La Fin du Monde Faire Peur, Attirant, ek Ennuyant

Ki ou sentiment concernant 21 Décembre 2012, enn date ki trouve lor calendrier Maya? Beaucoup finn dire ki sa date-la ti pou ena bann changement dan le monde entier. Dapré seki ou ti pé attann, kitfois ou soulagé, deçu, ou-soit indifferent. Eski sa ti zis enn lot prediction ki’nn mal calculé lor la fin du monde?

Ki kapav dire lor “la fin du monde” ki decrire dan la Bible? (Matthieu 24:3, TOB) Certain peur ki la terre brulé net. Lezot excité pou koné ki pou arrivé kan la fin du monde pou vini. Beaucoup finn fatigué tendé ki la fin pré. Mais eski li possible ki sa bann reaction-la plus basé lor l’imagination bann dimoune ki lor bann fait?

Kitfois ou pou etonné pou aprann seki la Bible vrai-mem dire concernant la fin du monde. La Bible pa zis donne bann raison pou nou attann la fin avek impatience, mais li aussi reconette ki certain kapav fatigué attann parski zot ena sentiment ki la fin pé trop tardé pou vini. Nou invite ou pou guette bann reponse ki la Bible donné lor bann question ki nou habitué tendé lor la fin du monde.

REPONSE KI LA BIBLE DONNÉ: “[Bondié] finn pose la terre lor so bann base bien fixe; jamais, oui jamais li pa pou bougé.”​—PSAUME 104:5.

La terre pa pou detruire ni par difé ni par enn lot kitsoz. Au contraire, la Bible enseigné ki sa planete-la li lakaz bann dimoune pou touletan. Psaume 37:29 dire: “Bann dimoune juste pou possede la terre, ek zot pou reste lor la pou touletan.”​—Psaume 115:16; Isaïe 45:18.

Apré ki Bondié ti crée la terre, Li ti dire ki sa “ti bien bon,” ek Li encore pense pareil. (Genèse 1:31) Li pa’nn prevoir pou detruire li, au contraire Li promette ki Li pou “detruire bann ki pé detruire la terre” ek pou protege li kont bann degat ki pa kapav reparé.​—Révélation 11:18.

Mais kitfois, ou pé pense 2 Pierre 3:7. Sa verset-la dire: “Finn reserve le ciel ek la terre ki existé zordi, pou brulé par difé.” Eski sa pa montré ki la terre pou brulé net? Avredir, parfois la Bible servi bann terme “le ciel,” “la terre,” ek “difé” dan enn fason symbolik. Par exemple, kan Genèse 11:1 dire: “La terre entier ti koz enn sel langage,” ici “la terre” faire reference ar bann dimoune.

Kan nou guette contexte 2 Pierre 3:7 nou trouvé ki le ciel, la terre, ek difé ki mentionné zot symbolik. Verset 5 ek 6 koz lor Deluge ki ti ena dan lepok Noé. Le monde ki ti ena sa lepok-la ti detruire, pourtant nou planete pa’nn disparette. Au contraire, Deluge finn detruire “la terre,” setadir bann mauvais dimoune, ek “bann le ciel,” setadir bann ki ti pé dirige sa bann dimoune-la. (Genèse 6:11) Dan mem sens, 2 Pierre 3:7 predire ki bann mauvais dimoune ek zot systeme gouvernement ki rempli ar corruption pou detruire pou touletan, pareil couma detruire enn kitsoz ar difé.

REPONSE KI LA BIBLE DONNÉ: “Le monde pé al fini ek so desir aussi, mais celui ki faire volonté Bondié, pou reste pou toujours.”​—1 JEAN 2:17.

“Le monde” ki pou al fini, c’est pa la terre, mais tou bann dimoune ki pa vive en accord avek volonté Bondié. Pareil couma enn docteur pou tire enn tumeur pou sauve la vie so patient, Bondié pou “detruire” bann mauvais pou ki bann bon dimoune kapav vrai-mem profite la vie lor la terre. (Psaume 37:9) Dan sa sens-la, “la fin du monde” li enn bon zaffaire.

Nou trouve sa coté positif-la dan bann traduction la Bible ki finn traduire l’expression “la fin du monde” par “conclusion sa systeme-la,” ou-soit “la fin enn lepok.” (Matthieu 24:3; New International Version) Si bann dimoune ek la terre pou survive kan la fin pou vini, eski li pa logik pou pensé ki apré pou ena enn nouveau lepok ou-soit enn nouveau systeme? Reponse ki la Bible donné c’est oui, parski li koz lor “systeme ki pou vini.”​—Luc 18:30.

Jésus ti appel sa lepok ki pou ena dan l’avenir-la enn periode kot “tou kitsoz ré-vinn nouveau.” Dan sa moment-la, li pou retabli condition ki Bondié ti’nn prevoir dan commencement pou bann dimoune. (Matthieu 19:28, La Bible de Jérusalem) Lerla nou pou kapav profite

• La terre ki pou vinn enn paradis, kot pou ena securité ek prosperité pou tou dimoune.​—Isaïe 35:1; Mika 4:4.

• Enn travail ki pou ena sens ek ki pou faire nou gagne satisfaction.​—Isaïe 65:21-23.

• Enn la vie kot pa pou ena okenn maladie.​—Isaïe 33:24.

• Enn la vie kot bann dimoune pou ré-vinn jeune.​—Job 33:25.

• Resurrection bann mort.​—Jean 5:28, 29.

Si nou faire “volonté Bondié,” setadir faire seki Li demann nou, nou pena pou peur la fin du monde. Au contraire, nou kapav attann li avek impatience.

REPONSE KI LA BIBLE DONNÉ: “Kan zot trouve sa bann kitsoz-la arrivé, zot bizin koné ki royaume Bondié pé kosté.”​—LUC 21:31.

Dan so livre Bann Dernier Jour, Zot La Encore Enn Fois (en anglais), Professeur Richard Kyle ecrire ki “kan enn coute ena enn changement ek desordre dan la societé sa crée enn l’atmosphere ki amenn vers bann prediction lor la fin du monde.” Sa arrivé surtout kan sa changement-la ek sa desordre-la parette difficile pou expliké.

Mais, bann prophete dan la Bible ki ti koz lor la fin pa ti decide par zot-mem pou donne enn explication concernant kifer bann mauvais kitsoz ti pé arrivé dan zot lepok. Mais Bondié ti inspire zot pou decrire bann condition ki pou montré ki la fin du monde bien pré. Examine sa bann prophetie ki suive-la ek reflechi par ou-mem si zot pé realisé dan nou lepok.

• Bann la guerre, la famine, tremblement de terre, ek bann l’epidemie ki touye dimoune.​—Matthieu 24:7; Luc 21:11.

• Bann pratik kont la loi pé augmenté.​—Matthieu 24:12.

• Bann dimoune pé detruire la terre.​—Révélation 11:18.

• Bann dimoune content zot-mem, kass, ek bann plaisir mais pena l’amour pou Bondié.​—2 Timothée 3:2, 4.

• Bann famille cassé.​—2 Timothée 3:2, 3.

• En general, bann dimoune pa kass la tête ar bann preuve ki la fin pé vini.​—Matthieu 24:37-39.

• Pé preche la bonne nouvelle lor Royaume Bondié dan le monde entier.​—Matthieu 24:14.

Pareil couma Jésus ti dire, kan nou trouve “tou sa bann kitsoz-la” nou koné ki la fin du monde pré. (Matthieu 24:33) Pou bann Témoins de Jéhovah tou sa bann kitsoz-la c’est bann preuve ki la fin li pré, ek zot partage zot croyance avek lezot kan zot preche dan 236 pays.

REPONSE KI LA BIBLE DONNÉ: “Kan zot pou dire: ‘La paix ek securité!’ lerla, enn sel coup enn destruction pou vinn lor zot, sans ki zot attann, pareil couma bann douleur enn femme enceinte; ek dan okenn fason zot pa pou sapé.”​—1 THESSALONICIENS 5:3.

La Bible compare destruction le monde ar commencement bann douleur enn femme enceinte​—bann douleur ki enn mama gagné pa kapav evité ek zot vini enn coute coumsa. Kapav aussi compare lepok ki amenn vers la fin, ar enn grossesse. Enn madame enceinte pli allé senti ki li pré pou accouché. So docteur kapav dire apepré ki date tibaba-la pou né; pourtant, mem si arrivé zenfant-la pa né sa date-la, li sur ki so tibaba pré pou né. Li pareil aussi concernant seki nou attann lor la fin, mem si la fin pa vini kan nou pé pensé li pou vini, sa pa vedir ki nou pa pé vive dan “bann dernier jour.”​—2 Timothée 3:1.

Kitfois ou pé demann-ou: ‘Si signe ki montré ki nou pré ar la fin bien clair, kifer beaucoup dimoune pa reussi reconette sa?’ La Bible dire ki kan la fin pou pré, beaucoup pa pou prend compte sa bann preuve-la. Au lieu ki zot reconette bann grand changement ki ena pendant bann dernier jour, zot pou bouffonne bann ki croire ladan ek pou dire: “Depuis la mort nou bann ancetre, tou kitsoz pé contigné pareil couma zot ti été depuis commencement la creation.” (2 Pierre 3:3, 4) Sa vedir, ki signe bann dernier jour li clair, mais beaucoup pou ignore li.​—Matthieu 24:38, 39.

Sa lartik-la inn examine zis deux-trois preuve Biblik ki la fin pré.a Eski ou ti pou envie konn plus? Si oui, kifer ou pa contacté bann Témoins de Jéhovah pou gagne enn l’etude la Bible gratis? Ou kapav etudié kot ou, dan place kot ou envie, ou-soit mem par telephone. Tou seki sa pou coute ou c’est zis ou le temps, ek bann bienfait ki ou pou gagné pena prix.