“Vey Bien lor Seki Bondie Finn Konfie Twa”

1-2. Dapre 1 Timote 6:20, ki kitsoz Timote ti gagne?

SOUVAN, nou demann lezot dimounn pou gard bann kitsoz ki ena valer pou nou. Par exanp, kitfwa nou pou gard nou kas dan labank. Ek kan nou fer sa, nou atann ki nou kas pou an sekirite, ki li pa pou perdi, ek ki personn pa pou kokin li. Sa lexanp-la montre nou kouma nou fer lezot dimounn konfians pou gard bann kitsoz ki ena valer pou nou.

² Lir 1 Timote 6:20. Lapot Pol ti rapel Timote ki li ti gagn enn kitsoz ki ena boukou valer: konesans exakt lor proze ki Bondie ena pou bann dimounn. Zeova ti osi donn Timote privilez pou “proklam laparol” ek pou fer “travay predikasion Bonn Nouvel.” (2 Tim. 4:2, 5) Pol ti ankouraz Timote pou “vey bien,” setadir pou gard bien sa privilez ki li ti gagne la. Parey kouma Timote, nou finn gagn bann kitsoz ki ena boukou valer. Ki sa bann kitsoz-la sa? Ek kifer nou bizin gard sa kado ki Zeova finn donn nou la?

3-4. Sit sertin rezon kifer bann verite ki ena dan Labib ena boukou valer.

³ Avek amour, Zeova finn donn nou enn konesans exakt lor bann verite ki ena dan so Parol, Labib. Sa bann verite-la ena boukou valer. Kifer? Parski zot ansegn nou kouma nou kapav ena enn bon relasion avek Zeova ek kouma nou kapav gagn vre boner. Kan nou aksepte sa bann verite-la ek nou viv an-akor avek zot, nou libere ar bann fos lansegnman ek bann pratik imoral.​—1 Kor. 6:9-11.

⁴ Enn lot rezon kifer bann verite ki ena dan Parol Bondie ena sa kantite valer-la, se parski Zeova fer zis bann dimounn ki ena limilite ek ki “ena enn bon kondision leker” konn sa. (Zist. 13:48, NW) Sa bann dimounn-la rekonet ki, dan nou lepok, se lesklav fidel ek saz ki pe ansegn bann verite ki ena dan Labib. (Mat. 11:25; 24:45, NW) Konpran sa bann verite-la, se enn kitsoz ki ena boukou valer ek nou pa kapav konpran zot par noumem.​—Prov. 3:13, 15.

 5. Ki kitsoz ankor Zeova inn donn nou?

⁵ Zeova inn osi donn nou privilez pou ansegn lezot bann verite lor Li ek lor so proze. (Mat. 24:14) Mesaz ki nou prese ena boukou valer parski sa kapav ed bann dimounn pou form parti fami Zeova ek sa donn zot posibilite pou viv pou touletan. (1 Tim. 4:16) Mem si nou pres boukou ouswa tigit, nou tou nou pe soutenir travay pli inportan ki ena dan nou lepok. (1 Tim. 2:3, 4) Se vremem enn gran privilez pou travay ansam avek Bondie!​—1 Kor. 3:9.

 6. Ki ti ariv sertin Kretien parski zot pa ti res lor zot gard?

⁶ Dan lepok Timote, sertin Kretien pa ti apresie zot privilez pou travay ansam avek Bondie. Demas pa ti gard so privilez pou travay ansam avek Pol, parski li ti kontan sa lemond-la. (2 Tim. 4:10) Fizel ek Ermozenn ti abandonn zot minister, kitfwa parski zot ti gagn per tansion zot gagn bann mem persekision ki Pol. (2 Tim. 1:15) Imene, Alexand, ek Filet ti vinn bann aposta ek ti kit laverite. (1 Tim. 1:19, 20, NW; 2 Tim. 2:16-18) Pandan enn lepok, tou sa bann dimounn-la ti kontan Zeova. Me apre, zot ti aret apresie bann kitsoz ki Zeova ti donn zot.

 7. Sit bann taktik ki Satan servi kont nou.

⁷ Kouma Satan esey fer nou abandonn bann kitsoz ki ena boukou valer? Anou get sertin taktik ki Satan servi. Li servi bann divertisman ek bann media pou fer nou pans ek azir dan enn fason ki, tigit-tigit, kapav fer nou aret kontan Zeova ouswa obeir so bann lalwa. Li servi persekision ek osi seki lezot panse lor nou, pou esey fer nou gagn per pou ki nou aret prese. Ek li esey inflians nou pou ekout “konesans” bann aposta, pou ki nou kit laverite.​—1 Tim. 6:20, 21.

 8. Ki to’nn aprann ar lexanp Daniel?

⁸ Si nou pa fer atansion, tigit-tigit nou kapav kit laverite. Anou pran lexanp Daniel,b ki ti kontan zwe bann video game. Li dir: “Mo ti koumans zwe bann video game kan mo ti ena apepre 10 an. O-koumansman, mo ti zwe bann zwe ki ti korek. Me tigit-tigit, mo ti koumans zwe bann zwe ki violan ek demoniak.” Avek letan, Daniel ti pe zwe bann video game pandan omwin 15 er-tan par zour. Daniel dir: “Mo ti kone ki sa bann zwe-la ek kantite letan ki mo ti pe pase pou zwe, ti pe elwagn mwa ar Zeova. Me selman, mo ti konvink momem ki mo pa ti bizin swiv bann prinsip Labib.” Si nou pa fer atansion, tigit-tigit bann divertisman kapav fer nou kit laverite. Ek si sa arive, nou pou perdi bann kitsoz ki Zeova inn donn nou.

 9. Dapre 1 Timote 1:18, 19, ar kisannla Pol ti konpar Timote?

⁹ Lir 1 Timote 1:18, 19, NW.c Pol ti konpar Timote ar enn solda ek li ti ankouraz li pou kontign “sa zoli konba-la.” Sa konba-la, se pa enn konba literal, me enn konba spiritiel. Dan ki sans bann Kretien zot kouma bann solda ki dan enn konba? Antan ki bann solda Zezi Kris, ki bann kalite nou bizin kiltive? Anou get sink leson ki nou kapav aprann ar lexanp ki Pol ti servi. Sa bann leson-la kapav ed nou pou tini ferm dan laverite.

10. Kifer nou bizin ena latasman pou Bondie?

¹⁰ Devlop latasman pou Bondie. Enn bon solda li fidel. Li pou lager pou protez enn kikenn ki li kontan ouswa enn kitsoz ki ena valer pou li. Pol ti ankouraz Timote pou devlop latasman pou Bondie. (1 Tim. 4:7) Plis nou kontan Bondie, plis nou pou anvi tini ferm dan laverite.​—1 Tim. 4:8-10; 6:6.

11. Kifer nou bizin disiplinn noumem?

¹¹ Disiplinn tomem. Enn solda bizin disiplinn limem pou ki li touletan pre pou lager. Timote ti res for lor plan spiritiel parski li ti swiv bann konsey Pol, setadir li ti lit kont bann move dezir, li ti fer bann gran zefor pou devlop bann kalite Kretien, ek li ti pas letan avek bann frer ek ser. (2 Tim. 2:22) Me pou fer sa, li ti bizin disiplinn limem. Nou osi, nou bizin disiplinn noumem pou nou kapav lit kont nou bann move dezir. (Rom. 7:21-25) Anplis, nou bizin disiplinn noumem pou nou kontign tir nou vie personalite ek met nouvo personalite lor nou. (Efe. 4:22, 24, NW) Ek kan nou fatige apre enn long lazourne, kitfwa nou bizin fors noumem pou al renion.​—Ebre 10:24, 25.

12. Kouma nou kapav amelior fason ki nou servi Labib?

¹² Enn solda bizin antrenn li pou servi so bann zarm. Ek si li anvi konn servi bien so bann zarm, li bizin antrenn li regilierman. Nou osi, nou bizin fer parey si nou anvi bien konn servi Parol Bondie. (2 Tim. 2:15) Nou kapav aprann kouma pou fer sa dan nou bann renion. Me si nou anvi ed lezot pou krwar ki bann verite ki ena dan Labib kapav ed zot, nou bizin etidie Labib regilierman par noumem. Nou bizin servi Parol Bondie pou fer nou lafwa vinn pli for. Sa inplik plis ki zis lir Labib. Nou bizin medit lor seki nou lir ek fer bann resers dan nou bann piblikasion pou ki nou kapav konpran bien bann verse Labib ek met zot an pratik. (1 Tim. 4:13-15, NW) Lerla, nou pou kapav servi Parol Bondie pou ansegn lezot. Ankor enn fwa, sa inplik plis ki zis lir enn verse Labib. Nou anvi ed bann dimounn pou konpran verse-la ek pou met li an pratik. Alor, kan nou etidie Labib regilierman, nou pou plis kapav servi Labib pou ed bann dimounn.​—2 Tim. 3:16, 17.

13. Dapre Ebre 5:14, kifer nou bizin ena disernman?

¹³ Ena disernman. Enn solda bizin kapav prevwar bann danze pou li evit zot. Nou osi, nou bizin aprann rekonet bann sitiasion ki kapav fer nou ditor ek azir pou evit zot. (Prov. 22:3; lir Ebre 5:14, NW.d) Par exanp, nou bizin swazir bien nou bann divertisman. Bann fim ek bann program televizion souvan montre bann kitsoz imoral. Nou bizin rezet sa bann divertisman-la parski sa kapav afebli nou lamour pou Zeova. Nou kone ki Zeova deteste bann konportman imoral, ek ki bann dimounn ki fer bann kitsoz imoral fer zotmem ek lezot osi ditor.​—Efe. 5:5, 6.

14. Ki bienfe Daniel inn gagne kan li’nn ena disernman?

¹⁴ Daniel, ki nou ti mansione avan, ti koumans konpran ki li ti bizin aret zwe bann video game violan ek demoniak. Li ti fer bann resers lor Watchtower Library lor sa size-la. Ki lefe sa ti ena lor li? Li ti aret zwe bann video game ki pa bon. Li ti kennsel so bann labonnman, ek li ti aret zwe avek bann lezot zwer. Daniel dir: “Olie ki mo zwe bann video game, mo ti koumans fer bann laktivite deor ek pas letan avek bann kamarad dan lasanble.” Azordi, Daniel pe servi kouma pionie ek ansien.

15. Kifer bann fos linformasion zot danzere?

¹⁵ Parey kouma Timote, nou osi nou bizin ena disernman pou rekonet bann fos linformasion ki bann aposta pe fane. (1 Tim. 4:1, 7; 2 Tim. 2:16) Par exanp, zot kapav esey fann bann rimer lor bann frer ouswa fer nou ena bann dout lor lorganizasion Zeova. Sa bann fos linformasion-la kapav afebli nou lafwa. Fode pa nou krwar sa bann linformasion-la. Kifer? Parski se bann “dimoun ti lespri ek dan lerer” ki fann sa bann rimer-la. Zot lobzektif se pou “fann zizani” ek zot “kontan diskite.” (1 Tim. 6:4, 5) Zot anvi ki nou krwar sa bann mansonz-la ek ki nou koumans dout nou bann frer.

16. Ki bann kitsoz kapav distrer nou?

¹⁶ Res konsantre. Antan ki “enn vre solda Zezi Kris,” Timote ti bizin res konsantre lor so minister, olie ki li les li distrer par bann kitsoz materyel ouswa bann lezot lobzektif. (2 Tim. 2:3, 4) Parey kouma Timote, fode pa ki nou les nou distrer par bann kitsoz materyel. “Lamour dibien materyel” kapav fer nou perdi nou lamour pou Zeova, nou rekonesans pou Parol Bondie, ek nou dezir pou koz lor Parol Bondie avek lezot. (Mat. 13:22) Nou bizin amenn enn lavi sinp, ek servi nou letan ek nou lenerzi pou “rod plito Rwayom Bondie.”​—Mat. 6:22-25, 33.

17-18. Ki nou kapav fer pou protez nou lamitie avek Zeova?

¹⁷ Prepar twa pou azir vit. Enn solda bizin fini kalkile ki li pou fer pou protez limem. Si nou anvi protez bann kitsoz ki Zeova inn donn nou, nou bizin azir vit kan nou trouv enn danze. Ki kitsoz kapav ed nou pou azir vit? Nou bizin fini kalkile alavans kouma nou pou reazir kan ena enn danze.

¹⁸ Anou pran enn lexanp. Kan ena enn levennman, souvan ankouraz bann dimounn dan lasistans pou fini kone kot bann “exit” ouswa bann sorti sekour ete, avan ki program-la koumanse. Kifer? Pou ki bann dimounn kapav sorti vit, si ena enn panik. Dan mem fason, nou kapav fini kalkile ki “exit” nou pou pran si nou trouv enn senn imoral, enn senn violan, ouswa bann kitsoz aposta kan nou lor Internet, kan nou pe get enn fim, ouswa enn program televizion. Si nou prepar nou pou bann kitsoz ki kapav arive, nou pou kapav azir vit pou protez nou lamitie avek Zeova ek res sin devan so lizie.​—Ps. 101:3; 1 Tim. 4:12.

19. Ki benediksion nou pou gagne si nou gard bien bann kitsoz ki Zeova inn donn nou?

¹⁹ Nou bizin gard bien bann kitsoz ki Zeova inn donn nou ek ki ena boukou valer, kouma bann verite inportan ki ena dan Labib ek privilez ki nou ena pou ansegn sa lezot. Kan nou fer sa, nou pou ena enn konsians kler, nou lavi pou ena enn sans, ek nou pou ere parski nou pou ed lezot pou aprann konn Zeova. Avek led Zeova, nou pou kapav gard bien bann kitsoz ki Li’nn donn nou.​—1 Tim. 6:12, 19.