“Zeova Nou Bondie Li Enn Sel Zeova”

1, 2. (a) Kouma boukou dimounn konn bann parol ki ena dan Deteronom 6:4? (b) Kifer Moiz ti dir sa bann parol-la?

PANDAN plizir santenn lane, bann Zwif ti servi bann parol ki trouv dan Deteronom 6:4 dan enn lapriyer spesial. Apel sa lapriyer-la Shema. Se premie mo ki ena dan sa verse-la an Ebre. Boukou Zwif resit sa lapriyer-la toule gramatin ek toule tanto pou montre ki zot res atase zis ar Bondie.

² Sa bann parol-la form parti dan dernie diskour ki Moiz ti fer ar nasion Izrael. An 1473 avan Zezi Kris, bann Izraelit ti dan Moab, ek ti pre pou travers Larivier Zourdin pou pran Later Promiz. (Deteronom 6:1) Moiz ti gid nasion Izrael pandan 40 an, ek li ti anvi ki zot ena kouraz pou fer fas ar bann difikilte ki zot ti pou gagne. Zot ti bizin fer Zeova konfians, ek res fidel ar Li. Se sa ki Moiz ti ankouraz zot pou fer, par so bann dernie parol ki li ti prononse. Apre ki li ti mansionn Dis Komannman ek bann lezot lalwa Zeova, Moiz ti rapel zot bann parol bien for ki nou kapav lir dan Deteronom 6:4, 5. (Lir.a)

 3. Ki bann kestion nou pou examine dan sa lartik-la?

³ Bann Izraelit ti kone ki Zeova zot Bondie Li “enn sel Zeova.” Bann Izraelit fidel ti ador enn sel Bondie, setadir Bondie zot bann anset. Alor, kifer eski Moiz ti rapel zot ki Zeova zot Bondie Li “enn sel Zeova”? Ki rapor sa verite-la ena avek kontan nou Bondie avek tou nou leker, tou nou nam, ek tou nou lafors? Ek kouma bann parol ki trouv dan Deteronom 6:4, 5 aplik ar nou zordi?

4, 5. (a) Ki enn sinifikasion lexpresion “enn sel Zeova”? (b) Kouma eski Zeova Li diferan ar bann bondie lezot nasion?

⁴ Li Inik. Lexpresion “enn sel Zeova” vedir ki Zeova Li inik, ki personn pa egal ar Li ouswa parey kouma Li. Kifer Moiz inn servi sa lexpresion-la? Kan Moiz ti pe dir sa bann parol-la, li pa ti pe koz lor fos lansegnman Trinite. Zeova Li Kreater lesiel ek later ek Li Dirizan liniver. Se Li tousel ki vre Bondie, ek pena okenn lot bondie ki kouma Li. (2 Samiel 7:22) Alor, bann parol Moiz ti rapel bann Izraelit ki zot ti bizin ador zis Zeova. Zot ti bizin pa imit bann nasion ki ti toutotour zot ek ki ti ador boukou fos bondie ek dees. Sa bann nasion-la ti krwar ki zot bondie ti kapav kontrol lanatir.

⁵ Par exanp, bann Ezipsien ti ador Ra (bondie soley), Nout (dees lesiel), Geb (bondie later), Api (bondie Larivier Nil) ek osi boukou lezot zanimo. Zeova ti montre ki Li ti pli siperyer ki sa bann fos bondie la kan Li ti amenn Dis Ple lor Lezip. Baal ti bondie prinsipal bann Kananeen. Bann Kananeen ti panse ki se limem ki’nn kree lavi, ek ki limem bondie lesiel, lapli ek tanpet. Dan boukou landrwa, bann dimounn ti kont lor Baal pou protez zot. (Nonb 25:3) Bann Izraelit ti bizin rapel ki zot Bondie, “vre Bondie,” Li inik. Li “enn sel Zeova.”​—Deteronom 4:35, 39.

6, 7. Ki deziem sinifikasion lexpresion “enn sel Zeova,” ek kouma Zeova inn prouve ki Li “enn sel”?

⁶ Li Pa Sanze ek Li Fidel. Lexpresion “enn sel” vedir osi ki nou kapav touzour ena konfians dan so proze ek so fason azir. Zeova nou Bondie Li ena enn sel panse, ek Li pa sanz-sanze. Li touletan fidel, Li res parey, ek Li dir seki vre. Par exanp, Li ti promet Abraam ki so desandan ti pou viv dan Later Promiz. Ek Zeova ti fer boukou mirak extraordiner pou tini sa promes-la. Mem apre 430 an, proze Zeova pa ti sanze.​—Zenez 12:1, 2, 7; Exod 12:40, 41.

⁷ Plizir santenn lane apre, Zeova ti apel bann Izraelit so bann temwin ek Li ti dir zot: “Mo pa finn sanze. Avan mwa okenn Bondie pa ti forme, ek apre mwa, pa finn ena okenn lot bondie.” Zeova ti osi fer zot bien konpran ki so proze zame sanze kan Li’nn rapel zot: “Mo touletan parey.” (Izai 43:10, 13; 44:6; 48:12) Se vremem enn gran privilez ki bann Izraelit ti ena pou servi enn Bondie ki zame sanze ek ki touletan fidel! Nou osi nou ena mem privilez azordi.​—Malaki 3:6; Zak 1:17.

8, 9. (a) Ki kitsoz Zeova atann so bann adorater fer? (b) Kouma Zezi ti montre linportans bann parol ki ena dan Deteronom 6:4, 5?

⁸ Moiz ti rapel bann Izraelit ki touletan Zeova ti pou kontan zot ek ti pou pran zot swin. An retour, Zeova ti atann ki zot res atase zis ar Li tousel ek ki zot kontan Li avek tou zot leker, tou zot nam, ek tou zot lafors. Bann paran ti bizin profit tou lokazion pou koz lor Zeova ar zot bann zanfan. Koumsa, mem bann zanfan osi ti pou ador zis Zeova tousel.​—Deteronom 6:6-9.

⁹ Zeova zame pa sanz so proze, alor touletan Li atann mem kitsoz ar so bann vre adorater. Si nou anvi ki nou ladorasion fer Zeova plezir, nou bizin res atase zis ar Li tousel ek kontan Li avek tou nou leker, tou nou lespri, ek tou nou lafors. Zezi ti dir ki samem pli gran komannman. (Lir Mark 12:28-31, NW.) Anou gete kouma nou kapav montre, par nou bann aksion, ki nou krwar ki “Zeova nou Bondie Li enn sel Zeova.”

10, 11. (a) Dan ki sans eski nou ador zis Zeova tousel? (b) Kouma bann zenn Ebre dan Babilonn ti montre ki zot atase zis ar Zeova tousel?

¹⁰ Zeova Li tousel nou Bondie. Nou res atase ar Li tousel kan nou ador zis Li. Nou pa kapav ador okenn lot bondie ouswa melanz bann fos lansegnman ek bann fos pratik dan nou ladorasion pou Zeova. Li pa zis enn Bondie ki pli siperyer ouswa ki pli pwisan ki lezot bondie. Limem vre Bondie. Alor, nou bizin ador zis Zeova tousel.​—Lir Revelasion 4:11, NW.

¹¹ Dan liv Daniel, nou kapav lir zistwar bann zenn Ebre ki ti apel Daniel, Anania, Mishael ek Azaria. Zot ti montre ki zot atase zis ar Zeova tousel kan zot ti refiz manz bann manze ki ti inpir pou bann adorater Zeova. Ek sa trwa kamarad Daniel la ti refiz prostern devan enn zidol an-or ki Lerwa Neboukadnetsar ti fer. Pou zot, Zeova ti pas an premie. Zot ti montre ki zot vremem fidel anver Zeova.​—Daniel 1:1–3:30.

12. Kan nou res atase zis ar Zeova tousel, kont ki kitsoz nou bizin protez nou?

¹² Zeova bizin pas an premie dan nou lavi. Si nou anvi res atase zis ar Li tousel, nou bizin fer sir ki pena okenn lezot kitsoz ki pran plas Zeova dan nou lavi. Ki bann kitsoz ki kapav pran plas Zeova? Dan Dis Komannman ki Zeova ti done, Li ti dir ki fode pa so pep ador bann lezot bondie. Fode pa ki zot pratik okenn form lidolatri. (Deteronom 5:6-10) Azordi, ena diferan form lidolatri, ek li bien difisil pou rekonet sertin parmi zot. Me Zeova pa’nn sanze ek Li ankor atann ki nou pa pratik lidolatri. Li touzour “enn sel Zeova.” Anou gete kouma nou kapav evit tom dan lidolatri azordi.

13. Ki bann kitsoz ki kapav gat sa lamitie spesial ki nou ena avek Zeova la?

¹³ Kolosien 3:5, NW (lir), mansionn bann kitsoz ki kapav gat sa lamitie spesial ki nou ena avek Zeova la. Sa verse-la fer nou konpran ki bann lanvi exazere ena enn lien avek lidolatri. Kouma? Kan nou ena enn gran dezir pou gagn bann kitsoz, kouma par exanp boukou kas ouswa bann kitsoz bien ser me ki pa inportan, sa dezir-la kapav kontrol nou lavi kouma enn bondie ki bien pwisan. Tou bann pese ki’nn mansione dan Kolosien 3:5 ena enn lien avek bann lanvi exazere, ki osi enn form lidolatri. Alor, si nou ena enn lanvi exazere pou sa bann kitsoz-la, nou kapav koumans kontan zot plis ki nou kontan Bondie. Lerla Zeova pou nepli “enn sel Zeova” pou nou. Zame nou pa pou anvi ki sa arive, pa vre?

14. Ki lavertisman lapot Zan ti done konsernan nou lamour pou Bondie?

¹⁴ Lapot Zan ti met laksan lor mem pwin. Li ti donn sa lavertisman-la: Si enn kikenn kontan bann kitsoz ki dan lemond, setadir “dezir laser, dezir lizie, enn kikenn ki fer letalaz ar seki so mwayin permet li ena,” sa montre ki “lamour nou Papa pa dan li.” (1 Zan 2:15, 16, NW.) Alor, nou bizin examinn noumem regilierman ek gete tansion nou kontan lemond. Kitfwa nou kapav remarke ki nou’nn koumans atire ar bann divertisman, bann dimounn, lamod ek stil abiye dan sa lemond-la. Ouswa, kitfwa nou anvi reisi fer “bann gran kitsoz” kan nou rod fer bann gran-gran letid. (Zeremi 45:4, 5) Lemond nouvo bien pre. Alor, nou bizin rapel bann parol bien for ki Moiz ti dir! Si nou’nn bien konpran ek nou vremem sir ki “Zeova nou Bondie Li enn sel Zeova,” nou pou res atase zis ar Li tousel ek nou pou servi Li dan fason ki Li, Li anvi.​—Ebre 12:28, 29.

15. Kifer Pol ti rapel bann Kretien ki Bondie Li “enn sel Zeova”?

¹⁵ Lexpresion “enn sel Zeova” fer nou konpran ki Zeova anvi ki so bann serviter res ini ek ena mem lobzektif dan lavi. Dan premie siek, ti ena diferan nasionalite dan kongregasion Kretien. Par exanp ti ena bann Zwif, bann Grek, bann Romin, ek lezot nasionalite ankor. Zot ti ena osi diferan kiltir, koutim, ek preferans. Se pou sa ki sertin parmi zot ti trouv sa difisil pou ador Bondie dan enn nouvo fason ouswa pou aret fer kouma zot ti pe fer avan. Akoz sa, Pol ti bizin rapel zot ki bann Kretien ena enn sel Bondie, Zeova.​—Lir 1 Korintien 8:5, 6.

16, 17. (a) Ki profesi pe realize dan nou lepok, ek ki rezilta sa ena? (b) Ki kitsoz kapav vinn enn danze pou nou linite?

¹⁶ Ki nou kapav dir lor kongregasion Kretien azordi? Profet Izai ti dir ki “dan peryod final bann zour,” bann dimounn dan tou nasion pou zwenn ansam pou ador Zeova. Zot pou dir: “Li pou montre nou ki nou bizin fer, ek nou pou mars lor so semin.” (Izai 2:2, 3) Nou bien kontan pou trouv sa profesi-la realize zordi! Nou bann frer ek ser sorti dan diferan landrwa, koz diferan lang, ek ena diferan kiltir. Me nou tou nou ador Zeova ansam dan linite. Selman, akoz sa bann diferans-la, parfwa kapav ena bann difikilte.

¹⁷ Par exanp, kouma to konsider bann frer ek ser ki pena mem kiltir ki twa? Zot langaz, zot fason abiye, zot manier, ek zot manze kitfwa bien diferan ar seki pou twa. Eski to evit zot ek to pas plis letan avek bann dimounn ki parey kouma twa? Ki to panse lor bann ansien ki dan to lantouraz me ki pli zenn ki twa ouswa ki ena enn lot nasionalite ouswa kiltir? Si nou pa fer atansion, nou kapav les sa bann diferans-la afekte nou ek detrir nou linite.

18, 19. (a) Ki konsey ena dan Efezien 4:1-3? (b) Ki nou kapav fer pou gard linite dan kongregasion?

¹⁸ Kouma nou kapav evit sa bann kalite difikilte-la? Pol ti donn bann konsey pratik bann Kretien dan Efez, enn lavil bien ris kot bann dimounn ti ena diferan kiltir. (Lir Efezien 4:1-3.) Pol ti mansionn bann kalite kouma limilite, douser, pasians ek lamour. Sa bann kalite-la zot kouma bann kolonn bien solid ki tini enn lakaz. Me pou gard enn lakaz dan enn bon leta, bizin travay bien dir. Pol ti anvi ki bann Kretien dan Efez travay dir pou “gard linite Lespri.”

¹⁹ Nou tou nou bizin travay dir pou gard linite dan kongregasion. Kouma nou kapav fer sa? Premierman, nou bizin devlop ek manifeste bann kalite ki Pol inn mansione: limilite, douser, pasians ek lamour. Deziemman, nou bizin fer bann gran zefor pou favoriz “lape ki tini [nou] ansam.” Kan ena bann ti friksion ouswa bann dezakor, se koumadir nou linite inn gagn enn ti felir. Dan sa ka-la, nou bizin fer bann gran zefor pou regle sa bann sitiasion-la pou ki nou prezerv nou lape ek nou linite.

20. Kouma nou kapav montre ki nou’nn konpran ki “Zeova nou Bondie Li enn sel Zeova”?

²⁰ “Zeova nou Bondie Li enn sel Zeova.” Se vremem bann parol bien pwisan! Sa rapel-la finn donn lafors bann Izraelit pou andir bann difikilte kan zot ti rant dan Later Promiz ek ti pran sa pei-la. Sa bann parol-la kapav donn nou’si lafors pou ki nou reisi travers gran detres ek antretenir lape ek linite dan Paradi ki pou vini biento. Anou kontign res atase zis ar Zeova tousel. Nou bizin kontan Li ek servi Li avek tou nou leker, tou nou nam ek tou nou lafors. Nou bizin osi fer bann gran zefor pou prezerv lape ek linite ki ena parmi nou. Si nou kontign fer sa bann kitsoz-la, Zezi pou konsider nou kouma bann mouton ek nou pou trouv so bann parol realize: “Vini, zot ki mo papa finn beni. Resevwar rwayom ki Bondie finn prepare pou zot depi kreasion lemonn.”​—Matie 25:34.