Parent​—Enseigne Zot Zenfant Depuis Ki Zot Bien Tipti

LA BIBLE dire: “Guetté! Bann garson, zot enn l’heritage Jéhovah; fruit ventre, li enn recompense.” (Ps. 127:3) Li pa etonnant alors ki bann parent Chretien bien content kan enn zenfant né.

Bann parent pa zis content, zot ena aussi bann grand responsabilité. Si zot envie ki zot zenfant vinn enn adulte en bonne santé, zot bizin donne li regulierement bann mangé nourrissant. Alors, pou ki enn zenfant prend position pou vrai l’adoration, so bann parent bizin aussi nourri li lor plan spirituel ek guide li. Zot bizin faire zeffort pou enseigne li bann principe Biblik. (Prov. 1:8) Kan eski zot bizin commence donne li sa formation-la, ek ki zot bizin enseigne li?

Anou prend l’exemple Manoah, enn Danite ki ti reste dan lavil Tsora, en Israël, dan le passé. Ange Jéhovah ti dire ar Manoah so madame, ki ti sterile, ki li ti pou gagne enn garson. (Juges 13:2, 3) Manoah ek so madame ti bann fidele serviteur Jéhovah, alors, surement zot ti bien content kan zot ti tann sa nouvelle-la. Selman, zot ti demann-zot couma zot ti pou faire pou bien elevé sa zenfant-la. Alors Manoah ti faire sa la priere-la: “Pardon Jéhovah. To serviteur, ki to finn fek envoyé-la, s’il-te-plait, faire li ré-vinn guette nou, pou li donne nou bann instruction, pou nou koné ki bizin faire concernant sa zenfant ki pou né-la.” (Juges 13:8) Manoah ek so madame ti envie faire tou seki zot kapav pou bien elevé zot zenfant. Pena doute ki zot ti enseigne Samson, zot garson, la loi Bondié, ek li parette ki zot ti reussi dan zot zeffort. La Bible dire: “Avek le temps, l’esprit Jéhovah ti commence pousse [Samson] pou” agir. Lerla, en tant ki juge nation Israël, Samson ti commence faire bann kitsoz extraordinaire.​—Juges 13:25; 14:5, 6; 15:14, 15.

Kan eski bann parent bizin commence enseigne zot zenfant? Eunice, mama Timothée, ek so grand-mere Loïs ti enseigne li “bann l’ecriture sacré” “depuis [li] bien tipti.” (2 Tim. 1:5; 3:15) Oui, zot ti commence enseigne li bann kitsoz spirituel depuis li ti bien tipti.

Li sage ki bann parent Chretien prié Jéhovah pou guide zot ek zot bizin fini decidé en avance ki zot pou faire pou ki zot kapav commence enseigne zot zenfant “depuis [zot] bien tipti.” Proverbes 21:5 dire: “Bann plan enn kikenn ki travail dur pou faire li gagne l’avantage.” Pena doute ki bann parent pou prepare-zot bien avant zot tibaba né. Li possible mem ki zot faire enn la liste bann kitsoz ki tibaba-la pou bizin. Li important aussi ki zot decidé couma zot pou enseigne zot tibaba lor Jéhovah. Zot bizin ena l’objectif pou commence enseigne zot tibaba bien boner.

Enn livre lor l’education bann zenfant (Early Childhood Counts​—A Programming Guide on Early Childhood Care for Development) dire: “Dan bann mois zis apré naissance enn zenfant, so cerveau developpe pli vite. Pendant sa periode-la, bann synapse​—bann connection ki permette li pou aprann​—augmente vingt fois plis.” Li sage ki bann parent profite sa ti periode-la pou commence mette dan l’esprit zot bann zenfant, bann pensée ek bann valeur spirituel!

Concernant so jeune tifi, enn mama ki aussi enn pionnier permanent ti dire: “Depuis ki li ena enn mois, mo ti amenn li avek moi dan predication. Mem si li pa ti comprend seki ti pé passé, mo pensé ki parski mo ti amenn li bien boner ar moi, sa ti ena enn bon l’effet lor li. Kan li ti ena deux an, li pa ti peur pou donne bann tract bann dimoune ki nou ti zwenn dan predication.”

Bann parent kapav gagne bann bon resultat si zot enseigne zot zenfant depuis bien tipti. Selman, bann parent remarké ki li pa toujours fasil pou enseigne zot zenfant lor plan spirituel.

Li difisil pou enn zenfant reste concentré pendant longtemps, ek sa kapav enn grand difficulté pou bann parent. Enn zenfant interessé ar enn kitsoz zis pou enn ti moment. Bann zenfant curieux ek zot rod koné ki ena tout autour zot. Ki bann parent kapav faire pou aide enn zenfant reste concentré kan zot pé enseigne li?

Reflechi lor seki Moïse ti dire dan Deutéronome 6:6, 7: “Sa bann commandement ki mo pé donne toi zordi-la, bizin lor to leker; to bizin contigne repete sa ar to garson pou faire sa rente dan so la tête ek koz sa kan to assizé dan to lakaz, kan to marché lor chemin, kan to allongé ek kan to levé.” Mot ‘repeté’ montré ki bann parent bizin souvent ré-dire mem zaffaire kan zot enseigné. Enn jeune zenfant ressemblé enn ti plante ki bizin de l’eau regulierement. Pareil couma bann adulte rappel pli bien bann kitsoz important kan zot tann sa plusieurs fois, repetition aussi aide bann zenfant!

Pou bann parent kapav enseigne zot zenfant la verité, zot bizin passe le temps avek zot. Zordi, bann parent bien occupé, alors sa kapav bien difisil pou zot faire sa. Mais, l’apotre Paul ti encourage nou pou “ré-acheté le temps ki bizin” pou bann activité spirituel. (Éph. 5:15, 16) Couma bann parent kapav faire sa? Enn ancien ek so madame, enn pionnier permanent ki bien occupé, ti bizin trouve enn l’equilibre entre zot diferan responsabilité: enseigne zot zenfant, occupe zot responsabilité theocratik, ek zot travail profane. Couma zot ti pou trouve le temps pou enseigne zot tifi? Papa-la dire: “Toulé-gramatin avant mo al travail, mo madame ek moi nou lire Mo Livre Zistoire La Bible ou-soit brochure Anou Examine La Bible Toulé-Jour, avek li. A soir avant li al dormi, nou faire enn maniere faire enn lecture avek li, ek kan nou al preché, nou amenn li avek nou. Nou pa envie rate okenn l’occasion pou enseigne li pendant sa bann premier l’année dan so lavi-la.”

Nou envie ki nou bann zenfant grandi pou vinn bann adulte responsable. Mais, raison principal kifer nou enseigne zot, c’est pou ki zot content Bondié avek tou zot leker.​—Marc 12:28-30.

Psaume 127:4 dire: “Couma bann fleche dan la main enn zom fort, coumsa-mem bann garson ki’nn gagné dan la jeunesse, été.” La Bible compare bann zenfant ar bann fleche ki bann parent bizin bien konn vise dan enn l’objectif. Enn dimoune ki’nn fini tire enn coute fleche, pa kapav faire so fleche retourne en arriere. Bann parent ena “bann fleche”​—zot zenfant​—zis pou enn ti moment avant zot vinn bann adulte. Zot bizin servi sa le temps-la pou grave bann principe Biblik dan l’esprit ek dan leker zot zenfant.

Concernant so bann zenfant spirituel, l’apotre Jean ti ecrire: “Pena nanyé ki faire moi ena plis reconnaissance, ki kan mo tann dire ki mo bann zenfant pé contigne marche dan la verité.” (3 Jean 4) Bann parent Chretien aussi bien content kan zot trouve zot zenfant “pé contigne marche dan la verité.”