Paradis ki la Bible mentionné, kot-sa li trouvé? — Watchtower BIBLIOTEK LOR INTERNET

Question bann lecteur . . .

Paradis ki la Bible mentionné, kot-sa li trouvé?

▪ “To pou avek moi dan Paradis.” (Luc 23:43) C’est seki Jésus ti promette enn missié ki ti pré pou mort ek ki avek courage ti exprime so la foi en li. Kot-sa, sa missié-la pou été? Eski Paradis pou trouve dan le ciel, lor la terre, ou-soit dan enn l’endroit entre toulé-deux kot bann dimoune attann enn jugement?

Au commencement, nou bann ancetre ti vive dan Paradis. La Bible dire nou: “Jéhovah ti faire enn jardin en Éden, vers l’est, ek la Li ti mette sa zom ki Li ti’nn formé-la. . . . Ek Jéhovah ti prend li ek ti mette li dan jardin Éden pou cultive jardin-la ek pou prend li soin.” (Genèse 2:8, 15) Kan ti traduire sa bann parole-la en grec, ti traduire sa mot ‘jardin-la’ par paradéïsos. C’est dan sa mot-la-mem ki mot paradis inn sorti.

Pareil couma enn couple pou agrandi zot lakaz kan zot gagne encore zenfant, pareil Bondié ti attann ki nou premier parent contigne agrandi Paradis mem ziska en dehors jardin Éden, kan zot famille, setadir l’humanité ti pou grandi. Bondié ti dire zot: “Rempli la terre ek ena controle lor li.”—Genèse 1:28.

Alors, nou comprend ki nou Createur ti ena projet pou ki bann dimoune vive ek gagne zenfant dan Paradis, ici-mem lor la terre. Zot ti pou vive pou touletan dan enn jardin lor la terre ek zot pa ti pou bizin okenn cimetiere. La terre ti pou vinn enn l’endroit kot l’humanité en entier ti pou resté pou touletan. Sa pa etonne nou ki bann merveille ki ena dan la nature faire nou plaisir sa quantité-la! Nou finn crée pou vive lor enn joli la terre.

Eski projet Bondié finn changé? Non, parski Jéhovah donne nou sa l’assurance-la: “Eh bien, mo parole aussi, ki sorti dan mo la bouche, li pa pou retourne vers moi sans resultat, mais vrai-mem li pou faire seki’nn faire moi plaisir.” (Isaïe 55:11) Plus ki 3,000 an apré creation bann dimoune, la Bible ti dire ki “Bondié ki finn forme la terre ek finn faire li,” “pa finn crée la terre pou nanyin,” mais “finn forme li pou ki dimoune reste lor la.” (Isaïe 45:18) Volonté Bondié pa’nn changé. La terre pou bizin vinn enn paradis.

Li interessant pou noté ki beaucoup passage la Bible ki koz lor Paradis, decrire en realité la vie lor la terre. Par exemple, enn prophetie Isaïe dire: “Zot pou range bann lakaz ek zot pou reste ladan; ek zot pou plante bann karo raisin ek zot pou mange zot bann fruit.” (Isaïe 65:21) Kot-sa eski bann dimoune range bann lakaz, plante bann karo raisin, ek mange zot fruit? Lor la terre. Proverbes 2:21 dire dan enn fason bien clair: “Bann dimoune droite pou reste lor la terre.”

Jésus aussi ti koz lor enn paradis lor la terre. Li vrai ki li ti aussi promette ki pou ena enn paradis dan le ciel, mais sa ti concerne zis enn ti groupe dimoune ki Bondié finn choisir. (Luc 12:32) Apré zot la mort, sa bann dimoune-la ressuscité ek al vive dan Paradis ki dan le ciel. Ensam avek Jésus zot pou dirige sa Paradis ki lor la terre-la. (Révélation 5:10; 14:1-3) Sa bann dirigeant ki dan le ciel-la pou faire sur ki sa Paradis ki lor la terre-la li gouverné couma bizin ek ki entretenir-li dapré bann condition ki Bondié inn etabli.

Jésus ti koné ki c’est sa-mem volonté Bondié pou la terre. Apré tou, li ti dan le ciel avek so Papa kan ti crée jardin Éden. Tou bann dimoune ki ena la foi zordi, ena possibilité pou vive dan enn paradis ki pou ena lor la terre, dan l’avenir. (Jean 3:16) Jésus promette sa bann dimoune-la: “To pou avek moi dan Paradis.”—Luc 23:43.

[Zimage page 10]