Kontiyn Servi dan Lakorite

“Mo pu donn bann pep enn lang ki pir, pu ki zot tu priye non Zeova ek servi Li lamin dan lamin.”—SEFANYA 3:9.

 1. Ki pe arive an akor avek realizasyon profesi Sefanya 3:9?

ZORDI, atraver later, dimunn koz preske 6,000 lang, san kont bann lezot ti lang ki’nn forme apartir sertenn lang. Me, ki dimunn koz Angle uswa Zulu, Bondye finn fer enn kitsoz vremem extraordiner. Li finn fer tu dimunn, ninport ki kote zot reste, aprann ek koz enn sel lang, enn lang ki pir. Sa pe realiz promes ki Bondye ti fer atraver profet Sefanya: “Mo [Bondye Zeova] pu donn bann pep enn lang ki pir, pu ki zot tu priye non Zeova ek servi Li lamin dan lamin.”—Sefanya 3:9.

 2. Ki ete sa “lang ki pir” la, ek ki li permet bann dimunn fer?

² Ki sa “lang ki pir” la sa? Se laverite Bondye ki ena dan so Parol, Labib. Se sirtu laverite lor Rwayom Bondye ki pu sanktifye non Zeova, zistifye drwa ki Bondye ena pu reyne lor later ek amenn bann benediksyon lor limanite. (Matye 6:9, 10) Se sel lang spirityel prop ki egziste lor later, ek ki koze par bann dimunn ki sorti dan tu nasyon ek tu ras. Sa permet zot servi Zeova “lamin dan lamin,” setadir dan linite uswa “dan lakorite.”—The New English Bible.

Fode Pa ki Bann Serviter Bondye Get Lezot De Manyer

 3. Ki permet nu servi Zeova dan linite?

³ Parmi bann Kretyin, ena diferan kalite dimunn. Sakenn koz so lang, me nu tu korpere ansam. Nu rekonesan pu sa. Mem si nu pe pres labonn nuvel lor Rwayom Bondye dan plizir lang, nu pe servi Bondye dan linite. (Psom 133:1) Kuma eski sa li posib? Ebyin, ninport ki kote nu reste lor later, nu tu koz enn sel lang ki pir pu donn Zeova luanz.

 4. Kifer eski bann serviter Bondye bizin pa get lezot de manyer?

⁴ Parmi lepep Bondye, fode ki personn pa get lezot de manyer. Se seki lapot Pyer ti byin montre kan li ti pres kot Korney, enn ofisye larme ki pa ti Zwif, dan lane 36 N.L. Pyer ti dir: “Vremem, mo rann mwa kont ki Bondye pa fer preferans, me, dan ninport ki nasyon, dimunn ki ena lakrint pu Li ek ki pratik lazistis, Bondye aksepte li.” (Akt 10:34, 35) Donk, si Bondye pa fer preferans, dan kongregasyon Kretyin usi, fode personn pa get lezot de manyer. Fode pa ena bann klan ek fer preferans pu sertin.

 5. Kifer eski li move kan form bann klan dan kongregasyon?

⁵ Enn fwa, enn etidyan kolez ti vizit enn Lasal DiRwayom. Li ti dir: “Normalman, bann legliz atir bann dimunn mem ras, uswa mem kominote. . . . Bann Temwin Zeova zot, zot tu ti pe asiz ansam ek personn pa ti pe fer klan.” Me, dan ansyin kongregasyon Korint sertin ti pe diviz bann frer. Donk, par zot fason fer, zot ti pe anpes lespri sin azir, parski lespri sin Bondye favoriz linite ek lape. (Galat 5:22) Si nu fer bann klan dan kongregasyon, nu pu al kont direksyon lespri sin. Alor, anu gard byin dan nu lespri sa bann parol ki Pol ti ekrir bann Korintyin la: “Frer, lor non nu Senyer Zezi Kris, mo ankuraz zot tu pu dakor lor seki zot dir. Veye ki pena okenn divizyon ant zot. Me, res ini dan mem fason panse ek mem lopinyon.” (1 Korintyin 1:10) Dan let ki li ti ekrir bann Efezyin usi, Pol ti atir latansyon lor linite.—Efezyin 4:1-6, 16.

6, 7. Ki konsey Zak ti done an rapor avek get sertin dimunn de manyer? Kuma nu kapav aplik so bann parol?

⁶ Bann Kretyin finn tuletan ankuraze pu pa fer preferans. (Romin 2:11) Dan kongregasyon premye syek, sertin ti pe get lezot de manyer; zot ti pe fer preferans pu bann dimunn ris. Alor, disip Zak ti ekrir: “Mo bann frer, zot ki ena lafwa dan nu Senyer Zezi Kris, ki enn laglwar pu nu, eski zot get lezot de manyer? Ki zot fer kan enn zom ris vinn dan zot lasanble avek bann bag an or ek bann gran-gran linz ek an mem tan enn dimunn mizer rantre avek enn linz sal? Zot pran plis kont sa dimunn ki’nn byin abiye la, ek zot dir li: ‘Asiz u dan sa pli bon plas la.’ Me ar dimunn mizer la, zot dir: ‘Twa, res debut,’ uswa ‘asiz anba la, kot mo lipye.’ Kan zot fer sa, eski zot pa pe kre bann diferan klas ant zot? Eski zot pa’nn vinn bann ziz ki pe rann bann move zizman?”—Zak 2:1-4.

⁷ Kan enn dimunn ris, ki pa krwayan, ki’nn met bann bag an or ek bann labiyman extra ti vinn reynion, li ti gayn enn lakey pli spesyal ki enn lot dimunn ki pa krwayan, me ki mizer ek finn met enn linz sal. Ti donn sa dimunn ris la “pli bon plas” pu asize. Me seki mizer la li, ti dir li res debut uswa asiz anba. Me, Bondye pa’nn get de manyer, kan Li ti ofer so Garson an sakrifis. Li’nn donn sa ranson la pu dimunn ris ek mizer tulede. (Zob 34:19; 2 Korintyin 5:14) Donk, si nu’le fer Zeova plezir ek servi Li lamin dan lamin, nu bizin pa fer preferans. Wi, fode pa nu ‘admir bann dimunn ki ena enn pozisyon pu nu gayn kitsoz an retur.’—Zid 4, 16.

Pa Mirmire

 8. Ki ti ariv bann Izraelit parski zot ti mirmire?

⁸ Pu kontiyn prezerv nu linite ek gayn faver Bondye, nu bizin pran kont sa konsey Pol la: “Kontiyn fer tu kitsoz san groyne.” (Filipyin 2:14, 15) Apre ki bann Izraelit ti’nn libere ar lesklavaz dan Lezip, zot ti kumans perdi lafwa. Zot ti mirmire kont Moiz ek Aaron, ek mem kont Zeova. Ala kifer, apart Zozye ek Kaleb, tu bann zom ki ti ena 20 an ek plis ki 20 an pa ti rant dan Peyi ki Bondye ti promet zot. Me, zot ti mor pandan sezur difisil ki Izrael ti pase dan dezer, pandan 40 an. (Nonm 14:2, 3, 26-30; 1 Korintyin 10:10) Ala ki pri zot finn bizin peye parski zot ti mirmire!

 9. Ki ti ariv Miryam parski li ti mirmire?

⁹ Sa montre seki kapav arive kan enn nasyon antye mirmire. Me, ki arive kan enn u de dimunn groyne? Miryam, ser Moiz, ek Aaron so frer ti mirmire. Zot ti dir: “Eski se zis par Moiz tusel ki Zeova finn koze? Eski Li pa finn koze par nu’si?” Nu lir ki “Zeova ti pe ekute.” (Nonm 12:1, 2) Ki’nn arive apre? Zeova finn donn Miryam enn leson, parski li paret ki se limem ki ti met dife. Wi, Zeova finn fer li gayn lalep ek Miryam finn oblize res andeor kan, pandan set zur ziska ki li revinn pir.—Nonm 12:9-15.

10, 11. Si enn kikenn pa aret mirmire, ki kapav arive? Donn enn legzanp.

¹⁰ Mirmire, se pa zis enn konplint konsernan enn kitsoz ki’nn mal fer. Bann ki kontiyn groyne atas tro buku linportans ar zot bann santiman uswa zot pozisyon. Zot atir latansyon lor zot, olye lor Bondye. Si enn kikenn pa aret mirmire, sa kapav diviz bann frer ek anpes zot servi Zeova lamin dan lamin. Kuma sa? Ebyin bann ki mirmire ankuraz lezot tuletan pu ekut zot, dan lespwar ki bannla pu pran zot par.

¹¹ Par egzanp, kikenn kapav kritik fason ki enn ansyin fer so bann size uswa fason ki li ranpli so bann responsabilite dan kongregasyon. Si nu ekut sa dimunn ki pe kritike la, nu’si nu kapav kumans pans kuma li. Purtan, avan nu tann sa kritik la, nanyin pa ti agas nu avek sa ansyin la. Me asterla, sa agas nu! Alafin, nu pa pu truv nanyin seki sa frer la fer, bon. Ek kitfwa, nu’si nu pu kumans mirmire kont li. Sa kalite kondwit la pena so plas dan enn kongregasyon bann serviter Zeova.

12. Si nu mirmire, ki lefe sa kapav ena lor nu relasyon avek Bondye?

¹² Si nu mirmire kont bann ki ena responsabilite pu pran swin trupo Bondye, sa kapav amenn nu ziska mem insilte zot. Sa kalite latitid la kapav afekte nu relasyon avek Zeova. (Egzod 22:28) Bann dimunn kumsa ki pa repanti, pa pu gayn Rwayom Bondye. (1 Korintyin 5:11; 6:10) Disip Zid ti koz lor sertin ki ti pe groyne. Sa bann dimunn la ti pe ‘mepriz lotorite Bondye ek zot ti pe koz an mal’ lor bann ki responsab dan kongregasyon. (Zid 8) Zot pa ti ena faver Bondye. Nu pu fer byin si nu rezet zot move kondwit.

13. Kifer eski pa tu konplint ki move?

¹³ Me sa pa vedir ki Bondye kondann tu bann konplint. Par egzanp, Li ti pran kont “konplint” lor Sodom ek Gomor. Li ti detrir sa de move lavil la. (Zenez 18:20, 21; 19:24, 25) Dan Zerizalem, enn tipe apre Lapantkot lane 33 N.L., “bann Zwif ki ti koz Grek ti fer konplint kont bann Zwif ki ti koz Ebre. Zot ti dir ki sak zur kan ti pe partaz manze, ti pe negliz bann vev dan zot grup.” Alor, bann zapot ti regle sa sityasyon la. Zot ti nom “set zom ki ti ena bon repitasyon” pu kontrol sa distribisyon manze la. (Akt 6:1-6) Zordi usi, fode pa ki bann ansyin “ferm zot zorey” kan ena bann konplint zistifye. (Proverb 21:13) Olye ki zot kritik bann frer, bann ansyin bizin plito ankuraz zot ek fortifye zot.—1 Korintyin 8:1.

14. Pu nu pa mirmire, ki kalite nu sirtu bizin?

¹⁴ Nu tu, nu bizin rezet tandans pu mirmire parski sa se enn latitid ki fer nu ditor lor plan spirityel. Sa kalite latitid la pu kas nu linite. Anu plito les lespri sin tuletan devlop lamur dan nu. (Galat 5:22) Si nu obeir ‘pli gran lalwa ki kapav ena, setadir lalwa lor lamur,’ sa pu ed nu pu kontiyn servi Zeova lamin dan lamin.—Zak 2:8; 1 Korintyin 13:4-8; 1 Pyer 4:8.

Pa Fer Palab

15. Si enn dimunn koz koze lezot, ki sa kapav amenn li fer?

¹⁵ Kan nu mirmire, sa kapav amenn nu fer palab. Alor, li inportan ki nu vey byin seki nu dir. Kan enn kikenn koz koze dimunn, li dir bann kitsoz initil lor dimunn la ek lor so bann zafer. Me, si enn kikenn pa fer atansyon, li kapav al ziska koz manti lor dimunn la pu gat so repitasyon. Enn kikenn ki fer sa bann kalite palab la, ena lintansyon pu fer lezot ditor. Donk, sa pa fer Bondye plezir ditu. Akoz sa, Li ti dir bann Izraelit: “Fode pa to al parsi-parla parmi to pep pu al fer palab lor lezot.”—Levitik 19:16.

16. Ki Pol ti dir konsernan sertin ki ti pe fer palab? Kuma sa konsey la bizin konsern nu?

¹⁶ Donk, kan enn kikenn koz koze lezot, sa kapav amenn li gat repitasyon sa bann dimunn la. Ala kifer, lapot Pol ti koz dir avek sertin ki ti pe koz koze lezot. Apre ki li ti’nn mansyonn bann vev ki kapav gayn led avek kongregasyon, Pol ti koz lor lezot vev ki’nn aprann pu “vinn pares ek [ki] al lakaz par lakaz. Ek zot pa zis pares, me zot koz koze lezot usi. Zot vey zafer dimunn ek zot koz lor bann kitsoz ki pa konsern zot.” (1 Timote 5:11-15) Si enn ser truve ki li ena enn tandans ki kapav amenn li fer palab, li bizin swiv konsey Pol, ki dir ki nu bizin “serye ek pa fer palab.” (1 Timote 3:11) Byinsir, bann frer usi bizin veye pu pa fer palab.—Proverb 10:19.

Aret Zize!

17, 18. (a) Ki Zezi ti dir konsernan ziz nu frer? (b) Kuma eski nu kapav aplik sa konsey Zezi la?

¹⁷ Mem si nu pa fer palab lor personn, nu bizin fer buku zefor pu evit ziz lezot. Zezi ti kondann sa latitid la, kan li ti dir: “Aret zize pu ki pa ziz zot. Parski pu ziz zot usi parey kuma zot ziz lezot; ek pu mezir pu zot, parey kuma zot mezir pu lezot. Kifer to pe get lapay ki dan lizye to frer, me to pa truv poto ki dan to prop lizye? Uswa kuma to kapav dir to frer, ‘Les mwa tir lapay ki dan to lizye,’ alor ki dan seki pu twa, ena deza enn poto? Ipokrit! Tir sa poto ki dan to lizye la avan, pu ki kumsa to truv pli byin kuma pu tir lapay ki dan lizye to frer.”—Matye 7:1-5.

¹⁸ Kuma eski nu kapav ena tupe pu tir “lapay” dan lizye nu frer pu ed li, kan numem, nu zizman li fose parski ena enn “poto” dan nu lizye? Avredir, si vremem nu ti konpran ki kantite Bondye ena pitye pu nu, nu pa ti pu rod ziz nu bann frer ek ser. Eski nu, nu kapav konpran zot, osi byin ki Bondye Li, Li konpran zot? Non, nu pa kapav. Donk, akoz sa, Zezi ti averti nu: ‘Aret zize pu ki pa ziz nu!’ Si nu onet avek numem ek nu analiz nu bann prop defo, sa mem bizin anpes nu ziz lezot, seki Bondye pa pu apresye.

Zot Frazil, me Zot Ena Valer

19. Kuma eski nu bizin konsider nu bann frer ek ser?

¹⁹ Si nu byin deside pu servi Bondye lamin dan lamin ansam avek nu bann frer, sa pa pu zis anpes nu ziz zot. Me, sa pu pus nu plito pu fer premye pa, pu donn zot loner. (Romin 12:10) Avredir, nu pa pu rod nu lavantaz, me zot lavantaz. Ek nu pu dispoze pu rann zot ninport ki ti servis. (Zan 13:12-17; 1 Korintyin 10:24) Kuma eski nu kapav gard enn bon latitid kumsa? Se kan tuletan nu mazine ki sak serviter Bondye ena valer devan lizye Zeova. Ek fode pa nu bliye usi ki sakenn parmi nu bizin so kamarad, parey kuma dan nu lekor sak parti depann lor lot.—1 Korintyin 12:14-27.

20, 21. Ki bann parol 2 Timote 2:20, 21 vedir pu nu?

²⁰ Nu rekonet ki bann Kretyin zot bann resipyan later ar ki Bondye finn konfye enn servis ki ena buku valer. (2 Korintyin 4:7) Pu nu kapav fer sa travay sakre la an loner Zeova, fode ki kan Li ek so Garson get nu, zot truve ki nu merit sa. Se selman kan nu gard nu kondwit ek nu ladorasyon prop, ki nu pu kuma enn resipyan ki ena buku valer dan lamin Zeova. Konsernan sa, Pol ti ekrir: “Dan enn gran lakaz, pena zis bann resipyan an or ek an arzan. Me, ena usi bann resipyan an dibwa ek an later. Ladan, ena ki servi pu bann lokazyon spesyal, ek lezot, zot bann resipyan ordiner. Si enn kikenn res lwin ar sa bannla, ebyin li pu enn resipyan ki servi dan bann lokazyon spesyal. So propryeter pu sanktifye li, li pu truv li itil ek li pu prepar li pu fer tu bon travay.”—2 Timote 2:20, 21.

²¹ Bann dimunn ki pena enn kondwit ki an akor avek seki Bondye demande, zot bann ‘resipyan ordiner.’ Me bann ki fer Bondye plezir zot, zot bann ‘resipyan ki servi dan bann lokazyon spesyal.’ Zeova finn sanktifye zot, uswa finn met zot apar, ek Li’nn prepar zot pu fer tu bon travay.’ Donk, nu kapav demann numem: ‘Eski mo enn resipyan ki “servi pu bann lokazyon spesyal”? Eski mo ena enn bon linflyans lor bann lezot frer ek ser? Eski dan kongregasyon mo travay lamin dan lamin avek lezot manb?’

Kontiyn Servi Lamin dan Lamin

22. Ar ki nu kapav konpar kongregasyon Kretyin?

²² Kongregasyon Kretyin parey kuma enn fami. Kan tu bann manb enn fami ador Zeova, ena enn bon latmosfer ranpli ar lamur ki profitab pu tu dimunn. Mem si bann manb la ena bann diferan personalite, sakenn ena enn plas ki ena valer. Alor, dan kongregasyon usi li parey. Mem si nu tu nu diferan ek nu inparfe, Bondye finn atir nu ar Li par mwayin Zezi Kris. (Zan 6:44; 14:6) Zeova ek Zezi kontan nu, ek parey kuma enn fami ki byin ini, nu byin bizin montre lamur ant nu.—1 Zan 4:7-11.

23. Ki fode zame nu bliye ek ki nu bizin byin deside pu fer?

²³ Parey kuma dan enn fami, nu atann ki bann manb dan kongregasyon Kretyin zot fidel. Lapot Pol ti ekrir: “Mo anvi ki partu, bann zom priye, ek ki zot lev zot bann lamin fidel, san okenn koler ek dispit.” (1 Timote 2:8) Donk, Pol ti asosye fidelite avek lapriyer an piblik, “partu” kot bann Kretyin reyni. Zis bann zom fidel ki bizin reprezant kongregasyon dan lapriyer. Byinsir, Bondye atann ki nu tu nu fidel ar Li ek sakenn fidel anver so kamarad. (Eklezyast 12:13,14) Donk, anu byin deside pu travay ansam, parey kuma bann diferan manb nu lekor. Antan ki manb dan lafami bann adorater Zeova, anu servi dan linite. Me sirtu, fode zame nu bliye ki sakenn parmi nu bizin so kamarad. Ek si nu kontiyn servi Zeova lamin dan lamin, Bondye pu donn nu so faver ek so bann benediksyon.

Kuma U Pu Reponn?

• Ki permet bann serviter Zeova pu servi Li lamin dan lamin?

• Kifer eski bann Kretyin pa get lezot de manyer?

• Dapre u, ki pabon ar mirmire?

• Kifer eski nu bizin donn loner nu bann frer?

[Zimaz lor paz 15]

Pyer ti rann li kont ki “Bondye pa fer preferans”

[Zimaz lor paz 16]

Eski u kone kifer Bondye ti donn Miryam enn leson?

[Zimaz lor paz 18]

Bann Kretyin fidel servi Zeova dan lazwa, lamin dan lamin