“Kouma Bann Mor Pou Resisite?”

1-2. Kifer tou bann Kretien bizin interes zot ar rezireksion ki ena dan lesiel?

AZORDI, laplipar bann serviter Zeova ena lesperans pou viv pou touletan lor later. Me ena enn ti-group Kretien ki ankor vivan azordi ek ki ena lesperans pou al viv dan lesiel. Sa bann Kretien-la anvi kone kouma zot lavi pou ete dan lesiel. Me kifer bann lezot brebi osi bizin konn sa? Sa lartik-la pou montre nou ki bann Kretien ki ena lesperans pou viv lor later pou gagn bann bienfe gras-a rezireksion ki ena dan lesiel. Alor, ki nou ena lesperans pou viv dan lesiel ouswa lor later, nou bizin interes nou ar rezireksion ki ena dan lesiel.

² Dan premie siek, Bondie ti servi so lespri sin pou fer sertin disip Zezi ekrir lor lesperans pou al viv dan lesiel. Lapot Zan ti dir: “Nou deza bann zanfan Bondie, me li pa kler kouma nou pou ete apre. Me nou kone kan li pou vini nou pou resanble li.” (1 Zan 3:2) Alor, bann Kretien ki ena lesperans pou al dan lesiel pa kone kouma zot lavi pou ete dan lesiel. Selman, zot kone ki, kan zot pou gagn zot rekonpans, zot pou trouv Zeova. Labib pa donn tou ti detay konsernan rezireksion ki ena dan lesiel, me lapot Pol donn nou sertin linformasion lor la. Li explike ki bann Kretien ki ena lesperans pou al dan lesiel pou avek Zezi kan li pou “detrir tou regn, otorite ek pouvwar.” Li pou osi detrir “dernie lennmi,” setadir “lamor.” Finalman, Zezi ek tou bann ki regn ansam avek li pou soumet zot ar Zeova. Zezi pou osi soumet tou kitsoz ar so Papa. (1 Kor. 15:24-28) Sa pou enn moman extraordiner!b

 3. Dapre 1 Korintien 15:30-32, ki kitsoz Pol so lesperans dan rezireksion ti ed li pou fer?

³ Pol ti krwar dan rezireksion, akoz sa li ti reisi andir bann gran leprev. (Lir 1 Korintien 15:30-32.) Li ti dir bann Korintien: “Sak zour mo riske mo lavi.” Li ti dir osi: “Mo [finn] lager kont bann zanimo dan Efez.” Kitfwa Pol ti pe koz lor bann vre zanimo sovaz ki ti ena dan enn larenn dan Efez. (2 Kor. 1:8; 4:10, NW; 11:23) Ouswa kitfwa li ti pe koz lor bann Zwif ek bann lezot dimounn ki, kouma bann “zanimo,” ti opoz ar li. (Zist. 19:26-34; 1 Kor. 16:9) Pol ti fer fas ar bann gran danze, selman li ti gard lespwar ki li ti pou ena enn lavenir ki ere.​—2 Kor. 4:16-18.

 4. Kouma lesperans rezireksion fortifie bann Kretien azordi? (Get zimaz lor kouvertir.)

⁴ Nou pe viv enn lepok bien difisil. Sertin frer ek ser pe soufer akoz laviolans. Ena lezot ki pe soufer akoz lager ek zot pa santi zot an sekirite. Dan sertin pei, bann serviter Zeova pa lib pou prese, ek zot pe servi Zeova mem si zot kapav al dan prizon ouswa mor akoz sa. Malgre sa bann sitiasion-la, tou sa bann frer ek ser-la pe kontign servi Zeova ek zot enn lexanp pou nou. Zot kone ki, mem si zot mor, Zeova pou realiz so promes ek pou donn zot enn zoli lavenir, ek sa vremem rekonfort zot.

 5. Ki move fason panse kapav diminie nou lafwa dan rezireksion?

⁵ Pol ti averti so bann frer konsernan enn move fason panse ki sertin parmi zot ti ena. Li ti dir zot: “Si bann mor pa resisite, alor anou manze-bwar parski dime nou pou mor.” Sertin dimounn ti ena sa fason panse-la mem dan lepok lapot Pol. Pol kitfwa ti sit bann parol ki trouv dan Izai 22:13, ki ti koz lor latitid bann Izraelit. Olie ki zot ti ogmant zot lamour pou Bondie, zot ti plis interese ar bann plezir lavi. Zot ti panse ki zot ti bizin profit lavi asterla tansion demin zot mor. Me Labib montre nou dan enn fason bien kler bann konsekans ki zot ti gagne akoz sa latitid-la.​—2 Kro. 36:15-20.

 6. Kifer lesperans rezireksion bizin motiv nou pou swazir bien nou bann kamarad?

⁶ Lesperans rezireksion bizin motiv nou pou swazir bien nou bann kamarad. Bann Kretien dan Korint ti bizin aret frekant bann dimounn ki pa ti krwar dan rezireksion. Ki leson nou aprann? Si nou pas boukou letan ar bann kamarad ki pa gagn traka lavenir ek ki zis pans lamizman, zot pou ena enn move lefe lor nou. Zot kapav fer nou ena enn move fason panse ek bann move labitid. Zot kapav mem fer nou fer bann kitsoz ki Bondie deteste. Se pou sa rezon-la ki Pol ti donn sa lavertisman-la: “Regagn zot lespri ek bon sans, ek aret fer pese.”​—1 Kor. 15:33, 34.

 7. Kouma mansione dan 1 Korintien 15:35-38, ki kestion sertin dimounn kapav poze lor rezireksion?

⁷ Lir 1 Korintien 15:35-38. Enn kikenn ki anvi fer lezot ena bann dout lor rezireksion kitfwa kapav dir: “Kouma bann mor pou resisite?” Li bon ki nou reflesi lor repons ki lapot Pol ti done, parski azordi bann dimounn ena diferan lopinion lor seki arive apre lamor. Me ki Labib ansegne lor la?

 8. Ki lexanp kapav ed nou pou konpran seki arive kan enn kikenn resisite pou al dan lesiel?

⁸ Kan enn kikenn mor, so lekor dekonpoze net. Me Kreater liniver kapav resisit sa dimounn-la ek donn li lekor ki li bizin. (Zen. 1:1; 2:7) Pol ti servi enn lexanp pou explike ki Bondie pa bizin resisit lekor ki enn dimounn ti ena avan. Li ti servi lexanp enn lagrin ki plant dan later, ki zerme, ek ki vinn enn plant. Plant-la bien diferan ar lagrin-la. Pol ti servi sa lexanp-la pou montre ki nou Kreater kapav “donn [enn kikenn] enn lekor ki [Bondie] finn swazir.”

 9. Dapre 1 Korintien 15:39-41, ki diferan kalite lekor ena?

⁹ Lir 1 Korintien 15:39-41. Pol explike ki Bondie pa finn kree tou bann lekor parey. Par exanp, lekor bann mamifer, bann zwazo, ek bann pwason bien diferan. Pol explike ki dan lesiel osi li parey. Par exanp, soley bien diferan ar lalinn, ek sak “zetwal so briyans pa parey kouma enn lot zetwal.” Wi, mem si nou pa kapav trouv sa bann diferans-la ar nou lizie, bann siantis dir ki ena diferan kalite zetwal, ena ki gro, ena ki tipti, ena ki rouz, ena ki blan, ek ena ki zonn kouma nou soley. Pol explike osi ki ena “bann lekor seles ek bann lekor teres.” Li ti pe rod dir ki bann ki viv lor later, zot ena enn lekor fizik, alor ki bann ki viv dan lesiel, zot ena enn lekor spiritiel, kouma bann anz.

10. Bann ki resisite pou al dan lesiel, ki kalite lekor zot ena?

¹⁰ Remarke ki Pol dir apre: “Parey koumsamem pou rezireksion bann mor. Lekor ki met dan later li mortel, lekor ki resisite li imortel.” Biensir, kan enn kikenn mor, so lekor dekonpoze ek li vinn lapousier. (Zen. 3:19) Alor, kouma li posib ki enn “lekor ki resisite li imortel”? Pol pa ti pe koz lor enn kikenn ki resisite pou viv lor later, parey kouma bann dimounn ki Eli, Elize, ek Zezi ti resisite. Pol ti pe koz lor bann dimounn ki ti pou resisite pou al viv dan lesiel, bann ki pou resisite avek “enn lekor spiritiel.”​—1 Kor. 15:42-44.

11-12. Ki kalite lekor Zezi ti gagne kan li ti resisite, ek ki pou ariv bann Kretien ki ena lesperans pou al dan lesiel?

¹¹ Kan Zezi ti lor later, li ti ena enn lekor fizik. Me kan li ti resisite, li ti vinn “enn Lespri ki donn lavi” ek li ti retourn dan lesiel. Dan mem fason, bann Kretien ki ena lesperans pou al dan lesiel, zot pou resisite avek enn lekor spiritiel. Pol ti explike: “Parey kouma nou ti resanble dapre zom ki sorti dan later, parey nou pou kouma zom ki sorti lesiel.”​—1 Kor. 15:45-49.

¹² Li inportan nou rapel ki Zezi pa ti resisite avek enn lekor imin. Pol ti explik sa kan li ti dir: “Laser ek disan pa kapav ena par dan Rwayom Bondie” ki dan lesiel. (1 Kor. 15:50) Bann zapot ek bann lezot Kretien ki ena lesperans pou al dan lesiel, pa pou resisite dan lesiel avek bann lekor laser ek disan, ki kapav pouri. Kan eski zot ti pou resisite? Pol ti explike ki sa ti pou arive dan lavenir, pa deswit apre zot lamor. Kan Pol ti ekrir so premie let pou bann Korintien, sertin disip ti fini “mor,” kouma par exanp, lapot Zak. (Zist. 12:1, 2) Lezot zapot ek lezot disip ti pou “mor” plitar.​—1 Kor. 15:6.

13. Ki ti pou arive pandan prezans Zezi Kris?

¹³ Zezi ek Pol toulede ti koz lor enn lepok bien inportan dan listwar: prezans Zezi Kris. Zezi ti anonse ki, pandan so prezans, ti pou ena bann lager, bann tranbleman-de-ter, bann lepidemi, ek lezot problem ankor dan lemond antie. Depi 1914, nou pe trouv sa profesi Labib la realize. Me ti pou ena enn lot kitsoz inportan osi ki ti pou arive. Zezi ti dir ki bon nouvel Rwayom Bondie ti pou prese “partou dan lemonn, kouma enn temwagnaz pou tou bann nasion; lerla lafin [ti] pou vini.” (Mat. 24:3, 7-14) Pol ti dir ki pandan “prezans nou Segner,” bann Kretien ki ena lesperans pou al dan lesiel ki ti mor, ti pou resisite.​—1 Tes. 4:14-16, NW; 1 Kor. 15:23.

14. Ki ariv bann Kretien ki ena lesperans pou al dan lesiel ki mor pandan prezans Zezi Kris?

¹⁴ Azordi, kan enn Kretien ki ena lesperans pou al dan lesiel mor, deswit li resisite pou al dan lesiel. Se seki Pol explike dan 1 Korintien 15:51, 52: “Pa nou tou ki pou mor, me nou tou, nou pou sanze dan enn miliem segonn, pa gagn letan bat lizie, kan tronpet final sone.” Azordi, sa parol lapot Pol la pe akonpli! Kan zot resisite, bann frer Zezi extra zwaye parski zot “pou toultan” avek Zezi.​—1 Tes. 4:17.

15. Bann ki “sanze dan enn miliem segonn,” ki travay zot pou fer dan lesiel?

¹⁵ Bann ki “sanze dan enn miliem segonn,” ki travay zot pou fer dan lesiel? Zezi ti dir zot: “Dimoun ki gagn laviktwar e ki fer mo volonte ziska lafin, mo pou donn li pouvwar lor tou bann nasion. Li pou diriz zot avek enn baton lasie; li pou kas zot parey kouma enn po later.” (Rev. 2:26, 27) Zot pou swiv zot Sef ek zot pou diriz bann nasion avek enn baton lasie.​—Rev. 19:11-15.

16. Kouma bann dimounn pou gagn laviktwar lor lamor?

¹⁶ Li kler ki bann Kretien ki ena lesperans pou al dan lesiel pou gagn laviktwar lor lamor! (1 Kor. 15:54-57) Zot rezireksion pou permet zot pou partisip dan lager Armagedon ek zot pou kapav ede pou tir lemal ki ena lor later. Bann milyon serviter Zeova pou “travers gran detres” ek zot pou rant dan lemond nouvo. (Rev. 7:14, NW) Zot pou kapav trouv enn lot viktwar lor lamor kan bann milyar dimounn ki’nn mor dan lepase pou resisite. Sa pou enn moman extraordiner! (Zist. 24:15) Lerla, tou bann dimounn ki’nn res fidel ar Zeova pou gagn laviktwar lor lamor ki nou’nn erite ar Adan. Zot pou kapav viv pou touletan!

17. Ki kitsoz 1 Korintien 15:58 ankouraz nou pou fer?

¹⁷ Bann parol ki lapot Pol ti ekrir bann Korintien konsernan rezireksion bizin ena enn gran valer pou nou! Nou ena bann bon rezon pou swiv konsey ki lapot Pol inn donn nou, setadir pou fer nou maximum dan “travay Lesegner.” (Lir 1 Korintien 15:58.) Si nou fer nou maximum dan sa travay-la, nou kapav atann pou ena enn lavi ki ere dan lavenir. Lavi dan lemond nouvo pou pli zoli ki tou seki nou kapav mazine. Sa moman-la, li pou kler ki tou seki nou’nn fer dan “travay Lesegner” pa ti dan vid.