Lespri Temwagn Avek Nou Lespri

1-3. Ki bann levennman ti arive zour Lapantkot ki ti fer sa zour-la spesial? Kouma sa bann levennman-la finn akonpli seki bann Lekritir ti predir? (Get zimaz dan koumansman lartik.)

SA DIMANS gramatin-la dan Zerizalem, se enn zour spesial ek extraordiner. Bann dimounn pe selebre Lapantkot, enn fet sakre ki selebre koumansman rekolt dible. Sa gramatin-la, gran pret pe ofer bann sakrifis kouma li abitie fer dan tanp. Apre sa, ver nef-er, li ofer de dipin ki ena levin. Sa de dipin-la ti fer ar premie dible, ouswa bann premie frwi rekolt. Gran pret balans bann dipin-la de kote pou prezant zot devan Zeova. Sa pe pase Lapantkot lane 33.​—Levitik 23:15-20.

² Pandan plizir santenn lane, gran pret ti fer sa ofrand balanse la, toule lane. Sa ofrand-la ti ena enn rapor avek enn kitsoz bien inportan ki finn arive Lapantkot lane 33. Sa ti konsern 120 disip Zezi ki ti pe priye ansam lao dan enn lasal dan Zerizalem. (Zistwar Bann Apot 1:13-15) Profet Yoel ti ekrir lor sa levennman-la 800 an avan. (Yoel 2:28-32; Zistwar Bann Apot 2:16-21) Kifer seki ti arive sa zour-la ti inportan?

³ Lir Zistwar Bann Apot 2:2-4. (NW) Zour Lapantkot lane 33, Bondie ti donn sa bann Kretien-la so lespri sin, ek se la ki zot inn kone ki zot ena lesperans pou al dan lesiel. (Zistwar Bann Apot 1:8) Lerla, enn lafoul ti rasanble otour zot, ek bann disip ti koumans koz lor bann kitsoz extraordiner ki zot finn trouve ek tande. Lapot Pier ti explike seki ti fek arive ek kifer sa ti inportan. Apre sa, li ti dir lafoul: “Repanti, e resevwar batem dan nom Zezi Kris pou zot gagn pardon pou zot pese; e zot pou resevwar don [“gratis,” NW] ki Bondie done, Lespri Sin.” Sa zour-la, apepre 3,000 dimounn ti pran batem ek zot osi ti gagn lespri sin.​—Zistwar Bann Apot 2:37, 38, 41.

 4. (a) Kifer seki finn arive pandan Lapantkot bizin interes nou? (b) Sit enn lot levennman ki kitfwa finn arive mem zour, plizir siek avan. (Get not alafin lartik.)

⁴ Ki gran pret ek lofrand ki li ti fer sak Lapantkot, reprezante? Gran pret ti reprezant Zezi. Bann dipin ti reprezant bann disip Zezi ki ti ena lesperans pou al dan lesiel. Sa bann disip-la finn swazire parmi bann imin inparfe. Apel zot bann “premie frwi.” (Zak 1:18) Bondie finn aksepte zot kouma so bann garson. Li finn swazir zot pou form parti dan Rwayom Bondie, ek pou regne avek Zezi dan lesiel. (1 Pier 2:9) Zeova pou servi so Rwayom pou beni tou bann dimounn ki obeir Li. Alor, mem si nou pou al res dan lesiel avek Zezi ouswa lor later dan Paradi, Lapantkot lane 33 bien inportan pou nou.^[1] ​—Get not alafin lartik.

 5. Kouma nou kone ki tou bann ki ena lesperans pou al dan lesiel pa gagn sa lesperans-la exakteman dan mem fason?

⁵ Bann disip ki ti dan lasal lao dan Zerizalem zame ti pou bliye sa zour-la. Zot tou ti ena enn kitsoz ki resanble enn laflam lor zot latet. Zeova ti donn zot kapasite pou koz dan enn lot lang. Zot pa ti ena okenn dout ki lespri sin ti swazir zot. (Zistwar Bann Apot 2:6-12) Me sa bann kitsoz extraordiner-la pa ariv tou bann Kretien kan zot gagn zot lesperans. Par exanp, plitar sa zour-la, bann milye dimounn ki ti rasanble dan Zerizalem ti gagn lesperans pou al dan lesiel, me Labib pa dir ki enn laflam ti aparet lor zot latet. Zot ti gagn zot lesperans kan zot ti pran batem. (Zistwar Bann Apot 2:38) Me pa tou Kretien ki gagn sa lesperans-la kan zot pran batem. Par exanp, bann Samaritin finn gagn zot lesperans inpe apre zot batem. (Zistwar Bann Apot 8:14-17) Dan enn lot sitiasion ki ase rar, Korney ek bann dimounn ki ti dan so lakaz ti gagn zot lesperans avan zot batem.​—Zistwar Bann Apot 10:44-48.

 6. Ki kitsoz tou bann Kretien ki ena lesperans pou al dan lesiel gagne, ek ki lefe sa ena lor zot?

⁶ Li kler ki bann Kretien konn zot lesperans pou al dan lesiel dan diferan fason. Sertin kitfwa finn realize deswit ki Zeova finn swazir zot pou al dan lesiel. Lezot finn realiz sa apre inpe letan. Me lapot Pol ti explike seki ariv sak Kretien ki ena sa lesperans-la. Li ti dir: “Apre ki zot finn krwar, inn met enn sele lor zot gras-a li avek lespri sin ki ti promet, ki enn garanti ki zot gagne alavans pou nou leritaz.” (Efezien 1:13, 14, NW.) Alor, Zeova servi so lespri sin pou garanti sa bann Kretien-la ki Li finn swazir zot pou al dan lesiel. Dan sa fason-la, lespri sin li “enn garanti ki zot gagne alavans,” setadir enn prev ki dan lavenir zot pou viv pou touletan dan lesiel, pa lor later.​—Lir 2 Korintien 1:21, 22; 5:5, NW.

 7. Ki sak Kretien ki ena lesperans pou al dan lesiel bizin fer pou gagn so rekonpans?

⁷ Kan enn Kretien gagn so lesperans pou al dan lesiel, eski sa vedir ki li fini sir ki li pou gagn so rekonpans? Non. Sa Kretien-la sir ki li finn gagn enn linvitasion pou al dan lesiel. Me li pou gagn so rekonpans zis si li res fidel ar Zeova. Pier ti donn sa lexplikasion-la: “Pou sa rezon-la frer, fer tou zot posib pou fer sir ki zot gard zot fidelite pou zot kapav, res parmi bann ki Bondie finn apele ek finn swazir, parski si zot kontign fer sa bann kitsoz-la, zame zot pou tonbe. An realite, se koumsa ki lantre pou gran ouver pou zot dan rwayom eternel nou Segner ek Sover Zezi Kris.” (2 Pier 1:10, 11, NW.) Alor, sak Kretien ki ena lesperans pou al dan lesiel bizin pa les nanye anpes li servi Zeova. Mem si li finn gagn linvitasion, ouswa finn apel li, pou al dan lesiel, si li pa res fidel, li pa pou gagn so rekonpans.​—Ebre 3:1; Revelasion 2:10.

8, 9. (a) Kifer sa difisil pou boukou konpran seki ariv enn kikenn kan Bondie swazir li? (b) Kouma enn kikenn kone ki li finn gagn linvitasion pou al dan lesiel?

⁸ Laplipar parmi bann serviter Bondie azordi trouv sa difisil pou konpran seki ariv enn kikenn kan Bondie swazir li. Li normal, parski zot pa finn gagn lesperans pou al dan lesiel. Bondie finn kree bann dimounn pou viv pou touletan lor later, pa dan lesiel. (Zenez 1:28; Psom 37:29) Me Zeova finn swazir sertin pou vinn bann lerwa ek bann pret dan lesiel. Alor, kan Li swazir zot, zot lesperans ek zot fason panse sanze, ek lerla zot atann pou al viv dan lesiel.​—Lir Efezien 1:18, NW.

⁹ Me kouma enn kikenn pou kone si finn swazir li pou al dan lesiel? Remark seki Pol ti dir bann frer dan Rom, ki ti ena lesperans pou al dan lesiel ek ki ti ‘swazir pou vinn bann sin.’ Li ti dir zot: “Parski zot pa finn gagn enn lespri lesklavaz ki fer zot gagn per ankor, me zot inn gagn lespri Bondie ki’nn adopte zot kouma bann garson, par sa lespri-la nou kriye: ‘Abba, Papa!’ Sa lespri-la limem temwagn avek nou lespri ki nou bann zanfan Bondie.” (Romin 1:7; 8:15, 16, NW.) Atraver so lespri sin, Bondie fer enn kikenn konpran dan enn fason kler, ki finn invit li pou regne antan ki lerwa avek Zezi dan lesiel.​—1 Tesalonisien 2:12.

10. Ki 1 Zan 2:27 aprann nou kan li dir ki enn Kretien ki’nn gagn lonksion pa bizin ki personn ansegn li?

¹⁰ Bann Kretien ki gagn sa linvitasion-la ar Bondie pa bizin ki enn dimounn dir zot ki zot ena lesperans pou al dan lesiel. Zeova fer zot kone, ek Li fer zot sir. Lapot Zan dir sa bann Kretien-la: “Sa Kikenn ki sin la finn donn zot lonksion, ek zot tou ena konesans.” Li dir osi: “An rapor avek zot, lonksion ki zot finn gagne ar Li res dan zot, ek zot pa bizin ki personn ansegn zot; me lonksion ki zot finn gagne ar Li pe ansegn zot konsernan tou kitsoz ek li vre ek pena okenn mansonz. Parey kouma li finn ansegn zot, res ini avek Li.” (1 Zan 2:20, 27, NW.) Bann Kretien ki ena sa lesperans-la bizin ki Zeova ansegn zot parey kouma ninport kisannla. Me zot pa bizin ki enn dimounn vinn konfirme ki vremem Zeova finn swazir zot. Zeova finn servi lafors pli pwisan ki ena, setadir so lespri sin, pou fer sa bann Kretien-la sir ki vremem Li finn swazir zot!

11, 12. Ki enn Kretien ki ena lesperans pou al dan lesiel kitfwa kapav panse, me ki dout zame li pa pou ena?

¹¹ Kan lespri sin swazir bann Kretien pou al regne dan lesiel, sa bann Kretien-la sanze. Telman zot sanze ki Zezi finn dir ki zot “ne ankor enn fwa,” ouswa zot “ne depi lao.” (Zan 3:3, 5, NW, not) Apre sa Zezi dir: “Pa etone parski mo dir twa ki zot bizin pran enn nouvo nesans. Divan soufle kot li anvi, to tann son so mouvman me to pa kone kot li sorti ni kot li pe ale; li parey pou dimoun ki pran nesans dan Lespri.” (Zan 3:7, 8) An realite, li inposib pou explike exakteman seki enn Kretien ki ena lesperans pou al dan lesiel resanti ar enn dimounn ki pena sa lesperans-la.^[2]​—Get not alafin lartik.

¹² Enn kikenn ki ena lesperans pou al dan lesiel kitfwa demann limem: ‘Kifer Zeova finn swazir mwa ek pa finn swazir enn lot?’ Li posib ki li demann limem si li merit enn responsabilite koumsa. Me li pena okenn dout ki Zeova finn swazir li. Okontrer, li resanti enn lazwa extraordiner ek li bien rekonesan pou sa don-la. Bann serviter Bondie ki ena sa lesperans-la ena mem santiman ki Pier kan li ti dir: “Ki Bondie, Papa nou Segner Zezi Kris, li beni; parski dan so gran mizerikord, li finn donn nou enn nouvo lavi ler li resisit Zezi depi bann mor, e li donn nou enn lesperans vivan; enn leritaz ki finn rezerve pou zot dan lesiel, ki pa pou [“vinn inpir,” NW], ni gate oubien fletri.” (1 Pier 1:3, 4) Kan bann Kretien ki ena sa lesperans-la lir sa bann parol-la, zot pena okenn dout ki zot Papa pe koz avek zot personelman.

13. Kouma fason panse enn dimounn sanze kan lespri sin swazir li? Ek ki kitsoz provok sa sanzman-la?

¹³ Avan ki Zeova invit sa bann Kretien-la pou al dan lesiel, zot ti ena lesperans pou viv pou touletan lor later. Zot ti pe atann lepok kan Zeova pou fer later vinn enn paradi ek pou tir tou mesanste. Li posib ki zot ti pe mem mazinn lepok kan zot pou akeyir enn manb zot fami ouswa enn kamarad ki’nn mor. Kitfwa osi zot ti pe mazinn lepok kan zot pou konstrir zot lakaz ek res ladan ouswa plant bann pie ek manz zot frwi. (Izai 65:21-23) Kifer zot finn koumans pans dan enn lot fason? Eski zot finn sanze parski zot ti deprime ouswa zot ti pe bien soufer? Eski enn kout koumsa zot finn panse ki li pou monotonn pou viv pou touletan lor later ek ki zot pa pou ere pou res lor la? Ouswa eski zot ti anvi kone kouma sa pou ete pou viv dan lesiel? Non. Okontrer, se Bondie ki’nn desid sa pou zot. Kan Li ti invit zot, li ti servi so lespri sin pou sanz zot fason panse ek sanz rekonpans ki zot ti pe atann.

14. Ki bann Kretien ki ena lesperans pou al dan lesiel resanti konsernan zot lavi lor later?

¹⁴ Alor, eski savedir ki bann ki ena lesperans pou al dan lesiel anvi mor? Pol ti explike seki sa bann Kretien-la resanti. Li ti konpar zot lekor ar enn “latant” ek li ti dir: “An realite, nou ki dan sa latant-la, nou plengne, nou akable, parski nou pa anvi tir li lor nou, me nou anvi met lot-la, pou ki lavi aval seki mortel.” (2 Korintien 5:4) Sa bann Kretien-la pa anvi mor. Zot kontan lavi ek zot anvi servi sak zour dan zot lexistans pou servi Zeova ansam avek zot fami ek zot bann kamarad. Me dan ninport ki kitsoz ki zot fer, zot rapel seki Bondie finn promet zot pou lavenir.​—1 Korintien 15:53; 2 Pier 1:4; 1 Zan 3:2, 3; Revelasion 20:6.

15. Ki kitsoz pa prouve ki lespri sin finn swazir enn dimounn?

¹⁵ Kitfwa to pe demann tomem si Zeova finn invit twa pou al dan lesiel. Si to panse ki kitfwa Li finn invit twa, reflesi lor sa bann kestion inportan-la: Eski to panse ki to ena enn extra gran zel dan predikasion? Eski to vremem kontan etidie Labib ek aprann “bann kitsoz profon ki konsern Bondie”? (1 Korintien 2:10, NW.) Eski to panse ki Zeova finn donn twa bann rezilta extraordiner dan to minister? Eski to anvi fer volonte Zeova, plis ki ninport ki kitsoz? Eski to ena enn gran lamour pou lezot ek to santi ki to ena enn gran responsabilite pou ed zot pou servi Zeova? Eski to finn trouv lame Zeova ed twa dan boukou sitiasion presi dan to lavi? Si to reponn wi pou tou sa bann kestion-la, eski savedir to finn gagn linvitasion pou al dan lesiel? Non. Kifer? Parski tou bann serviter Bondie kapav ena sa bann santiman-la, ki zot ena lesperans pou al dan lesiel ouswa non. Atraver so lespri sin, Zeova kapav donn so bann serviter mem lafors, mem si zot pa pou gagn mem rekonpans. Ofet, si to pe reflesi si to pou al dan lesiel ouswa non, savedir ki to pa finn gagn linvitasion. Bann ki Zeova finn swazir, zot pa reflesi lor la! Zot deza kone!

16. Pa tou Kretien ki finn gagn lespri sin Bondie ki’nn gagn linvitasion pou al dan lesiel. Kouma nou konn sa?

¹⁶ Dan Labib, ena boukou lexanp bann dimounn fidel ki finn gagn lespri sin Zeova me ki pa finn al dan lesiel. Par exanp Zan Batis. Zezi ti dir ki pena enn lot dimounn pli gran ki Zan, me apre li ti dir ki Zan pa pou regne antan ki lerwa dan lesiel. (Matie 11:10, 11) Lespri sin ti osi gid David. (1 Samiel 16:13) Lespri sin finn ed li pou konpran bann kitsoz profon konsernan Zeova ek finn osi gid li pou ekrir sertin parti dan Labib. (Mark 12:36) Me mem sa, lapot Pier ti dir ki David “pa ti mont dan lesiel.” (Zistwar Bann Apot 2:34) Zeova finn servi so lespri sin pou donn zot kapasite pou fer bann kitsoz extraordiner, me Li pa finn servi so lespri sin pou invit zot pou viv dan lesiel. Eski savedir zot pa ti ase fidel ouswa kalifie pou regne dan lesiel? Non. Savedir ki Zeova pou resisit zot dan Paradi ki pou ena lor later.​—Zan 5:28, 29; Zistwar Bann Apot 24:15.

17, 18. (a) Ki rekonpans laplipar serviter Bondie pe atann azordi? (b) Ki bann kestion nou pou examine dan prosin lartik?

¹⁷ Azordi, laplipar serviter Bondie pa pou al dan lesiel. Parey kouma Abraam, David, Zan Batis, ek boukou lezot misie ek madam dan lepok Biblik, zot pe atann pou viv lor later kan gouvernman Bondie pou dirize. (Ebre 11:10) Pou ena 144,000 dimounn ki pou regn avek Zezi dan lesiel. Labib koz lor “leres” kretien ki ena lesperans pou al dan lesiel, me ki ankor lor later pandan nou lepok. (Revelasion 12:17) Alor, laplipar parmi bann 144,000 inn fini mor ek zot dan lesiel.

¹⁸ Me si enn kikenn dir ki li ena lesperans pou al dan lesiel, kouma bann ki ena lesperans pou viv lor later bizin reazir? Si enn kikenn dan to kongregasion koumans manz dipin ek bwar divin pandan Memoryal, kouma to bizin tret li? Eski to bizin gagn traka si kantite bann ki dir ki zot ena lesperans pou al dan lesiel pe kontign ogmante? Prosin lartik pou reponn sa bann kestion-la.