Jéhovah faire koné seki “bizin arrivé bientot”

“Revelation par Jésus Christ, ki Bondié inn donne li, pou montré so bann esclave bann kitsoz ki pou bizin arrivé bientot.”​—RÉV. 1:1.

COUMA OU POU REPONN?

Ki partie dan sa grand statue-la represente Puissance mondial anglo-américain?

Couma Jean montré lien ki ena entre Puissance mondial anglo-américain ek l’Organisation Nation uni?

Couma Daniel ek Jean decrire la fin bann gouvernement humain?

1, 2. (a) Ki kitsoz bann prophetie Daniel ek Jean permette nou comprend? (b) Ki six premier la tête la bête sauvage representé?

ENA bann point commun entre prophetie Daniel ek Jean, ek kan nou compare zot, sa permette nou comprend signification beaucoup l’evenement ki ena dan nou lepok ek ki pou ena dan l’avenir. Ki nou kapav aprann kan nou compare vision ki Jean ti gagné concernant la bête sauvage, recit Daniel ki koz lor la bête sauvage ki ti ena dix corne, ek l’interpretation ki Daniel ti faire lor enn grand statue? Kan nou bien comprend sa bann prophetie-la, ki sa bizin pousse nou pou faire?

² Anou guette seki Jean ti trouvé dan so vision lor la bête sauvage. (Rév. chap. 13) Pareil couma nou ti trouvé dan lartik avant, six premier la tête sa bête sauvage-la represente l’Égypte, l’Assyrie, Babylone, l’Empire médo-perse, la Grèce, ek Rome. Tou sa bann puissance-la ti ena la haine pou descendance la femme. (Gen. 3:15) Rome, sixieme la tête, ti reste enn grand puissance politik pendant bien longtemps apré ki Jean ti ecrire so vision. Finalement, enn septieme la tête ti pou remplace Rome. Kisannla ki ti pou vinn sa puissance mondial-la, ek couma li ti pou traite descendance la femme?

GRANDE-BRETAGNE EK ÉTATS-UNIS PREND POUVOIR

 3. Ki sa bête sauvage ki ena dix corne ek ki faire peur-la representé, ek ki sa dix corne-la representé?

³ Kan nou compare vision ki Jean ti gagné avek vision kot Daniel ti trouve enn bête sauvage ki ena dix corne ek ki faire peur, nou kapav koné kisannla ki septieme la tête sa bête sauvage ki ena dan Révélation chapitre 13-la.a (Lire Daniel 7:7, 8, 23, 24.) La bête sauvage ki Daniel ti trouvé ti represente Puissance mondial romain. (Guette l’encadré lor page 14-15.) Dan cinquieme siecle nou lepok, l’Empire romain ti commence divisé en bann ti royaume. Sa dix corne ki Daniel ti trouve lor la tête sa bête sauvage ki faire peur-la, represente bann royaume ki ti sorti dan l’Empire romain.

4, 5. (a) Ki sa tipti corne-la ti faire? (b) Ki septieme la tête la bête sauvage representé?

⁴ Prophetie Daniel attire nou l’attention surtout lor quatre parmi sa bann corne (bann royaume), ki ti lor la tête sa bête sauvage-la. Enn lot corne, “enn tipti,” ti tire trois parmi sa bann corne-la dan zot position. Sa ti realisé kan Grande-Bretagne, ki avant ti forme partie dan l’Empire romain, ti vinn pli puissant. Avant 17^eme siecle, la Grande-Bretagne pa ti ena enn grand pouvoir. Trois lezot pays ki ti forme partie dan l’Empire romain​—l’Espagne, Pays-Bas, ek la France​—ti ena enn pli grand l’influence ki li. Mais, Grande-Bretagne ti humilié sa bann royaume-la enn par enn, ek ti tire zot dan zot grand position. Au milieu 18^eme siecle, la Grande-Bretagne ti pré pou vinn royaume pli puissant ki ti pou ena lor la terre. Mais li pa ti encore vinn septieme la tête la bête sauvage.

⁵ Mem si Grande-Bretagne ti vinn royaume pli puissant, so bann colonie dan l’Amérique du Nord ti rebellé ek ti vinn États-unis. Malgré sa, Grande-Bretagne pa ti empeche États-Unis pou vinn enn pays bien puissant, ek li ti mem servi so bann bateau pou protege li. Kan jour du Seigneur ti commencé en 1914, Grande-Bretagne ti’nn construire pli grand l’Empire ki ti’nn existé dan l’Histoire ek États-Unis ti vinn puissance industriel pli puissant ki ti ena lor la terre.b Pendant Premier Guerre mondial, États-Unis ek Grande-Bretagne ti dan mem camp. Lerla, Puissance mondial anglo-américain ti vinn septieme la tête la bête sauvage. Couma sa la tête-la ti traite descendance la femme?

 6. Couma septieme la tête ti traite peuple Bondié?

⁶ Enn tipé le temps apré ki jour du Seigneur ti commencé, sa septieme la tête-la ti attak peuple Bondié​—bann frere Christ ki ti encore lor la terre. (Mat. 25:40) Jésus ti dire ki pendant so presence, enn reste descendance la femme ti pou bien actif lor la terre. (Mat. 24:45-47; Gal. 3:26-29) Puissance mondial anglo-américain ti faire la guerre avek sa bann saint-la. (Rév. 13:3, 7) Pendant Premier Guerre mondial, li ti persecute peuple Bondié, interdit certain zot bann publication, ek jette bann representant l’esclave fidele dan prison. Septieme la tête sa bête sauvage-la ti preské arrete travail predication pendant enn moment. Jéhovah ti trouve seki ti pou arrivé bien en avance ek Li ti faire Jean konn sa. Bondié ti aussi dire Jean ki partie secondaire sa descendance-la ti pou ré-commence preché ek ti pou augmente zot l’activité spirituel. (Rév. 11:3, 7-11) L’histoire moderne bann serviteur Jéhovah confirmé ki sa bann l’evenement-la ti arrivé.

PUISSANCE MONDIAL ANGLO-AMÉRICAIN EK BANN LIPIÉ FERRAILLE EK L’ARGILE

 7. Ki lien ena entre septieme la tête la bête sauvage ek sa grand statue-la?

⁷ Ki lien ena entre septieme la tête sa bête sauvage-la ek sa grand statue-la? La Grande-Bretagne​—ek dan enn fason indirect, États-Unis aussi​—ti sorti dan l’Empire romain. Mais ki nou kapav dire lor lipié sa statue-la? La Bible decrire zot couma enn melange ferraille ek l’argile. (Lire Daniel 2:41-43.) Sa description-la corresponn avek lepok kan septieme la tête, setadir Puissance mondial anglo-américain, pou lor pouvoir. Pareil couma ferraille ki’nn melangé avek l’argile pli fragile ki zis ferraille tousel, Puissance mondial anglo-américain aussi pli fragile ki sa puissance kot li ti sorti-la. Couma sa Puissance-la inn vinn fragile?

8, 9. (a) Couma septieme puissance mondial ti manifesté enn la force pareil couma ferraille? (b) Ki l’argile dan lipié sa statue-la representé?

⁸ Parfois septieme la tête sa bête sauvage-la ti montré li fort pareil couma ferraille. Par exemple, li ti montré so pouvoir kan li ti gagne Premier Guerre mondial. Pendant Deuxieme Guerre mondial, li ti facile pou trouvé aussi ki sa septieme la tête-la ti ena enn pouvoir solide pareil couma ferraille.c Apré sa la guerre-la, parfois, fason ki sa septieme la tête-la ti agir, ti montré ki li fort pareil couma ferraille. Selman, depuis avant-mem, sa ferraille-la ti melangé avek l’argile.

⁹ Bann serviteur Jéhovah ti touletan envie comprend seki lipié sa statue-la representé. Daniel 2:41 decrire sa melange ferraille ek l’argile-la couma enn sel “royaume,” pa couma beaucoup royaume. Alors, sa l’argile-la represente bann element ki forme partie dan Puissance mondial anglo-américain ek ki faire li pli fragile ki l’Empire romain ki ti pareil couma ferraille ki pa’nn melangé. Prophetie Daniel dire ki sa l’argile-la c’est “descendance bann dimoune,” setadir le peuple. (Dan. 2:43) Enba domination Puissance anglo-américain, bann dimoune parmi le peuple laguerre pou reclame bann droit ki zot ena, pou ena plus droit dan zot travail, ek mem pou gagne zot l’independance en tant ki nation. Le peuple agir dan enn fason ki affaibli capacité Puissance mondial anglo-américain ek empeche li pou vinn solide couma ferraille. Bann dimoune ena bann l’opinion politik different. Ek kan enn chef politik gagne enn election zis par enn tigit vote, li pena assez pouvoir pou faire seki li ti promette. Daniel ti annoncé: “Sa royaume-la pou en partie fort ek en partie fragile.”​—Dan. 2:42; 2 Tim. 3:1-3.

10, 11. (a) Ki pou arrive lipié sa statue-la? (b) Ki conclusion nou kapav tiré concernant quantité lé-doigt lipié ki sa statue-la ena?

¹⁰ Dan 21^eme siecle, Grande-Bretagne ek États-Unis encore toujours partenaire, souvent zot coopere ensam dan bann zaffaire important dan le monde. Bann prophetie concernant sa grand statue-la ek la bête sauvage confirmé ki dan l’avenir pa pou ena enn lot puissance mondial ki pou remplace sa double Puissance mondial anglo-américain-la. Sa dernier puissance mondial-la li kitfois pli fragile ki Rome, la jambe en ferraille sa statue-la, selman li pa pou al fini par li-mem.

¹¹ Eski quantité lé-doigt lipié ki sa statue-la ena, zot ena enn signification special? Anou reflechi: dan bann lezot vision, Daniel mentionne bann chiffre precis​—par exemple, quantité corne ki ena lor bann la tête different zanimo. Sa bann chiffre-la zot ena zot l’importance. Selman, kan Daniel decrire sa statue-la, li pa mentionné ki quantité lé-doigt li ena. Pareil couma quantité lé-bras, la main, lé-doigt la main, la jambe ou-soit lipié ki sa statue-la ena, pena okenn signification, alors, quantité lé-doigt lipié ki sa statue-la ena, zot aussi zot pena okenn signification. Mais Daniel ti precisé ki sa bann lé-doigt lipié-la ti pou en ferraille ek en l’argile. Dapré sa description-la, nou kapav tire conclusion ki c’est Puissance mondial anglo-américain ki pou encore pé domine le monde kan sa “roche” ki represente Royaume Bondié-la pou crase lipié sa statue-la.​—Dan. 2:45.

ANGLO-AMÉRICAIN EK BÊTE SAUVAGE AVEK DEUX CORNE

12, 13. Ki sa bête sauvage avek deux corne-la representé, ek ki li faire?

¹² Mem si Puissance mondial anglo-américain c’est enn melange ferraille ek l’argile, bann vision ki Jésus ti donne Jean montré ki sa puissance-la ti pou contigne joué enn role important pendant dernier jour. Couma? Dan enn vision, Jean ti trouve enn bête sauvage avek deux corne, ki ti koz couma enn dragon. Ki sa bête sauvage bizarre-la representé? Li ena deux corne, sa vedir ki li enn double puissance. Sa bête sauvage-la aussi represente Puissance mondial anglo-américain, mais dan enn role special.​—Lire Révélation 13:11-15.

¹³ Sa bête sauvage avek deux corne-la encourage bann peuple pou faire enn zimage sa bête sauvage ki mentionné dan Révélation chapitre 13-la. Jean ti ecrire ki sa zimage-la ti pou la, apré, li ti pou disparette ek apré, li ti pou ré-apparette encore enn fois. C’est exactement seki ti arrivé ar enn l’organisation ki Grande-Bretagne ek l’États-Unis ti mette en place. Sa l’organisation-la ti ena l’objectif pou unir ek pou represente bann royaume dan le monde.d Li ti apparette apré Premier Guerre mondial ek li ti appel Société des Nations. Li ti disparette kan Deuxieme Guerre mondial ti eclaté. Pendant sa la guerre-la, peuple Bondié ti dire ki dapré sa prophetie mentionné dan Révélation-la, zimage sa bête sauvage-la ti pou ré-apparette. Ek vrai-mem li ti ré-apparette​—en tant ki l’Organisation Nation uni.​—Rév. 17:8.

14. Dan ki sens zimage la bête sauvage li “enn huitieme le roi”?

¹⁴ Jean ti decrire zimage sa bête sauvage-la couma “enn huitieme le roi.” Dan ki sens? Li pa enn huitieme la tête sa premier bête sauvage-la. Li zis enn zimage sa bête sauvage-la. N’importe ki pouvoir li ena, li gagne sa ar bann nation ki membre dan so l’organisation, surtout ar puissance ki soutenir li, setadir Puissance mondial anglo-américain. (Rév. 17:10, 11) Mais li gagne l’autorité pou agir couma enn le roi pou faire enn kitsoz bien precis ki pou ena enn grand l’effet lor l’histoire le monde entier.

ZIMAGE LA BÊTE SAUVAGE DEVORE SA PROSTITUÉ-LA

15, 16. Ki la prostitué representé, ek ki pé arrive bann dimoune ki pé soutenir li?

¹⁵ Jean ti decrire aussi enn prostitué symbolik ki pé monte lor enn bête sauvage couleur rouge vif ek pé influence li. Sa bête sauvage-la, c’est zimage sa bête sauvage avek sept la tête-la. Nom sa prostitué-la c’est “Babylone la Grande.” (Rév. 17:1-6) Sa prostitué-la represente tou bann fausse religion, en premier ena bann religion la chretienté. Bann fausse religion finn soutenir zimage sa bête sauvage-la ek zot finn essaye influence li.

¹⁶ Mais selman, pendant jour du Seigneur, Babylone la Grande finn trouve bann de l’eau​—bann dimoune ki soutenir li​—diminué dan enn fason incroyable. (Rév. 16:12; 17:15) Par exemple, kan zimage la bête sauvage ti apparette premier fois, bann religion la chretienté​—partie ki ena enn grand l’influence dan Babylone la Grande​—ti domine bann pays l’Europe ek l’Amérique. Zordi, bann religion la chretienté ek zot bann pretre finn perdi respé ek soutien beaucoup dimoune. En realité, beaucoup dimoune pensé ki religion ena enn part dan bann la guerre ou-soit responsable sa bann la guerre-la. Pli allé, bann dimoune intellectuel pé faire enn la lutte pou ki la religion arrete influence la societé.

17. Ki pou arrive fausse religion bientot, ek kifer?

¹⁷ Mais selman, fausse religion pa pou zis perdi so pouvoir tigit par tigit ek apré disparette. Sa prostitué-la pou contigne ena enn grand l’influence ek li pou essaye faire bann le roi faire tou seki li envie, ziska ki Bondié mette enn l’idée dan leker sa bann dirigeant-la. (Lire Révélation 17:16, 17.) Bientot, Jéhovah pou faire bann systeme politik dan le monde Satan, ki representé par l’Organisation Nation uni, attak bann fausse religion. Zot pou faire li perdi tou so l’influence ek zot pou prend tou so bann richesse. Si nou remonte plusieurs dizaine l’année en arriere, enn l’evenement coumsa ti kapav parette impossible pou arrivé. Zordi, sa prostitué ki pé assize lor sa bête sauvage couleur rouge vif-la pré pou tombé. Li pa pou glissé tigit-tigit, mais li pou tombé enn sel coute ek dan enn fason bien violent.​—Rév. 18:7, 8, 15-19.

DESTRUCTION BANN BÊTE SAUVAGE

18. (a) Ki la bête sauvage pou faire, ek ki resultat sa pou ena? (b) Dapré Daniel 2:44, ki bann gouvernement Royaume Bondié pou detruire? (Guette l’encadré page 19.)

¹⁸ Apré destruction bann fausse religion, Satan pou pousse la bête sauvage, setadir systeme politik ki li’nn etabli lor la terre, pou attak Royaume Bondié. Bann le roi lor la terre pa pou kapav al dan le ciel, alors zot pou tire zot colere lor bann ki pé soutenir Royaume Bondié lor la terre. Sa pou faire zot laguerre kont Bondié. (Rév. 16:13-16; 17:12-14) Daniel decrire enn l’aspect sa la guerre final-la. (Lire Daniel 2:44.) La bête sauvage ki mentionné dan Révélation 13:1, so zimage, ek la bête sauvage avek deux corne, pou detruire.

19. (a) Ki l’assurance nou kapav ena? (b) Ki fodé pa nou tardé pou faire?

¹⁹ Nou pé vive dan lepok sa septieme la tête-la. Pena okenn lot la tête ki pou apparette lor sa bête sauvage-la avant ki Bondié detruire li. Puissance mondial anglo-américain pou puissance ki pou dominé kan la fausse religion pou detruire. Bann prophetie ki Daniel ek Jean ti ecrire finn realisé dan tou ti detail. Nou kapav ena l’assurance ki destruction bann fausse religion ek la guerre Har-Maguédôn pou arrivé bientot. Bondié finn faire nou konn sa bann detail-la bien a l’avance. Eski nou pou prend compte sa bann l’avertissement-la? (2 Pierre 1:19) C’est asterla-mem ki nou bizin prend position pou Jéhovah ek soutenir so Royaume.​—Rév. 14:6, 7.

[Notes]

[L’encadré page 19]

KISANNLA KI FORME PARTIE DAN “TOU SA BANN ROYAUME-LA”?

Daniel 2:44 dire ki Royaume Bondié “pou crase tou sa bann royaume-la ek li pou fini zot.” Sa prophetie-la pé faire reference zis ar bann royaume ki forme partie dan sa statue-la.

Ki pou arrive tou bann lezot gouvernement humain? Prophetie Révélation ki koz lor mem sujet, faire nou konn plus. Li montré ki “bann le roi lor la terre entier” pou rassemblé kont Jéhovah kan pou ena “grand jour Bondié Tout-Puissant.” (Rév. 16:14; 19:19-21) Alors, pa zis bann royaume ki forme partie dan sa statue-la ki pou detruire kan pou ena Har-Maguédôn, mais aussi tou bann lezot gouvernement.