Enn Gran Lafoul Loue Bondie ek Lekris

 1. Ki lefe enn diskour ki ti fer an 1935 ti ena lor enn zenn garson?

ENN garson ti ena 18 an kan li ti pran batem an 1926. So bann paran ti bann etidian Labib. Sa lepok-la, se koumsa ki ti apel bann Temwin Zeova. Zot ti ena trwa garson ek de tifi, ek zot ti ansegn zot bann zanfan kouma pou servi Zeova ek pou imit Zezi Kris. Parey kouma tou bann etidian Labib sa lepok-la, sa garson-la ti koumans manz dipin ek bwar divin pandan Repa Lesegner. Selman, so lesperans ti sanze akoz enn diskour inportan ki ti ena tem « La grande multitude ». Frer Joseph Rutherford ti fer sa diskour-la dan enn lasanble ki ti fer dan Washington, dan Letazini, an 1935. Ki bann Etidian Labib ti aprann dan sa lasanble-la?

 2. Ki verite Frer Rutherford ti explike dan so diskour?

² Dan so diskour, Frer Rutherford ti explike kisannla gran lafoul ki mansione dan Revelasion 7:9. Sa lepok-la, bann etidian Labib ti panse ki gran lafoul ti enn deziem group dimounn ki ti pou al viv dan lesiel, me ki ti mwins fidel ki bann Kretien ki ena lesperans pou al dan lesiel. Frer Rutherford ti servi bann Lekritir pou explike ki gran lafoul pa ti pou al dan lesiel. Li ti explike ki zot ti reprezant bann lezot moutonb ki ti pou sirviv “gran detres” ek ki ti pou viv pou touletan lor later. (Rev. 7:14, NW) Zezi ti promet: “Mo ena lezot mouton ankor me zot pa dan sa park la ankor; mo bizin al rod zot osi e zot pou ekout mo lavwa. Lerla pou ena enn sel troupo ek enn sel berze.” (Zan 10:16) Sa bann lezot mouton-la se bann Temwin Zeova fidel ki ena lesperans pou viv pou touletan dan Paradi lor later. (Mat. 25:31-33, 46) Anou gete kouma sa nouvo lexplikasion-la finn sanz lavi boukou serviter Zeova, parmi ena osi sa frer ki ti ena 18 an la.​—Ps. 97:11; Prov. 4:18.

3-4. Dan lasanble ki ti fer an 1935, ki bann milye dimounn ti konpran konsernan zot lesperans, ek kifer?

³ Pandan sa lasanble-la, sa ti enn moman bien memorab kan lorater ti demann lasistans: “Eski tou bann ki ena lesperans pou viv pou touletan lor later kapav deboute silvouple?” Enn frer ki ti asiste sa lasanble-la dir ki li ti trouv plis ki lamwatie lasistans deboute. Lerla, Frer Rutherford ti dir: “Gete! Gran lafoul!” Apre sa, tou dimounn dan lasistans ti kriye bien for avek lazwa. Bann ki ti pe deboute ti kone ki Zeova pa ti swazir zot par so lespri sin pou al viv dan lesiel. So landemin, 840 nouvo Temwin ti pran batem, ek laplipar parmi zot ti form parti bann lezot mouton.

⁴ Apre sa diskour-la, sa garson ki nou ti mansione avan la ek bann milye lezot dimounn ti aret pran lanblem pandan Repa Lesegner. Boukou ti ena mem santiman ki sa frer ki ti dir avek boukou limilite la: “An 1935, se dernie fwa ki mo ti manz dipin ek bwar divin pandan Memoryal, parski mo ti kone ki Zeova pa ti swazir mwa par so lespri sin pou al viv pou touletan dan lesiel. Okontrer, mo ti ena lesperans pou viv lor later ek pou ede pou fer later vinn enn paradi.” (Rom. 8:16, 17; 2 Kor. 1:21, 22) Depi sa lepok-la, bann dimounn ki form parti dan gran lafoul pe kontign ogmante, ek zot tou pe travay ansam avek bann Kretien ki ena lesperans pou al dan lesiel me ki ankor lor later.

 5. Kouma Zeova konsider bann ki finn aret pran lanblem pandan Memoryal?

⁵ Kouma Zeova konsider bann ki finn aret pran bann lanblem apre 1935? Ek azordi, kouma Zeova konsider bann Kretien ki ti pe pran bann lanblem pandan Memoryal, me ki apre inn konpran ki Bondie pa’nn swazir zot pou al viv dan lesiel? (1 Kor. 11:28) Sertin ti pe pran bann lanblem parski zot ti mal konpran zot lesperans. Me si zot rekonet zot erer, zot aret pran bann lanblem, ek zot kontign servi Zeova avek fidelite, Zeova pou aksepte zot parmi bann lezot mouton. Ek mem si zot pa pran bann lanblem, zot ankor asiste Memoryal parski zot ena rekonesans pou seki Zeova ek Zezi inn fer pou zot.

 6. Ki Zezi finn demann bann anz pou fer?

⁶ Gran detres bien pre. Alor, kan nou reflesi lor seki Revelasion sapit 7 dir konsernan bann Kretien ki ena lesperans pou al dan lesiel ek gran lafoul, sa kapav bien ankouraz nou. Zezi inn donn lord bann anz pou kontign tini sa kat divan destriksion la. Fode pa ki zot larg sa bann divan la lor later avan ki tou bann Kretien ki ena lesperans pou al dan lesiel fini sele, setadir, ki Zeova deside ki zot fidel. (Rev. 7:1-4) Pou rekonpans zot pou zot fidelite, zot pou vinn bann lerwa ek bann pret avek Zezi dan lesiel. (Rev. 20:6) Zeova, Zezi, ek bann anz pou bien kontan kan zot pou trouv bann 144,000 gagn zot rekonpans dan lesiel.

 7. Dapre Revelasion 7:9, 10, kisannla Zan finn trouve dan so vizion, ek ki zot ti pe fer? (Get zimaz lor kouvertir.)

⁷ Apre ki li’nn koz lor bann 144,000, Zan trouv enn lot kitsoz extraordiner: Enn “gran lafoul” ki travers Armagedon. Diferans ki ena ant sa de group-la, se ki bann 144,000 zot enn nomb bien presi, alor ki gran lafoul, nou pa kone komie dimounn form parti ladan. (Lir Revelasion 7:9, 10, NW.c) Gran lafoul ena bann “long rob blan lor zot,” seki montre ki zot finn gard zot san “tas” ar lemond Satan ek ki zot inn res fidel ar Bondie ek Zezi. (Zak 1:27) Zot kriye bien for ki zot finn sape gras-a seki Zeova ek Zezi, Lagno Bondie, finn fer pou zot. Anplis, zot pe tini bann brans palmis dan zot lame, ek sa montre ki zot finn aksepte Zezi kouma Lerwa ki Zeova finn swazir.​—Konpar Zan 12:12, 13.

 8. Ki Revelasion 7:11, 12 dir nou konsernan tou bann ki dan lesiel?

⁸ Lir Revelasion 7:11, 12. Ki ti arive kan tou bann ki dan lesiel ti trouv sa gran lafoul-la? Zan dir ki zot tou ti bien zwaye ek ki zot ti loue Bondie. Zot tou dan lesiel pou bien zwaye pou trouv sa vizion-la realize, setadir kan gran lafoul pou travers gran detres vivan.

 9. Dapre Revelasion 7:13-15, ki gran lafoul pe fer azordi?

⁹ Lir Revelasion 7:13-15, NW.d Zan ti ekrir ki gran lafoul ti “lav zot long rob ek zot finn fer sa vinn blan dan disan Lagno.” Savedir ki zot ena enn konsians kler ek zot drwat devan lizie Zeova. (Iza. 1:18) Se bann Kretien vwe ek batize, ki ena enn lafwa for dan sakrifis Zezi, ek ki ena enn bon relasion avek Zeova. (Zan 3:36; 1 Pier 3:21) Se akoz sa ki zot ena faver Bondie ek ki zot kapav rann Li enn “servis sakre lanwit-lizour” lor later. Se seki zot pe fer kan zot fer zot maximum pou prese ek ansegn bann dimounn. Kifer zot fer sa? Parski Rwayom Bondie se kitsoz pli inportan pou zot.​—Mat. 6:33; 24:14; 28:19, 20.

10. Ki lasirans gran lafoul ena, ek ki promes zot pou trouv realize?

¹⁰ Gran lafoul, ki pou sape pandan gran detres, sir ki Bondie pou pran zot swin, parski “sa Kikenn ki finn asiz lor tronn la pou met so latant lor zot.” Lerla, promes ki bann lezot mouton pe atann depi bien lontan pou realize: “[Bondie] pou souy tou zot larm. Pa pou ena ni lamor, ni dey, ni lamantasion, ni douler.”​—Rev. 21:3, 4.

11-12. (a) Dapre Revelasion 7:16, 17, ki bann benediksion gran lafoul pou gagne dan lavenir? (b) Ki bann lezot mouton kapav fer pandan memoryal, ek kifer?

¹¹ Lir Revelasion 7:16, 17. Azordi, sertin serviter Zeova pe res san manze parski zot pena ase kas pou aste manze, ouswa akoz bann problem ki ena akoz bann lager. Ena lezot osi ki dan prizon akoz zot lafwa. Selman, gran lafoul ere parski zot kone ki apre ki zot pou sirviv destriksion sa move lemond-la, zot pou touletan ena manze an-abondans lor plan fizik ek spiritiel. Kan Zeova pou detrir move lemond Satan, Li pou fer sir ki Li protez gran lafoul ar so koler ki kapav “bril zot.” Apre gran detres, Zezi pou gid bann ki’nn sape ver “lasours delo lavi [eternel].” Reflesi lor lesperans extraordiner ki gran lafoul ena: Bann milyon dimounn inn viv lor later ek inn mor, me zot, kitfwa zame zot pa pou mor!​—Zan 11:26.

¹² Bann lezot mouton bien rekonesan anver Zeova ek Zezi pou sa zoli lesperans ki zot ena la! Mem si Zeova pa finn swazir zot pou al dan lesiel, Li kontan zot parey kouma Li kontan bann ki ena lesperans pou al dan lesiel. Toulede group kapav loue Zeova ek Zezi Kris, ek enn fason ki zot fer sa se kan zot asiste Repa Lesegner.

13-14. Kifer nou tou bizin asiste Memoryal?

¹³ Sa bann dernie lane-la, anviron enn dimounn lor mil ki ti asiste Memoryal ti pran lanblem. Dan laplipar bann lasanble, pena personn ki manz dipin ek bwar divin pandan Memoryal. Laplipar bann dimounn ki asiste Memoryal ena lesperans pou viv lor later. Alor, kifer zot asiste Repa Lesegner? Pou mem rezon ki bann dimounn asiste maryaz zot bann kamarad. Zot asiste enn maryaz parski zot anvi montre zot lamour ek zot soutien pou sa nouvo koup ki pe marye la. Dan mem fason, bann lezot mouton asiste Memoryal parski zot anvi montre zot lamour ek zot soutien pou Lekris ek bann ki ena lesperans pou al dan lesiel. Bann lezot mouton asiste sa levennman-la osi pou montre zot rekonesans pou sakrifis Zezi, enn sakrifis ki permet zot viv pou touletan lor later.

¹⁴ Enn lot rezon kifer bann lezot mouton asiste Memoryal se pou obeir komannman Zezi. Kan Zezi ti etabli sa repa spesial la avek so bann zapot fidel, li ti dir zot: “Kontign fer sa an mo memwar.” (1 Kor. 11:23-26, NW) Alor, zot kontign asiste Repa Lesegner tanki ena bann Kretien ki ena lesperans pou al dan lesiel ki ankor lor later. Anplis, bann lezot mouton invit tou dimounn pou asiste Memoryal ansam avek zot.

15. Kouma nou kapav loue Bondie ek Lekris pandan Memoryal?

¹⁵ Pandan Memoryal, nou ena lokazion pou loue Bondie ek Lekris par bann lapriyer ek bann kantik. Sa lane-la, diskour Memoryal pou ena tem “Montre Ou Rekonesans pou Seki Bondie ek Zezi Inn Fer pou Ou!” Sa diskour-la pou ogmant nou rekonesans pou Zeova ek Zezi. Kan pou pas bann lanblem, bann ki asiste sa levennman-la pou rapel seki dipin ek divin reprezante, setadir lekor ek disan Zezi. Nou pou mazinn lamour ki Zeova finn montre anver nou kan Li’nn permet ki so Garson donn so lavi pou ki nou kapav gagn lavi. (Mat. 20:28) Tou bann ki kontan nou Papa ki dan lesiel ek so Garson pou anvi asiste Memoryal.

16. Dan ki fason bann Kretien ki ena lesperans pou al dan lesiel ek bann lezot mouton, zot parey?

¹⁶ Devan lizie Zeova, bann Kretien ki ena lesperans pou al dan lesiel pena plis valer ki bann lezot mouton. Zot tou inportan pou Zeova ek Li kontan toulede group parey. Kifer nou kapav dir sa? Parski Li’nn pey mem pri pou aste bann Kretien ki ena lesperans pou al dan lesiel ek bann lezot mouton osi, setadir lavi so Garson ki Li bien kontan. Diferans ki ena ant sa de group-la se zot lesperans. Me toulede group bizin res fidel ar Zeova ek Zezi. (Ps. 31:23) Pa bliye osi ki Zeova donn sakenn parmi nou so lespri sin, ki nou ena lesperans pou al dan lesiel ouswa nou form parti bann lezot mouton.

17. Ki kitsoz bann Kretien ki ena lesperans pou al dan lesiel me ki ankor lor later pe atann?

¹⁷ Bann Kretien ki ena lesperans pou al dan lesiel, zot pa ne avek sa lesperans-la. Se Bondie ki met sa lesperans-la dan zot leker. Zot reflesi lor zot lesperans, zot priye pou sa, ek zot anvi gagn zot rekonpans dan lesiel. Zot pa kone kouma zot lekor pou ete dan lesiel. (Fil. 3:20, 21; 1 Zan 3:2) Me zot pe atann avek inpasians moman kot zot pou zwenn Zeova, Zezi, bann anz, ek bann Kretien ki deza dan lesiel, ek moman kot zot pou pran zot plas dan Rwayom Bondie.

18. Ki bann lezot mouton pe atann?

¹⁸ Bann lezot mouton pe atann avek inpasians moman kot zot pou viv pou touletan lor later. (Ekle. 3:11) Zot pe atann avek inpasians pou fer later antie vinn enn paradi. Zot pe atann osi zour kot zot pou kapav ranz zot lakaz, ena zot prop zardin, ek grandi zot zanfan ki pou ena enn bon lasante. (Iza. 65:21-23) Zot pou kapav vizit boukou landrwa lor later, get bann montagn, bann lafore, bann losean, ek etidie tou bann kitsoz ki Zeova inn kree. Me seki rann zot pli zwaye se ki zot kone ki zot lamitie avek Zeova pou kontign grandi.

19. Ki nou kapav fer gras-a Memoryal, ek kan eski nou pou fer Memoryal sa lane-la?

¹⁹ Zeova finn donn sakenn parmi so bann serviter enn zoli lesperans pou lavenir. (Zer. 29:11) Memoryal Lamor Zezi Kris se enn levennman spesial. Li donn sakenn parmi nou lokazion pou loue Bondie ek Zezi Kris pou tou seki zot inn fer pou ki nou kapav gagn lavi pou touletan. Memoryal se renion pli inportan ki bann Kretien fer toule lane. Samdi 27 Mars 2021, apre kouse soley, nou pou selebre Memoryal. Sa lane-la, boukou dimounn pou kapav asiste Memoryal san okenn restriksion. Ek ena osi ki pou asiste sa levennman-la malgre lopozision. Ena lezot osi ki pou asiste Memoryal dan prizon. Ninport kotsa nou pou asiste sa levennman-la, anou rapel ki Zeova, Zezi, bann anz, ek bann Kretien ki dan lesiel pe get nou. Alor, nou swet sak lasanble, sak group, ek sak dimounn, enn bon Memoryal!