Contigne reste couma “bann habitant temporaire”

1, 2. Lor kisannla Pierre ti pé kozé kan li ti servi l’expression “bann ki Bondié inn choisir,” ek kifer li ti appel zot “bann habitant temporaire”?

APEPRÉ 30 an apré ki Jésus ti’nn monte dan le ciel, l’apotre Pierre ti ecrire enn lettre pou “bann habitant temporaire ki reste inpé partout dan Pont, Galatie, Cappadoce, l’Asie ek Bithynie, bann ki Bondié inn choisir.” (1 Pierre 1:1) Li clair ki par l’expression “bann ki Bondié inn choisir,” Pierre ti pé faire reference ar bann ki, pareil couma li, ti’nn oint ar l’esprit saint ek ti’nn gagne “enn nouveau naissance pou enn l’esperance vivant” pou regne avek Christ dan le ciel. (Lire 1 Pierre 1:3, 4.) Mais kifer apré, li ti appel sa bann chretien oint-la “bann etranger ek bann habitant temporaire”? (1 Pierre 2:11) Kifer sa bizin interesse-nou, alors ki zis 1 lor 650 Témoins de Jéhovah ki actif dan le monde entier, dire ki zot oint ar l’esprit saint?

² Li ti approprié pou applik l’expression “habitant temporaire” ar bann chretien oint, dan premier siecle. Zot pa ti bann habitant permanent lor la terre, pareil couma le reste bann chretien oint ki encore vivant lor la terre zordi. L’apotre Paul, ki ti enn membre “ti troupeau,” ti expliké: “Mais nou, place kot nou ena droit pou resté, li trouve dan le ciel, enn place kot nou pé attann aussi avek impatience enn sauveur, Seigneur Jésus Christ.” (Luc 12:32; Phil. 3:20) Sa vedir, kan bann chretien oint mort, zot quitte la terre pou enn kitsoz ki beaucoup pli bon, la vie immortel dan le ciel. (Lire Philippiens 1:21-23.) Alors, kapav vrai-mem appel zot “bann habitant temporaire” lor sa la terre ki controlé par Satan-la.

 3. Ki question nou bizin posé lor bann “lezot brebis”?

³ Mais ki nou kapav dire lor bann “lezot brebis”? (Jean 10:16) Eski la Bible pa enseigné ki zot ena l’esperance pou vinn bann habitant permanent lor la terre? Oui, c’est la kot zot pou vive pou touletan! Mais, dan enn certain sens, zot aussi zot bann habitant temporaire. Dan ki sens?

 4. Ki bann dirigeant humain pa kapav empeché?

⁴ Tant ki Jéhovah permette ki mauvais systeme Satan existé, tou dimoune, mem bann chretien, pou contigne souffert parski Satan inn rebellé kont Jéhovah. Nou lire dan Romains 8:22: “Nou koné ki ziska zordi creation entier pé contigne plaigné ensam ek souffert ensam.” Okenn dirigeant humain, ni scientifik, ni organisation humanitaire, mem si zot sincere, pa kapav empeche sa situation-la.

 5. Depuis 1914, ki plusieurs million dimoune inn decidé pou faire, ek kifer?

⁵ Depuis 1914, plusieurs million dimoune inn choisir par zot-mem pou vinn bann sujet Jésus Christ, le Roi ki Bondié inn etabli. Zot pena okenn desir pou forme partie dan le monde Satan ek zot refuse pou soutenir so le monde. Au contraire, zot servi zot la vie ek zot bann kitsoz materiel pou soutenir Royaume Bondié.​—Rom. 14:7, 8.

 6. Dan ki fason bann Témoins de Jéhovah zot couma bann etranger?

⁶ Oui, bann Témoins de Jéhovah ki reste dan plus ki 200 pays, obeir la loi zot pays. Mais, n’importe ki coté zot resté, zot couma bann etranger. Zot pa prend part dan okenn probleme politik ek social ki ena dan zot pays. Mem asterla, zot considere-zot couma bann citoyen le monde nouveau ki Bondié inn promette. Zot content ki reste enn tigit le temps pou zot vive couma bann habitant temporaire dan sa le monde imparfait-la.

 7. Couma bann serviteur Bondié pou vinn bann habitant permanent, ek kot sa?

⁷ Dan enn tigit le temps, Christ pou servi so l’autorité pou detruire mauvais le monde Satan. Grace a so gouvernement parfait, Christ pou tire peché ek souffrance lor la terre. Li pou tire tou bann ki rebellé kont souveraineté Jéhovah​—ki li visible ou-soit invisible. Bann serviteur ki fidele ar Bondié pou kapav vinn bann habitant permanent dan Paradis lor la terre. (Lire Révélation 21:1-5.) Sa vedir ki dan enn fason complet, la creation “pou nepli esclave ar seki pé detruire li ek li pou gagne liberté extraordinaire bann zenfant Bondié.”​—Rom. 8:21.

8, 9. Expliké ki Pierre ti pé rod dire par “contigne rejette bann desir la chair.”

⁸ Pierre expliké ki qualité conduite bann chretien bizin ena. Li dire: “Mo bann frere ki mo bien content, mo suppliye zot couma bann etranger ek bann habitant temporaire pou contigne rejette bann desir la chair, sa bann desir-la-mem ki pé laguerre kont nou nâme.” (1 Pierre 2:11) C’est bann chretien oint ki ti gagne sa conseil-la, mais sa applik aussi ar bann membre lezot brebis.

⁹ Li pa necessairement mauvais ki nou satisfaire certain desir ki en accord avek bann principe ki nou Createur inn etabli. En realité, zot faire nou la vie pli agreable. Par exemple, li normal ki nou profite enn bon repas ek enn bon la boisson, ki nou participe dan bann activité ki faire nou di-bien, ek profite enn bon compagnie. Li normal ek li pa mauvais pou trouve plaisir dan bann relation sexuel avek nou conjoint. (1 Cor. 7:3-5) Mais “bann desir la chair” ki Pierre ti pé mentionné, c’est bann desir ki “pé laguerre kont nou nâme.” Certain traduction la Bible, couma par exemple Parole de Vie, faire nou bien comprend l’expression “bann desir la chair” kan li mette “bann mauvais desir.” Jéhovah finn faire nou koné couma nou bizin vive ek satisfaire nou bann desir. Alors, li bien clair ki fodé pa nou laisse okenn desir ki pa en accord avek bann principe Jéhovah gate nou relation avek Li. Sinon, nou pou mette en danger nou l’esperance pou gagne la vie eternel.

10. Ki certain methode Satan servi pou faire bann chretien forme partie dan so le monde?

¹⁰ L’objectif Satan c’est pou faire bann vrai chretien diminué zot determination pou considere zot-mem couma “bann habitant temporaire” dan sa systeme-la. Nou bizin rann-nou compte ki parmi bann piege ki Satan servi pou attire nou, ena materialisme, l’immoralité, desir pou gagne enn grand position, pou vinn touletan premier, ek nationalisme. Kan nou bien decidé pou rejette sa bann mauvais desir la chair-la, nou montré ki nou pa envie forme partie dan mauvais le monde Satan. Nou montré ki nou pé vive dan sa le monde-la zis couma bann habitant temporaire. Seki nou vrai-mem envie, c’est vinn bann habitant permanent dan le monde nouveau ki Bondié pou etabli, kot pou ena la justice. Ek nou faire tou seki nou kapav pou realise sa l’objectif-la.

11, 12. Couma parfois bann dimoune considere bann etranger, ek ki kapav dire lor bann Témoins de Jéhovah?

¹¹ Pierre contigne expliké seki Bondié attann ar bann chretien en tant ki “bann habitant temporaire.” Li dire dan verset 12: “Garde enn bon conduite parmi tou dimoune, pou ki, kan bannla koz kont zot ek dire ki zot bann mauvais dimoune, sa bann dimoune-la kapav, a cause zot bann bon action ki zot inn trouvé avek zot prop lizié, donne Bondié la gloire jour ki Li pou faire so inspection.” Parfois, bann dimoune critik bann etranger, ki bann habitant temporaire dan zot pays. Kifer? Parski sa bann etranger-la pa pareil couma lezot dimoune dan l’endroit, kitfois-mem certain considere zot couma bann mauvais dimoune. Li possible ki zot fason kozé, zot bann action, zot l’habillement, ek mem parfois zot l’apparence different. Mais kan zot faire bann bon action, setadir, kan zot ena enn bon conduite, sa faire lezot realisé ki zot pa bann mauvais dimoune couma certain dire.

¹² Bann vrai chretien aussi pareil, zot different ar zot bann voisin dan certain domaine, couma par exemple, dan zot conversation ou-soit dan bann divertissement ki zot choisir. Souvent, fason ki zot habillé ek coiffé faire zot parette different ar la plupart dimoune dan l’endroit. Parfois sa finn pousse certain dimoune ki mal renseigné lor zot, pou considere zot couma bann mauvais dimoune. Selman, ena lezot ki koz en bien lor bann Témoins de Jéhovah a cause zot bon conduite.

13, 14. Couma la sagesse “montré ki li juste par so bann action”? Donne bann l’exemple.

¹³ Oui, par nou bon conduite, nou kapav montré ki bann critik ki dimoune faire kont nou, zot fausse. Mem kont Jésus, bann dimoune ti faire bann fausse accusation, alors ki li ti sel zom ki ti obeir Bondié dan enn fason parfait. Certain ti dire ki li ti “enn zom vorace ek ki content boire di-vin, enn camarade ar bann ki ramasse taxe ek ar bann dimoune ki faire peché.” Mais en realité, so bon conduite ti montré ki li pa ti sa qualité dimoune-la. Jésus ti dire: “La sagesse montré ki li juste par so bann action.” (Mat. 11:19) Zordi aussi, li pareil. Par exemple, pou certain dimoune ki reste pré ar Béthel Selters, en Allemagne, fason vive bann Béthélite parette bizarre. Mais le maire sa l’endroit-la ti prend part bann Béthélite ek ti dire: “Bann Témoins ki servi la-bas ena zot prop fason vive, mais sa pa derange ditou la vie bann lezot dimoune dan l’endroit.”

¹⁴ Nou ena enn lot l’exemple dan Moscou, en Russie kot certain ti accuse bann Témoins de Jéhovah. Zot ti dire ki bann Témoin casse bann famille, encourage bann dimoune pou suicide-zot ek refuse bann traitement medical. Apré, en juin 2010, la Cour européenne des droits de l’homme dan Strasbourg, en France, ti juge sa cas-la ek ti trouvé ki la ville Moscou ti ena tort pou mele-li dan l’adoration bann Témoins de Jéhovah la-bas ek ki zot pa ti gagne droit empeche bann Témoins organise zot bann reunion. La Cour européenne des droits de l’homme ti dire ki bann la cour dan Russie pa ti donne bann preuve ki bann Témoins de Jéhovah ti coupable pou sa bann mauvais kitsoz-la. Ek li ti dire ki sa bann la cour-la ti applik bann la loi severe ki ena dan Moscou dan enn fason injuste envers bann Témoins de Jéhovah.

15. Ki principe la Bible bann vrai chretien dan le monde entier suive?

¹⁵ Bann Témoins de Jéhovah dan Moscou ek partout lor la terre obeir enn lot principe ki Pierre ti mentionné pou bann chretien. Li ti ecrire: “A cause nou Seigneur, soumette-zot ar tou dimoune, soit ar enn le roi parski li pli grand, soit ar bann gouverneur.” (1 Pierre 2:13, 14) Bann vrai chretien pa forme partie dan sa le monde mauvais-la. Mais pareil couma Paul ti dire, zot soumette-zot volontairement ar bann gouvernement ki “occupe sakenn so position dan place kot Bondié finn mette li.”​—Lire Romains 13:1, 5-7.

16, 17. (a) Ki montré ki nou pa kont bann gouvernement? (b) Ki certain chef politik finn reconette?

¹⁶ Kan bann Témoins de Jéhovah comporte-zot couma “bann habitant temporaire” dan sa systeme-la, zot pa faire sa pou oppose-zot ar gouvernement ou-soit pou critik lezot dimoune. Zot pa critik aussi bann dimoune ki ena zot prop l’idée dan domaine politik ou-soit social. Bann Témoins de Jéhovah pa mele-zot dan politik pareil couma certain groupe religieux faire. Jamais zot pa essaye faire bann chef politik change fason ki zot gouverné. Jamais bann Témoins de Jéhovah pou rebelle kont bann gouvernement ou-soit pou pousse bann dimoune pou faire sa!

¹⁷ Bann chretien obeir bann dirigeant politik en accord avek conseil ki Pierre ti donné pou “honore le roi.” Dan sa fason-la, zot respecté ek zot donne l’honneur sa bann dirigeant-la pou position ki zot ena. (1 Pierre 2:17) Parfois, bann dirigeant politik finn reconette ki pena okenn raison pou considere bann Témoins de Jéhovah couma bann dimoune dangereux. Par exemple, Steffen Reiche, enn politicien allemand, ki ti enn ministre dan l’etat Brandebourg ek ki plitar ti vinn enn membre dan Parlement allemand, ti dire: “Conduite bann Témoins de Jéhovah dan bann camp ek dan bann prison, ti montré ki zot ti ena bann grand qualité, ki zordi, pareil couma dan le passé, bien important pou ki enn l’etat democratik contigne existé; par exemple, zot ti tini ferme devant bann SS [bann soldat Hitler] ek zot ti ena compassion pou bann lezot prisonnier. Zordi, sa bann qualité-la zot bien important pou chaque citoyen nou pays, parski pli allé bann dimoune pé vinn violent envers bann etranger, ek aussi envers bann dimoune ki ena bann l’opinion politik ek bann croyance different.”

18. (a) Kifer li normal ki nou content tou nou bann frere? (b) Ki certain dimoune ki pa Témoin finn remarké?

¹⁸ L’apotre Pierre ti ecrire: “Content toute la famille nou bann frere, ena la crainte pou Bondié.” (1 Pierre 2:17) Bann Témoins de Jéhovah ena la crainte pou Bondié, zot faire tou pou faire Li plaisir, ek sa pousse zot encore plus pou faire so volonté. Zot bien content pou servi Jéhovah ensam avek enn grand famille mondial bann frere ek soeur ki ena mem desir. Alors, li normal pou zot pou “content toute la famille [zot] bann frere.” Zordi sa qualité l’amour-la bien rare dan sa le monde egoïste kot nou pé vive-la, alors bann dimoune ki pa Témoins bien etonné kan zot trouve sa. Par exemple, enn guide ki travail dan enn l’agence voyage américain, ti etonné kan li ti trouve l’affection ek l’attention ki bann Témoin ti montré envers bann delegué etranger ki ti vinn l’assemblée international en 2009, en Allemagne. Li ti dire ki tou sa l’année ki li travail couma guide-la, jamais li finn trouve enn kitsoz coumsa. Plitar, enn Témoin ti dire lor sa guide-la: “Tou seki li ti pé dire lor nou, li ti dire sa lor enn ton ki montré ki li ti bien etonné ek avek enn grand l’enthousiasme.” Eski ou finn deja tann bann dimoune dire mem zaffaire kan zot finn observe bann Témoins dan enn l’assemblée ki ou finn assisté?

19. Ki nou bizin bien decidé pou faire, ek pou ki raison?

¹⁹ Dan tou sa bann fason-la​—ek plus encore​—bann Témoins de Jéhovah finn montré vrai-mem ki zot “bann habitant temporaire” dan le monde Satan. Ek zot bien decidé pou reste coumsa. Zot ena enn l’esperance solide ek sur ki bientot zot pou vinn bann habitant permanent dan le monde nouveau kot pou ena la justice. Eski ou pa pé attann sa ou aussi?