“Ansegn Zot pou Vinn Mo Bann Disip”

1-6. Rakont bann lexperyans ki montre ki bann Temwin Zeova pe prese dan diferan fason.

REBECCA, enn zenn Temwin Zeova ki res Gana, ek li konsider so lekol kouma so teritwar personel. Li touletan ena bann piblikasion dan so sak. Pandan brek, li rod bann lokazion pou pres avek so bann kamarad lekol ek li’nn koumans plizir letid Labib avek sertin parmi zot.

² Madagaskar, se enn lil ki pre ar Lafrik. Laba, de pionie abitie mars anviron 25 kilomet anba enn gro soley, pou al dan enn vilaz izole. Ek dan sa vilaz-la, zot ena plizir letid Labib.

³ Bann Temwin dan Paragwe, ansam avek bann volonter ki sorti dan 15 pei, finn travay ansam pou konstrir enn bato ki pez 45 tonn. Ek 12 dimounn kapav viv lor sa bato-la. Zot servi sa bato-la pou pres avek bann dimounn ki res lor bann larivier Paragwe ek Parana. Gras-a sa bato-la, nou bann frer ek ser kapav pres dan bann landrwa kot zot pa ti kapav prese avan.

⁴ Dan Alaska, nou bann frer ek ser finn trouv enn bon mwayin pou prese. Pandan lete, boukou dimounn ki sorti dan diferan pei vinn vizit Alaska lor bann bato krwazier. Lerla, bann frer ek ser prese lor lepor ek propoz bann piblikasion dan diferan lang. Dan samem rezion-la, gras-a enn avion, finn kapav pres dan bann vilaz izole. Sa finn permet bann kominote aleout, atapaskann, simshiann, ek klinngit tann bon nouvel lor Rwayom Bondie.

⁵ Larry, ki res Texas dan Letazini, ena enn teritwar bien spesial: Home kot li reste. Mem si Larry dan enn fotey roulant, li rod bann lokazion pou prese. Li koz lor Rwayom Bondie avek lezot, ek li ena konfians ki li pou kapav re-marse dan lemond nouvo.​—Iza. 35:5, 6.

⁶ Dan Birmani, enn group Temwin ki res Mandale ti bizin al enn lasanble dan lenor Birmani. Pou al sa lasanble-la, zot ti bizin fer enn vwayaz trwa zour lor enn bato. Alor, zot ti amenn bann piblikasion avek zot pou pres ar bann pasaze sa bato-la. Sak fwa ki sa bato-la ti aret dan enn lavil ouswa dan enn vilaz, sa bann proklamater bien devwe la ti degaze desann pou pres ar bann dimounn dan sa landrwa-la. Pandan sa letan-la, ti ena bann nouvo pasaze ki ti mont lor bato. Alor, sak fwa ki zot ti remont lor bato, se koumadir zot ti gagn “enn nouvo teritwar.”

 7. Ki bann diferan metod bann Temwin Zeova servi pou koz lor Rwayom Bondie, ek ki lobzektif zot ena?

⁷ Parey kouma sa de-trwa lexanp-la finn montre nou, partou dan lemond, bann Temwin Zeova bien kontan pou “rann temwaniaz afon konsernan Rwayom Bondie.” (Zist. 28:23) Zot prese lakaz-lakaz, lor sime, par telefonn, ek zot ekrir bann let. Mem kan zot dan bis, kan zot marse dan zardin, ouswa kan zot pran enn ti poz dan zot travay, zot sezi tou ti lokazion pou koz lor Rwayom Bondie. Mem si zot servi diferan metod pou prese, zot ena enn sel lobzektif: Koz lor bon nouvel ar ninport kisann-la ki zot zwenn.​—Mat. 10:11.

8, 9. (a) Kifer li enn vre mirak ki nou pe reisi pres partou dan lemond? (b) Lor ki kestion interesan nou kapav reflesi? Ek ki nou bizin fer pou gagn repons sa kestion-la?

⁸ Bann proklamater pe pres lor Rwayom Bondie dan plis ki 235 pei. Eski to enn parmi zot? Si wi, twa osi to pe fer to par pou ki travay predikasion kontign progrese! Seki nou pe reisi fer dan lemond antie, se enn vre mirak. Kifer? Parski malgre bann gran obstak, kouma par exanp, kan gouvernman interdi nou bann aktivite ouswa akoz persekision, bann Temwin Zeova pe rann temwaniaz afon konsernan Rwayom Bondie ar bann dimounn dan tou bann nasion.

⁹ Enn kestion interesan lor ki nou kapav reflesi se: Kifer okenn obstak, ni mem tou seki Satan inn fer, pa’nn anpes travay predikasion kontign progrese? Pou reponn sa kestion-la, nou bizin get seki finn arive dan premie siek N.L.a Ek li normal ki nou fer sa, parski azordi, nou, bann Temwin Zeova, nou pe kontign travay ki bann Kretien dan premie siek ti koumanse.

10. Ki travay ki pli inportan pou Zezi, ek ki li ti kone konsernan sa travay-la?

¹⁰ Kan Zezi ti lor later, travay ki ti pli inportan pou li se pres lor Rwayom Bondie. Li ti form lasanble Kretien, ek azordi, li pe kontign sa travay predikasion la. Enn zour li ti dir: “Mo bizin anons bon nouvel lor Rwayom Bondie dan lezot lavil osi, parski akoz samem ki Bondie inn avoy mwa.” (Lik 4:43) Zezi ti kone ki li ti koumans enn travay ki li pa ti pou kapav fini tousel. Inpe avan so lamor, li ti dir ki ti pou pres lor Rwayom Bondie ar bann dimounn “dan tou bann nasion.” (Mark 13:10) Me kouma ti pou fer sa travay-la, ek kisann-la ki ti pou fer sa?

11. Ki mision inportan Zezi ti donn so bann disip? Ki ti pou soutenir zot pou fer sa travay-la?

¹¹ Apre ki Zezi ti mor ek ti resisite, li ti aparet ar so bann disip ek li ti donn zot enn mision bien inportan: “Al get bann dimounn dan tou nasion ek ansegn zot pou vinn mo bann disip, batiz zot lor nom mo Papa, lor nom so Garson ek lor nom lespri sin, ansegn zot pou obeir tou bann kitsoz ki mo’nn donn zot lord pou fer. Ek pa bliye ki mo avek zot toulezour ziska peryod lafin sa lemond-la.” (Mat. 28:19, 20) Kan Zezi ti dir so bann disip “mo avek zot,” sa montre ki li ti pou soutenir zot dan travay predikasion. Zot ti bien bizin ki Zezi soutenir zot, parski li ti predir ki “tou bann nasion pou ena laenn pou zot.” (Mat. 24:9) Bann disip ti pou kapav kont lor enn lot kitsoz ankor pou soutenir zot. Avan ki Zezi ti mont dan lesiel, li ti dir ki so bann disip ti pou gagn lespri sin. Sa lespri-la ti pou donn zot lafors pou vinn so bann Temwin “ziska dan bann landrwa pli lwin lor later.”​—Zist. 1:8.

12. Ki bann kestion kitfwa nou pe poz nou, ek kifer li bien inportan ki nou gagn repons sa bann kestion-la?

¹² Kitfwa nou pe poz nou sa bann kestion-la: Eski vremem bann zapot Zezi ek bann Kretien dan premie siek ti donn zot afon dan sa travay-la? Eski sa ti group Kretien la ti reisi fer sa, mem kan zot ti gagn bann gran persekision? Eski Zeova ek so lespri sin ti vremem soutenir zot dan sa travay-la? Nou pou gagn repons sa bann kestion-la ek lezot kestion ankor dan liv Zistwar Bann Zapot. Li bien inportan ki nou gagn repons sa bann kestion-la, parski Zezi ti dir ki sa travay-la ti pou kontigne “ziska peryod lafin sa lemond-la.” Alor, tou bann vre Kretien, mem nou ki pe viv dan bann dernie zour, bizin obeir lord ki Zezi inn done. Akoz samem, li bon ki nou kone ki ena dan liv Zistwar Bann Zapot.

13, 14. (a) Kisann-la finn ekrir liv Zistwar Bann Zapot, ek kouma li ti gagn so bann linformasion? (b) Ki ena dan liv Zistwar Bann Zapot?

¹³ Kisann-la finn ekrir liv Zistwar Bann Zapot? Dan sa liv-la, nou pa trouv nom so ekrivin. Me bann premie fraz liv Zistwar Bann Zapot montre nou ki dimounn ki’nn ekrir sa liv-la, inn osi ekrir Levanzil Lik. (Lik 1:1-4; Zist. 1:1, 2) Se akoz sa ki finn touletan konsider Lik kouma ekrivin liv Zistwar Bann Zapot. Lik ti enn ‘dokter ki bann dimounn ti bien kontan’ ek enn istorien ki ti kontan bann ti detay. (Kol. 4:14) Liv Zistwar Bann Zapot kouver enn peryod 28 an. Li koumanse kan Zezi ti mont dan lesiel, lane 33 N.L., ek fini ver lane 61 N.L., avek lafin lanprizonnman Pol dan Rom. Nou konpran ki Lik ti la pou sertin levennman, parski ena fwa li ti servi mo “nou” pou rakont sertin levennman. (Zist. 16:8-10; 20:5; 27:1) Lik ti anvi donn bann linformasion ki exakt, alor sirman li ti gagn bann linformasion ki li ti bizin ar Pol, Barnabas, Filip, ek lezot dimounn ki mansione dan sa liv-la.

¹⁴ Ki ena dan liv Zistwar Bann Zapot? Konpare ar so Levanzil, kot Lik rakont seki Zezi ti dir ek fer, dan liv Zistwar Bann Zapot, Lik rakont seki bann disip Zezi ti dir ek fer. Alor, liv Zistwar Bann Zapot koz lor bann kitsoz extraordiner ki sertin dimounn finn fer, mem si sertin ti konsider zot kouma ‘bann dimounn ki sinp ek ki pa ti ena boukou ledikasion.’ (Zist. 4:13) An de-trwa mo, sa liv-la rakonte kouma lasanble Kretien finn forme ek kouma li’nn progrese. Zistwar Bann Zapot montre osi ki bann metod bann Kretien dan premie siek ti servi pou prese, ek ki latitid zot ti ena. (Zist. 4:31; 5:42) Li dekrir kouma lespri sin finn ede pou ki bon nouvel fane partou. (Zist. 8:29, 39, 40; 13:1-3; 16:6; 18:24, 25) Liv Zistwar Bann Zapot met laksan lor mesaz prinsipal ki ena dan Labib: Rwayom Bondie ki dirize par Zezi Kris pou sanktifie nom Bondie. Li osi montre kouma bann disip inn reisi pres bon nouvel lor Rwayom Bondie, mem si zot ti gagn boukou persekision.​—Zist. 8:12; 19:8; 28:30, 31.

15. Ki bann bienfe nou pou gagne kan nou pou etidie liv Zistwar Bann Zapot?

¹⁵ Liv Zistwar Bann Zapot enn liv bien interesan. Nou sir ki kan nou pou examinn li, sa pou fortifie nou lafwa! Si nou reflesi lor gran devouman ek kouraz ki bann disip dan premie siek ti ena, pena dout ki sa pou bien ankouraz nou, ek motiv nou pou imit zot lafwa. Lerla, nou pou pare pou akonpli nou mision, setadir ‘ansegn bann dimounn pou vinn bann disip Zezi.’ Sa liv ki dan to lame la pou ed twa pou etidie liv Zistwar Bann Zapot afon.

16. Sit trwa lobzektif ki sa liv-la ena.

¹⁶ Ki lobzektif sa liv-la? Sa liv-la ena trwa lobzektif: (1) Fer nou ena plis konfians ki Zeova pe soutenir travay predikasion gras-a so lespri sin; (2) motiv nou pou fer plis dan predikasion, kan nou examinn lexanp bann disip Zezi dan premie siek; ek (3) ed nou pou ena plis respe pou lorganizasion Zeova, ek osi pou bann ki diriz bann lasanble ek predikasion.

17, 18. Kouma inn fer sa liv-la, ek ki bann kitsoz ki pou ed twa pou to letid personel?

¹⁷ Kouma inn fer sa liv-la? Sa liv-la divize an wit parti. Dan sak parti, nou pou examinn sertin sapit dan Zistwar Bann Zapot. Nou pa pou examinn Zistwar Bann Zapot verse par verse, me nou pou gete ki bann leson nou kapav aprann ar bann levennman ki ena dan sa liv Labib la, ek kouma nou kapav servi seki nou’nn aprann. Dan koumansman sak sapit, ena enn fraz ki explik nou pwin prinsipal sa sapit-la, ek anba sa fraz-la, nou pou trouve ki parti liv Zistwar Bann Zapot nou pou examine.

¹⁸ Ena bann kitsoz dan sa liv-la ki pou bien ed twa dan to letid personel. Bann zoli zimaz pou ed twa viv bann levennman ki ena dan liv Zistwar Bann Zapot. Dan boukou sapit, ena bann lankadre kot to pou gagn plis linformasion. Sertin lankadre pou koz lor lafwa sertin personaz Labib ki to kapav imite. Lezot lankadre pou donn plis detay lor bann landrwa, bann levennman, bann koutim, ouswa bann lezot dimounn ki mansione dan liv Zistwar Bann Zapot.

19. Ki bann kestion to bizin demann twa detanzantan?

¹⁹ Sa liv-la kapav ed twa pou examinn twa dan enn fason onet. Ki to fek koumans prese ouswa ki to pe prese depi lontan, li bon ki detanzantan to pran letan pou examinn to bann priorite ek fason ki to konsider predikasion. (2 Kor. 13:5) Demann twa: ‘Konpare ar kan mo ti pran batem, eski travay predikasion li touzour osi inportan pou mwa? (1 Kor. 7:29-31) Eski kan mo prese mo montre ki mo krwar dan seki mo pe dir? Eski mo donn mwa afon dan predikasion? (1 Tes. 1:5, 6) Eski mo pe fer mo maximum pou prese ek ansegne?’​—Kol. 3:23.

20, 21. Kifer travay ki finn donn nou bien inportan, ek ki nou bien motive pou fer?

²⁰ Nou bizin touletan rapel ki finn donn nou enn travay bien inportan: prese ek ansegn lezot pou vinn bann disip Zezi. Plis bann zour pe pase, plis sa travay-la pe vinn pli irzan. Lafin sa lemond-la bien pre ek ena ankor boukou dimounn pou sove. Nou pa kone ki kantite dimounn ki ena enn bon kondision leker ek ki pou aksepte nou mesaz, me nou responsabilite se pou ed zot avan ki li tro tar.​—Zist. 13:48; 1 Tim. 4:16.

²¹ Alor, li bien inportan ki nou imit gran devouman ki bann proklamater dan premie siek ti ena. Amezir ki to etidie sa liv-la, reflesi kouma to kapav ena plis kouraz ek lantouziasm kan to pe prese. Nou espere ki sa pou motiv twa pou kontign “rann temwaniaz afon konsernan Rwayom Bondie”!​—Zist. 28:23.