Pierre ti pé kozé? Dan commencement so lettre, li dire: “[Bondié] finn donne nou enn nouveau naissance pou enn l’esperance vivant, grace a resurrection Jésus Christ parmi bann mort, pou nou gagne enn l’heritage ki pa kapav pourri, ni vinn impur, ni fletri. Finn reserve sa pou zot dan le ciel.” (1 Pierre 1:3, 4) Alors, c’est bann chretien oint, ki ena l’esperance pou al dan le ciel, ki forme sa nouveau nation-la. C’est zot “Israël Bondié.” (Gal. 6:16) Dan enn vision, l’apotre Jean ti trouvé ki sa bann Israélite spirituel-la zot 144,000. “Finn acheté zot parmi bann dimoune, couma bann premier recolte pou Bondié ek pou l’Agneau” pou zot servi couma “bann pretre” ek pou zot “regne couma bann le roi avek [Jésus] pendant mille an.”—Rév. 5:10; 7:4; 14:1, 4; 20:6; Jacq. 1:18.

Eski lezot aussi concerné?

 5. (a) Ar kisannla l’expression “Israël Bondié” appliké? (b) Kifer mot “Israël” kapav ena aussi enn lot application?

⁵ Sa vedir ki dan Galates 6:16, l’expression “Israël Bondié” faire reference zis ar bann chretien oint. Mais eski ena bann passage dan la Bible kot nation Israël represente bann lezot chretien ki pa bann chretien oint? Nou trouve enn reponse dan bann parole ki Jésus ti dire so bann zapotre fidele: “Mo pé faire enn alliance avek zot, pareil couma mo Papa finn faire enn alliance avek moi pou enn royaume, pou ki zot mangé ek boire lor mo la table dan mo royaume, ek assize lor bann trone pou juge douze tribu Israël.” (Luc 22:28-30) Sa promesse-la pou realisé pendant “re-creation,” enn lepok kan tou kitsoz pou revinn nouveau, pendant Regne mille an Christ.—Lire Matthieu 19:28; note.

6, 7. Ar kisannla l’expression “douze tribu Israël” appliké dan contexte Matthieu 19:28 ek dan Luc 22:30?

⁶ Pendant Regne mille an, bann 144,000 pou servi couma bann le roi, bann pretre ek bann juge. (Rév. 20:4) Kisannla zot pou jugé ek lor kisannla zot pou regné? Matthieu 19:28 ek Luc 22:30 dire nou ki zot pou juge “douze tribu Israël.” Kisannla sa “douze tribu Israël[-la]” representé dan sa contexte-la? Zot represente tou bann ki ena l’esperance pou vive lor la terre—bann ki ena la foi dan sacrifice Jésus mais ki pa forme partie dan groupe bann pretre ek bann le roi. (Tribu Lévi pa ti forme partie dan la liste 12 tribu nation Israël.) Dan sa deux verset-la, 12 tribu Israël represente bann ki pou gagne bann benediction spirituel grace a service 144,000 pretre. Sa bann dimoune-la zot pa bann pretre mais zot forme partie zot aussi dan peuple Bondié ki content zot ek accepté zot. Li normal alors ki compare zot ar peuple Jéhovah ki ti existé dan le passé.

⁷ Sa corresponn bien avek vision ki l’apotre Jean ti trouvé. Apré ki li ti trouve 144,000 Israélite spirituel scellé dan enn fason permanent avant la grande tribulation, li ti trouve aussi enn “grand la foule” ki personne pa ti kapav compté, ki sorti “dan tou nation.” (Rév. 7:9) Sa bann dimoune-la pou traverse la grande tribulation vivant ek zot pou vive pendant Regne mille an Christ. La, plusieurs milliard ressuscité pou vinn joinde zot. (Jean 5:28, 29; Rév. 20:13) Tou sa bann dimoune-la pou forme “douze tribu Israël” symbolik ki Jésus ek so 144,000 associé pou jugé.—Actes 17:31; 24:15; Rév. 20:12.

 8. Couma bann l’evenement ki ti arrivé pendant jour Propitiation ti annonce relation ki ena entre 144,000 ek le reste l’humanité?

⁸ Bann evenement ki ti arrivé jour Propitiation, ki ti faire enn fois par an, ti represente lien ki ena entre bann 144,000 ek le reste l’humanité. (Lév. 16:6-10) Grand pretre ti bizin d’abord offert enn taureau couma enn sacrifice pou peché “pou li-mem ek pou so lakaz.” Sa vedir ki sacrifice Jésus applik d’abord pou so lakaz, setadir bann sous-pretre, bann ki pou servi avek li dan le ciel. Aussi, jour Propitiation, grand pretre ti offert deux bouc pou peché bann lezot Israélite. Dan sa contexte-la, bann pretre represente 144,000 ek le reste bann Israélite represente tou bann dimoune ki ena l’esperance pou vive lor la terre. Sa l’application-la montré ki l’expression “douze tribu Israël” ki mentionné dan Matthieu 19:28, pa represente bann pretre ki oint ek ki pou associé ar Jésus, mais tou bann lezot dimoune ki ena la foi dan sacrifice Jésus.a

 9. (a) Kisannla bann pretre dan vision ki Ézékiel ti gagné lor temple Jéhovah, representé? (b) Kisannla bann Israélite ki pa ti pretre, representé?

⁹ Anou examine enn lot l’exemple. Ézékiel ti gagne enn vision bien detaillé lor temple Jéhovah. (Ézék. chap. 40-48) Dan sa vision-la, bann pretre ti travail dan temple ek ti enseigne le peuple. Jéhovah ti aussi donne zot bann conseil ek ti corrige zot. (Ézék. 44:23-31) Dan mem vision, bann membre different tribu ti vinn adore Jéhovah ek ti offert Li bann sacrifice. (Ézék. 45:16, 17) Dan sa vision-la, bann pretre represente bann chretien oint, alors ki bann Israélite ki ti dan lezot tribu ki pa ti pretre, represente bann dimoune ki ena l’esperance pou vive lor la terre. Sa vision-la mette l’accent lor l’idée ki sa deux groupe-la travail dan l’unité ek ki bann pretre dirige vrai l’adoration.

10, 11. (a) Ki realisation bann parole Jésus nou finn trouvé? (b) Ki question nou kapav posé concernant bann lezot brebis?

¹⁰ Jésus ti koz lor bann “lezot brebis” ki pa ti pou dan mem “l’enclos” ki “ti troupeau” so bann disciple oint. (Jean 10:16; Luc 12:32) Li ti dire: “Sa bannla aussi, mo bizin amenn zot, ek zot pou ecoute mo la voix, ek zot pou vinn enn sel troupeau, enn sel berger.” Nou la foi inn vinn pli fort kan nou finn trouve realisation sa bann parole-la! Deux groupe dimoune finn rassemblé ensam—enn ti groupe bann chretien oint ek la grande foule lezot brebis. (Lire Zekaria 8:23.) Mem si dan enn fason symbolik lezot brebis pa servi dan la cour ki trouve endan, tout autour temple spirituel, zot servi Jéhovah dan la cour en dehors.

¹¹ Mais, si bann tribu ki pa ti pretre parfois ti represente bann membre lezot brebis, eski bann ki ena l’esperance pou vive lor la terre zot aussi zot bizin prend bann l’embleme ki passé pendant Mémorial? C’est sa question-la ki nou pou examiné asterla.

Nouveau l’alliance

12. Ki nouveau disposition Jéhovah ti annoncé?

¹² Jéhovah ti annoncé ki Li pou prend enn nouveau disposition pou so peuple kan Li ti dire: “Sa c’est l’alliance ki mo pou faire avek lakaz Israël apré sa bann jour-la. . . . Mo pou mette mo la loi dan zot, ek mo pou ecrire li dan zot leker. Oui, mo pou vinn zot Bondié, ek zot, zot pou vinn mo peuple.” (Jér. 31:31-33) Grace a sa nouveau l’alliance-la, promesse ki Jéhovah ti faire avek Abraham ti pou ena enn realisation rempli ar la gloire ek ti pou dure longtemps.—Lire Genèse 22:18.

13, 14. (a) Kisannla ki membre dan nouveau l’alliance? (b) Kisannla ki tire bann bienfait ar sa nouveau l’alliance-la? (c) Dan ki sens zot “tini [sa nouveau l’alliance-la] bien fort”?

¹³ Jésus ti koz lor sa nouveau l’alliance-la la nuit avant so la mort kan li ti dire: “Sa coupe-la represente nouveau l’alliance ki existé grace a mo di-sang, ki pou versé pou zot.” (Luc 22:20; 1 Cor. 11:25) Eski tou bann chretien forme partie dan sa nouveau l’alliance-la? Non. Certain, zot bann membre sa nouveau l’alliance-la, couma bann zapotre ki ti boire dan sa coupe-la sa soir-la.b Jésus ti faire aussi enn lot l’alliance avek zot pou regne ensam avek li dan so Royaume. (Luc 22:28-30) Zot pou ena pouvoir ensam avek Jésus dan so Royaume.—Luc 22:15, 16.

¹⁴ Ki nou kapav dire lor bann ki pou vive lor la terre enba so Royaume? Zot tire bann bienfait ar sa nouveau l’alliance-la. (Gal. 3:8, 9) Mem si zot pa bann membre, zot “tini [sa l’alliance-la] bien fort” kan zot soumette-zot ar so bann condition, pareil couma Jéhovah ti annoncé par prophete Isaïe: “Bann etranger ki finn joinde ensam avek Jéhovah pou servi Li ek pou content nom Jéhovah, pou ki zot vinn so bann serviteur, tou bann ki garde sabbat pou ki zot pa meprise sa ek ki tini mo l’alliance bien fort, oui, mo pou faire zot vinn lor mo montagne ki saint ek mo pou faire zot trouve la joie dan mo lakaz kot faire la priere.” Apré sa Jéhovah dire: “Parski pou appel mo lakaz enn lakaz kot faire la priere, pou tou bann peuple.”—Is. 56:6, 7.

Kisannla ki bizin prend bann l’embleme?

15, 16. (a) Ar ki privilege l’apotre Paul ti faire enn lien avek nouveau l’alliance? (b) Kifer bann ki ena l’esperance pou vive lor la terre pa prend bann l’embleme pendant Mémorial?

¹⁵ Bann ki dan nouveau l’alliance “ena franchise pou rente dan l’endroit sacré.” (Lire Hébreux 10:15-20.) Sa bann chretien-la bizin “gagne enn royaume ki pa kapav degringolé.” (Héb. 12:28) Alors, sa vedir ki zis bann ki pou le roi ek pretre dan le ciel avek Jésus Christ ki bizin boire dan sa “coupe” ki represente nouveau l’alliance-la. Bann ki membre dan sa nouveau l’alliance-la c’est zot ki pou marié avek l’Agneau. (2 Cor. 11:2; Rév. 21:2, 9) Tou bann lezot chretien ki present pou Mémorial zot assisté sa l’evenement-la avek respé en tant ki bann observateur ki pa prend bann l’embleme.

¹⁶ Paul aussi aide nou pou comprend ki bann ki ena l’esperance pou vive lor la terre pa prend bann l’embleme pendant Mémorial. Li ti dire bann chretien oint: “Parski chaque fois ki zot mange sa di-pain-la ek boire sa coupe-la, zot contigne annonce la mort nou Seigneur, ziska ki li vini.” (1 Cor. 11:26) Kan eski le Seigneur “vini?” C’est kan li pou vini pou prend bann dernier membre oint ki forme partie dan groupe la marié, pou al dan le ciel. (Jean 14:2, 3) Alors, li clair ki Mémorial ki nou faire toulé-l’année, c’est pa enn l’evenement ki pou contigne ena touletan. “Le reste” descendance la femme ki encore lor la terre pou contigne prend bann l’embleme pendant Mémorial ziska ki dernier membre gagne so recompense pou al dan le ciel. (Rév. 12:17) Mais, si bann ki pou vive pou touletan lor la terre ti bizin prend bann l’embleme Mémorial, lerla nou ti pou bizin contigne celebré Mémorial touletan.

“Vrai-mem zot pou vinn mo peuple”

17, 18. Couma prophetie Ézékiel 37:26, 27 inn realisé?

¹⁷ Jéhovah ti annonce l’unité ki pou ena parmi so bann serviteur par sa bann parole-la: “Mo pou faire avek zot enn l’alliance pou la paix; c’est enn l’alliance ki pou dure touletan ki pou ena avek zot. Oui, mo pou place zot la ek mo pou multiplié zot ek mo pou mette mo temple au milieu zot pou touletan. Ek mo tabernacle pou vrai-mem lor zot; ek pena doute ki mo pou vinn zot Bondié ek zot, zot pou vinn mo peuple.”—Ézék. 37:26, 27.

¹⁸ Tou bann serviteur Bondié kapav gagne bann bienfait ar realisation sa promesse extraordinaire-la, sa l’alliance pou la paix-la. Oui, Jéhovah inn garanti ki tou so bann serviteur ki obeir Li pou vive dan la paix. Nou kapav trouvé ki zot pé manifesté fruit l’esprit saint parmi zot. C’est parmi zot ki ena temple Bondié, ki ici represente vrai l’adoration ki pur. Zot inn vinn vrai-mem peuple Jéhovah parski zot finn abandonne tou forme l’idolatrie ek zot finn faire Jéhovah vinn sel Bondié ki zot adoré.

19, 20. (a) Kisannla ki forme partie dan bann ki Jéhovah appel “mo peuple”? (b) Ki nouveau l’alliance inn permette?

¹⁹ Sa ti enn grand privilege pou bann serviteur Jéhovah dan nou lepok pou trouve sa deux groupe-la rassemblé! Mem si zot pena l’esperance pou al vive dan le ciel, bann membre la grande foule ki pé augmenté, zot fiere pou collabore ensam avek bann ki ena sa l’esperance-la. Zot finn joinde-zot ensam avek Israël Bondié. Grace a sa, zot forme partie parmi bann ki Jéhovah appel “mo peuple.” Nou trouve realisation sa prophetie-la lor zot: “Oui, beaucoup nation pou joinde ensam avek Jéhovah sa jour-la, ek vrai-mem zot pou vinn mo peuple; ek mo pou reste au milieu toi.”—Zek. 2:11; 8:21; lire Isaïe 65:22; Révélation 21:3, 4.

²⁰ Jéhovah finn permette tousala arrivé grace a nouveau l’alliance. Plusieurs million etranger dan enn sens spirituel finn forme partie dan peuple ki ena faveur Jéhovah. (Mika 4:1-5) Zot bien decidé pou contigne tini sa l’alliance-la bien fort kan zot accepté so bann condition ek kan zot obeir so bann la loi. (Is. 56:6, 7) Sa l’attitude-la faire zot gagne bann grand benediction ek la paix pou touletan ensam avek bann membre l’Israël Bondié. Nou souhaité ki ou aussi ou gagne sa privilege-la—asterla ek pou touletan!

[Notes]

Eski ou rappel?

• Kisannla sa “douze tribu Israël” ki bann 144,000 pou jugé-la?

• Ki lien ena entre bann chretien oint ek lezot brebis par rapport ar nouveau l’alliance?

• Eski tou chretien bizin prend l’embleme jour Mémorial?

• Ki l’unité, la Bible ti annoncé pou ena dan nou lepok?