Ant Kretyin, Sakenn Bizin So Kamarad

“Nu tu nu bann manb enn sel lekor.”—EFEZYIN 4:25.

 1. Ki enn ansiklopedi dir konsernan lekor enn dimunn?

LEKOR enn dimunn li enn kitsoz extraordiner ki Bondye inn kre! Ansiklopedi The World Book Encyclopedia fer sa komanter la: “Suvan bann dimunn apel lekor imin enn masinn—mem pli bon masinn ki finn egziste. Byinsir, lekor imin pa enn masinn, me li resanble enn masinn dan plizir fason. Parey kuma enn masinn, nu lekor ena plizir parti. Sakenn sa bann parti la fer enn travay, parey kuma dan enn masinn. Me tu bann parti la travay ansam pu fer lekor la uswa masinn la mars byin.”

 2. Dan ki fason kongregasyon Kretyin parey kuma lekor enn dimunn?

² Wi, nu lekor ena plizir parti, ek sakenn fer enn kitsoz ki neseser. Pena okenn lavenn, okenn misk, uswa okenn lot parti nu lekor ki la zis pu fer zoli. Parey kumsa mem, sak manb dan kongregasyon Kretyin kapav fer so par pu ki kongregasyon gard so lasante ek bote spirityel. (1 Korintyin 12:14-26) Li vre ki personn pa bizin konsider li pli siperyer ki lezot. Me mem sa, fode pa ki personn ena santiman ki li pa inportan.—Romin 12:3.

 3. Kuma eski Efezyin 4:25 montre ki ant Kretyin, sakenn bizin so kamarad?

³ Dan nu lekor, sak parti depann lor so kamarad. Kumsa mem, ant Kretyin usi sakenn bizin so kamarad. Lapot Pol ti dir bann ki ti pu al viv dan lesyel: “Asterla ki zot finn rezet bann kitsoz ki fos, sakenn parmi zot bizin koz laverite avek so kamarad, parski nu tu nu bann manb enn sel lekor.” (Efezyin 4:25) Bann manb Izrael spirityel fer parti dan enn mem lekor, “lekor Kris.” Donk, ant zot ena enn kominikasyon byin fran ek sakenn korper byin avek so kamarad. (Efezyin 4:11-13) Asterla, bann Kretyin sinser ek onet ki ena lesperans pu viv lor later, zot travay ansam ek zot byin ini dan lazwa avek sa bann manb la.

 4. Dan ki bann fason nu kapav ed bann nuvo?

⁴ Tulelane, plizir milye dimunn pe pran batem. Zot ena lesperans pu viv dan paradi lor later. Avek lazwa, bann lezot manb dan kongregasyon ed zot pu progrese. (Ebre 6:1-3) Kuma eski zot fer sa? Zot reponn bann kestyon lor Labib ki bannla poze. Uswa, si bannla bizin led dan predikasyon zot dispoze pu ede. Nu kapav usi ed bann nuvo par nu bon legzanp, kan nu partisip regilyerman dan bann reynion. Dan bann moman difisil, nu kapav usi donn lankurazman, ek kitfwa mem konsolasyon. (1 Tesalonisyin 5:14, 15) Nu bizin rod bann mwayin pu ed lezot pu “kontiyn mars dan laverite.” (3 Zan 4) Wi, ki nu vye uswa nu zenn, ki nu nuvo uswa nu lontan dan laverite, nu kapav ed nu bann frer ek ser pu res byin lor plan spirityel. Wi, zot vremem bizin nu.

Zot Ti Donn Led Neseser

 5. Kuma eski Akila ek Prisil ti ed Pol?

⁵ Bann Kretyin marye, setadir bann kup, zot parmi bann ki kontan pu ed zot bann frer. Par egzanp, Akila ek so fam Prisil (Priska) ti ed Pol. Zot ti akey li kot zot, zot ti travay ansam ar li pu fabrik bann latant ek zot ti ed li pu form enn nuvo kongregasyon dan Korint. (Akt 18:1-4) Dan enn fason ki Labib pa dir, zot ti mem riske zot lavi pu Pol. Kan zot ti pe res dan lavil Rom, Pol ti dir bann Kretyin laba: “Donn mo bonzur Priska ek Akila, bann ki travay ansam avek mwa pu Kris Zezi, ek ki’nn riske zot lavi pu mwa. Mo’le remersye zot, ek pa zis mwa, me tu bann kongregasyon ki pa Zwif usi.” (Romin 16:3, 4) Zordi, ena sertin Kretyin ki kuma Akila ek Prisil. Zot form bann kongregasyon ek zot ed zot bann frer ek ser dan plizir fason. Defwa, zot mem riske zot lavi pu anpes bann persekiter bat zot bann frer uswa tuy zot.

 6. Ki led Apolos ti gayne?

⁶ Akila ek Prisil ti ed usi Apolos, enn predikater ki ti ena parol fasil. Li ti pe anseyn bann abitan Efez lor Zezi Kris. Kumansman, Apolos ti konn zis batem ki Zan ti pe fer pu bann ki ti repanti pu zot bann pese kont Lalwa. Akila ek Prisil ti truve ki Apolos ti bizin led. Alor, zot ti “explik li semin Bondye dan enn fason pli egzak.” Li posib ki zot ti explik li seki batem Kretyin ti vedir: plonz anba delo ek gayn lespri sin. Apolos ti aplik seki li ti aprann. Plitar dan lavil Akai, li ti “ed buku bann ki ti’nn vinn krwayan grasa faver Bondye. Avek bann largiman byin solid, li’nn montre an piblik avek led bann Lekritir ki Zezi limem Kris, ek donk ki bann Zwif ti dan lerer.” (Akt 18:24-28) Wi, komanter ki lezot Kretyin fer, kapav suvan amelyor uswa ogmant seki nu konpran dan Parol Bondye. Donk, dan sa domenn la usi, sakenn bizin so kamarad.

Donn Led Materyel

 7. Ki bann Filipyin ti fer kan zot bann frer ek ser Kretyin ti byin bizin led materyel?

⁷ Bann manb kongregasyon Filip ti byin kontan Pol. Kan li ti dan Tesalonik, zot ti avoy li sertin kitsoz materyel ki li ti bizin. (Filipyin 4:15, 16) Kan bann frer dan Zerizalem ti bizin led materyel, bann Filipyin ti pre pu kontribye ek mem donn plis ki seki zot ti ena. Pol ti telman apresye bon lespri ki sa bann frer ek ser Filip la ti ena, ki li ti sit zot kuma enn legzanp pu lezot krwayan.—2 Korintyin 8:1-6.

 8. Ki latitid Epafrodit ti montre?

⁸ Kan Pol ti dan prizon, bann Filipyin pa ti zis fer li bann don materyel. San tarde, zot ti avoy zot reprezantan personel, Epafrodit. Pol rakonte: “[Epafrodit] inn riske so lavi pu travay nu Senyer, pu ranplas led ki zot, zot pa ti kapav donn mwa zotmem, parski zot pa ti la.” (Filipyin 2:25-30; 4:18) Labib pa dir nu si Epafrodit ti enn ansyin uswa enn serviter ministeryel. Antuka, li ti enn Kretyin ki ti sakrifye limem pu ed so bann frer, ek Pol ti vremem bizin li. Eski ena kikenn kuma Epafrodit dan u kongregasyon?

Zot Ti Bann ‘Led Ki Fortifye’ Lezot

 9. Ki legzanp Aristark finn lese?

⁹ Dan kongregasyon, nu apresye buku bann frer ek bann ser ki montre lamur pu lezot, parey kuma Akila, Prisil ek Epafrodit. Ena ki resanble usi enn lot Kretyin premye syek ki ti apel Aristark. Li ek lezot Kretyin ti bann ‘led ki fortifye lezot.’ Dan ninport ki ti zafer pratik, zot ti ofer led ek konsolasyon. (Kolosyin 4:10, 11) Kan Aristark ti ed Pol, li ti montre ki li ti enn vre kamarad kan ena problem, parey kuma Proverb 17:17 dir: “Enn vre kamarad montre so lamur tuletan; li kuma enn frer dan bann moman difisil.” Eski u pa panse ki nu tu nu bizin vinn bann ‘led ki fortifye’ nu bann frer? Wi, ek sirtu anver bann ki pe gayn lopozisyon.

10. Ki legzanp Pyer finn lese pu bann ansyin?

¹⁰ Bann ansyin sirtu bizin vinn bann led ki fortifye zot bann frer ek ser dan kongregasyon. Se seki Zezi Kris ti dir lapot Pyer: “Fortifye to bann frer.” (Lik 22:32) Pyer ti kapav fer sa parski li ti ferm ek solid parey kuma enn ros, sirtu apre rezireksyon Zezi. Ansyin, fer zefor pu fer parey u’si. Fer li avek lamur ek avek tu u leker, parski u bann frer bizin u.—Akt 20:28-30; 1 Pyer 5:2, 3.

11. Ki nu aprann ar latitid ki Timote ti montre?

¹¹ Timote, ki ti akonpayn Pol dan so bann vwayaz misyoner, ti enn ansyin ki ti pran byin kont lezot Kretyin. Malgre ki li ti ena sertin problem lasante, Timote ti montre enn lafwa solid ek li ‘ti travay ansam avek Pol pu fer travay predikasyon avanse.’ Ala kifer, kan Pol ti ekrir bann Filipyin, li ti dir: “Mo pena personn ki ena mem latitid ki li, enn kikenn ki pu vremem pran kont bann kitsoz ki konsern zot.” (Filipyin 2:20, 22; 1 Timote 5:23; 2 Timote 1:5) Wi, kan nu ena mem latitid ki Timote, nu kapav vinn enn benediksyon pu lezot adorater Zeova. Li vre ki nu bizin tuzur fer fas ar nu bann febles ek bann lezot leprev. Me, nu’si nu kapav montre enn lafwa solid ek enn lintere sinser pu nu bann frer ek ser. Nu bizin mazine tuletan ki zot bizin nu.

Bann Fam Ki Ti Pran Kont Lezot

12. Ki nu aprann ar legzanp Dorkas?

¹² Dorkas ti parmi bann fam ki ti kontan Bondye ek ki ti pran kont lezot. Kan li ti mor, bann disip ti fer Pyer vini ek zot ti amenn li dan enn lasam lao. Laba, ‘ti ena tu bann vev; zot ti pe plore ek zot ti pe montre bann linz ek rob ki Dorkas ti abitye fer pu zot kan li ti avek zot.’ Apre, Pyer ti resisit Dorkas ek pena dut ki Dorkas ti kontiyn ‘fer bann bon aksyon anver lezot.’ Zordi, dan kongregasyon ena bann fam ki kuma Dorkas. Kitfwa zot kud linz uswa zot fer bann lezot kitsoz pu bann ki dan bezwin. Me byinsir, zot bann bon aksyon konsern sirtu Rwayom Bondye ek travay pu fer bann disip.—Akt 9:36-42; Matye 6:33; 28:19, 20.

13. Kuma eski Lidi ti pran kont lezot Kretyin?

¹³ Enn lot fam Kretyin ki ti ena lakrint pu Bondye ek ki ti pran kont lezot, se Lidi. Lidi ti ne dan lavil Tiatir. Me kan Pol ti pres dan lavil Filip ver lane 50 N.L., Lidi ti pe res laba. Sirman li ti’nn konverti; li ti vinn Zwif. Me, dan lavil Filip kitfwa pa ti ena buku Zwif ek pa ti ena enn sinagog. Donk, enn fwa Lidi ek lezot fam devwe ti’nn rasanble kot enn larivyer pu ador Bondye. Ek se laba ki lapot Pol ti pres labonn nuvel avek zot. Labib rakonte: “Zeova finn uver leker [Lidi] byin gran pu li pran kont seki Pol ti pe dir. Apre ki li ek so fami finn batize, li’nn sipliy [Pol ek lezot]: ‘Si zot truve ki vremem mo fidel ar Zeova, vinn res kot mwa.’ Alor finalman, li’nn obliz nu pu aksepte.” (Akt 16:12-15) Parski Lidi ti anvi fer bann bon kitsoz pu lezot, li ti reysi konvink Pol ek bann ki ti ar li pu res kot li. Zordi, nu byin apresye bann Kretyin ki invit lezot kot zot, parey kuma Lidi ti fer. Se enn fason ki zot montre zot lamur.—Romin 12:13; 1 Pyer 4:9.

Zot, Bann Zenn, Nu Bizin Zot Usi

14. Kuma eski Zezi ti tret bann zenn?

¹⁴ Kongregasyon Kretyin ti forme par Garson Bondye. Li enn kikenn ki bon ek ki ena buku santiman pu lezot. Wi, dimunn ti alez avek li, parski li ti ena buku lamur ek li ti konn met li dan zot plas. Enn fwa kan sertin ti kumans amenn zot bann zanfan ar Zezi, so bann disip ti rod return zot. Me Zezi ti dir: “Les sa bann ti zanfan la vinn ver mwa, ek pa rod anpes zot, parski Rwayom Bondye li pu bann ki parey kuma sa bann zanfan la. Wi, vremem mo dir zot: Si enn kikenn pa aksepte Rwayom Bondye kuma enn ti zanfan, zame li pa pu reysi rant ladan.” (Mark 10:13-15) Pu gayn bann benediksyon Rwayom Bondye, nu bizin dispoze pu abes nu ek les nu anseyne parey kuma bann ti zanfan. Zezi ti montre ki li kontan bann ti zanfan, kan li ti pran zot dan so lebra ek li ti beni zot. (Mark 10:16) Alor, zot, bann zenn? Pu zot usi li parey; zot kapav sir ki kongregasyon kontan zot ek bizin zot.

15. Kan nu lir Lik 2:40-52, ki nu aprann lor Zezi? Ki legzanp li finn lese pu bann zenn?

¹⁵ Zezi ti montre so lamur pu Bondye ek pu so Parol, alor ki li ti ankor enn zenn garson. Kan li ti ena 12 an, li ek so bann paran, Zozef ek Mari, ti sorti Nazaret pu al Zerizalem pu selebre fet Pak. Kan zot ti pe returne, so bann paran ti remarke ki Zezi pa ti ansam avek bann ki ti pe returne. Finalman, zot ti truv li dan enn bann lasal dan tanp. Li ti pe ekut bann anseynan Zwif ek li ti pe poz zot bann kestyon. Me, Zezi ti etone ki so bann paran pa ti kone kot li ti ete. Alor, li ti demann zot: “Eski zot pa kone ki mo bizin dan lakaz mo Papa?” Selman apre, li’nn return lakaz avek so bann paran. Li’nn kontiyn sumet ar zot ek li’nn kontiyn grandi ek gayn plis sazes. (Lik 2:40-52) Zezi finn les enn bon legzanp pu nu bann zenn, pa vre? Zot usi, zot bizin obeir zot bann paran ek interese ar bann kitsoz spirityel.—Deteronom 5:16; Efezyin 6:1-3.

16. (a) Kan Zezi ti pe prese dan tanp, ki detrwa garson ti kriye? (b) Ki privilez bann zenn Kretyin ena zordi?

¹⁶ Zenn, sirman u gayn lokazyon pu koz lor Zeova dan lekol ek kan u pres lakaz-lakaz avek u bann paran. (Izai 43:10-12; Akt 20:20, 21) Enn tipe avan li mor, Zezi ti pe prese dan tanp ek geri bann dimunn ki ti laba. Ek la, detrwa garson ti kriye: “Sov nu, nu sipliy twa, Garson David!” Kan bann sef pret ek bann skrib ti tann sa, zot ti ankoler. Zot ti proteste ar Zezi: “To tande ki bannla pe dir?” Zezi reponn zot: “Wi. Eski zame zot pa finn lir seki ti ekrir: ‘Dan labus bann ti zanfan ek bann tibaba, to’nn met luanz’?” (Matye 21:15-17) Parey kuma sa bann zanfan lepok Zezi la, zot, bann zenn dan kongregasyon, zot usi kapav donn laglwar Zeova ek so Garson. Wi, nu anvi ki zot parmi nu ek nu bizin zot pu pres Rwayom Bondye ansam avek nu.

Kan Ena Problem

17, 18. (a) Kifer eski Pol ti ramas enn kontribisyon pu bann Kretyin dan Zide? (b) Bann lezot Kretyin ti fer donasyon volonter pu bann Kretyin dan Zide. Ki lefe sa ti ena lor bann Kretyin Zwif ek lor bann ki pa ti Zwif?

¹⁷ Dan ninport ki sityasyon nu ete, se lamur ki pus nu pu ed nu bann frer ki bizin led. (Zan 13:34, 35; Zak 2:14-17) Se lamur pu so bann frer ek ser dan Zide ki ti pus Pol pu ramas enn kontribisyon pu zot dan bann kongregasyon Akai, Galasi, Masedwann, ek distrik Lazi. Bann disip dan Zerizalem ti konn persekisyon, lager sivil ek lafaminn. Se sirman sa bann kitsoz la ki Pol ti pe panse kan li ti koz lor ‘sufrans, maler ek piyaz zot bann dibyin.’ (Ebre 10:32-34; Akt 11:27–12:1) Donk, li ti organiz enn fon, ki li ti kontrole limem, pu bann Kretyin pov dan Zide.—1 Korintyin 16:1-3; 2 Korintyin 8:1-4, 13-15; 9:1, 2, 7.

¹⁸ Bann donasyon volonter ki ti fer pu bann frer dan Zide, ti montre ki ti ena enn lespri fraternite ant bann adorater Zeova Zwif ek ki pa ti Zwif. Avredir, pu bann ki pa ti Zwif, fer kontribisyon ti enn mwayin pu montre zot rekonesans pu zot bann frer dan Zide ki ti’nn fer zot konn laverite. Donk, ti ena enn partaz materyel ek spirityel. (Romin 15:26, 27) Zordi usi, bann Kretyin fer kontribisyon pu zot bann frer ki bizin led. Zot fer li volonterman ek parski zot motive par lamur. (Mark 12:28-31) Dan sa domenn la usi, sakenn bizin so kamarad. Kumsa, ena enn partaz egal ek ‘seki ena tigit pena tro tigit.’—2 Korintyin 8:15.

19, 20. Donn enn legzanp pu montre kuma lepep Zeova ede zot bann frer, kan ena enn katastrof.

¹⁹ Nu kone ki ant Kretyin, sakenn bizin so kamarad. Ala kifer, deswit kuma enn kitsoz arive, nu pre pu ed nu bann frer ek ser. Get, par egzanp, seki ti arive dan kumansman lane 2001, dan El Salvador apre ki finn ena bann vyolan tranblemandeter ek glisman terin. Enn rapor dir: “Partu dan El Salvador bann frer finn ofer zot led. Bann frer Guatemala, États-Unis, ek Canada usi finn donn zot led. . . . Byin vit, 500 lakaz ek 3 zoli Lasal DiRwayom finn monte. Travay dir ek lespri sakrifis sa bann frer la, finn rann enn gran temwaynaz.”

²⁰ Enn rapor ki sorti Afrique du Sud ti dir: “Bann gran inondasyon ki ti fer ravaz inpe partu dan Mozambique, ti afekte usi nu bann frer. Filyal Mozambique ti fer bann laranzman neseser pu ed sa bann frer la. Me, bann frer dan sa filyal la finn demann nu avoy bann linz ki ankor bon. Alor, nu finn ramas enn bon kantite linz ki ti kapav ranpli enn lasam 12 m (40 pye) longer ek nu finn avoy sa nu bann frer dan Mozambique. Wi, ala bann domenn ankor kot sakenn bizin so kamarad.

21. Ki nu pu egzamine dan prosin lartik?

²¹ Kuma nu’nn truve dan kumansman, dan lekor enn dimunn, tu bann parti inportan. Dan kongregasyon Kretyin usi li parey. Sak manb bizin so kamarad. Zot bizin usi kontiyn servi dan linite. Prosin lartik pu egzaminn detrwa kitsoz ki rann sa posib.

Kuma Eski U Pu Reponn?

• Dan ki fason kongregasyon Kretyin parey kuma lekor enn dimunn?

• Ki bann premye Kretyin ti fer kan zot bann frer ek ser ti bizin led?

• Ki bann legzanp dan Labib montre ki ant Kretyin, sakenn bizin led so kamarad?

[Zimaz lor paz 10]

Akila ek Prisil ti pran kont lezot

[Zimaz lor paz 12]

Kan ena problem, bann serviter Zeova ed sakenn so kamarad