Fodé Jamais Nou “en Colere Kont Jéhovah”

1, 2. Kifer fodé pa nou blame Jéhovah pou bann probleme ki ena lor later? Expliké.

SUPPOSÉ ki ou marié pendant plusieurs l’année avek enn madame ki bien gentil ek ou bien heureux. Enn jour kan ou rente lakaz, ou trouve tou inn devire en bas la-haut. Bann meuble inn cassé, bann vaisselle inn crasé, ou karpet inn tellement dechiré ki pa pou kapav ré-servi li. Coumadir enn cyclone inn passe dan ou lakaz. Eski desuite ou pou dire: “Kifer mo madame inn faire sa?” Ou-soit ou pou demann-ou-mem: “Kisannla inn faire sa?” Surement c’est sa deuxieme question-la ki pou vinn dan ou l’esprit. Kifer? Parski ou koné ki ou madame ki ou bien content, jamais pa pou faire enn kitsoz coumsa.

² Zordi, partout lor later ena pollution, violence, ek l’immoralité. Mais couma nou’nn aprann dan la Bible, Jéhovah pa responsable tou sa bann probleme-la. Li ti crée nou planete pou vinn enn joli paradis. (Gen. 2:8, 15) Jéhovah, li enn Bondié ki ena lamour. (1 Jean 4:8) Nou letid la Bible inn aide nou pou koné kisannla ki vrai-mem responsable sa quantité probleme ki ena dan le monde-la. C’est Satan le Diable, “chef le monde.”​—Jean 14:30; 2 Cor. 4:4.

 3. Couma nou kapav ena enn mauvais fason pensée lor nou bann probleme?

³ Selman, nou pa kapav rann Satan responsable tou nou bann malheur. Kifer? Parski parfois, si nou gagne certain probleme, c’est a cause nou prop erreur. (Lire Deutéronome 32:4-6.) Pourtant, mem si nou reconette sa, a cause nou l’imperfection, nou kapav commence ena enn mauvais fason pensée ki kapav dangereux. (Prov. 14:12) Dan ki fason? Au lieu ki nou blame-nou-mem ou-soit blame Satan pou enn probleme, kitfois nou commence blame Jéhovah. Kitfois-mem nou “en colere kont Jéhovah Li-mem.”​—Prov. 19:3.

4, 5. Couma enn Chretien kapav arrivé “en colere kont Jéhovah”?

⁴ Eski vrai-mem sa kapav arrivé ki nou “en colere kont Jéhovah”? Si sa arrivé, sa pa pou servi nanyé. (Is. 41:11) Enn poete ti dire: “To lé-bras trop courte pou faire la boxe ar Bondié.” Kitfois jamais nou pou dire ki nou en colere kont Jéhovah. Mais Proverbes 19:3 dire: “Kan enn dimoune agir dan enn fason bete, c’est sa-mem ki faire li prend enn mauvais chemin, ek lerla so leker en colere kont Jéhovah Li-mem.” Oui, li kapav arrivé ki enn dimoune en colere kont Bondié dan so leker. Li possible ki li manifesté sa l’attitude-la dan enn fason sournois. Coumadir li garde rancune kont Jéhovah. Lerla, kitfois sa dimoune-la quitte congregation ou-soit li ralenti dan so service pou Jéhovah.

⁵ Ki kapav faire nou “en colere kont Jéhovah”? Couma nou kapav evité tombe dan sa piege-la? Li bien important pou konn reponse sa bann question-la. Kifer? Parski sa concerne nou bann relation avek Jéhovah.

6, 7. Kifer bann Israélite dan lepok Moïse ti commence plaigné kont Jéhovah?

⁶ Ki kapav faire enn serviteur fidele commence faire bann reproche Jéhovah dan so leker? Anou examine cinq kitsoz ek aussi bann l’exemple Biblik ki montré couma certain dan le passé finn tombe dan sa piege-la.​—1 Cor. 10:11, 12.

⁷ Bann parole negatif ki lezot dire kapav influence nou. (Lire Deutéronome 1:26-28.) Bann Israélite ti esclave en Égypte. Jéhovah ti delivré zot ek ti envoye dix plaie lor sa pays-la ek apré, Li ti detruire Pharaon ek so l’armée dan Lamer Rouge. (Ex. 12:29-32, 51; 14:29-31; Ps. 136:15) Peuple Bondié ti pré pou rente dan Later Promise. Pourtant, dan sa moment important-la, bann Israélite ti commence plaigné kont Jéhovah. Ki ti faire zot mank la foi coumsa? Zot ti decouragé parski zot ti tann certain espion faire enn rapport negatif lor Later Promise. (Nomb. 14:1-4) Ki ti arrivé a cause sa? Bondié pa ti laisse enn generation entier rente dan “sa bon pays-la.” (Deut. 1:34, 35) Eski nou aussi parfois nou laisse bann parole negatif ki lezot dire affaibli nou la foi ek faire nou plaigné concernant fason ki Jéhovah agir avek nou?

 8. Dan lepok Isaïe, ki ti pousse nation Juda pou commence blame Jéhovah pou zot probleme?

⁸ Bann malheur ek bann difficulté kapav decourage nou. (Lire Isaïe 8:21, 22.) Dan lepok Isaïe, nation Juda ti dan enn situation bien difisil. Zot bann lennmi ti entoure zot. Beaucoup dimoune ti faim parski pa ti ena mangé. Mais ti ena enn probleme pli grave, ti ena enn famine lor plan spirituel. (Amos 8:11) Selman, au lieu ki zot ti rod l’aide Jéhovah pou faire face ar sa bann l’epreuve-la, zot ti commence “donne malediction” zot le roi ek zot Bondié. Oui, zot ti blame Jéhovah pou zot bann probleme. Si nou decouragé a cause enn malheur ou-soit bann probleme personnel, eski nou aussi nou dire dan nou leker: ‘Kot Jéhovah été kan mo bizin Li?’

 9. Kifer bann Israélite dan lepok Ézékiel ti ena enn mauvais l’attitude lor fason agir Jéhovah?

⁹ Nou pa konn tou bann detail. Bann Israélite dan lepok Ézékiel pa ti konn tou bann detail lor chaque situation, alors zot ti pensé ki fason agir Jéhovah ‘pa ti bien reglé.’ (Ézék. 18:29) Coumadir zot ti pensé ki zot ti ena droit juge Bondié, ek ki zot bann principe concernant la justice ti pli bon ki pou Jéhovah. Zot ti juge Li alors ki zot ti ena enn connaissance limité lor bann l’evenement ki ti pé passé. Si parfois nou pa comprend bien enn recit Biblik ou-soit fason ki certain l’evenement arrivé dan nou lavi, eski nou pensé dan nou leker ki fason agir Jéhovah li injuste, ki li “pa bien reglé”?​—Job 35:2.

10. Couma li kapav arrivé ki enn kikenn suive mauvais l’exemple Adam?

¹⁰ Nou jette responsabilité nou prop faute ek erreur lor lezot. Dan commencement l’histoire l’humanité, Adam ti blame Bondié pou so prop peché. (Gen. 3:12) Mem si Adam ti bien koné ki li ti’nn desobeir la loi Bondié ek ki consequence li ti pou gagné, li ti blame Jéhovah. Coumadir li ti pé dire ki Jéhovah ti’nn donne li enn mauvais madame. Depuis sa lepok-la, lezot dimoune inn suive l’exemple Adam, zot blame Bondié pou bann erreur ki zot faire. Li bon nou demann-nou-mem: ‘Eski mo tellement deçu ek en colere a cause bann erreur ki mo finn faire ki mo commence pensé ki bann principe Jéhovah trop severe?’

11. Ki leson nou kapav aprann ar l’exemple Yona?

¹¹ Nou commence pense zis nou-mem. Prophete Yona ti en colere kan Jéhovah ti manifesté so misericorde envers bann Ninivite. (Yona 4:1-3) Kifer? Kitfois li ti peur pangar bannla pensé ki li enn fausse prophete parski so declaration concernant destruction zot lavil pa ti realisé. Yona ti tellement tracassé pou so reputation ki li pa ti ena compassion pou bann Ninivite ki ti repenti. Eski li kapav arrivé ki nou tellement pense zis nou-mem ki nou “en colere kont Jéhovah” parski Li pa pé faire lafin vinn vite? Par exemple, kitfois nou finn preché pendant plusieurs l’année ki jour Jéhovah bien pré. Mais kan lezot critik nou parski sa jour-la pankor arrivé, eski nou commence perdi patience avek Jéhovah?​—2 Pierre 3:3, 4, 9.

12, 13. Si dan nou leker nou commence pa d’accord avek seki Jéhovah faire ou-soit permette, ki nou bizin faire?

¹² Ki nou kapav faire si nou pa d’accord avek seki Jéhovah faire ou-soit permette? Nou bizin rappel ki li pa sage pou pense coumsa. Proverbes 19:3 rappel nou ki a cause nou prop l’ignorance, kitfois nou blame Jéhovah pou bann probleme kot nou-mem ki en tort. Alors, anou examine cinq kitsoz ki pou aide nou pou ki jamais nou pa laisse nou bann probleme faire nou en colere kont Jéhovah.

¹³ Pa neglige ou bann relation avek Jéhovah. Si nou ena bann bon relation avek Jéhovah, nou pa pou en colere kont Li. (Lire Proverbes 3:5, 6.) Nou bizin ena confiance en Jéhovah. Fodé pa aussi ki nou pensé ki nou konn plis ki Jéhovah, ou-soit nou pense zis nou-mem. (Prov. 3:7; Eccl. 7:16) Lerla, nou pa pou ena tendance pou blame Jéhovah kan bann mauvais kitsoz arrivé.

14, 15. Ki pou aide nou pou pa laisse bann parole negatif ki lezot dire influence nou?

¹⁴ Pa laisse bann parole negatif influence ou. Bann Israélite dan lepok Moïse ti ena tou bann raison pou croire ki Jéhovah kapav faire zot rente dan Later Promise. (Ps. 78:43-53) Mais dix espion ki pa ti fidele envers Jéhovah ti faire enn rapport negatif lor Later Promise. Kan bann Israélite ti tann sa, zot pa ti “rappel seki . . . la main [Jéhovah] ti faire.” (Ps. 78:42) Si nou medite lor tou bann kitsoz ki Jéhovah inn faire pou nou, sa pou fortifié nou bann relation avek Li. Lerla, nou pa pou laisse bann parole negatif ki lezot dire eloigne nou ar Jéhovah.​—Ps. 77:11, 12.

¹⁵ Ki pou arrivé si nou ena enn l’attitude negatif envers nou bann frere? Dan sa cas-la, sa kapav affecté nou bann relation avek Jéhovah. (1 Jean 4:20) Kan bann Israélite ti mette en doute position ki Aaron ti ena en tant ki grand pretre, Jéhovah ti consideré ki en realité, c’est kont Li-mem ki zot ti pé plaigné. (Nomb. 17:10) Dan mem fason, si nou commence plaigné ek critik bann ki Jéhovah servi pou dirige so l’organisation lor later, en realité, nou pé plaigne kont Jéhovah.​—Héb. 13:7, 17.

16, 17. Ki nou bizin rappel kan nou pé gagne probleme?

¹⁶ Rappel ki Jéhovah pa responsable nou bann probleme. Mem si bann Israélite dan lepok Isaïe ti’nn detourne-zot ar Jéhovah, Li ti toujours envie aide zot. (Is. 1:16-19) N’importe ki probleme nou gagné, sa kapav encourage nou pou koné ki Jéhovah interessé avek nou ek envie aide nou. (1 Pierre 5:7) En realité, Jéhovah promette pou donne nou la force necessaire pou reste fidele envers Li.​—1 Cor. 10:13.

¹⁷ Si nou pé souffert a cause enn certain l’injustice​—pareil couma Job​—nou bizin rappel ki Jéhovah pa responsable. Jéhovah ena la haine pou l’injustice; Li content la justice. (Ps. 33:5) Anou ressemblé Élihou, camarade Job, ki ti dire: “Jamais vrai Bondié pou faire le mal, ek jamais Tout-Puissant pou agir dan enn fason injuste!” (Job 34:10) Jamais Jéhovah pa faire nou gagne probleme, au contraire, Li donne nou “tou joli don ek tou cadeau parfait.”​—Jacq. 1:13, 17.

18, 19. Kifer fodé jamais nou ena bann doute lor fason agir Jéhovah? Donne enn l’exemple.

¹⁸ Fodé jamais nou ena bann doute lor Jéhovah. Bondié Li parfait, ek so bann pensée pli haute ki nou bann pensée. (Is. 55:8, 9) Alors, l’humilité ek modestie bizin aide nou pou reconette ki nou ena enn connaissance limité. (Rom. 9:20) Bien souvent, nou pa konn tou bann detail lor enn situation. Pena doute ki ou finn trouvé ki sa proverbe-la vrai: “Premier dimoune ki presente so cas parette juste, ziska ki enn lot dimoune vini ek questionne li.”​—Prov. 18:17, New International Version.

¹⁹ Si nou ena enn camarade ki nou faire confiance ek ki’nn faire enn kitsoz ki nou pa comprend ou-soit ki nou pensé pa normal, eski desuite nou pou accuse li ki li’nn faire enn mauvais kitsoz? Non, au contraire, nou pou conscient ki nou pa konn tou bann detail. Nou pa pou doute so mobile surtout si nou konn sa dimoune-la depuis longtemps. Si nou agir avek amour envers nou bann camarade ki imparfait, eski ou pa pensé ki nou bizin pli disposé pou faire confiance nou Papa ki dan le ciel? Eski so fason agir ek so bann pensée pa beaucoup pli haute ki pou nou?

20, 21. Kifer li important ki nou rappel veritable responsable nou bann probleme?

²⁰ Rappel veritable responsable nou bann probleme. Kifer? Nou bizin reconette ki parfois nou-mem ki responsable si nou gagne certain probleme. (Gal. 6:7) Pa essaye blame Jéhovah pou nou bann probleme. Kifer li pa bon ki nou faire sa? Anou prend enn l’exemple: Kitfois enn l’auto kapav roule bien vite. Maziné ki enn chauffeur roule trop vite ek depasse limite vitesse kan li faire enn contour dangereux ek li faire enn accident. Eski c’est fabricant sa l’auto-la ki pou responsable? Non! Li pareil aussi pou Jéhovah, Li finn crée nou avek liberté pou choisir. Mais, Li finn aussi donne nou bann instruction pou nou kapav prend bann bon decision. Alors, kifer eski nou bizin blame nou Createur pou nou prop erreur?

²¹ Bien sur, tou nou bann probleme pa arrivé a cause nou bann erreur personnel ek nou bann mauvais action. Nou gagne certain probleme a cause “bann situation ki [nou] pa attann.” (Eccl. 9:11) Finalement, fodé jamais nou blié ki c’est Satan le Diable ki principal responsable bann probleme ki ena lor later. (1 Jean 5:19; Rév. 12:9) C’est li ki nou lennmi, pa Jéhovah!​—1 Pierre 5:8.

22, 23. Ki nou bizin rappel si nou decouragé a cause nou bann probleme?

²² Kan ou pé passe par bann l’epreuve ek bann difficulté, rappel l’exemple Josué ek Caleb. Sa deux zom fidele-la ti faire enn bon rapport lor Later Promise, zot pa ti ressemblé sa dix lezot espion-la. (Nomb. 14:6-9) Zot ti ena la foi en Jéhovah. Mais kan-mem, zot ti bizin tourne en rond dan desert pendant 40 an ensam avek lezot Israélite. Eski Josué ek Caleb ti plaigné ou-soit ti vinn amer, ek pensé ki sa ti injuste? Non. Zot ti ena confiance en Jéhovah. Eski Jéhovah ti beni zot? Oui! Alors ki preské tou sa generation-la ti mor dan desert, sa deux zom-la finalement ti reussi rente dan Later Promise. (Nomb. 14:30) Li pareil aussi pou nou, Jéhovah pou beni nou si nou pa ‘fatigué’ pou faire so volonté.​—Gal. 6:9; Héb. 6:10.

²³ Ki ou pou faire si ou decouragé a cause ou bann probleme, a cause l’imperfection lezot, ou-soit a cause ou prop l’imperfection? Reflechi lor bann qualité extraordinaire ki Jéhovah ena. Mazinn l’esperance ki Jéhovah inn donne ou. Demann-ou-mem: ‘Kot mo ti pou été sans Jéhovah?’ Reste toujours proche avek Li, ek jamais pa en colere kont Jéhovah dan ou leker!