Eski U Montre ki U Pe “Kontiyn Atann”?

“Ki kalite dimunn zot bizin ete par bann aksyon ki montre zot kondwit sin ek zot latasman avek Bondye; kontiyn atann ek gard tuzur dan zot lespri prezans zur Zeova!”—2 PYER 3:11, 12.

1, 2. Ki legzanp nu kapav servi pu montre ki nu pe “kontiyn atann” zur Zeova?

MAZINN enn fami ki pe atann bann invite pu dine. Ler ki finn fixe pu bannla vini, pe koste vit-vit. Madam la byin okipe pu terminn bann dernye preparasyon so repa. So mari ek so bann zanfan pe ede pu fer sir ki tu kitsoz pre. Tu dimunn eksite. Wi, tut lafami pe atann avek inpasyans kan bann invite pu vini. Zot pe atann pu pran enn bon repa ek pu pas bann bon moman avek zot bann invite.

² Antan ki Kretyin, nu pe atann enn kitsoz ki pli inportan ankor. Ki nu pe atann? Nu tu nu pe atann “zur Zeova”! Ziska ki sa zur la vini, nu bizin ena mem latitid ki profet Mika, ki ti dir: “Se Zeova ki mo pu kontiyne veye. Mo pu kontiyn atann Bondye ki pu sov mwa.” (Mika 7:7) Eski sa bann parol la ule dir ki nu zis ena pu krwaz nu lebra ek atann sa zur la? Non. Ena buku travay pu fer!

 3. Dapre 2 Pyer 3:11, 12, ki latitid bann Kretyin bizin ena?

³ Lapot Pyer ed nu pu ena latitid ki bizin pandan ki nu pe atann. Li dir: “Ki kalite dimunn zot bizin ete par bann aksyon ki montre zot kondwit sin ek zot latasman avek Bondye; kontiyn atann ek gard tuzur dan zot lespri prezans zur Zeova!” (2 Pyer 3:11, 12) Sa bann parol Pyer la kapav sonn kumadir enn kestyon. Me, se pa enn kestyon! Dan so de let ki li ti ekrir par linspirasyon Bondye, Pyer ti dekrir ki kalite dimunn bann Kretyin bizin ete. Li ti usi konsey zot pu kontiyn fer “bann aksyon ki montre zot kondwit sin ek zot latasman avek Bondye.” Mem si apepre 30 an ti’nn pase depi ki Zezi Kris ti’nn donn siyn lor “lafin sa lemond la,” bann Kretyin ti bizin tuzur kontiyn res lor zot gard. (Matye 24:3) Zot ti bizin “kontiyn atann ek gard tuzur dan zot lespri” prezans zur Zeova.

 4. Ki vedir ‘gard tuzur dan lespri prezans zur Zeova’?

⁴ Mo Grek ki’nn tradir isi par “gard tuzur dan zot lespri” vedir literalman “akselere.” Byinsir, anverite nu pa kapav ‘akseler’ zur Zeova. Detutfason, nu pa “konn ni zur, ni ler” kan Zezi Kris pu vini pu ziz bann lennmi so Papa. (Matye 24:36; 25:13) Enn liv referans explike ki rasinn sa lexpresyon “akselere” la, vedir “degaze.” Donk, dapre sa liv la, “sa inplik ‘azir avek zel, res byin okipe, ek preokipe par enn kitsoz.’ ” Donk, Pyer ti pe ankuraz bann krwayan pu “ena enn gran dezir” pu truv zur Zeova. Zot ti pu kapav fer sa, si zot ti gard sa zur la tuletan dan zot lespri. (2 Pyer 3:12, not) Pwiski nu kone ki “gran zur Zeova ki fer per,” byin pre, nu bizin ena mem latitid nu’si.—Yoel 2:31.

Atann Avek “Bann Aksyon Ki Montre Zot Kondwit Sin”

 5. Kuma eski nu kapav montre ki nu “ena enn gran dezir” pu truv “zur Zeova”?

⁵ Pu montre ki nu “ena enn gran dezir” pu sirviv kan zur Zeova vini, nu pu fer “bann aksyon ki montre [nu] kondwit sin ek [nu] latasman avek Bondye.” Lexpresyon “bann aksyon ki montre [nu] kondwit sin,” kapav fer nu rapel konsey ki Pyer ti done, kan li ti dir: “Parey kuma bann zanfan obeisan, aret swiv bann dezir ki zot ti ena avan, kan zot ti dan linyorans. Me, an akor avek sa Kikenn Sin ki finn apel zot la, zot usi, vinn sin dan tu zot kondwit, parski finn ekrir: ‘Zot bizin sin, parski mo sin.’ ”—1 Pyer 1:14-16.

 6. Ki nu bizin fer pu nu res sin?

⁶ Pu nu ena enn kondwit sin, nu bizin res pir lor plan fizik, mantal, moral ek spirityel. Pwiski nu port non Zeova, nu bizin demann numem: Eski nu pe gard numem sin? Si wi, nu pu montre ki vremem nu pe prepar nu pu “zur Zeova.” Li pa fasil pu res sin zordi, parski pli ale bann valer moral sa lemond la pe degrade. (1 Korintyin 7:31; 2 Timote 3:13) Akoz sa, li bon ki nu analiz numem. Ki kantite diferans ena ant bann valer moral sa lemond la ek nu prop prinsip moral? Eski sa diferans la pe vinn deplizanpli gran? Si nu truve ki pena enn gran diferans, ebyin sa bizin fer nu reflesi. Petet, nu bann valer moral pli siperyer ki seki ena dan lemond. Me, eski zot pe kumans deteryore asterla? Si wi, nu bizin azir san tarde pu koriz sa, pu nu kapav fer Bondye plezir.

7, 8. (a) Ki kapav anpes nu truv linportans pu ena ‘bann aksyon ki montre nu kondwit sin’? (b) Ki bann aksyon kitfwa nu bizin fer pu koriz sa?

⁷ Sertin dimunn ki avan, pa ti gayn akse ar bann kitsoz imoral, zordi pe kapav get pornografi lor Internet, san ki personn kone. Dapre enn dokter, sa bann dimunn la pe truv zot devan “enn gran kantite propozisyon sexyel.” Si zame nu rod al lor sa bann sit Internet la, sa pu montre klerman ki nu pe inyor sa komannman Labib ki dir nu pa “tus nanyin malprop.” (Izai 52:11) Lerla, eski kapav dir ki vremem nu pe “gard tuzur dan [nu] lespri prezans zur Zeova”? Ubyin, eski nu pa pe plito ranvway sa zur la dan nu lespri, ek panse ki mem si nu pe gat nu lespri avek bann kitsoz malprop, nu ankor ena letan pu pirifye nu? Si nu finn devlop enn problem an rapor avek pornografi, nu bizin sipliy Zeova san tarde pu gayn so led. Wi, nu bizin dir Li ‘fer nu lizye pase san get bann kitsoz initil ek prezerv nu lavi dan so semin’!—Psom 119:37.

⁸ Erezman ki laplipar Temwin Zeova, ki zot zenn uswa vye, zot res atase ar bann prinsip moralite ki Bondye inn fixe. Zot evit bann tantasyon imoral ki ena dan lemond. Zot konsyan ki lafin byin pre ek ki “zur Zeova pu vinn kuma enn voler,” parey kuma Pyer ti averti. Se akoz sa ki zot kontiyn fer “bann aksyon ki montre zot kondwit sin.” (2 Pyer 3:10) Zot aksyon pruve ki zot pe “kontiyn atann ek gard tuzur dan zot lespri prezans zur Zeova.”a

Atann Avek Bann “Aksyon Ki Montre Zot Latasman Avek Bondye”

 9. Ki latasman pu Bondye bizin pus nu pu fer?

⁹ Pu nu kapav kontiyn gard zur Zeova dan nu lespri, li byin inportan ki nu fer usi bann ‘aksyon ki montre nu latasman avek Bondye’. Ena “latasman avek Bondye” vedir ki nu ena enn gran respe pu Li ek sa respe la pus nu fer kitsoz ki fer Li plezir. Se nu latasman fidel avek Zeova ki motiv nu pu fer sa bann aksyon la. Zeova anvi ki “tut sort kalite dimunn sove ek gayn enn konesans egzak lor laverite.” (1 Timote 2:4) Li pa anvi ki “personn detrir, me okontrer Li anvi ki tu dimunn repanti.” (2 Pyer 3:9) Alor, eski nu “latasman avek Bondye” pa bizin pus nu pu fer plis zefor pu ed bann dimunn pu aprann lor Zeova ek pu imit Li?—Efezyin 5:1.

10. Kifer nu bizin fer atansyon ar “puvwar ki rises ena pu anbet dimunn”?

¹⁰ Nu lavi pu ranpli ar bann aksyon ki montre nu latasman avek Bondye, si nu rod so Rwayom an premye. (Matye 6:33) Sa vedir ki nu bizin ena enn lopinyon ekilibre lor bann kitsoz materyel. Zezi ti donn sa lavertisman la: “Gard zot lizye uver ek pa les zot anvye, dan ninport ki fason, seki lezot posede. Parski mem kan enn dimunn ena enn kantite kitsoz, so lavi pa depann lor sa bann kitsoz la.” (Lik 12:15) Petet nu, nu panse ki li difisil ki lamur larzan avegle nu. Me, li bon ki nu remarke ki “traka ki ena dan sa lemond la ek puvwar ki rises ena pu anbet dimunn” kapav ‘tuf parol’ Bondye. (Matye 13:22) Zordi, li pa fasil pu nu gayn nu lavi. Dan sertin rezyon lor later, buku dimunn panse ki pu zot viv pli byin, zot bizin al res dan bann peyi pli ris. Zot aksepte kit zot fami deryer zot pu plizir lane. Mem sertin parmi bann serviter Bondye finn ena sa kalite rezonnman la. Li vre ki kan zot al dan enn lot peyi, sertin kapav ed zot fami pu viv pli byin lor plan materyel. Me selman, ki kapav ariv kondisyon spirityel sa fami la? Si sef lafami pa la pu diriz so fami kuma bizin, eski so bann manb pu ase for lor plan spirityel pu zot kapav sirviv dan zur Zeova?

11. Kuma eski enn misye ki ti res Philippines, finn montre ki latasman ar Bondye pli inportan ki larises?

¹¹ Enn misye ti kit Philippines pu al travay Japon. Laba, li finn konn laverite avek bann Temwin Zeova. Kan li finn aprann seki Labib dir lor responsabilite enn mari, li finn pran konsyans ki li bizin ed so fami pu servi Zeova. (1 Korintyin 11:3) So madam ki ti dan Philippines, ti byin opoze ar so nuvo krwayans. Madam la ti prefer ki so mari kontiyn avoy larzan, olye ki li return lakaz pu anseyn lafami seki li finn aprann dan Labib. Me, misye la ti trakase pu so fami, anplis ki li kone ki lafin byin pre. Alor, li finn return lakaz. Avek letan, pasyans ek lamur ki li’nn manifeste anver bann manb so fami, sa finn rekonpanse. So fami finn aksepte laverite, ek so madam finn pran servis aplintan.

12. Kifer eski nu bizin met bann kitsoz spirityel an premye dan nu lavi?

¹² Nu kapav konpar nu sityasyon avek bann dimunn ki dan enn batiman ki pe pran dife. Dan enn sityasyon parey, ki pli saz pu fer? Galup kuma enn fu pu tir bann kitsoz materyel dan enn batiman ki pre pu kraze? Uswa, sov lavi bann dimunn—nu prop lavi, lavi nu fami ek lavi bann lezot dimunn ki dan sa batiman la? Pareyman, sa move lemond la pre pu kraze ek lavi bann dimunn an danze. Kan nu realiz sa, nu truve ki nu bizin met bann kitsoz spirityel an premye dan nu lavi, ek konsantre avek zel lor travay predikasyon Rwayom Bondye, enn travay ki sov lavi bann dimunn.—1 Timote 4:16.

Nu Bizin Montre Nu “san Tas”

13. Dan ki kondisyon nu anvi ete kan zur Zeova arive?

¹³ Pu met laksan lor linportans pu kontiyn atann, Pyer dir: “Bann byineme, pwiski zot pe atann sa bann kitsoz la, fer tu zot posib pu ki alafin [Bondye] truv zot san tas, san defo ek anpe.” (2 Pyer 3:14) Apre ki li’nn koz lor bann aksyon ki montre nu kondwit sin ek nu latasman avek Bondye, Pyer atir nu latansyon lor enn kitsoz inportan. Li montre ki fode ki alafin, Zeova truv nu kuma bann dimunn k’nn pirifye ar disan presye Zezi Kris. (Revelasyon 7:9, 14) Pu sa, enn dimunn bizin ena lafwa dan sakrifis Zezi, angaz so lavi ar Zeova ek pran batem.

14. Ki vedir res “san tas”?

¹⁴ Pyer konsey nu pu fer tu seki nu kapav pu ki Bondye truv nu “san tas.” Nu kondwit ek nu personalite Kretyin, zot kuma enn linz ki nu’nn met lor nu. Alor, eski nu pe anpes lemond tas nu linz? Kan nu remark enn tas lor nu linz, deswit nu esey tir li. Ek sirtu si se enn linz ki nu byin kontan, nu pu pran ankor plis prekosyon pu netway li. Eski se kumsa ki nu reazir kan nu labiyman Kretyin inn tase akoz sertin defo ki nu ena dan nu personalite uswa dan nu kondwit?

15. (a) Kifer eski bann Izraelit ti bizin fer bann franz dan rebor zot linz? (b) Kifer bann serviter Zeova zordi, montre ki zot diferan?

¹⁵ Bann Izraelit ti bizin met bann “franz dan rebor zot linz” ek zot ti bizin “met enn kordone ble lor sa bann franz la.” Kifer? Pu zot rapel bann komannman Zeova, obeir sa bann komannman la ek “vinn sin” pu zot Bondye. (Nonm 15:38-40) Antan ki bann serviter Zeova zordi, nu montre ki nu diferan avek sa lemond la parski nu swiv bann lalwa ek bann prinsip Bondye. Par egzanp, nu res prop lor plan moral, nu respekte valer sakre disan, ek nu rezet tut sort kalite lidolatri. (Akt 15:28, 29) Ek, parski nu byin determine pu res san tas, buku dimunn respekte nu.—Zak 1:27.

Nu Bizin “san Defo”

16. Ki vedir res “san defo”?

¹⁶ Pyer dir usi ki fode ki Bondye truv nu “san defo.” Kuma eski li posib sa? Normalman, kan ena tas lor enn kitsoz, nu netway sa kitsoz la ziska ki tas la sorti. Me, nu pa kapav netway enn defo. Avredir, enn defo indike ki ena enn kitsoz andan mem ki pabon. Get sa konsey ki lapot Pol ti donn bann Kretyin Filip: “Kontiyn fer tu kitsoz san ki zot groyne ek san ki zot diskite, pu ki zot pa gayn okenn repros, ek ki zot res inosan, kuma bann zanfan Bondye ki san defo, parmi enn move zenerasyon, ki’nn vinn traver ek ki’nn degrade. Ek parmi sa zenerasyon la, zot pe briye kuma lalimyer ki ekler lezot dan lemond.” (Filipyin 2:14, 15) Si nu swiv sa konsey la, nu pu evit groyne ek diskite. Nu pu servi Bondye avek bann bon mobil. Se lamur pu Zeova ek nu prosin ki pu pus nu pu pres labonn “nuvel lor Rwayom” Bondye. (Matye 22:35-40; 24:14) Anplis, nu pu kontiyn pres labonn nuvel, mem si buku dimunn pa konpran kifer nu donn nu letan volonterman pu ed lezot pu aprann lor Bondye ek lor so Parol, Labib.

17. Avek ki mobil nu bizin ena dezir pu gayn bann privilez dan kongregasyon?

¹⁷ Pwiski nu anvi res “san defo,” li bon ki nu egzaminn nu bann mobil. Lemond ankuraz bann dimunn pu rod zis zot prop lintere. Par egzanp, li ankuraz zot pu fer tu pu gayn larises uswa laglwar. Me nu, nu finn rezet bann manyer azir sa lemond la. Donk, si nu ena dezir pu gayn bann privilez dan kongregasyon, les nu motive par bann bon mobil, ek par lamur pu Zeova ek pu lezot. Kan bann zom spirityel ena dezir pu vinn sirveyan, li ankurazan pu truve ki zot fer sa avek lazwa, ek avek enn dezir pu travay dir pu Zeova ek pu zot bann frer. (1 Timote 3:1; 2 Korintyin 1:24) Wi, bann zom ki kalifye pu servi kuma ansyin, zot “gid trupo Bondye . . . avek plezir, pa dan enn lintere malonet, me avek enn bon volonte; pa kuma bann seki donn lord kuma sef lor leritaz Bondye, me kuma bann legzanp pu trupo.”—1 Pyer 5:1-4.

Nu Bizin Viv “Anpe”

18. Pu ki bann kalite, bann Temwin Zeova zot byin renome?

¹⁸ Finalman, Pyer dir ki fode ki Bondye truv nu pe viv “anpe.” Pu nu kapav ranpli sa kondisyon la, nu bizin anpe avek Zeova ek avek nu prosin. Pyer montre linportans pu ena ‘enn gran lamur enn anver lot’ ek pu prezerv lape avek nu bann frer Kretyin. (1 Pyer 2:17; 3:10, 11; 4:8; 2 Pyer 1:5-7) Pu prezerv lape, nu bizin ena lamur ant numem. (Zan 13:34, 35; Efezyin 4:1, 2) Sa lamur ek sa lape la, zot byin vizib sirtu kan ena nu bann lasanble internasyonal. An 1999, ti ena enn lasanble internasyonal dan Costa Rica. Bann Temwin lokal ti vinn airport pu akeyir bann delege. Me, san ki zot fer expre, zot ti pe blok landrwa kot enn marsan ti pe fer so komers. Marsan la ti agase, parski zot ti pe bar so bann kliyan. Me, dezyem zur, li’nn remark lamur ek lape ki ti ena kan bann Temwin lokal ti pe akeyir bann delege, mem si zot pa ti konn bannla personelman. Ebyin, dernye zur, marsan la usi finn rant ansam avek bann Temwin la pu akeyir bann delege, ek finalman li finn demann enn letid Labib.

19. Kifer eski li inportan ki nu fer zefor pu viv anpe avek nu bann frer ek ser Kretyin?

¹⁹ Li byin inportan ki nu fer bann zefor sinser pu kontiyn viv anpe avek nu bann frer ek ser spirityel. Kifer? Parski dan enn sans, sa pu indike ki kantite nu vremem sinser, kan nu dir nu pe atann zur Zeova ek nuvo lemond ki Li’nn promet. (Psom 37:11; 2 Pyer 3:13) Sipoze ki nu gayn difikilte pu res anpe avek enn Kretyin an partikilye. Eski nu kapav truv nu pe viv anpe avek li dan Paradi? Si enn frer ena enn kitsoz kont nu, nu bizin deswit ‘fer lape avek li.’ (Matye 5:23, 24) Li byin inportan ki nu fer sa, pu ki nu anpe avek Zeova.—Psom 35:27; 1 Zan 4:20.

20. Kuma eski nu bizin montre ki nu pe “kontiyn atann”?

²⁰ Eski personelman nu pe ‘atann ek gard tuzur dan nu lespri prezans zur Zeova’? Kan nu res sin dan sa lemond imoral la, sa montre ki nu anvi vremem ki Bondye anlev mesanste enn fwa. Si nu fer bann aksyon ki montre nu latasman avek Bondye, sa pu pruve ki nu inpasyan pu truv zur Zeova ek pu viv kan Rwayom Bondye pu diriz later. Ek kan nu fer zefor pu kontiyn viv anpe avek nu bann frer ek ser asterla, sa montre ki nu pe atann pu viv dan lemond nuvo, kot pu ena lape. Wi, se par sa bann fason la ki nu montre ki nu pe “kontiyn atann” ek ki nu pe ‘gard tuzur dan nu lespri prezans zur Zeova.’

[Notes]

Eski U Rapel?

• Ki sa vedir ‘gard tuzur dan nu lespri prezans zur Zeova’?

• Kuma eski nu kondwit montre ki nu pe “kontiyn atann”?

• Kifer li inportan pu fer bann aksyon ki montre nu “latasman avek Bondye”?

• Ki nu bizin fer pu ki Zeova truv nu “san tas, san defo ek anpe”?

[Zimage page 11]

Nu montre ki nu pe “kontiyn atann” kan nu fer bann aksyon ki montre nu kondwit sin

[Zimage page 12]

Travay predikasyon labonn nuvel sov lavi

[Zimage page 14]

Pandan ki nu pe atann zur Zeova, anu kontiyn fer zefor pu viv anpe avek lezot