Zot finn trouve le Messie!

“Nou finn trouve le Messie.”​—JEAN 1:41.

 1. Ki ti pousse André pou dire: “Nou finn trouve le Messie”?

JEAN LE BAPTISTE ti pé deboute ensam avek deux parmi so bann disciple. A mesure ki Jésus ti pé vinn vers zot, Jean ti dire: “Guetté, l’Agneau Bondié!” André ek sa lot disciple-la ti suive Jésus desuite ek zot ti passe la journée avek li. Plitar, André ti al guette so frere Simon Pierre, ek ti annonce li sa nouvelle extraordinaire-la: “Nou finn trouve le Messie.” Apré sa, li ti amenn Pierre vers Jésus.​—Jean 1:35-41.

 2. Ki bienfait nou pou gagné kan nou pou contigne examine bann prophetie lor le Messie?

² A mesure ki le temps ti passé, André, Pierre ek lezot disciple ti pou ena beaucoup l’occasion pou etudié en profondeur bann l’Ecriture ek sans okenn doute, zot ti dire ki Jésus, ki ti sorti Nazareth, ti vrai-mem le Messie ki Bondié ti promette. Nou la foi dan Parole Bondié ek dan sa kikenn ki Bondié inn choisir pou vinn le Messie-la, pou vinn pli fort a mesure ki nou pou contigne examine bann prophetie lor le Messie.

’Guetté! To le Roi pé vini’

 3. Ki bann prophetie ti realisé kan Jésus ti rente dan Jérusalem couma enn le roi?

³ Le Messie ti pou rente dan Jérusalem kot bann dimoune ti pou accueillir li couma enn le roi. Prophetie Zekaria ti annoncé: “To bizin dan enn grand la joie, o toi tifi Sion! Pousse bann cri la victoire, o toi tifi Jérusalem! Guetté! To le roi li-mem pé vinn vers toi. Li juste, oui, li gagne la victoire; li ena l’humilité, ek li pé monte enn bourrik, enn zanimo adulte, garson enn femelle bourrik.” (Zek. 9:9) Enn psalmiste ti ecrire: “Beni sa Kikenn ki vinn au nom Jéhovah-la.” (Ps. 118:26) Selman, pou realise sa prophetie-la, enn grand la foule ti criyé avek la joie kan Jésus ti rente dan Jérusalem. Jésus pa ti dire sa la foule-la ki zot ti bizin faire. A mesure ki ou lire sa recit-la, faire vision ki ou la-bas ek ou pé tann sa la foule-la pé criyé.​—Lire Matthieu 21:4-9.

 4. Expliké couma Psaume 118:22, 23, ti realisé.

⁴ Mem si beaucoup ti pou rejette Jésus malgré bann preuve ki li ti le Messie, Jésus ena grand valeur pou Bondié. Pareil couma la Bible ti annoncé, bann dimoune ki ti refuse pou croire sa bann preuve-la, ti ’meprise Jésus ek ti considere li couma enn nanyin ditou.’ (Is. 53:3; Marc 9:12) Selman, Bondié ti inspire enn psalmiste pou dire: “Sa roche ki bann constructeur finn rejeté-la finn vinn roche principal ki dan coin. C’est Jéhovah Li-mem ki finn faire sa.” (Ps. 118:22, 23) Jésus ti cite sa texte-la avek so bann l’ennemi religieux, ek Pierre ti dire ki sa ti realisé lor Christ. (Marc 12:10, 11; Actes 4:8-11) Enn batiment ena enn roche principal dan enn coin so fondation. Jésus aussi ti vinn pareil couma “roche fondation ki dan coin” en rapport avek congregation. Bann dimoune ki pa ti ena la foi, ti rejette li couma le Messie, mais Bondié ti “choisir li, ek li ena valeur pou Li.”​—1 Pierre 2:4-6.

Enn disciple ti trahir li ek lezot ti abandonne li!

5, 6. Ki ti annoncé concernant trahison le Messie ek couma sa ti realisé?

⁵ Enn prophetie ti annoncé ki enn camarade ti pou trahir le Messie. David ti prophetisé: “Mais sa zom ki ti en paix avek moi-la, en ki mo ti ena confiance ek ki ti pé mange mo di-pain, finn leve so talon kont moi.” (Ps. 41:9) Dan sa lepok-la, enn dimoune ki ti mange di-pain avek enn lot dimoune, ti consideré couma so camarade. (Gen. 31:54) Alors, kan Judas Iscariote ti trahir Jésus, sa ti vrai-mem pli pire trahison ki ti ena. Jésus ti attire l’attention lor realisation bann parole David kan Li ti faire reference ar sa traitre-la, ek li ti dire so bann zapotre: “Mo pa pé koz lor zot tou; mo konn bann ki mo finn choisir. Mais c’est pou ki sa l’Ecriture-la realisé: ’Sa kikenn ki ti habitué mange mo di-pain-la finn leve so talon kont moi.’”​—Jean 13:18.

⁶ Sa kikenn ki ti pou trahir le Messie-la ti pou gagne 30 piece l’argent​—prix enn esclave! Matthieu ti faire reference ar Zekaria 11:12, 13 pou montré ki Judas ti trahir Jésus pou sa ti somme l’argent-la. Mais kifer Matthieu ti dire ki sa ti annoncé “par prophete Jérémie”? Dan lepok Matthieu, livre Jérémie ti kitfois trouve en premier dan enn groupe livre la Bible kot ti ena livre Zekaria. (Compare avek Luc 24:44.) Jamais Judas ti servi sa l’argent ki li ti mal gagné-la, parski li ti jette sa dan temple ek apré, li ti al suicide-li.​—Mat. 26:14-16; 27:3-10.

 7. Couma Zekaria 13:7 ti realisé?

⁷ Mem bann disciple le Messie ti pou quitte li. Zekaria ti ecrire: “Batte berger-la, ek laisse bann brebis dan troupeau fané partout-partout.” (Zek. 13:7) Le 14 Nisan l’an 33 nou lepok, Jésus ti dire so bann disciple: “Zot tou zot pou tombé en rapport avek moi sa la nuit-la, parski finn ecrire: ’Mo pou batte berger-la, ek bann brebis dan troupeau pou fané partout-partout.’” C’est exactement seki ti arrivé, parski Matthieu ti dire ki “tou bann disciple ti abandonne [Jésus] ek ti sauvé.”​—Mat. 26:31, 56.

Certain ti pou accuse li ek ti pou batte li

 8. Dan ki circonstance Isaïe 53:8 ti realisé?

⁸ Bann dimoune ti pou amenn le Messie la cour ek ti pou condamne li a mort. (Lire Isaïe 53:8.) Le 14 Nisan, boner gramatin, tou bann membre Sanhédrin ti joinde, zot ti faire attache Jésus, ek ti livré li ar gouverneur romain Ponce Pilate. Li ti pose Jésus bann question ek li ti trouvé ki Jésus pa ti faire nanyin de mal. Mais kan Pilate ti propose pou largue Jésus, la foule ti criyé: “Attache li lor enn poteau!” ek zot ti demann pou largue Barabbas, enn criminel. Pilate ti envie faire la foule plaisir. Li ti largue Barabbas, li ti faire fouette Jésus, ek li ti livré li pou attache li lor enn poteau.​—Marc 15:1-15.

 9. Pareil couma sa ti annoncé dan Psaume 35:11, ki ti arrivé dan lepok Jésus?

⁹ Bann fausse temoin ti pou donne bann fausse temoignage lor le Messie. Psalmiste David ti dire: “Bann temoin violent levé, zot demann moi seki mo pa koné.” (Ps. 35:11) Exactement couma sa prophetie-la ti dire, “bann chef pretre ek Sanhédrin en entier ti pé rod enn fausse temoignage kont Jésus pou touye li.” (Mat. 26:59) En realité, “beaucoup ti pé donne enn fausse temoignage lor li, mais zot temoignage pa ti pareil.” (Marc 14:56) Pou sa bann l’ennemi fanatik-la, sa pa ti faire zot nanyin ki bann temoin ti pé koz menti. Zot ti zis envie la mort Jésus.

10. Expliké couma Isaïe 53:7 ti realisé.

¹⁰ Le Messie ti pou reste trankil devant bann ki ti pou accuse li. Isaïe ti prophetisé: “Ti ena enn grand pression lor li, ek li ti pé laisse lezot maltraite li; pourtant li pa ti ouvert so la bouche. Ti pé amenn li couma enn mouton pou al touye li; ek pareil couma enn brebis ki ti reste trankil devant bann ki ti pou tire la laine lor li, li aussi li pa ti ouvert so la bouche.” (Is. 53:7) Kan “bann chef pretre ek bann ancien ti pé accuse [Jésus], li pa ti reponn nanyin.” Pilate ti demann li: “Eski to pa tendé ki quantité kitsoz zot pé dire kont toi?” Pourtant, Jésus “pa ti reponn li, non, pa enn mot, ek sa ti faire gouverneur-la bien etonné.” (Mat. 27:12-14) Jésus pa ti insulté bann ki ti pé accuse li.​—Rom. 12:17-21; 1 Pierre 2:23.

11. Couma Isaïe 50:6 ek Mika 5:1 ti realisé?

¹¹ Isaïe ti prophetisé ki le Messie ti pou gagne batté. Prophete Isaïe ti ecrire: “Mo ti donne mo lé-dos ar bann ki batte dimoune, ek mo la joue ar bann ki rass poil. Mo pa ti cachiette mo figure kan zot ti insulté moi ek crache lor moi.” (Is. 50:6) Mika ti annoncé: “Avek enn baton zot pou batte lor la joue juge Israël.” (Mika 5:1) Kan Marc ti ecrire so l’Evangile, li ti confirme realisation sa bann prophetie-la, li ti dire: “Certain ti commence crache lor [Jésus], ek couvert so figure net, ek batte li coute poing ek ti dire li: ’Prophetisé!’ Ek bann officier la justice ti donne li calotte kan li ti vini.” Marc dire ki bann soldat ti pou “batte li aussi lor so la tête avek enn roseau ek zot ti crache lor li, ek zot ti agenou devant li pou donne li l’honneur [pou bouffonne li].” (Marc 14:65; 15:19) Bien sur, Jésus pa ti faire nanyin pou merite enn traitement coumsa.

Fidele ziska la mort

12. Couma Psaume 22:16 ek Isaïe 53:12 ti applik ar Jésus?

¹² Le Messie ti pou mort lor enn poteau. Psalmiste David ti dire: “Enn l’assemblée bann mauvais dimoune finn entoure moi. Pareil couma enn lion, zot attak mo la main ek mo lipié.” (Ps. 22:16) Dan so l’Evangile, Marc ti raconte enn l’evenement ki bann ki lire la Bible bien koné: “Ti troisieme l’heure [apepré neuf heure gramatin], ek zot ti attache li lor enn poteau.” (Marc 15:25) Enn prophetie ti aussi annoncé ki ti pou compte le Messie avek bann ki faire peché. Isaïe ti ecrire: “Li ti verse so nâme dan la mort, ek ti compte li avek bann ki faire peché.” (Is. 53:12) Sa ti realisé kan “ti attache deux bandit lor bann poteau avek [Jésus], enn dan so coté droite, ek lot-la dan so coté gauche.”​—Mat. 27:38.

13. Dan ki fason Psaume 22:7, 8 ti realisé lor Jésus?

¹³ David ti prophetisé ki bann dimoune ti pou insulté le Messie. (Lire Psaume 22:7, 8.) Bann dimoune ti pé insulté Jésus kan li ti pé souffert lor poteau parski Matthieu ti dire: “Bann passant ti commence koz en mal lor li, zot ti sakouye zot la tête ek zot ti dire: ’Toi ki ti envie crase temple ek reconstruire li dan trois jour, sauve toi to-mem! Si to enn garson Bondié, desann lor sa poteau souffrance-la!’” Bann chef pretre, bann scribe ek bann ancien aussi pareil, zot ti bouffonne li ek ti dire: “Li finn sauve lezot; li pa kapav sauve li-mem! Li le Roi Israël; ki li desann asterla-mem lor sa poteau souffrance-la ek nou pou croire en li. Li finn mette so confiance dan Bondié, ki Bondié sauve li asterla si Li content li, parski li ti dire: ’Mo Garson Bondié.’” (Mat. 27:39-43) Pourtant, Jésus ti supporte tousala dan enn fason digne. C’est vrai-mem enn bon l’exemple pou nou, pa vrai?

14, 15. Expliké couma bann prophetie bien precis ti realisé en rapport avek linge le Messie ek kan zot ti donne li vinaigre pou boire.

¹⁴ Zot ti pou faire enn tirage au sort lor bann linge le Messie. David ti ecrire: “Zot ti partage mo bann linge entre zot, ek lor mo linge zot ti faire enn tirage au sort.” (Ps. 22:18) C’est seki ti arrivé, parski “kan [bann soldat romain] ti attache [Jésus] lor enn poteau, zot ti partage bann linge ki li ti metté la-haut par enn tirage au sort.”​—Mat. 27:35; lire Jean 19:23, 24.

¹⁵ Zot ti pou donne le Messie vinaigre ek enn kitsoz amer pou boire. Enn psalmiste ti dire: “Mais zot ti donne moi enn plante empoisonné pou mangé, ek pou passe mo la soif, zot ti essaye faire moi boire vinaigre.” (Ps. 69:21) Matthieu dire nou: “Zot ti donne [Jésus] di-vin ki’nn melangé avek enn kitsoz amer pou boire; mais apré ki li ti goutte sa, li ti refuse boire.” Plitar, “enn parmi zot ti galopé ek ti prend enn l’eponge, ti trempe li avek di-vin aigre ek ti mette sa lor enn roseau ek ti donne li boire.”​—Mat. 27:34, 48.

16. Expliké couma Psaume 22:1 ti realisé.

¹⁶ Coumadir Bondié ti pou abandonne le Messie. (Lire Psaume 22:1.) En accord avek sa prophetie-la, “kan ti arrive neuvieme heure, [vers trois heure l’apré-midi] Jésus ti criyé fort: ’Éli, Éli, lama sabaqthani?’ seki, kan traduire, vedir: ’Mo Bondié, mo Bondié, kifer to’nn abandonne moi?’” (Marc 15:34) Jésus pa ti perdi la foi dan so Papa ki dan le ciel. Bondié ti abandonne Jésus ar so bann l’ennemi kan Li ti tire so protection lor li pou ki so l’integrité testé dan enn fason complet. Ek kan li ti dire Bondié kifer Li’nn abandonne li, Jésus ti realise Psaume 22:1.

17. Couma Zekaria 12:10 ek Psaume 34:20 finn realisé?

¹⁷ Le Messie ti pou transpercé, mais so bann lezo pa ti pou cassé. Bann habitant Jérusalem ti pou “guette sa Kikenn ki zot finn transpercé-la.” (Zek. 12:10) Psaume 34:20 dire: “[Bondié] protege tou so lezo; pa enn sel lezo inn cassé.” Pou confirme sa, l’apotre Jean ti ecrire: “Enn parmi bann soldat ti perce . . . cote [Jésus] ar enn lance, ek desuite di-sang ek de l’eau ti sorti. Ek sa kikenn ki finn trouve sa-la [Jean], finn rann temoignage, ek so temoignage vrai . . . Sa bann kitsoz-la finn arrivé pou ki sa parole l’Ecriture-la kapav realisé: ’Pa enn so bann lezo pou crasé.’ Ek encore, enn lot parole l’Ecriture ti dire: ’Zot pou guette sa Kikenn ki zot ti transpercé-la.’”​—Jean 19:33-37.

18. Couma prophetie ki ti annoncé ki ti pou enterre Jésus avek bann riche, ti realisé?

¹⁸ Le Messie ti pou enterré avek bann dimoune riche. (Lire Isaïe 53:5, 8, 9.) Le 14 Nisan, tard dan l’apré-midi, “enn zom riche ki ti reste Arimathée, ki ti appel Joseph,” ti demann Pilate lekor Jésus ek Pilate ti donne li. L’Evangile Matthieu ajouté: “Joseph ti prend lekor Jésus, ti enveloppe li dan enn tissu en lin ki raffiné ek pur, ek li ti depose li dan so tombe souvenir ki ti neuf, seki li ti faire dan roche. Ek apré ki li ti roule enn gros roche devant l’entrée sa tombe souvenir-la, li ti allé.”​—Mat. 27:57-60.

Loué le Messie, nou le Roi!

19. Couma Psaume 16:10 ti realisé?

¹⁹ Le Messie ti pou ressuscité. David ti ecrire: “[Jéhovah] pa pou abandonne mo nâme dan shéol.” (Ps. 16:10) Certain madame ti vinn kot tombe kot ti depose lekor Jésus. Maziné ki quantité zot ti etonné kan zot ti trouve enn ange pé assize ladan. Li ti dire zot: “Pa bizin zot etonné. Zot pé rod Jésus ki sorti Nazareth, ki ti attaché lor enn poteau. Li finn ressuscité, li pa ici. Guette l’endroit kot ti depose li.” (Marc 16:6) L’apotre Pierre ti dire la foule ki ti present jour la Pentecôte l’an 33 nou lepok: “[David] ti trouve resurrection Christ en avance, ek li ti koz lor la, kan li ti dire ki pa finn abandonne li dan l’hadès ek so la chair pa finn pourri.” (Actes 2:29-31) Bondié pa ti permette ki lekor physik so Garson ki Li bien content, pourri. En plus, Jéhovah ti faire enn mirak, Li ti ré-donne li la vie en tant ki enn l’esprit!​—1 Pierre 3:18.

20. Couma bann prophetie lor regne le Messie ti realisé?

²⁰ Pareil couma ti annoncé, Bondié ti dire ki Jésus so Garson. (Lire Psaume 2:7; Matthieu 3:17) Ek aussi, bann la foule ti loué Jésus ek Royaume ki ti pou vini. Zordi, nou aussi nou content pou koz ar lezot lor li ek lor bann benediction ki so Royaume pou amené. (Marc 11:7-10) Bientot, Christ pou detruire so bann l’ennemi kan li pou “defann la verité, l’humilité ek la justice.” (Ps. 2:8, 9; 45:1-6) Lerla, so regne pou amenn la paix ek prosperité partout lor la terre. (Ps. 72:1, 3, 12, 16; Is. 9:6, 7) Jésus Christ, Garson ki Jéhovah bien content, pé deja regné dan le ciel en tant ki le Roi messianik. En tant ki Témoins de Jéhovah, nou vrai-mem ena enn grand privilege pou preche sa bann verité-la ar lezot.

Couma ou pou reponn?

• Couma enn disciple ti trahir Jésus ek lezot ti abandonne li?

• Ki certain prophetie ti dire lor la mort Jésus Christ lor enn poteau?

• Kifer ou sur ki Jésus li-mem li le Messie ki Bondié ti promette?

[Zimage page 15]

Kan Jésus ti rente dan Jérusalem couma enn le roi, ki bann prophetie sa ti realisé?

[Zimage page 17]

Jésus ti mort pou nou bann peché, mais asterla li pé regné en tant ki le Roi messianik