Eski kikenn vrai-mem interessé ar moi?

Eski ou finn deja senti-ou tousel ek decouragé, coumadir pa ti ena personne ki vrai-mem comprend bann probleme ki ou ti pé gagné? Ek mem si zot ti konn sa bann probleme-la, ou ti ena l’impression ki zot pa ti vrai-mem interessé ar seki ti pé arrive ou.

KAN nou gagne bann probleme, nou ena l’impression ki nou pé passe dan enn cyclone. Parfois, nou kapav mem ena l’impression ki nou pé passe dan enn situation ki tellement difficile ek ki injuste ki nou pensé ki nou pou nepli kapav supporté. Souvent nou ena sa sentiment-la kan nou pé souffert lor plan affectif, kan nou pé faire enn depression, kan nou’nn faire enn accident ki’nn affaibli nou, kan nou gagne enn maladie chronik, ou-soit kan nou gagne enn lot probleme inpé pareil. Kitfois nou senti-nou tellement abatte ek desesperé ki nou envie koné kot sa nou kapav gagne reconfort. Eski kikenn vrai-mem interessé ar nou?

“Bondié ki donne tou consolation” interessé ar nou

La Bible decrire Bondié couma enn “Papa ki ena beaucoup misericorde ek Bondié ki donne tou consolation.” (2 Corinthiens 1:3) Bondié, ki appel Jéhovah, koné ki nou bizin consolation. La Bible servi mot “consolation” plus ki cent fois, dan plusieurs fason, pou rassure nou ki Bondié pa zis comprend seki nou pé traversé mais Li aussi envie console nou. Sa connaissance-la donne nou l’assurance ki mem kan lezot coumadir pa pé remark nou bann probleme ou-soit zot pa pé comprend ek pa pé tracassé, Jéhovah Li, Li interessé ar nou.

Bann l’Ecriture montré bien ki Jéhovah interessé ar chaque dimoune. La Bible dire: “Lizié Jéhovah partout, Li pé veille bann ki mauvais ek bann ki bon.” (Proverbes 15:3) Pareil, dan Job 34:21, nou lire: “So lizié lor conduite chaque dimoune, ek Li trouve tou so bann pas.” Jéhovah trouve seki nou faire—ki li bon, ki li mauvais—ek Li konn nou situation, alors Li kapav agir dan enn fason ki adapté ar nou situation. Bann parole ki prophete Hanani, enn voyant, ti dire Asa, ki ti le roi Juda, confirme sa: “En seki concerne Jéhovah, so lizié pé guette partout lor la terre pou montré so la force en faveur bann dimoune ki ena enn leker complet envers Li.”—2 Chroniques 16:7, 9.

Jéhovah pé veille lor nou pou enn lot raison. Jésus expliké: “Personne pa kapav vinn vers moi si mo Papa, ki finn envoye moi, pa attire li.” (Jean 6:44) Jéhovah tellement interessé ar bann dimoune, ki Li guetté si ena enn dimoune ki envie konn Li pli bien. Si Li trouve sa, Li kapav aide sa dimoune-la par bann fason ki vrai-mem extraordinaire. Par exemple, dan République dominicaine, enn madame ti l’hopital pou enn l’operation cancer. Li ti suppliye Bondié pou aide li trouve vrai religion. Zis dan sa ler-la, so mari ti amenn enn brochure pou li, ek so titre ti Ki Bondié pé demann nou faire?a So mari ti gagne sa brochure-la gramatin kan enn Témoin de Jéhovah ti vinn kot li. Madame-la ti lire sa brochure-la ek li ti realisé ki Bondié ti’nn reponn so la priere. Li ti accepté enn l’etude la Bible avek bann Témoins de Jéhovah ek dan moins ki six mois li ti voué so la vie ar Bondié ek apré li ti prend bapteme.

Dan livre Psaumes dan la Bible, nou trouve plusieurs l’expression encourageant ki bann ancient psalmiste hébreu, couma le roi David, ti ecrire ek ki decrire couma Jéhovah interessé avek amour ar so bann serviteur. Dan Psaume 56:8, nou trouve le roi David pé suppliye Bondié: “Mette mo larme dan to bouteille en la peau. Eski zot pa dan to livre?” Sa comparaison-la montré, ki David ti koné ki Jéhovah pa ti zis trouve so souffrance, mais aussi l’effet ki sa ti ena lor so sentiment. Jéhovah ti konn la peine ki David ti ena ek Li ti rappel ki David ti passe dan enn situation difficile lor plan affectif ek ki sa ti faire li ploré. Vrai-mem, nou Createur veille lor tou bann ki faire zeffort pou faire so volonté, “bann dimoune ki ena enn leker complet envers Li.”

Enn lot passage la Bible ki montré ki Jéhovah interessé ar nou avek amour c’est Psaume 23, ki beaucoup dimoune koné. Bann premier verset sa Psaume-la decrire Jéhovah couma enn berger ki ena l’amour: “C’est Jéhovah ki mo Berger. Mo pa pou mank nanyin.” Enn berger ki vive dan Moyen-Orient prend compte chaque mouton ki li ena, li mem donne sakenn enn nom. Toulé-jour li appel chaque mouton ek avek amour li caresse li ek guetté si li’nn blessé. Si li trouvé ki enn mouton inn blessé, li mette de l’huile ou-soit enn la pommade lor l’endroit kot li finn blessé-la pou ki sa di-mal-la bien. Si mouton-la malade, kitfois sa berger-la pou bizin fonce medecine dan so la gorge pou oblige li boire-sa ek faire li debouté pou ki li pa allongé ek mort. Vrai-mem, sa li enn joli l’exemple pou montré couma Jéhovah interessé ar bann ki rod so l’aide.

La priere ek resurrection—Bann preuve ki Bondié interessé ar nou

Sa bann psaume-la ek lezot encore pa finn ecrire dan la Bible zis pou nou lire zot ek gagne la joie. Zot montré nou couma bann fidele serviteur dan le passé finn ouvert zot leker ar Jéhovah pou montré ki zot ti bizin l’aide Bondié ek aussi pou remercié Li pou direction ek benediction ki Li ti donne zot. Seki zot inn dire montré bien ki sa bann serviteur Bondié ki ti vive dan le passé-la ti sur ki Bondié interessé ar zot. Kan nou lire ek nou medite lor sa bann parole bien touchant-la, sa kapav aide nou pou ena mem sentiment envers Bondié. Privilege ki Bondié accorde nou pou prié Li, c’est enn preuve solide ki Bondié interessé ar nou.

Mais, parfois, nou senti-nou tellement bouleversé par enn probleme ki nou nepli koné couma pou prié pou sa probleme-la. Eski sa empeche Jéhovah konn nou souffrance? Romains 8:26 reponn nou: “L’esprit aussi vinn aide nou dan nou faiblesse; parski probleme-la c’est: nou pa koné couma pou prié pou sa kitsoz ki nou bizin prié-la, mais l’esprit saint li-mem plaide pou nou avek bann soupire ki nou pa kapav exprimé en parole.” Sa verset-la dire nou ki bann la priere ki bann serviteur Bondié ti inspiré pou ecrire dan le passé, kapav reflete nou bann sentiment ek lerla Jéhovah, sa Kikenn “ki ecoute la priere[-la],” kapav accepté sa bann la priere-la coumadir nou ki pé faire sa.—Psaume 65:2.

L’esperance resurrection li enn lot preuve ki convaink nou ki Bondié interessé ar chaque dimoune. Jésus Christ ti dire: “L’heure pé vini kot tou seki dan bann tombe souvenir pou tann [Jésus] so la voix ek pou sorti.” (Jean 5:28, 29) Mot grec ki finn servi ici, finn bien traduire par “bann tombe souvenir” ek pa zis “bann tombe.” Li donne l’idée ki Bondié rappel tou lor la vie sa dimoune ki’nn mort-la.

Zis maziné, pou ki Bondié kapav ressuscite enn dimoune, Li bizin konn tou lor sa dimoune-la, couma li ti été physiquement, bann trait caractere ki li finn herité ek ki li finn gagné avek le temps, ek tou so bann souvenir! (Marc 10:27) Souvenir ki Bondié ena lor sa dimoune-la pa disparette, mem apré plusieurs millier l’année. (Job 14:13-15; Luc 20:38) Alors, Jéhovah rappel en detail tou sa bann milliard dimoune ki finn mort-la—enn preuve ki Jéhovah interessé ar sakenn parmi nou!

Jéhovah recompense so bann serviteur

Ki nou bizin faire pou ki Bondié interessé ar nou avek amour? Avant tou, nou bizin montré ki nou faire Li confiance ek ki nou obeir Li, ki nou ena la foi en Li. L’apotre Paul ti montré ki pou enn dimoune gagne soutien Jéhovah, li bizin ena la foi. Li ti ecrire: “Sans la foi li impossible pou faire Li plaisir, parski enn dimoune ki approche ar Bondié, bizin croire ki Li existé, ek ki Li vinn sa kikenn ki recompense bann ki rod Li vrai-mem.”—Hébreux 11:6.

Remarké ki pou ena enn la foi ki faire Bondié plaisir, sa implik deux kitsoz. Premierement, nou bizin “croire ki Li existé,” ek ki Li nou pli grand Dirigeant ki merite nou l’obeissance ek nou l’adoration. Deuxiemement, nou bizin croire ki Li “recompense bann ki rod Li vrai-mem.” Ena enn la foi veritable vedir croire ki Bondié Li interessé ar bien-etre tou bann ki vrai-mem envie faire So volonté ek ki Li recompense zot. Kan ou etudié Parole Bondié ek ou frequente bann ki obeir Li, ou aussi ou pou kapav ena la foi—enn la foi ki pou faire ou gagne recompense ki Bondié donné ek ki pou faire Li interessé ar ou avek amour.

Zordi beaucoup dimoune pensé ki Bondié pa interessé ar bann dimoune. Mais couma nou finn trouvé, la Bible montré dan enn fason clair ki Bondié interesse-Li beaucoup ar bann ki montré enn la foi veritable en Li. Mem si zordi la vie rempli avek souffrance, tracas, decouragement, ek la peine, fodé pa nou desesperé. Jéhovah vrai-mem interessé ar nou. En realité, avek amour Li demann nou pou rod so l’aide. Enn psalmiste ti dire: “Jette to fardeau lor Jéhovah Li-mem, ek Li-mem Li pou soutenir toi. Jamais Li pa pou laisse enn kikenn droite, tombé.”—Psaume 55:22.

[Note]

[L’encadré lor page 27]

Bann verset ki faire ou ena encore plus confiance ki Bondié interessé ar ou

“En seki concerne Jéhovah, so lizié pé guette partout lor la terre pou montré so la force en faveur bann dimoune ki ena enn leker complet envers Li.”—2 CHRONIQUES 16:9

“Mette mo larme dan to bouteille en la peau. Eski zot pa dan to livre?”—PSAUME 56:8

“C’est Jéhovah ki mo Berger. Mo pa pou mank nanyin.”—PSAUME 23:1

“Toi ki ecoute la priere, oui tou dimoune pou vinn vers toi.”—PSAUME 65:2

“To pou appel moi, ek moi mo pou reponn toi. To pou attann avek impatience pou trouve travail ki to la main finn faire.”—JOB 14:15

“Enn dimoune ki approche ar Bondié, bizin croire ki Li existé, ek ki Li vinn sa kikenn ki recompense bann ki rod Li vrai-mem.”—HÉBREUX 11:6

“Jette to fardeau lor Jéhovah Li-mem, ek Li-mem Li pou soutenir toi. Jamais Li pa pou laisse enn kikenn droite, tombé.”—PSAUME 55:22