Sapit 5

Ladorasyon Kisannla Bondye Aksepte?

 1. Ki enn madam Samaritenn ti anvi kone lor ladorasyon?

ESKI u finn deza demann u mem, ‘Ladorasyon kisannla Bondye aksepte?’ Sa mem kestyon ki ti sirman dan lespri enn madam kan li ti koz ar Zezi Kris pre kot Montayn Gerizim, dan Samari. Kan sa madam la ti dir: “Nu bann gran dimunn finn ador dan sa montayn la; me zot, zot dir ki dan Zerizalem ki bann dimunn bizin adore,” li ti pe atir latansyon Zezi lor diferans ki ena ant ladorasyon bann Samaritin ek ladorasyon bann Zwif. (Zan 4:20) Eski Zezi ti dir sa madam Samaritenn la ki Bondye aksepte tu ladorasyon? Uswa eski li ti dir li ki bizin fer sertin kitsoz ki Bondye demande pu fer Li plezir?

 2. Kan Zezi finn reponn sa madam Samaritenn la, ki li finn dir li?

² Zezi finn donn enn repons ki finn etonn madam la. Li finn dir: “Ler pe vini kot ni dan sa montayn la, ni dan Zerizalem ki zot pu ador [zot] Papa.” (Zan 4:21) Pandan enn bon letan, bann Samaritin ti ena lakrint pu Zeova, me zot ti pe priye usi bann lezot bondye lor Montayn Gerizim. (2 Lerwa 17:33) Asterla, Zezi Kris finn dir ki ni sa plas la ni Zerizalem pa pu enn plas inportan pu vre ladorasyon.

ADOR BONDYE AVEK LESPRI EK LAVERITE

 3. (a) Kifer eski bann Samaritin pa ti vremem konn Bondye? (b) Kuma eski bann Zwif fidel ek bann lezot kapav arive konn Bondye?

³ Zezi finn kontiyn dir sa fam Samaritenn la: “Zot ador seki zot pa kone, nu, nu ador seki nu kone, parski delivrans sorti ar bann Zwif.” (Zan 4:22) Bann Samaritin ti ena bann fos lide relizye ek zot ti aksepte zis sink premye liv Labib kuma bann liv ki Bondye finn fer ekrir par so lespri. Ek la usi, zot finn aranz li dan zot manyer, zot apel li Pantatek Samaritin. Me, zot pa ti konn Bondye vremem. Par kont, Bondye ti konfye bann Zwif konesans bann Lekritir. (Romin 3:1, 2) Lekritir ti donn tu bann Zwif fidel ek tu bann lezot ki ti pu ekute, seki zot ti bizin pu konn Bondye.

 4. Dapre Zezi, ki bann Zwif ek bann Samaritin ti pu bizin fer pu ki Bondye aksepte zot ladorasyon?

⁴ Me, Zezi finn montre ki bann Zwif ek bann Samaritin, tulede, ti pu bizin sanz zot fason adore pu zot fer Bondye plezir. Li finn dir: “Ler pe vini, wi asterla mem, kot bann vre adorater pu ador Papa avek lespri ek laverite, parski, avredir [nu] Papa pe rod sa bann kalite dimunn la mem pu ador Li. Bondye li Lespri, ek bann ki ador Li, bizin ador Li avek lespri ek laverite.” (Zan 4:23, 24) Nu bizin ador Bondye “avek lespri,” avek enn leker ranpli ar lafwa ek lamur. Nu kapav ador Bondye ‘avek laverite’ kan nu etidye so Parol, Labib, ek kan nu ador Li dapre laverite ki Li finn fer nu kone. Eski u kontan pu fer sa?

 5. (a) Ki vedir “ladorasyon”? (b) Ki nu bizin fer pu ki Bondye aksepte nu ladorasyon?

⁵ Zezi finn byin presize ki Bondye anvi gayn vre ladorasyon. Sa montre ki ena bann form ladorasyon ki Zeova pa aksepte. Ador Bondye vedir donn Li loner avek respe, ek donn Li enn servis sakre. Si u anvi donn loner enn dirizan ki ena buku lotorite, sirman u pu pre pu servi li ek fer seki fer li plezir. Alor, nu anvi fer Bondye plezir parey kumsa mem. Olye ki nu zis dir, ‘Mo satisfe ar mo relizyon,’ nu bizin plito gete si vremem nu pe ador Bondye kuma Li demande.

FER VOLONTE NU PAPA

 6, 7. Kifer eski Zezi pa rekonet bann ki swadizan so disip?

⁶ Kan nu lir Matye 7:21-23 nu truv enn pwin byin inportan ki permet nu kone si Bondye aksepte tu ladorasyon. Zezi finn dir: “Pa tu seki dir mwa, ‘Senyer, Senyer,’ ki pu rant dan rwayom lesyel, me seki pe fer volonte mo Papa ki dan lesyel, ki pu rantre. Sa zur la, buku pu dir mwa, ‘Senyer, Senyer, eski nu pa finn anons bann profesi par to non, ek pus bann demon par to non, ek fer enn kantite mirak par to non?’ Ek purtan, lerla, mo pu dir zot san ezite: Zame mo finn konn zot! Sorti devan mwa, ale, zot bann ki pa obeir lalwa.”

⁷ Dan vre ladorasyon, li byin inportan pu rekonet Zezi Kris kuma Senyer. Me sa verse la presiz byin ki bann swadizan disip Zezi pu mank enn kitsoz dan zot ladorasyon. Li finn dir ki ena pu fer bann “mirak,” par egzanp zot pu fer bann gerizon. Me selman, zot pa pu fer seki Zezi finn konsider inportan. Zot pa pu fer “volonte [so] Papa.” Si nu anvi fer Bondye plezir, nu bizin aprann konn volonte Bondye ek lerla fer li.

KONESANS EGZAK—ENN PROTEKSYON

 8. Ki nu bizin fer pu fer volonte Bondye, ek ki bann fos lide nu bizin rezete?

⁸ Pu fer volonte Bondye, nu bizin gayn enn konesans egzak lor Bondye Zeova ek Zezi Kris. Sa konesans la kapav amenn nu ver lavi pu tuletan. Alor, sirman nu tu pu anvi konsider zefor ki nu pu fer pu gayn konesans egzak dan Parol Bondye Labib, kuma enn kitsoz byin serye. Me, ena kapav panse ki tank ki zot sinser ek zele dan zot ladorasyon, enn konesans egzak pa inportan. Lezot kapav dir, ‘Mwins u kone, mwins kitsoz u pu bizin fer.’ Me purtan, Labib ankuraz nu pu ogmant nu konesans lor Bondye ek lor so bann proze.—Efezyin 4:13; Filipyin 1:9; Kolosyin 1:9.

 9. Kuma eski konesans egzak protez nu, ek kifer eski nu bizin sa proteksyon la?

⁹ Sa konesans la li enn proteksyon, li anpes nu ladorasyon kontamine. Lapot Pol ti koz lor enn kreatir spirityel ki fer li mem pas pu enn “anz lalimyer.” (2 Korintyin 11:14) Sa kreatir spirityel la—Satan—rod anbet bann dimunn ek pus zot pu fer bann kitsoz ki kont volonte Bondye. Bann lezot kreatir spirityel ki ansam avek Satan, zot usi, zot pe kontaminn ladorasyon bann dimunn. Lapot Pol ti dir: “Bann kitsoz ki bann nasyon pe sakrifye, zot pe sakrifye sa ar bann demon, me pa ar Bondye.” (1 Korintyin 10:20) Ala kifer, buku panse ki zot ti pe ador Bondye dan enn bon fason, alor ki zot pa ti pe fer seki Li anvi. Zot finn les zot mem anbete ek dirize dan fos ladorasyon malprop. Nu pu aprann plis lor Satan ek lor so bann demon apre, me enn kitsoz ki kler, seki sa bann lennmi Bondye la finn fini kontaminn ladorasyon bann dimunn net.

10. Ki u pu fer si enn kikenn par expre finn met pwazon dan u rezervwar delo, ek ki kitsoz konesans Bondye prepar nu pu fer?

¹⁰ Si u kone ki enn dimunn par expre finn met pwazon dan rezervwar ki furni u delo, eski u pu kontiyn bwar sa delo la? Sirman, u pu fer enn demars pu truv enn lot plas kot u kapav gayn delo prop. Ebyin, konesans egzak Parol Bondye donn nu tu seki nu bizin pu rekonet vre relizyon ek pu rezet tu bann malpropte ki kapav fer Bondye pa aksepte nu ladorasyon.

SERVI BANN KOMANNMAN ZOM KUMA BANN KRWAYANS RELIZYE

11. Ki pa ti bon avek ladorasyon buku bann Zwif?

¹¹ Kan Zezi ti lor later, buku Zwif pa ti azir dapre konesans egzak Bondye. Alor, zot finn rat lokazyon ki zot ti ena pu res prop devan Zeova. Pol finn ekrir konsernan sa bann dimunn la: “Mo donn bannla temwaynaz ki zot ena enn zel pu Bondye; me pa enn zel ki dapre konesans egzak.” (Romin 10:2) Olye ki zot ekut Bondye, zot ti desid par zot mem fason ki zot pu ador Li.

12. Ki ti kontaminn ladorasyon Izrael, ek ki konsekans sa finn ena?

¹² Kumansman, bann Izraelit ti pe pratik enn relizyon prop, relizyon ki Bondye ti donn zot. Me apre, bann lanseynman ek bann panse zom finn kumans kontaminn zot relizyon. (Zeremi 8:8, 9; Malaki 2:8, 9; Lik 11:52) Mem si bann Farizyin, bann sef relizye Zwif, ti panse ki Bondye ti aksepte zot ladorasyon, Zezi ti dir zot: “Izai ti ena rezon kan li finn profetiz lor zot, bann ipokrit, parey kuma finn ekrir, ‘Sa pep la donn mwa loner avek [zot] lalev, me zot leker byin lwin ar mwa. Pu nanyin zot pe kontiyn ador mwa, parski zot pe servi bann komannman zom pu anseyn bann krwayans relizye.’”—Mark 7:6, 7.

13. Parey kuma bann Farizyin, ki nu kapav arive fer nu’si?

¹³ Eski kapav arive ki nu’si, nu fer parey kuma bann Farizyin? Sa kapav arive si nu swiv bann tradisyon relizye ki nu finn gayne, olye ki nu egzaminn seki Bondye dir lor so ladorasyon. Pol finn averti nu kont sa danze la kan li ti ekrir: “Laparol ki dirize [par lespri] dir klerman ki dan bann lepok ki pu vini, ena pu abandonn lafwa, ek zot pu pran kont bann parol ek lanseynman bann demon, ki anbet [bann dimunn].” (1 Timote 4:1) Alor, fode pa ki nu zis sipoze ki nu ladorasyon fer Bondye plezir. Parey kuma madam Samaritenn ki ti zwenn Zezi, nu’si, kitfwa nu finn gayn nu fason adore kuma enn leritaz ar nu bann paran. Me nu bizin sir ki Bondye aksepte seki nu pe fer.

FER ATANSYON PA OFANS BONDYE

14, 15. Mem si nu ena enn ti konesans lor volonte Bondye, kifer nu bizin fer byin atansyon?

¹⁴ Si nu pa fer atansyon, nu kapav fer enn kitsoz ki Bondye pa aksepte. Par egzanp, lapot Zan ti tom dan lipye enn anz “pu ador li.” Me anz la finn averti li: “Atansyon! Pa fer sa! Mo zis enn esklav kuma twa, ek kuma to bann frer ki pe travay pu donn temwaynaz lor Zezi. Ador Bondye.” (Revelasyon 19:10) Alor, eski u truve komye li inportan ki u veye, ki okenn form ladorasyon idol pa gat u ladorasyon?—1 Korintyin 10:14.

¹⁵ Kan sertin Kretyin ti kumans pratik bann kutim relizye ki pa ti fer Bondye plezir, Pol ti demann zot: “Kuma eski zot kapav pe return ar bann kitsoz sinp ki feb ek mizerab, ek ki zot anvi revinn esklav sa bann kitsoz la? Zot pe pran byin kont bann zur, bann mwa, bann sezon ek bann lane. Mo per pangar, dan enn sertenn fason mo finn donn tu sa lapenn la dan vid pu zot.” (Galat 4:8-11) Sa bann dimunn la ti gayn enn konesans Bondye, me apre zot finn fer pese kan zot finn kumans swiv bann kutim relizye ek bann zur sakre ki Zeova pa ti aksepte. Kuma Pol finn dir, nu bizin “kontiyn verifye byin seki Senyer aksepte.”—Efezyin 5:10.

16. Kuma eski Zan 17:16 ek 1 Pyer 4:3 ed nu pu kone ki bann fet ek bann kutim ki fer Bondye plezir?

¹⁶ Nu bizin sir ki nu finn rezet tu bann fet relizye ek bann lezot kutim ki kont bann prinsip Bondye. (1 Tesalonisyin 5:21) Sa mem ki Zezi ti dir konsernan so bann disip: “Zot pa fer parti dan lemond, parey kuma mwa mo pa fer parti dan lemond.” (Zan 17:16) Eski dan u relizyon u swiv bann kutim ek bann fet ki fer u pran par dan bann zafer lemond? Uswa eski bann ki pratik u relizyon, zot pran par dan bann tradisyon uswa dan bann fet kot zot ena enn kondwit parey kuma Pyer finn dekrir? Li finn ekrir: “Pu zot, tu sa letan ki finn pase la finn ase pu zot fer volonte bann nasyon, kot zot ti pe pratik bann vis, bann pasyon, bwar buku divin, fer bann fet kot pena okenn kontrol, bann fet kot bwar ziska su, bann idolatri ki kont lalwa.”—1 Pyer 4:3.

17. Kifer eski nu bizin rezet tu kitsoz ki reflekte lespri lemond?

¹⁷ Lapot Zan ti byin montre linportans pu rezet bann pratik ki reflekte lespri lemond ki otur nu ek ki pa respekte Bondye. Lapot Zan finn ekrir: “Pa kontan lemond, ni bann kitsoz ki dan lemond. Si enn kikenn kontan lemond, lamur [nu] Papa pa dan Li; parski tu kitsoz ki dan lemond—dezir laser, dezir lizye, ek letalaz bann kitsoz ki nu ena—tusala pa sorti kot [nu] Papa, me sorti dan lemond. An plis, lemond pe al fini ek so dezir usi, me seki fer volonte Bondye pu res pu tuzur.” (1 Zan 2:15-17) Eski u finn note ki seki ‘fer volonte Bondye’ pu res pu tuzur? Wi, si nu fer volonte Bondye, ek si nu rezet bann pratik ki reflekte lespri lemond, nu kapav gard lespwar pu viv pu tuletan!

GARD BANN PRINSIP ELVE BONDYE LOR SEKI BON EK SEKI PABON

18. Kuma eski bann Korintyin ti pe fer erer konsernan kondwit ki zot ti bizin ena, ek ki sa bizin montre nu?

¹⁸ Bondye anvi ki so bann adorater gard so bann prinsip elve lor seki bon ek seki pabon. Dan ansyin lavil Korint, ena ti pe fer erer kan zot ti panse ki Bondye ti pu kontiyn toler zot move lavi ki zot ti pe amene. Kan nu lir 1 Korintyin 6:9, 10, nu kapav truve ki kantite zot ti pe fer erer. Si nu anvi ki Bondye aksepte nu ladorasyon, nu bizin fer Li plezir par nu parol ek par nu aksyon. Eski u fason adore permet u fer sa?—Matye 15:8; 23:1-3.

19. Kuma eski vre ladorasyon inflyans fason ki nu tret lezot?

¹⁹ Nu bann relasyon avek lezot usi bizin montre ki nu respekte bann prinsip Bondye. Zezi Kris finn ankuraz nu pu tret lezot parey kuma nu, nu ti pu kontan ki lezot tret nu. Sa li fer parti dan vre ladorasyon. (Matye 7:12) Not seki li finn dir usi konsernan lamur ki bizin ena ant bann frer: “Par sa zot tu pu kone ki zot mo bann disip, si zot ena lamur ant zot.” (Zan 13:35) Bann disip Zezi bizin kontan zot kamarad, ek zot bizin fer dibyin anver bann lezot adorater ek anver lezot dimunn usi.—Galat 6:10.

ENN LADORASYON KI PA PARTAZE

20, 21. (a) Ki kalite ladorasyon Bondye demande? (b) Kifer eski Zeova ti rezet ladorasyon Izrael dan lepok Malaki?

²⁰ Dan u leker, sirman u anvi ador Bondye kuma Li, Li aksepte. Pu sa, u bizin ena mem lopinyon ki Bondye lor ladorasyon. Disip Zak finn presiz byin ki lor sa size la, pa nu lopinyon ki konte, me lopinyon Bondye. Li finn ekrir: “Form ladorasyon ki prop ek ki san malpropte devan lizye nu Bondye ek nu Papa li: pran swin bann ki pena mama-papa, bann vev dan zot difikilte, ek res san tas ar lemond.” (Zak 1:27) Si nu anvi fer Bondye plezir, sakenn parmi nu bizin egzaminn nu ladorasyon pu nu sir ki li pa kontamine avek bann pratik ki Bondye pa aksepte, uswa pu nu sir ki nu pa pe rat enn kitsoz ki Bondye konsider inportan.—Zak 1:26.

²¹ Zeova kontan kan nu donn Li enn ladorasyon prop ki pa partaze. (Matye 22:37; Kolosyin 3:23) Kan nasyon Izrael pa ti donn Bondye ladorasyon ki Li ti pe atann, Li ti dir zot: “Enn garson li, li donn loner so papa; ek enn serviter donn loner so gran met. Alor, si mwa mo enn papa, kot loner ki mo merite? Ek si mwa mo enn gran met, kot lakrint pu mwa?” Zot ti pe ofans Bondye kan zot ti pe donn an sakrifis bann zanimo aveg, bwate, ek malad. Bondye ti rezet sa kalite ladorasyon la. (Malaki 1:6-8) Zeova merit enn form ladorasyon pli prop ki kapav ena, ek Li reklam enn latasman zis pu Li tusel.—Egzod 20:5; Proverb 3:9; Revelasyon 4:11.

22. Si nu anvi Bondye aksepte nu ladorasyon, ki nu pu bizin rezete, ek ki nu pu fer?

²² Sa madam Samaritenn ki ti koz ar Zezi la, ti paret interese pu ador Bondye fason ki Li aksepte. Si nu’si, nu ena sa dezir la, nu pu rezet tu bann lanseynman ek tu bann pratik ki kapav gat nu ladorasyon. (2 Korintyin 6:14-18) Plito, nu pu fer zefor pu gayn enn konesans egzak lor Bondye ek pu fer so volonte. Pu ki Bondye aksepte nu ladorasyon, nu bizin res byin atase avek seki Li demande. (1 Timote 2:3, 4) Bann Temwin Zeova pe fer latet-lipye pu kapav fer sa, ek zot kontan ankuraz u pu partisip ansam avek zot pu ador Bondye “avek lespri ek laverite.” (Zan 4:24) Zezi ti dir: “[Nu] Papa pe rod sa bann kalite dimunn la mem pu ador Li.” (Zan 4:23) Nu espere ki u sa kalite dimunn la. Parey kuma madam Samaritenn la, sirman u’si, u ti pu kontan gayn lavi pu tuletan. (Zan 4:13-15) Me selman, u truv dimunn vinn vye ek zot mor. Prosin sapit pu explik nu kifer sa.

TESTE U KONESANS

Parey kuma Zan 4:23, 24 montre, ki ladorasyon Bondye aksepte?

Kuma eski nu kapav kone si Bondye pran plezir ar sertin kutim ek sertin fet?

Ki bann kitsoz ki nu bizin fer pu ki Bondye aksepte nu ladorasyon?

[Zimaz paz 44]