• Eski Ou Pre pou Pran Batem?
    Viv Ere pou Touletan!—Dekouver Seki Labib Dir

    • 3. Kifer fode pa ou les laper anpes ou pou pran batem?

      Sertin dimounn per tansion zot pa kapav tini promes ki zot inn fer Zeova. Li vre ki parfwa ou pou fer bann erer, me mem bann zom ek bann fam fidel ki mansione dan Labib ti fer bann erer. Ek Zeova pa atann ki so bann serviter parfe. (Lir Psom 103:13, 14.) Seki pli inportan pou Li se ki ou fer ou best! Ek Li pou ed ou fer sa. Ofet, Zeova rasir nou ki nanye pa “kapav separ nou ar [so] lamour.”​—Lir Romin 8:38, 39.

  • Ou Kapav Res Fidel kan Ou Gagn Persekision
    Viv Ere pou Touletan!—Dekouver Seki Labib Dir

    • Pa zordi pa dime, bann dimounn pou esey anpes ou servi Zeova ek mem persekit ou. Eski sa bizin fer ou per?

      1. Kifer nou bizin atann ki nou gagn persekision?

      Labib dir dan enn fason bien kler: “Tou dimoun ki vremem oule viv dan Lekris pou gagn persekision dan zot lavi.” (2 Timote 3:12) Bann dimounn ti persekit Zezi parski li pa ti form parti dan lemond Satan. Nou osi nou pa form parti dan lemond. Alor, fode pa sa etonn nou ki bann gouvernman ek bann lorganizasion relizie persekit nou.​—Zan 15:18, 19.

      2. Kouma nou kapav prepar nou pou fer fas ar persekision?

      Depi asterla mem, nou bizin fer zefor pou ena plis konfians dan Zeova. Toulezour nou bizin pran letan pou priye Zeova ek lir Labib. Nou bizin osi asiste bann renion regilierman. Tousala pou donn ou kouraz ek lafors ki ou bizin pou fer fas ar persekision, mem si se ou bann fami ki pe persekit ou. Get ki lapot Pol, enn dimounn ki’nn bien gagn persekision, ti ekrir: “[Zeova], limem mo sekour, Mo pa pou per nanye.”​—Ebre 13:6.

      Kan nou prese regilierman, sa ed nou osi pou gagn plis kouraz. Predikasion aprann nou pou met nou konfians dan Zeova ek pou pa per seki bann dimounn kapav fer nou. (Proverb 29:25) Si depi asterla mem ou fer plis zefor pou ena kouraz, sa pou ed ou pou kontign prese mem si enn zour bann gouvernman anpes ou prese.​—1 Tesalonisien 2:2.

      3. Ki bienfe nou gagne kan nou res fidel malgre bann persekision?

      Nou pa kontan kan bann dimounn persekit nou. Me kan nou reisi tini ferm, sa fer nou lafwa vinn pli for. Ek kan nou nepli ena lafors pou tini, nou resanti led Zeova. Lerla, sa fer nou vinn pli pros avek Li. (Lir Zak 1:2-4.) Biensir, kan Zeova trouv nou soufer sa fer so leker fermal. Me Zeova kontan kan Li trouv nou pe tini ferm. Labib dir: “Si, apre ki zot finn fer dibien, zot ena pou soufer, sa li enn lagras devan Bondie.” (1 Pier 2:20) Alor, si nou res fidel, Zeova pou rekonpans nou. Nou pou kapav viv pou touletan dan enn nouvo lemond. Ek lerla, tou dimounn pou servi Zeova, ek personn pa pou persekit nou.​—Matie 24:13.

      ANOU GET INPE PLIS

      Nou pou aprann ki nou kapav res fidel ar Zeova mem kan bann dimounn persekit nou. Nou pou gete osi kouma Zeova pou rekonpans nou.

      Enn madam pe kontign so letid Labib, mem si so bann paran pa dakor.

      4. Ou kapav tini ferm mem si ou fami esey anpes ou servi Zeova

      Zezi ti kone ki kitfwa sertin manb nou fami pa ti pou dakor ki nou servi Zeova. Lir Matie 10:34-36, ek apre sa, get sa kestion-la ansam:

      • Ki bann manb lafami kapav dir ouswa fer kan enn kikenn swazir pou servi Zeova?

      Pou trouv enn lexanp, zwe VIDEO-la, ek apre sa, get sa kestion-la ansam:

      VIDEO: Zeova Finn Akeyir Nou (5:13)

      • Ki ou pou fer si enn fami ouswa enn kamarad esey anpes ou pou servi Zeova?

      Lir Psom 27:10 ek Mark 10:29, 30. Apre ki ou’nn lir sak verse, get sa kestion-la ansam:

      • Kouma sa promes-la kapav ed ou, si ou fami ouswa ou bann kamarad esey anpes ou servi Zeova?

      5. Kontign ador Zeova mem si bann dimounn persekit ou

      Nou bizin ena kouraz pou kontign servi Zeova kan bann dimounn esey anpes nou fer sa. Zwe VIDEO-la, ek apre sa, get sa kestion-la ansam:

      VIDEO: Montre Kouraz Malgre Persekision (6:27)

      • Kouma bann lexanp ki ena dan sa video-la kapav ed ou pou ena kouraz?

      Lir Zistwar Bann Apot 5:27-29 ek Ebre 10:24, 25. Apre ki ou’nn lir sak verse, get sa kestion-la ansam:

      • Kifer li inportan ki nou kontign ador Zeova, mem si bann gouvernman anpes nou pou prese ek asiste bann renion?

      6. Zeova pou ed ou pou tini ferm

      Ki zot vie ouswa zenn, bann Temwin Zeova partou dan lemond finn kontign servi Zeova avek fidelite, mem si bann dimounn ti persekit zot. Pou kone ki kitsoz inn ed zot, zwe VIDEO-la. Apre sa, get sa kestion-la ansam:

      VIDEO: Zeova pou Donn Mwa Lafors (3:40)

      • Dan sa video-la, ki finn ed sa bann frer ek ser la pou tini ferm?

      Lir Romin 8:35, 37-39 ek Filipien 4:13, NW. Apre ki ou’nn lir sak verse, get sa kestion-la ansam:

      • Kouma sa verse-la rasir ou ki ou pou kapav tini ferm devan ninport ki leprev?

      Lir Matie 5:10-12, ek apre sa, get sa kestion-la ansam:

      • Kifer ou kapav ere mem si ou gagn persekision?

      Bann Temwin Zeova dan nou lepok pe gagn persekision ek pe met zot dan prizon akoz zot lafwa.

      Bann milyon Temwin Zeova finn kontign servi Zeova avek fidelite malgre persekision. Ou osi ou kapav fer sa!

      SERTIN DIMOUNN DIR: “Mo pa pou kapav tini si mo gagn persekision.”

      • Ki bann verse Labib ou kapav servi pou rasir enn dimounn ki dir sa?

      SEKI NOU’NN APRANN

      Sa ena boukou valer pou Zeova kan nou fer zefor pou servi Li, mem kan nou gagn persekision. Gras-a so led nou pou kapav tini ferm!

      Eski Ou Rapel?

      • Kifer bann Kretien bizin atann ki zot pou gagn persekision?

      • Ki ou kapav fer depi asterla mem pou prepar ou pou fer fas ar persekision?

      • Kifer ou kapav sir ki ou pou kapav kontign servi Zeova malgre ninport ki difikilte ou pou gagne?

      Mo Lobzektif

      DEKOUVER

      Enn zenn frer, ki’nn fer prizon akoz so netralite, rakonte kouma Zeova finn ed li.

      Andire Malgre Persekision (2:34)

      Ki kitsoz finn ed enn koup pou res fidel ar Zeova, mem si pandan plizir lane bann dimounn ti persekit zot?

      Kontign Servi Zeova Malgre Bann Sanzman (7:11)

      Aprann kouma ou kapav ena kouraz kan bann dimounn persekit ou.

      “Prepar Twa Depi Asterla Mem pou Fer Fas ar Persekision” (Latour Degard, Ziliet 2019)

      Kouma nou bizin konsider persekision ki nou gagne ar nou fami, ek ki nou kapav fer pou tini ferm malgre bann difikilte?

      “Laverite Pa Amenn ‘Lape, me Lepe’” (Latour Degard, Oktob 2017)