Bann Kretyin Ador Bondye Avek Lespri ek Laverite

“Bondye Li enn lespri, ek bann ki ador Li bizin ador Li avek lespri ek laverite.”—ZAN 4:24.

 1. Ki kalite ladorasyon Bondye aksepte?

DAN enn fason byin kler, Zezi Kris, Garson Bondye, ti montre ki kalite ladorasyon so Papa aksepte. Enn zur, li ti donn temwaynaz ar enn madam Samaritenn kot enn plas ki tir delo, pre ar lavil Sisar. Zezi ti dir madam la: “Zot ador seki zot pa kone; nu, nu ador seki nu kone, parski delivrans vinn atraver bann Zwif. Me, ler pe vini, wi asterla mem, kot bann vre adorater pu ador Papa avek lespri ek laverite, parski, avredir mo Papa pe rod sa bann kalite dimunn la mem pu ador Li. Bondye Li enn lespri, ek bann ki ador Li bizin ador Li avek lespri ek laverite.” (Zan 4:22-24) Ki sa bann parol la montre nu?

 2. Ki bann Samaritin ti swiv pu ador Bondye?

² Bann Samaritin ti ena bann fos lide lor fason ador Bondye. Zot ti aksepte zis sink premye liv bann Lekritir Sakre. Ek la usi, zot ti ena zot prop tradiksyon pu sa bann liv la. Ti apel sa Pantatek Samaritin. Donk, bann Samaritin pa ti vremem konn Bondye. Parkont, Bondye ti konfye bann Zwif konesans Lekritir. (Romin 13:1, 2) Bann Zwif fidel ek lezot usi ti kapav gayn faver Bondye. Me ki zot ti pu bizin fer pu sa?

 3. Ki vedir ador Bondye “avek lespri ek laverite”?

³ Ki bann Zwif, bann Samaritin ek bann lezot dan lepase ti bizin fer pu ki Bondye aksepte zot ladorasyon? Zot ti bizin ador Li “avek lespri ek laverite.” Nu’si nu bizin fer parey. Li vre ki nu kapav byin devwe dan servis Bondye parski nu leker ranpli ar lamur ek lafwa. Me, ador Bondye avek lespri vedir ki nu ena so lespri sin lor nu ek nu les li gid nu. Nu bizin etidye Parol Bondye ek met li an pratik pu ki nu fason panse vinn an akor avek panse Bondye. (1 Korintyin 2:8-12) Pu ki Bondye aksepte nu ladorasyon, nu bizin usi ador Li avek laverite. Sa vedir ki nu ladorasyon bizin an akor avek seki Parol Bondye, Labib anseyn nu lor Bondye ek lor so bann lintansyon.

Kapav Truv Laverite

 4. Ki sertin panse lor laverite?

⁴ Dapre sertin ki fer bann gran letid, zame bann dimunn pa pu reysi dekuver laverite pir-pir. Avredir, enn ekrivin, Alf Ahlberg, ti ekrir: ‘Zot dir ki ena bann kestyon ki zame pa pu kapav donn repons egzak.’ Dapre sertin, sak dimunn konpran laverite dan so manyer. Me, eski li vre sa? Pa dapre Zezi Kris.

 5. Kifer eski Zezi ti vinn dan lemond?

⁵ Fer kumadir nu dan kumansman lane 33 N.L. Nu pe temwin enn senn. Zezi pe debut devan Guverner Romin Pons Pilat. Zezi dir li: “Mo’nn vinn dan lemond pu donn temwanyaz lor laverite.” Pilat demann li: “Ki ete sa, laverite? Me, li pa atann ki Zezi reponn li.—Zan 18:36-38.

 6. (a) Dapre enn diksyoner, ki vedir “laverite”? (b) Ki lord Zezi ti donn so bann disip?

⁶ Dapre enn diksyoner, laverite se “tu bann kitsoz, bann levennman ek bann zistwar ki reel, ki’nn arive vremem.” (Webster’s Ninth New Collegiate Dictionary) Me eski se parski Zezi ti tuletan koz vre ki nu dir ki li ti donn temwaynaz lor laverite? Non. Zezi ti koz lor enn laverite presi. Li ti donn so bann disip lord pu anons sa laverite la, parski li ti dir zot: “Fer bann dimunn dan tu bann nasyon vinn bann disip, batiz zot lor non Papa, lor non Garson ek lor non lespri sin. Anseyn zot pu pratik tu bann kitsoz ki mo finn dir zot.” (Matye 28:19, 20) Avan “lafin sa lemond la,” bann vre disip Zezi pu bizin anons sa laverite la kuma enn bonn nuvel, partu lor later. (Galat 2:14) Alor, zot pu bizin realiz seki Zezi ti anonse: “Sa bon nuvel lor rwayom la pu prese partu kot dimunn reste lor later kuma enn temwaynaz pu bann nasyon; ek lerla lafin pu vini.” (Matye 24:14) Donk, zordi ena enn bann ki pe pres enn bon nuvel ar tu bann nasyon, pu anseyn zot laverite. Li byin inportan ki nu reysi rekonet ki sa bannla sa.

Kuma Nu kapav Aprann Laverite

 7. Kuma eski u pu montre ki se Zeova Limem ki donn laverite?

⁷ Zeova Limem ki donn nu laverite lor fason ki nu bizin ador Li. Akoz sa, dan enn psom ki li ti ekrir, David ti apel Zeova “Bondye laverite.” (Psom 31:5; 43:3) Zezi ti rekonet ki parol so Papa li vre. Seki ti amenn li pu dir: “Bann Profet ti ekrir: ‘Zot tu pu anseyne par Zeova.’ Seki finn tann bann kitsoz ki sorti ar mo Papa ek finn aprann sa, li vinn ver mwa.” (Zan 6:45; 17:17; Izai 54:13) Alor, li kler ki bann ki pe rod laverite bizin anseyne par Zeova, nu Gran Profeser. (Izai 30:20, 21) Bann ki rod laverite bizin gayn “konesans Bondye.” (Proverb 2:5) Avek lamur, Zeova finn donn laverite dan plizir fason.

 8. Par ki bann mwayin Bondye finn donn laverite?

⁸ Par egzanp, se par mwayin bann anz ki Bondye ti donn bann Izraelit lalwa. (Galat 3:19) Dan bann rev, Li ti promet Abraam ek Zakob bann benediksyon. (Zenez 15:12-16; 28:10-19) Bondye ti mem koze depi lesyel, parey kuma kan Zezi ti batize. Li ti dir: “Sa mo Garson ki mo byin kontan, limem ki mo finn aksepte.” (Matye 3:17) Bondye finn usi donn bann dimunn so lespri pu zot ekrir Labib. Nu bizin rekonesan ki Li pe servi sa mwayin la pu anseyn nu laverite. (2 Timote 3:16, 17) Alor, si nu aprann seki ena dan Parol Bondye, nu pu kapav gayn “lafwa dan laverite.”—2 Tesalonisyin 2:13.

Laverite ek Garson Bondye

 9. Kuma eski Bondye ti donn laverite atraver so Garson?

⁹ Se sirtu atraver so Garson Zezi Kris ki Bondye finn fer bann dimunn dekuver laverite. (Ebre 1:1-3) Avredir, okenn dimunn pa finn anseyn laverite parey kuma Zezi. (Zan 7:46) Mem apre ki li ti fini mont dan lesyel, li ti donn so bann disip laverite ki sorti kot so Papa. Par egzanp, lapot Zan ti gayn “enn revelasyon par Zezi Kris, ki Bondye ti donn li, pu montre so bann esklav seki ti pu bizin arive dan enn tigit letan ankor.”—Revelasyon 1:1-3.

10, 11. (a) Dapre Zezi, laverite konsern ki kitsoz? (b) Kuma eski Zezi ti fer laverite vinn reel?

¹⁰ Zezi ti dir Pons Pilat ki Li ti vinn lor later pu donn temwaynaz lor laverite. Kan li ti anseyne, Zezi ti montre ki laverite konsern seki Bondye pu fer pu montre ki Li ena drwa pu guvern lor bann dimunn. Ek se seki Li pu fer par mwayin so Rwayom ki dirize par Zezi Kris. Me, pu donn temwaynaz lor laverite, Zezi pa ti zis prese ek anseyne. Zezi ti fer laverite vinn reel; Li ti realiz li. Ala kifer, lapot Pol ti ekrir: “Personn pena drwa ziz zot lor seki zot manze, lor seki zot bwar, ni lor enn fet, uswa lor kutim nuvel linn, uswa lor enn saba. Sa bann kitsoz la pe anons bann kitsoz ki vini, me Kris li, limem realite.”—Kolosyin 2:16, 17.

¹¹ Enn fason ki laverite ti vinn reel atraver Zezi, se par so nesans. Li ti ne dan lavil Betleem, parey kuma ti anonse. (Mika 5:2; Lik 2:4-11) Dan so profesi, Danyel ti anonse ki Mesi ti pu paret apre 69 ‘semenn lane.’ Sa ti arive zis pu zis dan lane 29 N.L., kan Zezi ti prezant limem devan Bondye pu batize. Ek la, Bondye ti swazir li avek so lespri sin. (Danyel 9:25; Lik 3:1, 21, 22) Zezi ti rann laverite reel ankor kan li ti pres Rwayom Bondye pu ekler bann ki ti dan nwarte. (Izai 9:1, 2, 6, 7; 61:1, 2; Matye 4:13-17; Lik 4:18-21) So lamor ek so rezireksyon, sa usi finn fer laverite vinn reel.—Psom 16:8-11; Izai 53:5, 8, 11, 12; Matye 20:28; Zan 1:29; Akt 2:25-31.

12. Kifer eski Zezi ti kapav dir: “Momem laverite”?

¹² Pwiski laverite li santre lor Zezi, li ti kapav dir: “Momem semin, momem laverite, ek momem lavi. Personn pa kapav vinn ver mo Papa san pas par mwa.” (Zan 14:6) Kan bann dimunn aksepte laverite, ek zot aksepte rol ki Zezi zwe dan proze Bondye, personn pa kapav anbet zot lor fason ki bizin ador Bondye. (Zan 8:32-36; 18:37) Wi, bann dimunn sinser ki aksepte laverite ek swiv Kris dan lafwa, pu gayn lavi pu tuletan.—Zan 10:24-28.

13. Sit trwa kitsoz ki nu pu al egzamine lor ki Labib anseyn nu laverite.

¹³ Laverite ki Zezi ek so bann disip finn transmet par lespri Bondye, samem ki donn vre lafwa Kretyin. Donk, bann ki “obeir sa lafwa la kontiyn mars dan laverite.” (Akt 6:7; 3 Zan 3, 4) Be zordi, ki bann ki pe mars dan laverite? Ki bann ki pe anseyn tu bann nasyon vremem laverite? Pu reponn sa bann kestyon la, nu pu aret nu lor bann premye Kretyin. Nu pu egzaminn laverite ki Labib anseyne lor (1) seki bann dimunn krwar, (2) lor manyer adore, ek (3) lor kondwit ki enn dimunn bizin ena.

Laverite lor Seki Bann Dimunn Krwar

14, 15. Ki u kapav dir lor latitid bann premye Kretyin ek bann Temwin Zeova lor bann Lekritir?

¹⁴ Bann premye Kretyin ti ena buku lestim pu Parol ki Zeova ti fer ekrir. (Zan 17:17) Tu seki zot ti krwar ek zot ti pratike ti sorti dan Parol Bondye. Konsernan sa bann Kretyin la, get seki Clément d’Alexandrie ki ti viv dan dezyem ek trwazyem syek, ti ekrir. Li ti dir: “Sa bannla zot tultan pe lite pu ena bann bon kalite. Zame zot pa pu aret rod laverite, tank ki zot pa gayn prev ki seki zot krwar sorti vremem dan bann Lekritir.”

¹⁵ Parey kuma bann premye Kretyin, bann Temwin Zeova usi ena buku lestim pu Labib. Zot krwar ki se Bondye ki’nn fer ekrir Labib ek sa liv la kapav anseyn zot. (2 Timote 3:16) Alor, anu egzaminn detrwa bann kitsoz ki bann premye Kretyin ti krwar. Apre, nu pu konpar sa avek seki bann serviter Zeova zordi zot, zot finn aprann parski zot servi Labib kuma zot liv prinsipal.

Laverite lor Nam

16. Ki laverite lor lam?

¹⁶ Bann premye Kretyin ti anseyn laverite lor nam parski zot ti krwar seki bann Lekritir dir. Zot ti kone ki premye “zom ti vinn enn nam vivan” kan Bondye ti kre li. (1 Korintyin 15:45) Alor, kan enn dimunn ti mor, ti kapav dir ki enn nam ti’nn mor. (Ezekyel 18:4; Zak 5:20) Zot ti kone usi ki ‘bann dimunn ki mor pa konn nanyin ditu.’—Eklezyast 9:5, 10.

17. Kuma eski u pu explik lespwar ki bann dimunn mor ena?

¹⁷ Selman, bann premye disip Zezi ti ena enn lespwar sir. Zot ti ena lasirans ki bann dimunn mor ki dan memwar Bondye pu resisite, setadir zot pu regayn lavi. Pol ti dir sa san ezite: “Mo ena lespwar an Bondye . . . ki pu ena enn rezireksyon bann dimunn drwat ek bann dimunn ki pa drwat.” (Akt 24:15) Mem plitar, Minicius Felix, ki ti pretann ki li ti Kretyin, ti ekrir: ‘Kumansman, se Bondye Limem ki ti kre dimunn. Alor, si Bondye ule, eski Li pa kapav redonn bann mor lavi? Fode enn kikenn li bet ek li pa reflesi pu persiste dir ki sa li inposib!’ Parey kuma bann premye Kretyin, bann Temwin Zeova swiv laverite ki Labib anseyne lor nam, lor lamor ek lor rezireksyon. Asterla, anu egzamine kisannla Bondye ek kisannla Zezi Kris.

Laverite lor Trinite

18, 19. Kifer eski kapav dir ki Trinite pa enn lanseynman ki sorti dan Labib?

¹⁸ Pu bann premye Kretyin, zame Bondye, Zezi Kris ek lespri sin ti form enn bondye an trwa personn, setadir enn Trinite. The Encyclopædia Britannica dir: “Dan Nuvo Testaman, pena okenn tras mo Trinite, ni okenn kitsoz an rapor avek sa lanseynman la. Dayer, ni Zezi, ni so bann disip pa ti pu anvi al kont seki dir dan Sema [enn lapriyer Ebre] ki truv dan Ansyin Testaman. Sa lapriyer la dir: ‘Ekut sa, Izrael: Senyer nu Bondye Li enn sel Senyer.’ (Det. 6:4).” Bann Kretyin pa ti ador bondye Romin an trwa personn, ni okenn lot bondye. Zot ti aksepte seki Zezi ti dir, ki se Zeova tusel ki bizin adore. (Matye 4:10) Zot ti krwar usi sa bann parol Zezi la: “Mo Papa pli gran ki mwa.” (Zan 14:28) Zordi, bann Temwin Zeova usi pans parey.

¹⁹ Bann premye disip Zezi ti fer byin diferans ant Bondye, Kris ek lespri sin. Avredir, zot ti batiz bann disip (1) lor non Papa, (2) lor non Garson, ek (3) lor non lespri sin, me zame lor non enn Trinite. Parey kumsa mem, bann Temwin Zeova anseyn laverite ki sorti dan Labib. Alor, zot fer diferans ant Bondye, so Garson, ek lespri sin.—Matye 28:19.

Laverite lor Batem

20. Ki konesans bann kandida batem bizin gayne?

²⁰ Zezi ti donn so bann disip lord pu anseyn bann dimunn laverite, pu fer zot vinn bann disip. Pu kalifye pu pran batem, sa bann dimunn la ti bizin konn byin bann lanseynman inportan ki ena dan bann Lekritir. Par egzanp, zot ti bizin rekonet pozisyon ek lotorite ki Zeova ek so Garson, Zezi Kris, ena. (Zan 3:16) Bann kandida batem bizin usi konpran ki lespri sin li pa enn personn, me li lafors ki Bondye servi pu realiz so bann proze.—Zenez 1:2, not.

21, 22. Kifer eski u pu dir ki batem li pu bann ki krwar?

²¹ Bann premye Kretyin ti batiz zis bann dimunn ki ti gayn enn konesans, ki ti repanti ek ki ti angaz zot net ar Bondye pu fer so volonte. Zur fet Lapantkot lane 33 N.L., bann Zwif ek bann Zwif konverti ki ti rasanble dan Zerizalem, ti deza ena enn konesans bann Lekritir Ebre. Kan zot ti tann lapot Pyer koz lor Mesi, Zezi, anviron 3,000 dimunn “ti aksepte laverite avek tu zot leker” ek zot “ti batize.”—Akt 2:41; 3:19–4:4; 10:34-38.

²² Batem Kretyin li pu bann ki krwar. Bann dimunn dan Samari ti aksepte laverite ek “letan zot finn krwar Filip ki ti pe anons bon nuvel lor Rwayom Bondye ek lor non Zezi Kris, zot tu, zom ek fam, ti batize. (Akt 8:12) Enn ofisye Etyopyin ki ti enn Zwif konverti sinser, ti deza ena enn konesans Zeova. Apre ki Filip finn explik li kuma bann profesi finn realize lor Mesi, li finn aksepte sa laverite la. Ek lerla, li’nn pran batem. (Akt 8:34-36) Plitar, Pyer ti dir Korney ek bann lezot ki pa Zwif ki “Bondye aksepte ninport ki dimunn ki ena lakrint pu Li ek ki pratik lazistis. Ninport kisannla ki met lafwa an Zezi Kris pu gayn pardon pu so bann pese.” (Akt 10:35, 43; 11:18) Tusala an akor avek lord ki Zezi ti done pu ‘fer bann disip ek anseyn bann dimunn bann kitsoz ki li’nn dir.’ (Matye 28:19, 20; Akt 1:8) Bann Temwin Zeova usi swiv mem prinsip. Pu enn dimunn gayn batem, li bizin konn byin bann lanseynman inportan ki ena dan Labib, ek li bizin angaz li ar Bondye.

23, 24. Ki bon fason pu pran batem Kretyin?

²³ Plonze net dan delo, se kumsa mem ki bann Kretyin, zot batize. Apre ki Zezi ti batize dan Larivyer Zurdin, “li ti sorti anba delo.” (Mark 1:10) Kan ofisye Etyopyin la ti batize, li ek Filip ti rant dan delo ek apre zot ti resorti. (Akt 8:36-40) Dapre Labib, kan enn dimunn batize, se kumadir li pe anter so lavi avan. Donk, sa aksyon plonze net dan delo la, montre sa byin.—Romin 6:4-6; Kolosyin 2:12.

²⁴ The Oxford Companion to the Bible dir: “Kan nu lir Nuvo Testaman, nu truve ki kan ti batiz bann dimunn, ti plonz zot net dan delo.” Dapre Larousse du XX^e Siècle (Paris, 1928), “kan bann premye Kretyin ti pran batem, zot ti plonz net dan delo, partu kot zot ti truv delo.” Ek liv After Jesus—The Triumph of Christianity (Apre Zezi—Viktwar Vre Relizyon Kretyin) fer sa remark la: “Pu enn kandida batem, batem vedir, fer konn so lafwa an piblik ek apre, plonze net dan delo lor non Zezi.”

25. Ki nu pu egzamine dan prosin lartik?

²⁵ Nu’nn get detrwa legzanp bann kitsoz ki bann premye Kretyin ti krwar ek ki zot ti pratike. Nu’nn truve ki tusala ti sorti dan bann Lekritir. Nu ti kapav sit lezot legzanp pu montre kuma bann premye Kretyin ek bann Temwin Zeova krwar bann mem kitsoz. Dan prosin lartik, nu pu egzaminn bann lezot fason kuma kapav rekonet bann ki pe anseyn bann dimunn laverite.

Kuma U Pu Reponn?

• Ki kalite ladorasyon Bondye demande?

• Kuma eski laverite finn vinn reel par mwayin Zezi Kris?

• Ki laverite lor nam ek lamor?

• Kuma batem Kretyin derule? Ki bann kalifikasyon enn kikenn bizin ena pu li batize?

[Zimaz lor paz 14]

Zezi ti dir Pilat: ‘Mo finn vinn donn temwaynaz lor laverite’

[Zimaz lor paz 15]

Eski u kapav explike kifer Zezi ti dir: ‘Momem laverite’?

[Zimaz lor paz 16]

Ki laverite konsernan batem Kretyin?