“Apre ki Ti Ena enn Gran Deba”

1-3. (a) Ki kitsoz pe kree divizion dan bann lasanble dan premie siek? (b) Ki bienfe nou pou gagne kan nou pou examinn sitiasion ki arive dan liv Zistwar Bann Zapot?

KAN Pol ek Barnabas ariv dan Antios dan Siri, zot bien kontan parski zot fek fini zot premie vwayaz misioner. Zot extra kontan ki Zeova inn “ouver laport pou bann nasion pou ki zot kapav ena lafwa.” (Zist. 14:26, 27) Anplis, zot kontan ki bon nouvel pe fane partou dan Antios, ek ki “enn gran kantite” non-Zwif pe vinn bann Kretien.​—Zist. 11:20-26.

² Kan bann Kretien dan Zide tann dir ki ena bann nouvo disip, pa zot tou ki kontan. Ena sertin ki panse ki tou bann Kretien bizin sirkonsi, alor ki lezot panse ki li pa neseser. Kouma bann Kretien zwif bizin konsider bann Kretien non-zwif, ek eski bann Kretien non-zwif bizin swiv Lalwa Moiz? Sa kestion lor sirkonsizion la kree enn gran problem ant bann frer, ek mem menas lape dan lasanble. Kouma pou regle sa problem-la?

³ Kan nou pou examinn sa sitiasion-la dan liv Zistwar Bann Zapot, nou pou aprann boukou leson inportan. Sa pou ed nou pou azir avek sazes si enn zour dan lasanble ariv enn sitiasion ki kree divizion.

 4. Ki fos lide sertin Kretien zwif ena, ek ki kestion sa fer nou poze?

⁴ Lik dir: ‘Sertin zom depi Zide desann Antios ek koumans ansegn bann frer: “Si zot pa fer sirkonsizion dapre koutim Moiz, zot pa pou sape.”’ (Zist. 15:1) Nou pa kone si sa bann ‘zom depi Zide’ la, ti bann Farizien avan ki zot vinn bann Kretien. Me li paret ki zot ankor pans parey kouma bann Farizien ki ti swiv tou bann ti detay ki ena dan Lalwa. Kitfwa zot pe mem pretann ki seki zot pe dir, sorti kot bann zapot ek bann ansien dan Zerizalem. (Zist. 15:23, 24) Kifer bann Kretien zwif kontign krwar ki sirkonsizion inportan, alor ki’nn gagn 13 an, Bondie ti fer Pier konpran ki Li’nn aksepte bann non-Zwif dan lasanble?a​—Zist. 10:24-29, 44-48.

5, 6. (a) Kifer kitfwa sertin Kretien zwif panse ki bizin kontign fer sirkonsizion? (b) Eski lalians sirkonsizion ti form parti lalians Abraamik? Explike. (Get not.)

⁵ Kitfwa sa bann Zwif-la ena plizir rezon pou krwar sa. Se Zeova Limem ki ti demande ki tou bann zom dan so pep fer sirkonsizion, ek sa ti montre ki ti ena enn lien spesial ant zot avek Zeova. Se Zeova osi ki ti demann Abraam ek tou bann zom ki ti viv avek li pou fer sirkonsizion. Kan Zeova ti demann Abraam pou fer sa, pa ti ankor ena Lalwa Moiz. Me plitar, sirkonsizion ti form parti dan sa Lalwa-la.b (Lev. 12:2, 3) Dapre Lalwa Moiz, mem bann etranze ti bizin fer sirkonsizion pou ki zot kapav partisip dan sertin aktivite, kouma par exanp manz Repa Pak. (Ex. 12:43, 44, 48, 49) Alor pou bann Zwif, enn zom ki pa ti sirkonsi ti enn kikenn ki inpir ek ki pa ti kapav servi Zeova.​—Iza. 52:1.

⁶ Alor, bann Zwif ki’nn vinn bann Kretien, bizin ena lafwa ek limilite, pou ki zot kapav adapte zot fason panse ar fason panse Zeova. Nouvo lalians inn ranplas Lalwa Moiz. Savedir ki bann Zwif ki’nn ne Zwif nepli otomatikman form parti pep Bondie. Boukou Kretien zwif ankor pe viv dan bann kominote zwif, alor sa demann zot boukou kouraz pou aksepte Zezi kouma Lemesi, ek pou ador Bondie ansam avek bann Kretien non-zwif ki pa sirkonsi.​—Zer. 31:31-33; Lik 22:20.

 7. Ki kitsoz bann ‘zom depi Zide’ pa konpran?

⁷ Biensir, bann prinsip Zeova pa’nn sanze. Ek nou trouv sa bien avek nouvo lalians, parski dan nouvo lalians nou kapav retrouv bann prinsip fondamantal ki ena dan Lalwa Moiz. (Mat. 22:36-40) Par exanp, kan Pol ti koz lor sirkonsizion, li ti dir: “Enn vre Zwif se enn kikenn ki Zwif dan so leker ek so sirkonsizion se enn sirkonsizion leker par lespri sin ek pa par lalwa an ekri.” (Rom. 2:29; Det. 10:16) Me bann ‘zom depi Zide’ pa konpran sa. Ek zot pe persiste ki Bondie pa’nn kennsel lalwa konsernan sirkonsizion. Eski zot pou dakor pou sanz zot fason panse?

 8. Kifer bann frer desid pou al get komite santral dan Zerizalem konsernan kestion sirkonsizion?

⁸ Lik dir ki ‘apre ki ena enn gran deba ek enn gran diskision ant zot, setadir bann zom depi Zide ek Pol ek Barnabas, bann frer fer laranzman pou ki Pol, Barnabas, ek sertin mont Zerizalem pou al get bann zapot ek bann ansien konsernan sa zafer-la.’c (Zist. 15:2) ‘Sa gran deba ek gran diskision la,’ montre ki sakenn sir ki zot ena rezon, ek bann frer dan Antios pa pe reisi trouv enn solision pou sa problem-la. Alor pou gard lape ek linite, avek sazes, lasanble desid pou poz sa kestion-la ‘bann zapot ek bann ansien dan Zerizalem,’ ki form komite santral. Ki nou kapav aprann ar bann ansien dan Antios?

9, 10. Ki nou kapav aprann ar bann frer dan Antios, ek Pol ek Barnabas?

⁹ Premie leson ki nou aprann, se ki nou bizin ena foul konfians dan lorganizasion Zeova. Pran letan ek reflesi: Bann frer dan Antios ti kone ki dan komite santral, ti ena zis bann Kretien zwif. Me kanmem sa, zot ti ena konfians ki komite santral ti pou regle sa kestion-la an-akor avek bann Lekritir. Kifer? Lasanble ti sir ki Zeova ti pou regle sa problem-la gras-a so lespri sin, ek sef lasanble Zezi Kris. (Mat. 28:18, 20; Efe. 1:22, 23) Azordi, kan bann problem inportan leve, anou imit bon lexanp bann frer dan Antios kan nou fer foul konfians lorganizasion Bondie ek Komite Santral.

¹⁰ Sa montre nou osi ki nou bizin ena pasians ek limilite. Mem si se lespri sin ki ti swazir Pol ek Barnabas pou al pres avek bann non-Zwif, bann-la pa ti panse ki zot ti ena lotorite pou regle sa problem lor sirkonsizion la dan Antios. (Zist. 13:2, 3) Anplis, inpe apre Pol ti ekrir: ‘Mo ti mont Zerizalem parski mo ti gagn enn revelasion,’ seki ti montre ki lespri sin ti pe gid li. (Gal. 2:2) Azordi osi kan bann problem ki diviz lasanble leve, bann ansien fer zefor pou montre pasians ek limilite. Olie ki zot diskit ant zot ek insiste ki zot ena rezon, zot rod direksion Zeova dan Labib, ek zot rod bann instriksion ek bann konsey ki esklav fidel ek saz done pou sa bann problem-la.​—Fil. 2:2, 3.

11, 12. Kifer li inportan ki nou atann Zeova?

¹¹ Parfwa, nou bizin atann ki Zeova ed nou pou konpran sertin kitsoz. Rapel ki se lane 36 N.L. ki Korney ti gagn lespri sin, ek ki bann frer inn bizin atann 13 an, ver lane 49 N.L., pou ki Zeova fer zot konpran ki bann non-Zwif pa ti bizin fer sirkonsizion. Kifer Zeova ti atann tou sa letan-la? Kitfwa Bondie ti anvi donn bann Zwif ki sinser ase letan pou adapte avek sa gran sanzman-la. Lalians ki Zeova ti fer avek Abraam ek ki bann Zwif ti bien kontan, ti res an viger pandan 1,900 an. Alor, sa ti enn gro sanzman pou bann Zwif!​—Zan 16:12.

¹² Zeova ansegn nou ek form nou avek pasians ek zantiyes, ek sa vremem enn gran privilez! Seki Li ansegn nou touletan bon pou nou ek dan nou lavantaz. (Iza. 48:17, 18; 64:8) Fode pa ki nou fier ek insiste ki nou bann lide bon. Ek fode pa ki nou reazir dan enn move fason kan lorganizasion fer bann sanzman, ouswa donn bann nouvo lexplikasion konsernan bann verse. (Ekle. 7:8) Si to trouve ki to ena sa tandans-la, kifer to pa medit lor bann prinsip ki ena dan Zistwar Bann Zapot sapit 15, ek demann Zeova pou ed twa aplik sa bann prinsip-la?d

13. Kouma nou kapav imit pasians Zeova kan nou prese?

¹³ Kitfwa nou pou bizin ena pasians osi avek nou etidian Labib, kan li trouv sa difisil pou abandonn bann fos krwayans, ouswa bann tradision ki pa baze lor Labib. Dan sa sitiasion-la, nou pou bizin donn lespri sin Bondie ase letan pou ki li azir lor leker sa etidian-la. (1 Kor. 3:6, 7) Nou bizin osi priye pou li, ek ena konfians ki Zeova pou montre nou dan bon moman, ki pli bon fason pou ed sa etidian-la.​—1 Zan 5:14.

14, 15. (a) Kouma lasanble dan Antios donn loner Pol, Barnabas, ek bann lezot frer kan zot al Zerizalem? (b) Kouma Pol ek so bann konpagnon ankouraz bann lezot frer ki zot zwenn?

¹⁴ Lik kontign rakonte: ‘Apre ki lasanble akonpagn zot enn bout semin, sa bann zom-la kontign zot larout ek zot travers Fenisi ek Samari. Laba zot rakont an detay kouma bann dimounn lezot nasion pe konverti ek sa fer tou bann frer bien kontan.’ (Zist. 15:3) Parski lasanble akonpagn Pol, Barnabas, ek bann lezot frer enn bout semin, sa montre ki zot bien kontan bann-la, ki zot anvi donn zot loner, ek ki zot anvi ki bann-la kontign gagn benediksion Bondie. Ankor enn fwa, bann frer dan Antios donn nou enn bon lexanp! Eski to donn loner to bann frer ek ser, “sirtou bann [ansien] ki travay dir pou ansegn ek koz lor parol Bondie”?​—1 Tim. 5:17.

¹⁵ Lor larout ver Zerizalem, Pol ek so bann konpagnon ankouraz bann frer ek ser dan Fenisi ek Samari, kan zot rakont “an detay” kouma bann dimounn lezot nasion inn vinn bann Kretien. Kitfwa parmi bann ki pe ekout zot, ena bann Kretien zwif ki’nn vinn res dan sa bann rezion-la, apre ki Etienn ti mor akoz so lafwa. Azordi osi, sa ankouraz nou kan nou tande kouma Zeova pe beni nou travay predikasion, sirtou kan nou pe pas par bann leprev. Nou gagn sa bann nouvel-la dan bann renion, bann lasanble sirkonskripsion ek rezional, ek dan bann biografi ki ena dan bann magazinn ouswa lor jw.org. Eski to pe fer tou seki to kapav pou pa rat okenn sa bann lankourazman-la?

16. Ki kitsoz montre ki kestion lor sirkonsizion inn vinn enn gro problem?

¹⁶ Apre ki sa delegasion ki sorti Antios la vwayaz 550 kilomet dan direksion lesid, zot ariv Zerizalem. Lik ekrir: ‘Kan zot ariv dan Zerizalem, lasanble, bann zapot, ek bann ansien bien akeyir zot, ek zot rakont tou bann kitsoz ki Bondie inn fer par zot.’ (Zist. 15:4) Me selman, ‘sertin parmi bann ki ti swiv lansegnman bann Farizien ek ki’nn vinn krwayan lev lor zot sez ek dir: “Bizin fer sirkonsizion ar zot ek donn zot lord pou swiv Lalwa Moiz.”’ (Zist. 15:5) Vremem sa kestion lor sirkonsizion la inn vinn enn gro problem, ek bien bizin regle sa!

17. Kisann-la ti form parti dan komite santral dan Zerizalem, ek kifer kitfwa ti ena “bann ansien” ansam avek zot?

¹⁷ Proverb 13:10 (Proverb Dan Kreol Morisien) dir: “Bann ki ekout konsey ena lasazes.” An-akor avek sa prinsip-la, “bann zapot ek bann ansien ti zwenn ansam pou diskit lor [kestion sirkonsizion].” (Zist. 15:6) “Bann zapot ek bann ansien” ti pran bann desizion pou tou bann lasanble, ek azordi osi Komite Santral fer parey. Me kifer “bann ansien” ti pe travay ansam avek bann zapot? Rapel ki ti exekit Zak, ek ki pandan enn sertenn letan Pier ti dan prizon. Eski mem kitsoz ti kapav ariv lezot zapot? Si wi, li ti pou bien inportan ki ena bann lezot frer ki lespri sin inn swazir pou ki travay-la kontigne.

18, 19. Ki bann parol pwisan Pier dir, ek ki bann dimounn ki pe ekout li bizin konpran?

¹⁸ Lik kontigne: ‘Apre enn long diskision, Pier leve ek dir: “Mo bann frer, zot bien kone ki depi lontan, Bondie inn swazir mwa parmi zot pou ki bann dimounn lezot nasion tann bon nouvel ek ki zot krwar. Ek Bondie, ki konn leker, finn montre ki li aksepte zot kan li’nn donn zot lespri sin, parey kouma li ti donn nou osi. Ek li pa’nn fer okenn diferans ant zot ek nou, me li’nn pirifie zot leker akoz zot lafwa.”’ (Zist. 15:7-9) Dapre enn liv referans, mo grek ki’nn servi dan verse 7 pou “enn long diskision,” kapav osi vedir “rode; poz bann kestion.” Mem si bann frer ena diferan lopinion lor sa size-la, zot pa ezite pou dir seki zot panse vremem.

¹⁹ Bann parol ki Pier dir, rapel bann-la ki li ti la kan bann premie non-Zwif, setadir Korney ek so fami, ti gagn lespri sin lane 36 N.L. Si Zeova inn aret fer diferans ant bann Zwif ek bann non-Zwif, par ki lotorite bann dimounn kapav fer lekontrer? Anplis, se pa parski enn dimounn obeir Lalwa Moiz ki Zeova pou aksepte so ladorasion, me fode ki sa dimounn-la ena lafwa dan Lekris.​—Gal. 2:16.

20. Dan ki sans, bann ki kontan sirkonsizion “pe teste Bondie”?

²⁰ An-akor avek seki Bondie ti dir dan enn fason kler, ek fason ki Li ti servi so lespri sin, Pier fer sa konklizion-la: “Alor kifer aster-la zot pe teste Bondie kan zot pe inpoz lor bann disip enn fardo ki ni nou, ni nou bann anset pa’nn kapav sarye? Okontrer, nou ena lafwa ki parey kouma nou gagn delivrans gras-a bonte extraordiner Lesegner Zezi, bann-la osi gagn delivrans.” (Zist. 15:10, 11) Pier dir ki bann ki pe lager lor sirkonsizion “pe teste Bondie,” ouswa ‘teste so pasians.’ Zot pe esey fors bann non-Zwif pou swiv Lalwa, alor ki zotmem zot pa’nn kapav swiv sa Lalwa-la net, ek akoz sa, zot ti kondane pou mor. (Gal. 3:10) Bann Zwif ki pe ekout Pier, bizin rekonesan ki Bondie inn montre so bonte extraordiner anver zot atraver Zezi.

21. Ki Barnabas ek Pol dir pou ed bann frer pran enn bon desizion?

²¹ Li kler ki bann parol ki Pier dir fer bann-la reflesi, parski ‘zot tou res trankil.’ Apre sa, Barnabas ek Pol rakont ‘tou bann mirak ek bann kitsoz extraordiner ki Bondie inn fer atraver zot parmi bann dimounn lezot nasion.’ (Zist. 15:12) Aster-la, bann zapot ek bann ansien ena tou bann linformasion ki zot bizin pou pran enn desizion ki an-akor avek volonte Bondie lor sirkonsizion.

22-24. (a) Kouma Komite Santral azordi swiv lexanp komite santral dan premie siek? (b) Kouma tou bann ansien montre ki zot respekte lotorite ki Zeova inn etabli?

²² Azordi osi, kan bann manb Komite Santral zwenn ansam, zot rod direksion Bondie dan so Parol, Labib, ek zot priye pou gagn so lespri sin. (Ps. 119:105; Mat. 7:7-11) Pou ki zot kapav fer sa, sak manb Komite Santral gagn enn program sa renion-la alavans, pou ki li kapav reflesi ek priye lor bann kitsoz ki zot pou get ansam. (Prov. 15:28) Pandan sa renion-la, sa bann frer ki Zeova inn swazir par so lespri la, servi Labib ek pa ezite pou dir avek respe seki zot panse.

²³ Bann ansien dan lasanble bizin imit zot lexanp. Ek si bann ansien pa pe reisi regle enn gro problem, zot kapav rod konsey ar Betel, ouswa ar bann reprezantan ki Betel inn nome, kouma par exanp bann responsab sirkonskripsion. Lerla, si bizin, Betel kapav ekrir Komite Santral.

²⁴ Wi, Zeova pou beni bann ki montre limilite, fidelite, pasians, ek ki swiv bann direksion so lorganizasion. Ek kouma nou pou trouve dan prosin sapit, kan nou fer sa, Zeova pou beni nou, donn nou lape, ek linite.