Agir en Accord Avek la Priere Jésus

1, 2. Expliké seki Jésus ti faire pou so bann zapotre apré ki zot ti celebré Pâque l’an 33 Nou Lepok.

LE 14 Nisan l’an 33 Nou Lepok, tard dan la soirée, Jésus ek so bann zapotre ti fek celebré Pâque. Sa celebration-la ti faire zot rappel couma Bondié ti delivré zot bann ancetre ki ti esclave en Égypte. Mais so bann disciple fidele ti pou konn enn pli grand delivrans, “enn delivrans eternel.” Lendemain, (toujours le 14 Nisan) bann lennmi ti pou touye zot Chef ki ti parfait. Mais seki sa bann lennmi-la ti pou faire, ti pou vinn enn benediction. Sacrifice Jésus ti pou permette tou bann dimoune delivré ar peché ek lamor.​—Héb. 9:12-14.

² Pou faire sur ki nou pa blié sa disposition ki rempli ar lamour-la, Jésus ti etabli enn nouveau celebration ki ti pou remplace Pâque. So bann disciple ti pou bizin faire sa toulé l’année. Jésus ti casse enn di-pain sans levain ek ti partage sa avek so 11 zapotre ki ti reste fidele ar li. Li ti dire: “Sa represente mo lekor ki pou bizin donné en sacrifice pou zot. Contigne faire sa en mo memoire.” Li ti faire pareil avek enn coupe di-vin rouge ek li ti dire zot: “Sa coupe-la represente nouveau l’alliance ki existé grace a mo di-sang, ki pou versé pou zot.”​—Luc 22:19, 20.

 3. (a) Ki grand changement finn ena apré lamor Jésus? (b) Lor ki deux question nou bizin reflechi kan nou examine la priere Jésus ki mentionné dan Jean chapitre 17?

³ L’alliance la Loi ki ti ena entre Bondié ek bann Israélite ti pré pou aboli. Li ti pou remplacé par enn nouveau l’alliance entre Jéhovah ek bann disciple Jésus ki ti oint ar l’esprit saint. Jésus ti bien interessé ar condition spirituel sa bann chretien oint ki ti forme sa nouveau nation spirituel-la. Nation Israël ti bien divisé lor plan religieux ek lor plan social. Sa ti amenn deshonneur lor nom Bondié, enn nom ki saint. (Jean 7:45-49; Actes 23:6-9) Mais Jésus ti envie ki so bann disciple travail ensam dan l’unité pou ki zot kapav glorifié nom Bondié. Ki Jésus ti faire? Li ti faire pli joli la priere ki enn dimoune kapav ena privilege pou lire. (Jean 17:1-26; guette zimage dan commencement lartik.) A mesure ki nou examine sa la priere-la, anou reflechi lor sa deux question-la: “Eski Bondié ti reponn la priere Jésus? Eski mo pé agir en accord avek sa la priere-la?”

4, 5. (a) Ki nou aprann ar seki Jésus ti dire dan commencement so la priere? (b) Couma Jéhovah ti reponn seki Jésus ti demandé en rapport avek so lavenir?

⁴ Jésus ti enseigne so bann disciple ziska bien tard sa soir-la ek li ti donne zot enn connaissance ki ena beaucoup valeur lor Bondié. Apré, li ti guette le ciel ek li ti prié: “Papa, ler inn arrivé; glorifié to garson pou ki to garson kapav glorifié toi, dapré l’autorité ki to finn donne li lor tou dimoune, pou ki, concernant tou bann ki to finn donne li, li kapav donne zot lavi eternel. . . . Mo’nn glorifié toi lor later, parski mo’nn fini travail ki to ti donne moi pou faire. Alors asterla, toi, Papa, donne moi la gloire ensam avek toi, la gloire ki mo ti ena ensam avek toi avant ki le monde ti existé.”​—Jean 17:1-5.

⁵ Remarké ki bann kitsoz pli important Jésus ti demandé dan commencement so la priere. D’abord, li ti prié pou ki so Papa gagne la gloire ek sa ti en accord avek premier kitsoz ki li ti demandé dan la priere Notre Père: “Papa, ki to nom sanctifié.” (Luc 11:2) Apré, Jésus ti prié pou seki so bann disciple bizin, setadir li ti demandé ki “li kapav donne zot lavi eternel.” Finalement, Jésus ti demann enn kitsoz personnellement pou li, kan li ti dire: “Papa, donne moi la gloire ensam avek toi, la gloire ki mo ti ena ensam avek toi avant ki le monde ti existé.” Jéhovah inn recompense so Garson ki ti reste fidele, kan Li’nn donne li plis ki seki li ti demandé: Li’nn donne Jésus “enn nom ki pli grand ki” nom ki tou bann ange ena.​—Héb. 1:4.

 6. Ki bann zapotre ti bizin faire pou gagne lavi eternel, ek couma nou koné ki zot ti reussi faire sa?

⁶ Jésus ti aussi prié lor seki nou bizin faire pou gagne lavi eternel, enn cadeau ki nou pa merité. (Lire Jean 17:3.) Li ti dire ki nou bizin “aprann konn” Bondié ek Jésus Christ. Enn fason pou faire sa, c’est kan nou servi nou lizié ek nou zoreille pou aprann plis lor Jéhovah ek lor so Garson. Enn lot fason important pou aprann konn Bondié c’est kan nou applik seki nou aprann dan nou lavi. C’est seki bann zapotre ti faire, parski Jésus ti dire dan so la priere: “Bann parole ki to finn donne moi, mo finn donne zot sa, ek zot inn gagne sa.” (Jean 17:8) Mais pou zot gagne lavi eternel, zot ti bizin contigne medite lor bann parole Bondié ek mette seki zot ti aprann en pratik dan zot lavi toulé-jour. Eski sa bann zapotre fidele-la ti reussi faire sa ziska lafin zot lavi lor later? Oui, zot ti reussi. Nou konn sa parski nom chaque zapotre inn ecrire dan enn fason ki personne pa kapav effacé lor 12 roche fondation ki trouve dan Nouvelle Jérusalem, dan le ciel.​—Rév. 21:14.

 7. Ki sa vedir “konn” Bondié, ek kifer sa bien important?

⁷ Dapré bann specialiste dan langue Grec, l’expression ki traduire par “aprann konn” kapav aussi traduire par “bizin contigne aprann.” Ena enn lien entre sa deux l’idée-la ek toulé-deux important. En rapport avek Jean 17:3, dan la Bible avec notes et références nou trouve sa note-la, “ki zot konn toi.” Alors, l’expression “aprann konn” Bondié vedir contigne aprann plis lor Li. Selman, konn pli grand Personnage dan l’univers implik plis ki zis konn so bann qualité ek so projet. Konn Jéhovah vedir ki nou ena enn grand lamour pou Li ek nou ena bann relation bien proche avek Li, ek aussi avek nou bann frere ek soeur. La Bible donne sa explication-la: “Kikenn ki pena lamour pa finn arrivé konn Bondié.” (1 Jean 4:8) Alors, konn Bondié implik ki nou obeir Li. (Lire 1 Jean 2:3-5.) C’est vrai-mem enn grand l’honneur ki nou ena pou forme parti parmi bann dimoune ki konn Jéhovah! Mais nou bizin faire attention pou pa perdi sa bann bon relation-la pareil couma seki ti arrive Judas Iscariote. Anou travail dur pou garde bann bon relation avek Jéhovah. Lerla, Jéhovah pou trouve nou digne pou donne nou lavi eternel​—sa joli cadeau-la.​—Mat. 24:13.

8, 9. Ki kitsoz ti pli important pou Jésus pendant so ministere lor later, ek ki tradition li ti rejeté?

⁸ Kan nou lire la priere Jésus, ki mentionné dan Jean chapitre 17, nou pena okenn raison pou douté ki li ti ena enn grand lamour, pa zis pou so bann zapotre, mais aussi pou bann ki ti pou vinn so bann disciple dan lavenir. (Jean 17:20) En mem temps, li bon nou comprend ki, seki ti pli important pou Jésus, c’est pa ki nou gagne lavi sauve. Depuis commencement ziska lafin so ministere lor later, seki ti pli important pou li c’est sanctifié ek glorifié nom so Papa. Par exemple, kan, dan synagogue Nazareth, li ti faire koné pou ki raison li ti vinn lor later, Jésus ti lire sa bann parole-la dan rouleau Isaïe: “L’esprit Jéhovah lor moi, parski Li finn choisir moi pou annonce bann bon nouvelle ar bann pauvre.” Nou kapav sur ki Jésus ti prononce nom Bondié dan enn fason bien clair kan li ti lire sa.​—Luc 4:16-21.

⁹ Dapré tradition bann Juif, bien longtemps avant Jésus vinn lor later, bann chef religieux ti decourage bann dimoune pou servi nom Bondié. Nou kapav sur ki Jésus pa ti d’accord ditou avek sa tradition ki pa Biblik-la ek li ti rejette sa. Li ti dire ar sa bann chef religieux-la: “Mo finn vinn au nom mo Papa, mais zot pa accepté moi; si enn lot vinn lor so prop nom, zot pou accepté li.” (Jean 5:43) Apré sa, deux-trois jour avant so lamor, Jésus ti ré-dire seki ti pli important dan so lavi kan li ti faire sa la priere-la: “Papa, glorifié to nom.” (Jean 12:28) Alors, fodé pa nou etonné ki Jésus ti koz lor nom so Papa toute longue sa la priere ki nou pé examiné-la.

10, 11. (a) Couma Jésus ti faire bann dimoune konn nom so Papa? (b) Ki l’objectif bann disciple Jésus bizin ena?

¹⁰ Dan so la priere, Jésus ti dire: “Mo finn faire bann dimoune ki to finn donne moi ek ki sorti dan le monde, konn to nom. Zot ti pou toi, ek to finn donne moi zot, ek zot finn suive to parole. Ek aussi, mo nepli dan le monde, mais zot, zot dan le monde ek mo pé vinn vers toi. Mo Papa ki saint, veille lor zot a cause to nom ki to finn donne moi, pou ki zot kapav vinn enn sel pareil couma nou, nou enn sel.”​—Jean 17:6, 11.

¹¹ Kan Jésus ti faire so bann disciple konn nom so Papa, li ti faire plis ki zis servi nom Jéhovah. Li ti aussi aide zot pou koné seki sa nom-la representé. Li ti enseigne zot lor bann qualité extraordinaire ki Bondié ena ek fason ki Li agir avek bann dimoune. (Ex. 34:5-7) En plis, Jésus, ki le Roi dan le ciel, pé contigne aide so bann disciple pou faire konn nom Jéhovah partout lor later. Avek ki l’objectif? Pou aide pli beaucoup dimoune aprann lor Jéhovah avant lafin sa mauvais systeme-la. Kan sa jour-la pou vini, Jéhovah pou sauve so bann serviteur, ek lerla tou dimoune pou konn so grand nom!​—Ézék. 36:23.

12. Ki trois kitsoz nou bizin faire pou nou fini travail ki Jésus ti commencé?

¹² Kan li ti lor later, Jésus ti faire tou seki li ti kapav pou aide so bann disciple travail lor zot bann faiblesse. Li ti necessaire ki zot faire sa pou zot kapav fini travail ki Jésus ti commencé. Jésus ti faire sa la priere-la: “Pareil couma to finn envoye moi dan le monde, moi aussi mo finn envoye zot dan le monde.” Pou zot kapav reussi dan sa travail ki sauve lavi bann dimoune-la, Jésus ti demann Jéhovah pou aide zot faire trois kitsoz bien important. Premierement, li ti prié ki so bann disciple pa faire parti dan le monde Satan. Deuxiemement, li ti prié pou ki zot vinn saint kan zot mette en pratik la verité ki ena dan Parole Bondié dan zot prop lavi. Troisiemement, plusieurs fois Jésus ti suppliye Bondié pou ki ena l’unité parmi so bann disciple, pareil couma li ek so Papa zot uni par lamour. Alors, sakenn parmi nou bizin demann-li-mem: ‘Eski mo pé agir en accord avek sa trois kitsoz ki Jésus ti demandé-la?’ Jésus ti ena confiance ki si so bann disciple ti faire sa bann kitsoz-la, ‘le monde ti pou croire ki Jéhovah ti’nn envoye li.’​—Lire Jean 17:15-21.

13. Couma Jéhovah ti reponn la priere Jésus dan premier siecle Nou Lepok?

¹³ Kan nou etudié livre Actes ki trouve apré quatre l’Evangile, nou trouvé couma Jéhovah ti reponn la priere Jésus. Parmi bann disciple Jésus dan premier siecle, ti ena bann Juif ek bann non-Juif, bann riche ek bann pauvre, bann esclave ek bann proprietaire esclave. A cause sa, ti ena enn grand risk ki ena division parmi zot. Pourtant, tellement ti ena l’unité parmi zot ki l’apotre Paul ti compare zot ar diferan parti lekor enn dimoune ek Jésus couma la tête sa lekor-la. (Éph. 4:15, 16) Sa ti vrai-mem enn mirak dan le monde Satan ki divisé! C’est selman grace a l’esprit saint Jéhovah ki sa ti possible.​—1 Cor. 3:5-7.

14. Couma Jéhovah inn reponn la priere Jésus dan nou lepok?

¹⁴ Malheureusement, sa l’unité-la pa’nn duré apré lamor bann zapotre. Pareil couma sa ti annoncé, enn grand l’apostasie ti commencé ek sa ti crée plusieurs secte ki divisé dan la Chretienté. (Actes 20:29, 30) Mais en 1919, Jésus ti delivré bann Chretien oint ki ti couma bann prisonnier dan la fausse religion, li ti rassemblé zot ek ti faire zot bien ‘soudé ensam.’ (Col. 3:14) Ki resultat zot predication ti ena lor bann dimoune? Plis ki sept million “lezot brebis” ki sorti dan “tou nation ek tribu ek peuple ek langue” finn rassemblé dan l’unité dan enn sel troupeau avek bann Chretien oint. (Jean 10:16; Rév. 7:9) C’est enn fason extraordinaire ki Jéhovah inn reponn la priere Jésus kan li ti demandé “ki le monde koné ki c’est toi [Jéhovah] ki finn envoye moi ek ki to’nn content zot pareil couma to’nn content moi.”​—Jean 17:23.

15. Ki Jésus ti demandé pou so bann disciple oint?

¹⁵ Inpé pli boner dan la soirée 14 Nisan, Jésus ti honore so bann zapotre kan li ti etabli enn l’alliance avek zot pou zot regne avek li dan so Royaume. (Luc 22:28-30; Jean 17:22) Alors, Jésus ti faire sa la priere-la concernant tou bann ki ti pou vinn so bann disciple oint: “Papa, concernant seki to finn donne moi, mo envie ki la, kot mo été, zot aussi zot avek moi, pou ki zot trouve la gloire ki to finn donne moi, parski to finn content moi avant fondation le monde.” (Jean 17:24) Bann lezot brebis bien content ki bann Chretien oint pou gagne sa recompense-la, ek zot pa jaloux. C’est aussi enn preuve ki vrai-mem ena l’unité parmi tou bann vrai Chretien zordi.

16, 17. (a) A lafin so la priere, ki Jésus ti dire li bien decidé pou faire? (b) Ki nou aussi nou bizin bien decidé pou faire?

¹⁶ La plupart dimoune ki influencé par zot chef religieux zordi, pa’lé reconette ki Jéhovah ena enn peuple ki uni ek ki vrai-mem konn Li. C’est seki ti arrivé dan lepok Jésus aussi. Alors, li ti termine so la priere par sa bann parole-la: “Papa ki juste, le monde pa finn aprann konn toi, mais moi mo’nn aprann konn toi, ek sa bannla inn koné ki c’est toi ki finn envoye moi. Mo’nn faire zot konn to nom ek mo pou faire konn sa, pou ki lamour ki to finn ena pou moi, kapav dan zot, ek pou ki moi mo uni avek zot.”​—Jean 17:25, 26.

¹⁷ Kisannla kapav dire ki Jésus pa’nn faire bann dimoune konn nom so Papa? En tant ki Chef congregation, li pé contigne aide nou pou faire bann dimoune konn nom ek projet so Papa. Anou montré ki nou pé soumette-nou ar so l’autorité kan nou zelé dan predication ek dan l’activité pou faire bann disciple. (Mat. 28:19, 20; Actes 10:42) Anou contigne aussi travail dur pou garde nou l’unité. Si nou faire sa bann kitsoz-la, nou pou agir en accord avek la priere ki Jésus ti faire, nou pou glorifié nom Jéhovah ek nou pou heureux pou touletan.