LESON 43

Kouma Bann Kretien Bizin Konsider Lalkol?

Version Inprime

Bann dimounn ena diferan lopinion lor lalkol. Sertin kontan bwar detanzantan kan zot zwenn zot bann kamarad. Sertin swazir pou pa bwar ditou, alor ki lezot bwar ziska sou. Me ki Labib dir lor lalkol?

1. Eski bwar lalkol se enn move kitsoz?

Labib pa dir ki bwar lalkol se enn move kitsoz. Okontrer, kan li koz lor bann diferan kado ki Bondie inn donn nou, Labib dir ki ‘divin fer leker kontan.’ (Psom 104:14, 15) Labib koz lor sertin serviter Bondie ki ti bwar lalkol.—1 Timote 5:23.

2. Ki konsey ena dan Labib pou bann ki swazir pou bwar?

Pou Zeova, li vremem enn move kitsoz kan enn dimounn bwar tro boukou, ouswa bwar ziska sou. (Galat 5:21) Labib dir: “Fode pa ki to parmi bann ki bwar boukou divin.” (Proverb 23:20) Alor, ki nou tousel ouswa non, si nou swazir pou bwar, fode pa ki nou bwar telman boukou ki nou nepli kapav reflesi bien, ki nou pa kapav kontrol seki nou dir ek fer, ouswa ki nou gat nou lasante. Si nou pa kapav kontrol kantite ki nou bwar, li pli bon ki nou aret bwar net.

3. Kouma nou kapav montre ki nou respekte desizion ki lezot pran konsernan lalkol?

Sak dimounn bizin deside si li pou bwar lalkol ouswa non. Fode pa nou ziz enn dimounn ki swazir pou bwar lalkol avek moderasion. Fode pa osi ki nou met presion lor enn dimounn ki pa anvi bwar. (Romin 14:10) Si pou enn dimounn li enn problem ki nou bwar, vomie nou pa bwar. (Lir Romin 14:21.) Nou ‘pa pou rod nou prop lintere me lintere lezot.’—Lir 1 Korintien 10:23, 24.

ANOU GET INPE PLIS

Get bann prinsip Labib ki kapav ed ou pou deside si ou pou bwar ouswa non, ouswa ki kantite ou pou bwar. Gete osi seki ou kapav fer si ou pe lite ar enn problem lalkol.

4. Deside si ou pou bwar ouswa non

Ki Zezi ti panse lor lalkol? Pou gagn repons sa kestion-la, anou get premie mirak ki Zezi ti fer. Lir Zan 2:1-11, ek apre sa, get sa bann kestion-la ansam:

Kouma sa mirak-la ed nou pou kone seki Zezi ti panse lor lalkol ek lor bann ki bwar lalkol?
Si Zezi pa ti interdi pou bwar lalkol, kouma enn Kretien bizin konsider enn kikenn ki swazir pou bwar?

Selman, se pa parski enn Kretien kapav bwar lalkol ki savedir ki li touletan bon ki li bwar. Lir Proverb 22:3, ek apre sa, get sa bann diferan sitiasion la pou kone si ou pou bwar ouswa non:

Ou pou al kondir ouswa ou pou travay ar enn masinn.
Ou ansint.
Enn dokter inn dir ou pa bwar lalkol.
Ou gagn difikilte pou kontrol kantite lalkol ki ou bwar.
Dapre lalwa, ou pa gagn drwa bwar.
Ou avek enn kikenn ki’nn swazir pou pa bwar, parski dan lepase li ti ena enn problem lalkol.

Eski ou pou servi lalkol pandan enn maryaz ouswa kan ena enn ti fet? Pou kone ki kapav ed ou pou pran enn bon desizion, zwe VIDEO-la.

VIDEO: Eski Mo Bizin Servi Lalkol? (2:41)

Lir Romin 13:13 ek 1 Korintien 10:31, 32. Apre ki ou’nn lir sak verse, get sa kestion-la ansam:

Kouma sa prinsip-la kapav ed ou pou pran enn desizion ki fer Zeova kontan?

Enn frer pe refiz bwar divin dan enn restoran. De ser ki avek li pe bwar divin. — Sak Kretien pou deside si li pou bwar lalkol ouswa non. Mem si parfwa li bwar lalkol, ena bann moman kot li kapav swazir pou pa bwar

5. Fixe enn limit lor kantite ki ou pou bwar

Si ou swazir pou bwar lalkol, rapel sa lide-la: Mem si Zeova pa anpes nou pou bwar lalkol, Li dir ki li pa bon ki nou bwar tro boukou. Kifer? Lir Oze 4:11, 18, ek apre sa, get sa kestion-la ansam:

Ki kapav arive kan enn dimounn bwar tro boukou?

Ki kapav ed nou pou pa bwar tro boukou lalkol? Nou bizin rekonet nou bann limit. Lir Proverb 11:2, ek apre sa, get sa kestion-la ansam:

Kifer li enn bon lide pou fixe enn limit lor kantite ki nou bwar?

6. Seki kapav ed enn dimounn pou aret bwar tro boukou

Gete ki finn ed enn misie ki pa ti kapav sanpas lalkol. Zwe VIDEO-la, ek apre sa, get sa bann kestion-la ansam:

VIDEO: ‘Mo’nn Plin ar Mo Lavi’ (6:32)

Zimaz: Bann zimaz dan video ‘Mo’nn Plin ar Mo Lavi.’ 1. Dmitry pe get enn boutey lalkol. 2. Dmitry, so madam, ek zot tifi pe etidie Labib ansam.

Dan video-la, ki lefe lalkol ti ena lor fason ki Dmitry ti azir?
Eski li ti kapav aret bwar deswit?
Kouma li’nn reisi regle so problem lalkol?

Lir 1 Korintien 6:10, 11, ek apre sa, get sa bann kestion-la ansam:

Ki kantite grav sa ete kan enn kikenn bwar tro boukou?
Ki kitsoz montre ki enn dimounn alkolik kapav sanze?

Lir Matie 5:30, NW, ek apre sa, get sa kestion-la ansam:

Kan Zezi ti dir ki nou bizin koup nou lame, li ti pe dir ki nou bizin fer bann sakrifis pou fer Zeova kontan. Ki ou kapav fer si ou gagn difikilte pou kontrol kantite ki ou bwar?a

Lir 1 Korintien 15:33, ek apre sa, get sa kestion-la ansam:

Ki lefe ou bann kamarad kapav ena lor kantite ki ou bwar?

SERTIN KAPAV DEMANDE: “Eski Labib dir ki nou pa gagn drwa bwar lalkol?”

Ki ou ti pou dir?

SEKI NOU’NN APRANN

Lalkol se enn kitsoz ki Zeova finn donn nou pou fer nou kontan. Parkont, pou Li se enn move kitsoz si nou bwar plis ki bizin ouswa si nou bwar ziska sou.

Eski Ou Rapel?

Ki Labib dir lor lalkol?
Ki bann danze ena kan nou bwar tro boukou?
Kouma nou kapav respekte desizion ki lezot pran konsernan lalkol?

Dat ki’nn fini sa leson-la:

Mo Lobzektif

Si mo desid pou bwar lalkol, gete dan ki sitiasion mo pou bwar, ek fixe enn limit lor kantite ki mo pou bwar.

Lezot lobzektif:

Mo bann lezot lobzektif

DEKOUVER

Kouma bann adolesan kapav pran bann bon desizion konsernan lalkol?

Avan To Bwar, Reflesi Bann Konsekans (2:31)

Gete seki kapav ed enn dimounn ki ena enn problem lalkol.

“Couma garde enn bon l’attitude lor lalkol” (Latour Degard, 1^e Fevriye 2010)

Eski enn Kretien kapav bwar enn lasante?

“Kestion Bann Lekter” (Latour Degard, 15 Fevriye 2007, an Franse)

Dan lartik, « J’étais une barrique sans fond » gete kouma enn misie inn aret bwar tro boukou.

“Labib Sanz Bann Dimounn” (Latour Degard, 1^e Me 2012, an Franse)

a Bann ki ena enn problem lalkol kitfwa pou bizin rod led ek fer enn swivi pou aret bwar. Boukou dokter dir ki bann ki ena enn problem lalkol bizin aret bwar net.