“Parol Zeova Ti Pe Kontign Fane”

1-4. Par ki sitiasion difisil Pier pe pase, ek ki to ti pou resanti dan so plas?

TANN enn gro baw, kan bann gard ferm bann gro laport an-feray deryer Pier. Pier ansene avek enn gard romin dan sak kote, ek bann-la pe amenn li dan so kaso. Aster-la, li pou bizin atann plizir lertan, kitfwa mem plizir zour, avan ki li kone ki bann-la pou fer ar li. Kot Pier gete, li trouv zis bann miray prizon, bann baro, so bann lasenn, ek bann gard ki pe vey li.

² Enn extra move nouvel tonbe. Lerwa Erod Agripa I bien deside pou fer exekit Pier.a Ofet, apre Pak li pe pans pou prezant Pier ar lafoul ek pou met li amor pou fer lafoul plezir. Se pa enn menas anler. Pa tro lontan, Erod ti fer touy Zak, enn parmi bann zapot.

³ Mazine ki azordi se lanwit avan ki Erod fer exekit Pier. Pier dan so kaso ki bien nwar. Ki li pe panse? Eski li pe mazinn seki Zezi ti dir li inn gagn de-trwa lane avan, setadir ki bann dimounn ti pou atas li, ek amenn li kont so volonte pou ki li mor? (Zan 21:18, 19) Kitfwa Pier pe demann limem si sa moman-la inn arive.

⁴ Si to ti dan plas Pier, ki to ti pou resanti? Kitfwa boukou ti pou santi zot dezespere, parski zot panse ki pena okenn lespwar. Me pou enn vre disip Zezi Kris, eski kapav ena enn sitiasion kot pena okenn lespwar? Ki nou kapav aprann ar fason ki Pier ek bann lezot Kretien finn reazir ar persekision ki zot inn gagne? Anou get sa ansam.

5, 6. (a) Kifer, ek kouma Lerwa Erod Agripa I atak pep Bondie? (b) Kifer lamor Zak ti enn leprev bien dir pou lasanble?

⁵ Kouma nou’nn trouve dan sapit avan dan sa liv-la, kan Korney ek so fami ki ti bann non-Zwif ti vinn bann Kretien, sa ti vremem enn levennman bien inportan pou pep Zeova. Sirman bann Zwif finn gagn sok, kan zot finn trouv bann Kretien zwif pe reini ansam avek bann non-Zwif pou pratik zot ladorasion.

⁶ Erod, enn politisien ki bien malin. Li trouv sa sitiasion-la kouma enn lokazion pou gagn faver bann Zwif. Alor, li koumans maltret bann Kretien. Sirman li’nn aprann ki zapot Zak ti bien pros avek Zezi Kris. Alor, Erod fer “touy Zak, frer Zan, par lepe.” (Zist. 12:2) Se enn leprev bien dir pou lasanble! Kan Zezi so laparans ti sanze ek ki li ti fer sertin mirak, ti ena zis trwa zapot ki ti trouv sa, ek Zak ti enn parmi zot. (Mat. 17:1, 2; Mark 5:37-42) Zezi ti apel Zak ek so frer Zan “Bann Garson Loraz,” parski zot ti ena boukou lantouziasm. (Mark 3:17) Alor, lasanble perdi enn temwin fidel, ki ti ena boukou kouraz, ek ki zot ti bien kontan.

7, 8. Kouma bann manb lasanble reazir kan Pier al dan prizon?

⁷ Parey kouma Agripa ti pe atann, bann Zwif kontan kan inn fer exekit Zak. Alor, li pa aret lamem. Sann-kou si, li sort pou Pier. Parey kouma nou’nn trouve dan koumansman sa sapit-la, li fer bann-la aret Pier. Kitfwa Agripa rapel ki bann prizon pa’nn touletan efikas pou gard bann zapot kouma prizonie. Dan sapit 5 sa liv-la, nou ti trouve kouma gras-a enn mirak, bann zapot ti libere depi prizon. Alor pou fer sir ki sa zapot-la pa sove, Erod pa pran okenn risk. Li fer ansenn Pier avek enn gard dan sak kote, ek ena osi 16 gard ki travay lanwit-lizour lor enn sistem sift. Ek si par maler Pier reisi sove, bann gard-la ti pou konn mem santans ki Pier. Dan enn sitiasion difisil koumsa, ki bann lezot frer ek ser kapav fer?

⁸ Bann manb lasanble bien kone ki zot bizin fer. Zistwar Bann Zapot 12:5 dir: ‘Pandan ki Pier dan prizon, lasanble pe kontign priye Bondie pou li avek tou zot leker.’ Wi, bann lapriyer ki zot fer pou zot frer ki zot bien kontan, li bien sinser. Lamor Zak pa’nn fer zot perdi lafwa, ek zot touzour sir ki Zeova ekout zot bann lapriyer. Bann lapriyer bien inportan pou Zeova. Si zot an-akor avek so volonte, Li pou reponn zot. (Ebre 13:18, 19; Zak 5:16) Se enn leson bien inportan pou bann Kretien azordi.

 9. Ki nou kapav aprann lor lapriyer avek bann frer ek ser ki ti priye pou Pier?

⁹ Eski to konn bann frer ek ser ki pe pas par bann leprev? Kitfwa sertin pe viv dan bann pei kot nou travay interdi, zot pe gagn persekision, ouswa zot pe pas par bann katastrof natirel. Kifer to pa priye pou zot? Kitfwa to konn osi sertin frer ek ser ki pe pas par bann sitiasion difisil ki lezot pa remarke. Par exanp, zot bann fami pe persekit zot, zot dekouraze, ouswa zot pe pas par bann lezot sitiasion ki pe teste zot lafwa. Si to pran letan pou reflesi lor seki to pou dir avan ki to priye, to pou kapav mansionn nom sertin frer ek ser kan to pe koz ar Zeova, sa Kikenn ki ‘ekout bann lapriyer-la.’ (Ps. 65:2, NW) Ek pa bliye ki twa osi, to bizin ki to bann frer ek ser priye pou twa kan to pas par bann sitiasion difisil.

10, 11. Dekrir kouma anz Zeova liber Pier dan prizon.

¹⁰ Eski Pier per seki Erod pou fer avek li? Nou pa kone. Me pandan so dernie lanwit dan prizon, li pe dormi ant sa de gard ki pe vey li la. Sa zom ki ena lafwa la kone ki, ninport ki arive demin, Zeova pou rapel li. (Rom. 14:7, 8) Antouka, Pier pa’nn kapav imazinn bann kitsoz extraordiner ki pou arive dan de-trwa minit. Enn kout, enn lalimier bien eklatan ranpli so kaso. Enn anz pe debout la, ek li paret ki bann gard pa pe trouv anz-la. Ek la, anz-la degaze lev Pier. Lerla, bann lasenn ki dan so lame, ki kitfwa ti paret pa kapav kase, nek tonbe!

¹¹ Anz-la donn Pier enn seri lord ki kourt ek presi: “Degaze leve! . . . Abiy twa ek met to sandalet. . . . Met to manto.” Pier obeir deswit. Finalman anz-la dir li: “Swiv mwa,” ek se seki Pier fer. Zot kit kaso-la, pas devan bann gard ki devan kaso san fer okenn tapaz, ek pran direksion sa gran laport an-feray la. Kouma zot pou pas sa gran laport-la? Antouka, si Pier pe poz li sa kestion-la, li pa bizin atann lontan pou gagn so repons, parski kouma zot vinn pre ar laport, laport-la “ouver tousel.” Lerla, zot sorti ek aterir lor sime. Lerla, anz-la disparet. Pier tousel ek la li realize ki tou seki’nn pase, inn vremem arive. Alor, sa pa ti enn vizion. Li lib!​—Zist. 12:7-11.

12. Kifer sa kapav rekonfort nou kan nou reflesi lor fason ki Zeova inn sov Pier?

¹² Eski sa pa rekonfort twa pou kone ki Zeova kapav servi so pwisans ki pena okenn limit pou sov so bann serviter? Lerwa ki ti met Pier dan prizon ti ena backing enn gouvernman ki bien pwisan, ek ziska ler pa finn ena enn gouvernman pli pwisan ki sa. Pourtan, Pier pa’nn bizin fer bel zefor pou sorti dan prizon. Li vre ki azordi, Zeova pa fer sa bann kalite mirak la pou tou so bann serviter. Li pa’nn fer li pou Zak, ek Li pa’nn fer li osi pou Pier bann lane apre, kan seki Zezi ti predir konsernan Pier, ti realize. Azordi, bann Kretien pa atann ki Zeova fer enn mirak pou sov zot. Me selman, zot rapel ki Zeova pa’nn sanze. (Mal. 3:6) Biento, Li pou servi so Garson pou liber bann milyon dimounn ar lamor ki kouma enn prizon, kot okenn dimounn pa kapav sorti par limem. (Zan 5:28, 29) Sa bann promes-la vremem ankouraz nou kan nou ena pou fer fas ar bann leprev.

13-15. (a) Kouma bann manb lasanble ki kot Mari reazir kan Pier arive? (b) Apartir sa moman-la, lor ki kitsoz liv Zistwar Bann Zapot koze, me ki lefe Pier finn kontign ena lor so bann frer ek ser?

¹³ Pier pe debout dan nwar lor sime. Li pe kalkile kotsa li pou ale. Ek la, li rapel ki enn ser ki apel Mari, pa res tro lwin. Li paret ki Mari enn vev ki pa mizer, parski li ena enn lakaz ki ase gran pou ki bann frer ek ser reini kot li. Mari se Zan Mark so mama, ek se premie fwa ki liv Zistwar Bann Zapot koz lor Zan Mark. Ek avek letan li pou vinn kouma enn garson pou Pier. (1 Pier 5:13) Sa swar-la, mem si li bien tar, boukou frer ek ser kot Mari ek pe priye Bondie avek tou zot leker. Pena dout ki bann-la pe priye pou ki Pier libere, me zot pou bien etone ar fason ki Zeova pou reponn zot lapriyer!

¹⁴ Pier tap laport lantouraz, ek sa laport-la tom lor lakour ki devan lakaz Mari. Enn servant ki apel Roda, vinn ouver laport. Li pa’le krwar seki li pe tande. Se lavwa Pier! Li telman exsite, ki olie ki li ouver laport pou Pier, li les Pier lamem ek galoupe rant dan lakaz pou al dir bann-la ki Pier devan laport. Bann-la dir li ki li fol, me Roda pa bes lebra. Li kontign insiste ki seki li pe dir vre. Sertin dakor avek li, me dir ki kitfwa se enn anz ki reprezant Pier. (Zist. 12:12-15) Pandan tou sa letan-la, Pier pe kontign tap laport devan, ziska ki bann-la vini pou ouver laport.

¹⁵ Kan bann-la al kot laport, ‘zot trouv li ek zot etone’! (Zist. 12:16) Zot telman kontan, ki Pier bizin dir zot kalme zot pou ki li kapav rakont so zistwar. Apre sa, li demann bann-la pou rakont disip Zak ek bann lezot frer, seki’nn arive. Lerla Pier ale, avan ki bann solda Erod trouv li. Pier al servi dan enn landrwa kot li pou plis an sekirite. Zistwar Bann Zapot rekoz lor Pier zis dan sapit 15, kan kestion konsernan sirkonsizion leve. Apartir sa moman-la, Zistwar Bann Zapot koz lor Pol ek so bann vwayaz misioner. Me nou kapav sir ki ninport kotsa Pier inn ale, li’nn kontign fortifie lafwa so bann frer ek ser. Par exanp, sirman bann frer ek ser ki ti rasanble kot Mari ti dan lazwa, kan Pier inn kit zot.

16. Kifer nou kapav sir ki ena boukou bon kitsoz ki pe atann nou dan lavenir?

¹⁶ Parfwa Zeova donn so bann serviter plis ki seki zot atann, ek bien souvan sa donn zot enn gran lazwa. Sirman sa swar kot Pier inn libere la, bann frer ek ser dan lasanble ti resanti sa. Kitfwa nou osi nou ena sa santiman-la kan nou santi ki Zeova pe beni nou. (Prov. 10:22) Nou sir ki dan lavenir, Zeova pou realiz so bann promes dan lemond antie. Bann benediksion ki nou pou gagne dan lavenir pou bien plis ki seki nou kapav imazine azordi. Alor, nou kapav sir ki tanki nou res fidel, ena boukou bon lezot kitsoz ki pe atann nou.

17, 18. Ki kitsoz fer ki lafoul flat Erod?

¹⁷ Erod osi bien etone ki Pier inn sove, me sa pa enn bon sirpriz pou li. Deswit li donn lord pou rod Pier, ek apre sa interoz bann solda ki ti pe vey Pier. Li “donn lord pou pini zot,” ek sirman li fer exekit zot. (Zist. 12:19) Bann dimounn pa pou rapel Erod Agripa kouma enn kikenn ki ena konpasion ek mizerikord. Me eski sa zom kriel la inn gagn enn pinision pou seki li’nn fer?

¹⁸ Kitfwa Agripa Inn santi li rabase, parski li pa’nn reisi fer exekit Pier. Me biento, gras-a enn levennman diplomatik, li pou kapav regagn so fierte, parski so bann lennmi pou vinn get li pou fer lape. Alor, sa pou donn li lokazion pou fer enn diskour devan enn gran loditwar. Lik dir ki avan so diskour, ‘Erod met so linz rwayal.’ Flavis Zozef, enn istorien zwif, dir ki linz ki Erod ti mete ti an-arzan, koumsa kan lalimier ti pou tap lor lerwa, li ti pou briye koumadir li enn bondie. Apre sa, sa politisien bien arogan la fer so diskour. Lafoul ki anvi flat li dir: “Lavwa enn bondie sa, pa lavwa enn zom!”​—Zist. 12:20-22.

19, 20. (a) Kifer Zeova ti pini Erod? (b) Dan ki sans lamor Erod Agripa kapav donn nou enn sertin rekonfor?

¹⁹ Se zis Bondie ki gagn drwa gagn sa kalite laglwar-la, ek Bondie pe gete! Erod ti kapav evit gagn enn pinision. Li ti kapav koriz lafoul ouswa mem, pa dakor avek seki zot ti dir. Me li’nn montre ki proverb ki dir: “Lorgey amenn destriksion,” li vre. (Prov. 16:18, Proverb Dan Kreol Morisien) ‘Deswit anz Zeova fer li tom malad.’ Lerla sa zom ki egois ek fier la mor dan enn fason bien terib ek ki degoutan, parski ‘lever manz li ek li mor.’ (Zist. 12:23) Flavis Zozef osi, inn dir ki sa inn ariv Erod enn kout koumsa, ek anplis li’nn dir ki lerwa inn konpran ki li ti pe mor parski li ti aksepte laglwar ki lafoul ti donn li. Flavis Zozef ti dir ki Agripa Inn soufer pandan sink zour avan ki li mor.b

²⁰ Parfwa li kapav paret ki bann dimounn ki move, fer bann move kitsoz, san ki zot gagn okenn move konsekans. Fode pa ki sa etonn nou, parski “lemond antie li dan pouvwar sa kikenn ki move la.” (1 Zan 5:19) Me kanmem sa, ena fwa sa fatig bann serviter Bondie ki fidel, kan li paret ki bann move dimounn pa gagn okenn pinision. Me bann zistwar koumsa kapav rekonfort nou. Kan nou trouve ki Zeova inn azir dan sa sitiasion-la, sa rapel nou ki Li enn Kikenn ki kontan lazistis. (Ps. 33:5) Pa zordi pa dime, Li pou amenn lazistis.

21. Ki leson inportan nou aprann dan Zistwar Bann Zapot sapit 12, ek kifer sa kapav rekonfort nou azordi?

²¹ Sa zistwar-la fini avek enn leson bien ankourazan: “Parol Zeova ti pe kontign fane ek boukou dimounn ti pe vinn bann krwayan.” (Zist. 12:24) Sa rapor-la rapel nou ki Zeova ti beni travay predikasion, ek ki azordi osi Li pe kontign beni sa travay-la. Wi, seki’nn ekrir dan Zistwar Bann Zapot sapit 12, se pa zis zistwar enn zapot ki’nn mor, ek zistwar enn zapot ki’nn gagn lavi sov. Sa sapit-la ansegn nou boukou kitsoz lor Zeova, kouma Li’nn anpes Satan detrir lasanble Kretien ek kouma Li’nn anpes Satan aret travay predikasion. Bann latak Satan pa’nn marse, ek ninport kisann-la ki pou esey aret travay predikasion pa pou reisi. (Iza. 54:17) Parkont, bann ki dan kote Zeova ek Zezi Kris pe fer zot par pou ki sa travay-la kontigne. Sa li vremem ankourazan, pa vre? Wi, azordi nou ena privilez pou ede pou ki bann dimounn tann “Parol Zeova”!