“Ki Volonte Zeova Akonpli”

1-4. Kifer Pol pe al Zerizalem, ek ki pe atann li laba?

POL ek Lik pe debout lor enn pon ki amenn lor bato. Inn ariv ler pou ki sa de misioner-la kit Mile. Dan zot bagaz, zot ena tou seki zot bizin pou zot vwayaz. Zot pe osi amenn avek zot bann kontribision pou bann Kretien ki pov dan Zide, ek zot bien anvi amenn sa kado-la pou bann-la. Me selman kan zot pe ale, zot leker pe fermal parski zot bizin kit bann ansien ki sorti Efez ki zot bien kontan.

² Enn ti labriz pe gonfle bann lavwal bato, ek bato-la koumans kit lepor kot ena boukou tapaz. Sa de zom-la, ansam avek zot set konpagnon, pe get zot bann frer ki lor lepor ek ki bien tris. (Zist. 20:4, 14, 15) Pol ek so bann konpagnon kontign fer zot kamarad babay ziska ki zot nepli trouv zot.

³ Pandan anviron trwa-z-an, Pol ti travay ansam avek bann ansien dan Efez. Me aster-la lespri sin pe gid li pou al Zerizalem. Li ena enn ti lide ki pe atann li laba. Inpe avan, li ti dir sa bann ansien-la: “Mo pe al Zerizalem parski lespri sin pe fors mwa, mem si mo pa kone ki pou ariv mwa laba, apart ki dan enn lavil apre lot, lespri sin pe kontign fer mwa kone ki prizon ek persekision pe atann mwa.” (Zist. 20:22, 23, not) Malgre bann danze ki pe atann li, Pol santi ki “lespri sin pe fors” li. Seki vedir ki li pa zis santi li oblize pou fer li, me li anvi swiv direksion ki lespri sin pe donn li pou al Zerizalem. Sa pa vedir ki li kontan soufer, me ki seki pli inportan pou li, se fer volonte Bondie.

⁴ Eski twa osi, to ena sa santiman-la? Kan nou’nn promet Zeova pou donn Li nou lavi, nou’nn promet Li ki kitsoz ki pli inportan dan nou lavi aster-la, se fer so volonte. Dan sa sapit-la, nou pou aprann plis lor lexanp lapot Pol, ek sa pou ed nou pou swiv so lexanp.

 5. Kotsa Pol ek so bann konpagnon pase pou ariv Tir?

⁵ Bato ki Pol ek so bann konpagnon pran, “al drwat.” Savedir ki zot pa bizin zigzage akoz bann divan kontrer, me parski zot pe al dan mem direksion ki divan, sa permet zot ariv Kos mem zour. (Zist. 21:1) Li paret ki bato-la zet lank laba pou lanwit, avan ki li al Rod ek Patara. Dan Patara, ki trouv lor lakot Sid Lazi Miner, zot pran enn bato kargo ki amenn zot direk Tir, dan Fenisi. Kan zot lor bato pou al Tir, zot pas devan ‘lil Sip, ki trouv dan zot kote gos.’ (Zist. 21:3) Kifer Lik, ki’nn ekrir liv Zistwar Bann Zapot, mansionn sa detay-la?

 6. (a) Kifer kitfwa sa ankouraz Pol kan li trouv lil Sip? (b) Kan to reflesi lor kouma Zeova finn beni twa ek ed twa, ki santiman to kapav ena?

⁶ Kitfwa, parski kan zot pas devan sa lil-la, Pol rakont bann lexperyans ki li’nn viv laba. Anviron nef an avan, pandan so premie vwayaz misioner, Pol, ansam avek Barnabas ek Zan Mark, ti zwenn Elimas, ki ti enn longanis ek ki ti opoze ar zot predikasion. (Zist. 13:4-12) Kitfwa kan Pol trouv sa lil-la ek ki li reflesi lor seki ti arive laba, sa ankouraz li ek sa donn li lafors pou seki pe atann li pli devan. Nou osi sa kapav ed nou kan nou reflesi lor kouma Bondie finn beni nou ek finn ed nou pou andir bann difikilte. Lerla, kitfwa sa pou ed nou pou ena bann mem santiman ki David, ki ti ekrir: “Dimoun ki obeyir Bondie fer fas boukou traka me LESEGNER delivre li dan tousala.”​—Ps. 34:19.

 7. Ki Pol ek so bann konpagnon fer kan zot ariv Tir?

⁷ Pol bien kontan profit konpagni so bann frer ek ser. Lik dir ki kan zot ariv Tir, ‘zot rod bann disip ek zot trouv zot.’ (Zist. 21:4) Pol ek so bann konpagnon kone ki ena bann frer ek ser dan Tir, alor zot al rod bann-la ek sirman res avek zot. Enn parmi bann zoli benediksion ki nou gagne kan nou dan laverite, se ki ninport kotsa nou ale, nou kapav trouv bann frer ek ser ki pou kontan pou akeyir nou. Bann ki kontan Bondie ek ki pratik vre ladorasion, ena bann kamarad partou dan lemond.

 8. Kouma nou bizin konpran Zistwar Bann Zapot 21:4?

⁸ Pol ek so bann konpagnon res pandan set zour dan Tir. Lik dir ki pandan sa letan-la, enn kitsoz ki kapav paret bizar arive: ‘Akoz seki lespri sin inn revel bann frer dan Tir, plizir fwa bann disip dir Pol pa met lipie dan Zerizalem.’ (Zist. 21:4) Eski Zeova inn sanz so lide? Eski aster-la Li pe dir Pol pa al Zerizalem? Non. Lespri sin ti dir ki Pol ti pou gagn maltrete dan Zerizalem, me li pa ti dir ki li ti bizin evit sa lavil-la. Li paret ki gras-a lespri sin, bann frer dan Tir konpran ki Pol pou gagn bann problem dan Zerizalem. Alor, parski zot gagn Pol so traka, zot esey konvink li pou pa al Zerizalem. Nou konpran ki zot anvi protez Pol kont bann problem ki li kapav gagne dan Zerizalem. Me kanmem sa, Pol bien determine pou fer volonte Zeova ek pou al Zerizalem.​—Zist. 21:12.

9, 10. (a) Kan Pol tann bann frer dan Tir sipliy li pou pa al Zerizalem, ki kitsoz kitfwa li rapel? (b) Ki tandans bann dimounn ena azordi, ek kouma sa bien diferan ar seki Zezi ti dir?

⁹ Kan bann frer sipliy Pol pou pa al Zerizalem, kitfwa Pol rapel ki bann disip Zezi ti reazir dan mem fason kan Zezi ti dir zot ki li bizin al Zerizalem, soufer boukou, ek mor. Dan sa lokazion-la, akoz seki Pier ti resanti pou Zezi, li ti dir: “To bizin bon ar tomem, Segner; zame sa pa pou ariv twa.” Zezi ti reponn: “Pas deryer mwa, Satan! To kouma enn ros lor mo sime, parski to pa pans kouma Bondie me kouma bann zom.” (Mat. 16:21-23) Zezi ti determine pou fer volonte Bondie ek pou ofer so lavi kouma enn sakrifis. Pol osi dispoze pou soufer ek mem mor pou fer volonte Bondie. Nou sir ki parey kouma lapot Pier, bann frer dan Tir ena bann bon lintansion, me zot pa konpran ki se volonte Bondie ki Pol al Zerizalem.

¹⁰ Azordi, bien souvan bann dimounn prefer bon ar zotmem ouswa swiv sime ki pli fasil. Zot ena tandans pou rod enn relizion kot zot pena boukou zefor pou fer. Me Zezi ti ankouraz nou pou ena enn lot fason panse. Li ti dir so bann disip: “Si enn kikenn anvi swiv mwa, li bizin aret viv pou limem ek pran so poto soufrans ek kontign swiv mwa.” (Mat. 16:24) Mem si li pa fasil pou swiv Zezi, samem kitsoz pli bon ek pli saz ki nou kapav fer.

11. Kouma bann disip dan Tir montre ki zot kontan Pol ek ki zot soutenir li?

¹¹ Letan pas bien vit, ek ariv ler pou ki Pol, Lik, ek zot bann konpagnon kontign zot vwayaz. Lik dekrir zot depar avek boukou lemosion. Bann zom, bann madam, ek bann zanfan akonpagn Pol ek so bann kamarad ziska laplaz. Zot tou met zot azenou ek priye ansam, ek dir zot kamarad orevwar. Sa montre ki kantite bann frer ek ser dan Tir bien kontan Pol ek ki kantite zot anvi soutenir li dan so servis. Apre sa, Pol, Lik, ek zot bann konpagnon mont lor enn lot bato ek kontign zot vwayaz ziska Tolemais, kot zot zwenn bann frer, ek res enn zour avek zot.​—Zist. 21:5-7.

12, 13. (a) Ki Filip inn fer dan so servis pou Zeova? (b) Ki bann papa kapav aprann ar lexanp Filip?

¹² Apre sa, Lik dir ki Pol ek so bann konpagnon al Sezare. Kan zot ariv laba, zot “rant dan lakaz Filip, enn predikater.”a (Zist. 21:8) Sirman zot bien kontan pou retrouv Filip. Anviron 20 an avan, bann zapot ti swazir li pou ede pou distribie manze dan nouvo lasanble ki ti’nn forme dan Zerizalem. Filip enn predikater ki bien devwe depi lontan. Rapel ki kan ti gagn persekision ek ki bann disip ti disperse, Filip ti al Samari ek ti koumans prese. Plitar, li ti pres ar enn ofisie lakour etiopien ek ti batiz li. (Zist. 6:2-6; 8:4-13, 26-38) Tousala montre ki Filip inn vremem fer boukou dan so servis pou Zeova!

¹³ Filip ankor pe donn so maximum dan predikasion. Aster-la li res Sezare, ek li bien okipe dan predikasion parski Lik apel li “enn predikater.” Nou aprann osi ki li ena kat tifi ki profetize, seki montre ki bann-la pe swiv tras zot papa.b (Zist. 21:9) Savedir osi ki Filip inn travay bien dir pou ed so fami pou kontan ek servi Zeova. Azordi, bann papa kapav swiv so lexanp, kan zotmem zot donn lexanp dan predikasion ek kan zot ed zot zanfan pou kontan predikasion.

14. Kan Pol vizit so bann frer ek ser, ki bienfe zot tou gagne, ek kouma nou kapav imit zot?

¹⁴ Ninport kotsa Pol ale, li rod so bann frer ek ser, ek pas letan avek zot. Sirman bann frer ek ser dan bann landrwa kot li ale, bien kontan pou akeyir li ek so bann konpagnon. Gras-a sa bann vizit-la, nou sir ki zot tou ‘ankouraze par lafwa zot kamarad.’ (Rom. 1:11, 12) Azordi, nou gagn bann mem lokazion. Mem si nou lakaz bien sinp, nou kapav gagn boukou lankourazman kan nou invit responsab sirkonskripsion ek so madam kot nou.​—Rom. 12:13.

15, 16. Ki mesaz Agabis anonse, ek ki lefe sa ena lor bann dimounn ki pe tann sa?

¹⁵ Pandan ki Pol pe res kot Filip, enn lot kikenn ki bann dimounn bien respekte arive, Agabis. Bann ki’nn rasanble dan lakaz Filip kone ki Agabis enn profet. Li ti predir ki ti pou ena enn lafaminn pandan ki Lanperer Klod ti pou regne. (Zist. 11:27, 28) Kitfwa zot pe demann zotmem: ‘Kifer Agabis inn vini? Ki li ena pou dir?’ Pandan ki zot tou zot lizie fixe lor li, Agabis pran Pol so sintir. Sa sintir-la ti enn long bout latwal ki bann dimounn ti abitie met otour zot lerin, kot ti kapav met kas ek bann lezot kitsoz. Agabis atas so prop lame ek so prop lipie avek sa sintir-la. Apre sa, li koze. So mesaz bien inportan: “Ala seki lespri sin dir: ‘Koumsa mem ki bann Zwif dan Zerizalem pou atas proprieter sa sintir-la, ek zot pou livre li dan lame bann dimounn lezot nasion’”​—Zist. 21:11.

¹⁶ Sa profesi-la konfirme ki vremem Pol pou al Zerizalem. Li montre osi ki bann Zwif dan Zerizalem pou livre Pol “dan lame bann dimounn lezot nasion.” Kan bann dimounn ki’nn reini dan sa lakaz-la tann sa profesi-la, zot bien trakase. Lik ekrir: ‘Kan nou’nn tann sa, nou ek bann ki la koumans sipliy Pol pou pa mont Zerizalem. Lerla Pol reponn: “Kifer zot pe plore ek zot pe sey dekouraz mwa? Pa gagn traka, mo’nn pare pa zis pou ki bann-la atas mwa, me osi pou mor dan Zerizalem pou nom Lesegner Zezi.”’​—Zist. 21:12, 13.

17, 18. Kouma Pol montre ki li bien determine pou fer volonte Bondie, ek kouma bann frer reazir?

¹⁷ Sey mazine kouma sa inn pase. Bann frer, parmi ena Lik, sipliy Pol pou pa al Zerizalem. Sertin parmi zot pe plore. Pol trouve ki zot vremem kontan li ek ki zot gagn so traka. Alor, avek boukou lamour li demann zot pou pa “sey dekouraz [li],” ouswa kouma sertin tradiksion dir, zot pe “fer [so] leker fermal.” Kanmem sa, Pol bien determine. Parey kouma sa ti pase dan Tir, Pol pa les bann siplikasion ek bann larm fer li ezite. Okontrer, li explik zot kifer li bizin ale. Pol vremem montre boukou kouraz ek determinasion! Parey kouma Zezi, Pol bien deside pou al Zerizalem. (Ebre 12:2) Pol pa pe anvi mor, me si sa bizin arive, li pou konsider sa kouma enn loner, parski li pou mor kouma enn disip Kris Zezi.

¹⁸ Kouma bann frer reazir? Zot respekte so desizion. Labib dir: ‘Nou pa’nn reisi konvink li, alor nou’nn aret insiste ek nou’nn dir: “Ki volonte Zeova akonpli.”’ (Zist. 21:14) Bann ki esey konvink Pol pou ki li pa al Zerizalem, pa insiste pou ki li fer seki zot anvi. Zot ekout Pol, zot aret insiste, ek zot rekonet ek aksepte volonte Zeova, mem si sa difisil pou zot. Pol inn pran enn sime ki finalman pou amenn li ver lamor. Li ti pou pli fasil pou Pol, si bann ki kontan li pa ti esey konvink li pou pa al Zerizalem.

19. Ki leson nou aprann ar seki’nn ariv Pol?

¹⁹ Nou aprann enn leson bien inportan ar seki’nn ariv Pol: Fode zame ki nou esey konvink lezot pou pa fer bann sakrifis pou servi Zeova. Nou kapav aplik sa prinsip-la ar boukou sitiasion, pa zis kan sa inplik lavi ouswa lamor. Par exanp, mem si boukou paran Kretien trouv sa difisil pou trouv zot zanfan kit lakaz pou al servi Zeova dan bann landrwa ki bien lwin, zot determine pou pa dekouraz zot. Phyllis, ki res Langleter, rapel seki li ti resanti kan so sel tifi ti al servi kouma misioner dan Lafrik. Li ti dir: “Sa ti bien difisil pou mwa. Mo ti tris parski li ti pou bien lwin ar mwa. Mo ti fier ek tris anmemtan. Mo’nn priye boukou lor la, me sa ti so desizion ek zame mo’nn esey konvink li pou retourne. Ofet, mo’nn touletan ansegn li pou met Zeova an premie dan so lavi! Pandan sa 30 dernie lane-la, li’nn servi Zeova dan diferan pei, ek toulezour mo remersie Zeova pou so fidelite.” Ala li zoli la, kan nou ankouraz nou bann frer ek ser pou fer bann sakrifis pou servi Zeova!

20, 21. Ki kitsoz montre ki Pol kontan frekant so bann frer ek ser, ek kifer li anvi fer sa?

²⁰ Apre ki tou so bann zafer inn fini pare, Pol kontign so vwayaz ek bann frer ki dan Sezare akonpagn li. Sa montre ki zot bann kamarad fidel ki soutenir li. Toutlong zot vwayaz ziska Zerizalem, Pol ek bann ki akonpagn li, rod bann lokazion pou zwenn zot bann frer ek ser. Dan Tir, zot rod bann disip ek zot res avek zot pandan set zour. Dan Tolemais, zot al get zot bann frer ek ser, ek res enn zour avek zot. Dan Sezare, zot res plizir zour dan lakaz Filip. Apre sa, sertin disip dan Sezare akonpagn Pol ek so bann konpagnon ziska Zerizalem ek zot res kot Mnason, ki enn parmi bann premie disip. Finalman, kan zot ariv Zerizalem, Lik dir ki ‘bann frer akeyir zot avek boukou lazwa.’​—Zist. 21:17.

²¹ Li kler ki Pol anvi pas letan avek so bann frer ek ser. Kan li avek zot, sa bien ankouraz li, parey kouma sa ankouraz nou osi pou pas letan avek nou bann frer ek ser. Pena dout ki lankourazman ki li’nn gagne pou donn li lafors pou fer fas ar bann lennmi ki pou rod touy li.