Problem Limanite Byinto Pu Fini!

“LED imaniter ena enn valer limite si li pa fer parti enn plan ki anglob tu seki konserne ek si li pena sutyin politik ki ena lobzektif pu atak rasinn bann konfli. Lexperyans finn montre plizir fwa ki led imaniter tusel pa kapav regle bann problem ki ofon bann problem politik.”—The State of the World’s Refugees 2000.

Malgre gran led imaniter, bann problem limanite pa pe aret ogmante. Ki posibilite ena pu gayn enn solisyon politik ki dirab? Anverite, byin tigit. Me, kot sa nu kapav rode ankor? Dan enn pasaz ki merit nu latansyon dan kumansman let ki Pol ti adres bann Kretyin dan Efez, li explike kuma Bondye pu fer tu bann problem limanite disparet. Li mem indike ki mwayin Bondye pu servi pu fer sa—enn mwayin ki pu atak rasinn bann problem ki fatig nu zordi. Kifer eski nu pa egzaminn seki Pol ena pu dir? Sa pasaz la truv dan Efezyin 1:3-10.

“Rasanble Tu Bann Kitsoz Ankor enn Fwa dan Kris”

Lapot Pol dir ki proze Bondye li pu, seki Li apel “enn administrasyon [uswa direksyon bann zafer] ziska lafin bann letan fixe.” Ki sa vedir? Li vedir ki Bondye finn fixe enn letan kot Li pu azir enn sertenn fason pu “rasanble tu bann kitsoz ankor enn fwa dan Kris, bann kitsoz ki dan lesyel ek bann ki kitsoz lor later.” (Efezyin 1:10) Wi, Bondye finn kumans servi enn mwayin pu fer tu kitsoz dan lesyel ek lor later revinn an armoni direkteman anba so kontrol. Li interesan pu not remark ki enn spesyalis Labib J. H. Thayer fer konsernan lexpresyon ki servi pu ‘rasanble ankor enn fwa’: “Rasanble ankor enn fwa pu Limem . . . tu kitsoz ek tu seki egziste (ki ziska ler pa dan linite akoz pese) dan enn linite ansam avek Kris.”

Sa montre kifer li inportan Bondye fer sa, kan nu konsider kuma linite ti kase okumansman. Dan kumansman listwar imin, nu premye paran, Adan ek Ev, ti swiv Satan Dyab dan enn rebelyon kont Bondye. Zot ti rod lindepandans kan zot ti rod drwa pu desid par zotmem seki bon ek seki pabon. (Zenez 3:1-5) An akor avek lazistis Bondye, ti exkli zot dan fami Bondye ek zot ti perdi relasyon ki zot ti ena avek Li. Zot inn plonz limanite dan linperfeksyon avek tu bann konsekans terib ki nu kone zordi.—Romin 5:12.

Permisyon Tanporer Lemal

Ena kapav demande: ‘Kifer eski Bondye ti les zot fer sa? Kifer eski Li pa ti zis servi so lafors siprem ek aplik so volonte, kumsa Li ti pu’nn anpes duler ek sufrans ki nu kone zordi?’ Li kapav paret normal pu pans kumsa. Me ki sa ti pu pruve vremem si Li ti servi enn lafors siperyer kumsa? Eski u admir uswa dakor ar enn dimunn ki, kuma enn kikenn pa dakor ar li, kraz tu lopozisyon parski li ena puvwar pu fer sa? Sirman pa.

Avredir, sa bann rebel la pa ti’nn defye lafors tu-pwisan Bondye. Zot ti plito defye so drwa legal pu dirize ek fason zis ki Li dirize. Pu regle enn fwa pu tu sa bann kestyon inportan ki ti’nn suleve la, Zeova finn permet so bann kreatir diriz zot par zotmem san so direksyon pandan enn letan limite. (Eklezyast 3:1; Lik 21:24) Kan sa letan la fini, Li pu azir pu repran kontrol total lor later. Lerla, Li pu vremem kler ki so manyer dirize sa mem sel manyer ki garanti boner, prosperite ek lape dirab pu bann abitan later. Li pu tir pu tuletan tu bann ki pe fer dominer dan lemond.—Psom 72:12-14; Danyel 2:44.

“Avan Fondasyon Lemond”

Zeova ti ena lintansyon pu fer sa depi lontan. Avan fondasyon lemond,” dapre Pol. (Efezyin 1:4) Se pa avan kreasyon later uswa kreasyon Adan ek Ev. Sa lemond ki Bondye ti fer la ti “byin bon,” ek rebelyon pa ti ankor eklate. (Zenez 1:31) Me alor, ki “lemond” lapot Pol ti pe koze? Lemond bann zanfan Adan ek Ev—enn lemond limanite ki fer pese, inparfe avek lespwar pu reaste zot. Avan ki okenn zanfan ne, Zeova ti deza fini kone kuma Li ti pu fer fas ar sa sityasyon la pu sulaz bann desandan Adan ki ti pu kapav reaste.—Romin 8:20.

Byinsir, sa pa vedir ki Suverin liniver bizin regle bann kitsoz parey kuma bann imin fer. Pwiski bann imin rekonet ki enn irzans kapav arive, zot prepar diferan plan detaye pu fer fas ar sityasyon la. Me, Bondye tu-pwisan sinpleman fer konn so proze ek Li akonpli li. Kan mem sa, Pol explike kuma Zeova ti desid pu regle bann sityasyon pu ki Li sulaz limanite pu tuletan. Ki bann dispozisyon Li ti pran?

Kisannla Pu Amenn Sulazman?

Pol explike ki bann disip Kris ki’nn swazire ena enn rol spesyal pu repar bann dega ki pese Adan finn koze. Pol dir ki Zeova “ti swazir nu an inyon avek [Kris],” pu dirize avek Zezi dan so Rwayom ki dan lesyel. Pu explik nu sa pli byin, Pol dir ki Zeova “ti fini swazir an avans pu adopte nu kuma so bann garson atraver Zezi Kris.” (Efezyin 1:4, 5) Byinsir, Zeova pa ti’nn swazir zot sakenn personelman. Me, Li’nn swazir an avans enn grup dimunn fidel ek devwe ki ansam avek Kris pu repar dega ki Satan Dyab, Adan ek Ev, finn amenn lor lafami imin.—Lik 12:32; Ebre 2:14-18.

Eski sa pa enn kitsoz extraordiner! Dan defi ki li ti lanse kont suverennte Bondye depi kumansman, Satan ti pretann ki kreasyon imin li inparfe—anba presyon uswa devan tantasyon, zot tu pu rebel kont lalwa Bondye. (Zob 1:7-12; 2:2-5) Dan enn manifestasyon remarkab “so faver glorye ki nu pa merite,” avek letan Bondye Zeova finn montre so konfyans dan so kreasyon ki lor later. Li’nn adopte sertin dan fami peser Adan pu vinn so bann zanfan spirityel pu al servi dan lesyel. Dan ki lintansyon?—Efezyin 1:3-6; Zan 14:2, 3; 1 Tesalonisyin 4:15-17; 1 Pyer 1:3, 4.

Lapot Pol dir ki sa bann garson ki finn adopte la, vinn “eritye ansam avek Kris” dan so Rwayom dan lesyel. (Romin 8:14-17) Antan ki lerwa ek pret, zot pu pran par pu liber lafami imin dan duler ek sufrans ki li pe kone asterla. (Revelasyon 5:10) Li vre ki “tu kreasyon pe kontiyn pleyne ansam ek pe kontiyn sufer ansam ziska asterla.” Alor, byinto, sa bann ki’nn swazire spesyalman pu vinn bann garson Bondye la, pu swiv Zezi Kris kan li pu azir. Ek tu bann imin obeisan “pu libere ar lesklavaz pese ek pu gayn enn liberte extraordiner kuma bann zanfan Bondye” ankor enn fwa.—Romin 8:18-22.

“Liberasyon par Ranson”

Tusala finn vinn posib grasa sakrifis Zezi Kris, ki’nn donn so lavi an ranson. Sa mem manyer pli inpresyonan ek pli siperyer ki Bondye finn montre so faver ki nu pa merite anver sa lemond limanite ki ti kapav reaste la. Pol finn ekrir: “Par mwayin [Zezi Kris] nu gayn liberasyon par ranson grasa disan sa kikenn la, nu gayn pardon pu [nu] bann fot, dapre rises so faver ki nu pa merite.”—Efezyin 1:7.

Zezi Kris limem personaz prinsipal dan lakonplisman proze Bondye. (Ebre 2:10) So sakrifis ki li’nn donn an ranson poz enn fondman legal pu ki Bondye adopte sertin parmi bann desandan Adan dan so fami dan lesyel. Li pu usi sulaz limanite ar bann konsekans pese Adan, san diminye konfyans dan So bann lalwa ek So bann prinsip. (Matye 20:28; 1 Timote 2:6) Zeova finn fer bann kitsoz enn manyer ki sutenir so lazistis ek satisfer seki lazistis parfe demande.—Romin 3:22-26.

“Sin Sekre” Bondye

Pandan plizir milye lane, Bondye pa ti revel egzakteman kuma Li ti pu realiz so proze pu later. Dan premye syek N.L., “Li finn fer [bann Kretyin] konn sin sekre konsernan so volonte.” (Efezyin 1:9) Pol avek so bann konpaynon Kretyin ki’nn swazire ti konpran klerman rol extraordiner ki Zezi ti’nn gayne dan lakonplisman proze Bondye. Zot finn usi kumans konpran zot rol spesyal antan ki bann eritye avek Kris dan so Rwayom dan lesyel. (Efezyin 3:5, 6, 8-11) Wi, Rwayom ki dan lamin Zezi Kris ek so bann dirizan asosye, sa mem mwayin ki Bondye pu servi pu amenn lape dirab, pa zis dan lesyel me usi lor later. (Matye 6:9, 10) Atraver sa mwayin la, Zeova pu refer later vinn dan kondisyon kuma Li ti anvi li ete depi kumansman.—Izai 45:18; 65:21-23; Akt 3:21.

Ler pe koste aster kot Bondye pu intervenir personelman pu debaras later ar tu bann ki pe fer dominer ek ki pratik linzistis. Me an realite Zeova ti kumans sa restorasyon la Lapantkot 33 N.L. Kuma? Kan Li ti kumans rasanble “bann kitsoz dan lesyel,” bann ki pu reyn avek Kris dan lesyel. Parmi ena usi bann Kretyin ki ti res dan lavil Efez. (Efezyin 2:4-7) Fek la, dan nu lepok, Zeova ti’nn rasanble “bann kitsoz ki lor later.” (Efezyin 1:10) Atraver enn kanpayn predikasyon mondyal, Li pe fer tu bann nasyon konn labonn nuvel lor guvernman ki dan lamin Zezi Kris. Bann ki aksepte sa bonn nuvel la pe rasanble depi asterla mem dan enn plas kot zot gayn proteksyon ek gerizon spirityel. (Zan 10:16) Byinto lor enn later prop ki pu vinn enn paradi, zot pu libere konpletman ar tu linzistis ek sufrans.—2 Pyer 3:13; Revelasyon 11:18.

Bann led imaniter finn fer “buku progre extraordiner” dan bann zefor pu ed bann dimunn ki pe pas mizer. (The State of the World’s Children 2000) Wi, progre pli extra ki pu ena ankor byinto se kan Kris Zezi ek so bann dirizan asosye dan Rwayom Bondye pu intervenir. Zot pu atak konpletman rasinn lager ek tu bann lezot mesanste ki fatig nu. Zot pu tir tu bann problem limanite.—Revelasyon 21:1-4.

[Zimaz lor paz 4]

Bann aksyon imaniter pa finn regle bann problem limanite

[Zimaz lor paz 6]

Sakrifis ki Kris finn donn an ranson, finn sulaz tu limanite avek pese Adan

[Zimaz lor paz 7]

Zordi, li posib pu truv enn proteksyon ek gerizon spirityel

[Zimaz lor paz 7]

Byinto, nu pu sulaze konpletman ar bann problem grasa Rwayom Mesi