Ou l’integrité faire leker Jéhovah content

“Montré ki to sage mo garson, ek faire mo leker content, pou ki mo kapav reponn celui ki pé provok moi.”—PROV. 27:11.

1, 2. (a) Dan livre Job, ki l’accusation Satan ti faire? (b) Ki montré nou ki Satan inn contigne provok Jéhovah apré lepok Job?

JÉHOVAH ti permette Satan testé l’integrité Job, enn fidele serviteur Bondié. A cause sa, Job ti perdi tou so bann zanimo, so bann zenfant ek so la santé. Mais kan Satan ti mette en doute l’integrité Job, li pa ti pense zis Job tousel. Li ti dire: “La peau pou la peau, ek tou seki enn dimoune ena, li pou donne sa pou sap so nâme.” Sa l’accusation-la ti souleve enn question ki pa ti concerne zis Job tousel mais lezot dimoune aussi, ek sa inn contigné bien longtemps apré la mort Job.—Job 2:4.

² Apepré 600 an apré ki Job ti gagne sa bann l’epreuve-la, Salomon ti inspiré pou ecrire: “Montré ki to sage mo garson, ek faire mo leker content, pou ki mo kapav reponn celui ki pé provok moi.” (Prov. 27:11) Li clair ki dan sa lepok-la, Satan ti pé contigne provok Jéhovah. En plus, dan enn vision ki l’apotre Jean ti gagné, li ti trouve Satan pé accuse bann serviteur Bondié; sa ti passé apré ki ti’nn tire li dan le ciel enn tipé apré ki Royaume Bondié ti etabli en 1914. Oui, mem zordi, alors ki dernier jour sa mauvais le monde-la inn bien avancé, Satan encore pé mette en doute l’integrité bann serviteur Bondié!—Rév. 12:10.

 3. Ki bann leson important nou kapav aprann dan livre Job?

³ Ena trois leson important ki nou kapav aprann dan livre Job. Premierement, bann l’epreuve Job faire nou trouvé kisannla ki vrai l’ennemi bann dimoune ek ki derriere tou bann l’opposition ki peuple Bondié gagné. Sa l’ennemi-la c’est Satan le Diable. Deuxiemement, n’importe ki l’epreuve nou kapav gagné, kan nou ena bann bon relation avek Bondié sa pou permette nou garde nou l’integrité. Troisiemement, kan nou gagne bann difficulté ek kan nou pé passe par bann l’epreuve, Bondié aide nou pou enduré pareil couma Li ti aide Job. Zordi, Jéhovah faire sa par so Parole, so l’organisation ek so l’esprit saint.

Rappel toujours kisannla ki nou vrai l’ennemi

 4. Kisannla nou bizin blamé pou bann condition ki ena dan le monde?

⁴ Beaucoup dimoune pa croire ki Satan existé. Alors, mem si zot tracassé a cause bann condition ki ena dan le monde, zot pa arrivé comprend ki vrai responsable c’est Satan le Diable. Li vrai ki beaucoup malheur ki pé arrivé zordi c’est bann dimoune zot-mem ki responsable. Nou premier parent Adam ek Ève ti choisir pou dirige-zot par zot-mem sans l’aide zot Createur. Ek depuis sa, bann generation ki’nn vini apré finn agir dan enn fason ki pa sage ditou. Mais kan-mem, c’est Satan ki ti trompe Ève pou rebelle kont Bondié. C’est li ki finn developpe enn systeme mondial ki li controlé parmi bann dimoune imparfait ki’nn condamné pou mort. Satan li “bondié sa systeme-la”; alors li pa etonnant ki bann dimoune manifesté mem defaut ki li: l’orgueil, tendance pou laguerre, jalousie, enn desir pou rod gagne toujours pli beaucoup, tendance pou embete bann dimoune ek rebellion. (2 Cor. 4:4; 1 Tim. 2:14; 3:6; lire Jacques 3:14, 15.) Sa bann defaut-la finn amenn bann desaccord dan domaine politik ek religieux, la haine, corruption ek desordre ek sa inn faire bann dimoune passe beaucoup misere.

 5. Nou ena enn connaissance ki ena valeur, ki nou envie faire avek sa?

⁵ En tant ki bann serviteur Jéhovah nou ena vrai-mem enn connaissance ki ena enn grand valeur! Oui, nou koné kisannla ki responsable bann condition ki pé deterioré lor la terre. Eski sa pa pousse nou pou participe dan predication, pou faire bann dimoune koné kisannla ki vrai-mem responsable nou bann probleme? Eski nou pa content pou prend position pou vrai Bondié, Jéhovah, ek pou explik bann dimoune couma Li pou faire Satan ek bann malheur ki bann dimoune pé gagné, disparette?

6, 7. (a) Kisannla ki responsable persecution ki bann vrai adorateur Jéhovah gagné? (b) Couma nou kapav imite l’exemple Élihou?

⁶ Satan li pa zis responsable la plupart malheur ki ena dan le monde, li aussi responsable l’opposition ki peuple Bondié gagné. Li bien decidé pou testé nou. Jésus Christ ti dire l’apotre Pierre: “Simon, Simon, ecoute sa: Satan inn demann pou gagne zot pou tamine zot couma di-blé.” (Luc 22:31) Li pareil pou nou aussi, sakenn parmi nou ki suive l’exemple Jésus, pou gagne bann l’epreuve dan enn certaine fason. Pierre ti compare Satan ar “enn lion ki pé criyé ek ki pé rod kikenn pou devoré.” Ek Paul ti dire: “Tou bann ki envie reste attaché avek Bondié, en tant ki disciple Christ Jésus pou gagne persecution zot aussi.”—1 Pierre 5:8; 2 Tim. 3:12.

⁷ Kan enn frere ou-soit enn soeur gagne enn malheur, fodé pa nou pensé ki Jéhovah pé puni li pou enn kitsoz ki li’nn faire. Couma nou finn trouvé, c’est Satan ki nou veritable l’ennemi. Au lieu ki nou eloigne-nou ar sa frere ou-soit sa soeur-la, nou pou faire pareil couma Élihou ki ti koz avek Job couma enn vrai camarade. Nou soutenir nou frere dan so la lutte kont l’ennemi ki nou tou nou ena, setadir Satan. (Prov. 3:27; 1 Thess. 5:25) Nou l’objectif c’est pou aide nou frere ou-soit nou soeur pou garde so l’integrité n’importe ki arrivé, ek coumsa li pou faire leker Jéhovah content.

 8. Kifer Satan pa ti reussi faire Job arrete glorifié Jéhovah?

⁸ Premier kitsoz ki Satan ti faire Job perdi, ti so bann zanimo. Sa bann zanimo-la ti ena beaucoup valeur, kitfois sa ti pé permette Job pou gagne so la vie. Mais Job ti servi zot aussi pou faire bann sacrifice kan li ti adore Jéhovah. Apré ki Job ti sanctifié so bann zenfant, “li ti leve boner gramatin ek li ti offert bann sacrifice, dapré quantité zenfant ki li ti ena; parski Job ti dire: ‘pangar mo bann garson inn faire peché ek inn maudit Bondié dan zot leker.’ C’est coumsa ki Job ti faire touletan.” (Job 1:4, 5) Oui, Job ti offert Jéhovah bann sacrifice zanimo regulierement. Mais enn fois ki so bann l’epreuve ti’nn commencé, sa ti nepli possible. Job pa ti ena “bann kitsoz ki ena valeur” ki li ti kapav servi pou honore Jéhovah. (Prov. 3:9) Mais li ti kapav honore Jéhovah avek so la bouche, ek c’est seki li ti faire!

Developpe bann bon relation avek Jéhovah

 9. Ki pli grand di-bien nou ena?

⁹ Ki nou riche ou-soit misere, jeune ou-soit vié, nou ena enn bon la santé ou-soit non, nou kapav developpe bann bon relation avek Jéhovah. N’importe ki l’epreuve ki nou gagné, si nou proche avek Bondié sa pou permette nou pou garde nou prop l’integrité ek pou faire leker Jéhovah content. Mem certain dimoune ki pa ti ena enn grand connaissance lor la verité ti prend position avek courage pou Jéhovah ek ti garde zot l’integrité.

10, 11. (a) Couma enn parmi nou bann soeur finn reagir kan li’nn gagne bann l’epreuve ki finn testé so l’integrité? (b) Ki reponse solide sa soeur-la inn donne Satan?

¹⁰ Anou prend l’exemple soeur Valentina Garnovskaïa, enn parmi bann Témoins de Jéhovah en Russie ki, pareil couma Job, ti garde zot l’integrité malgré bann l’epreuve bien difficile. En 1945, kan li ti ena apepré 20 an, enn frere ti rann li temoignage. Frere-la ti revinn koz lor la Bible avek li deux fois, mais apré, jamais li pa’nn retrouve frere-la encore. Malgré sa, Valentina ti commence preche avek so bann voisin. A cause sa, bann l’autorité ti arrete li ek ti condamne li pou passe huit an dan enn camp. En 1953, li ti liberé ek desuite li ti recommence preché. Encore enn fois, bannla ti arrete li ek ti mette li dan enn camp—sa fois-la pou dix an. Apré ki li’nn passe plusieurs l’année dan enn camp, li ti al dan enn lot. Dan sa camp-la, ti ena certain soeur ki ti ena enn la Bible avek zot. Enn jour, enn soeur ti montré Valentina sa la Bible-la. Sa ti vrai-mem enn moment extraordinaire! Mazinn enn coup, sel la Bible ki Valentina ti’nn deja trouvé avant, ti seki li ti trouvé dan la main sa frere ki ti preche avek li en 1945-la!

¹¹ En 1967, Valentina ti gagne so liberté ek finalement li ti kapav prend bapteme pou montré ki li’nn voué so la vie ar Jéhovah. Avek zele, li ti servi so liberté pou preché ziska 1969. Mais, sa l’année-la, bannla ti rearrete li encore, ek sa fois-la li ti condamné pou passe trois an dan prison. Mais kan-mem, Valentina ti contigne preché. Avant li mort en 2001, li ti’nn aide 44 dimoune pou konn la verité. Li ti’nn passe 21 an dan prison ek dan bann camp. Li ti disposé pou sacrifié tou, mem so liberté, pou li kapav garde so l’integrité. Vers la fin so la vie, Valentina ti dire: “Jamais mo finn ena enn place pou mo-mem. Tou seki mo ti ena ti trouve zis dan enn sel valise, mais mo ti content ek satisfait pou servi Jéhovah.” Valentina ti vrai-mem donne enn reponse bien ferme kont l’accusation ki Satan ti faire ki soi-disant bann dimoune pa pou reste fidele envers Bondié dan bann l’epreuve! (Job 1:9-11) Nou kapav sur ki Valentina inn faire leker Jéhovah content ek ki Jéhovah pé attann avek impatience pou ressuscite li ek lezot dimoune ki finn mort fidele.—Job 14:15.

12. Ki role l’amour ena dan nou relation avek Jéhovah?

¹² Nou l’amitié avek Jéhovah basé lor l’amour ki nou ena pou Li. Nou admire bann qualité ki Jéhovah ena ek nou faire tou seki nou kapav pou vive en accord avek so projet. Contrairement ar seki Satan pretann, nou donne nou l’amour Jéhovah dan enn fason volontaire ek sans faire okenn condition. Sa l’amour ki sorti dan nou leker-la faire nou vinn fort pou nou kapav garde nou l’integrité kan nou gagne bann l’epreuve. Jéhovah Li, Li pou faire so part “pou veille chemin so bann fidele.”—Prov. 2:8; Ps. 97:10.

13. Couma Jéhovah considere seki nou faire pou Li?

¹³ L’amour pousse nou pou donne l’honneur nom Jéhovah, mem si nou senti ki nou pa kapav faire beaucoup. Li trouve nou bann bon mobile ek Li pa juge nou si nou pa reussi faire tou seki nou ti pou content faire. Seki important c’est pa zis seki nou faire mais aussi pou ki raison nou faire sa. Mem si Job ti bien bouleversé ek ti endure beaucoup souffrance, li ti koz lor l’amour ki li ti ena pou bann principe Jéhovah avek bann dimoune ki ti accuse li. (Lire Job 10:12; 28:28.) Dan dernier chapitre livre Job, Bondié ti dire ki Li bien en colere kont Éliphaz, Bildad ek Tsophar parski zot pa ti dire la verité. En mem temps, Jéhovah ti montré ki Li approuve Job kan quatre fois Li ti appel li “mo serviteur” ek kan Li ti demann li pou prié pou sa bann fausse consolateur-la. (Job 42:7-9) Nou aussi, anou agir dan enn fason pou ki Jéhovah donne nou so faveur.

Jéhovah soutenir so bann serviteur fidele

14. Couma Jéhovah ti aide Job pou corrige so fason pensé?

¹⁴ Job ti garde so l’integrité mem si li ti imparfait. Parfois, kan li ti gagne bann grand l’epreuve, li pa ti ena enn bon fason pensé. Par exemple, li ti dire Jéhovah: “Mo criyé toi pou vinn sap moi mais to pa reponn moi . . . Avek tou la force to la main, to garde la haine kont moi.” En plus, Job ti trop rod justifié-li-mem kan li ti dire: “Mo pena tort,” ek “pena violence lor mo la main, ek mo la priere li pur.” (Job 10:7; 16:17; 30:20, 21) Mais malgré sa, Jéhovah ti aide Job avek bonté kan Li ti pose li enn serie question ki pa ti attire l’attention lor Job. Sa ti aussi permette Job pou trouve pli bien ki c’est Bondié ki pli grand ek ki pa kapav compare enn zom ar Li. Job ti accepté direction Jéhovah ek ti corrige li-mem.—Lire Job 40:8; 42:2, 6.

15, 16. Dan ki fason Jéhovah aide so bann serviteur zordi?

¹⁵ Jéhovah donne aussi so bann serviteur direction ki zot bizin. En plus, nou gagne bann grand bienfait. Par exemple, Jésus Christ ti donne so la vie en sacrifice ek grace a sa li’nn pose enn base pou nou gagne pardon nou bann peché. Lor base sa sacrifice-la, nou kapav ena bann bon relation avek Bondié malgré nou l’imperfection. (Jacq. 4:8; 1 Jean 2:1) Jéhovah donne nou so l’esprit saint, ek kan nou gagne bann l’epreuve nou prié pou ki sa l’esprit-la soutenir nou ek donne nou la force. En plus, nou ena la Bible complet, si nou lire li ek medite lor seki ena ladan, nou pé prepare-nou-mem pou bann l’epreuve ki kapav testé nou la foi. L’etude aide nou pou comprend bann question ki’nn soulevé lor souveraineté universel Jéhovah ek lor nou prop l’integrité.

¹⁶ En plus, nou gagne bann bienfait parski nou forme partie dan enn famille spirituel international ki gagne la nourriture spirituel ar Jéhovah par moyen “l’esclave fidele et avisé.” (Mat. 24:45-47) Ena apepré 100,000 congregation Témoins de Jéhovah zordi, ek dan chaque congregation, ena bann reunion ki enseigne nou ek fortifié nou pou nou kapav faire face ar bann l’epreuve ki kapav testé nou la foi. C’est seki l’exemple Sheila, enn Témoin adolescent ki reste en Allemagne, montré nou.

17. Donne enn l’exemple pou montré ki li sage ki nou assisté reunion touletan.

¹⁷ Enn jour dan lekol, pa ti ena personne pou veille classe kot Sheila ti été. Alors, so bann camarade ti decidé pou essaye enn planche oui-ja pou konn l’avenir. Desuite Sheila ti quitte so classe, ek seki li’nn tendé plitar ti faire li content ki li’nn prend sa decision-la. Pendant ki zot ti pé servi sa planche oui-ja-la, certain parmi bann zeleve ti senti presence bann demon ek zot ti bizin sauvé tellement zot ti paniké. Mais ki ti aide Sheila pou prend decision pou quitte so classe desuite? Sheila raconté: “Pa trop longtemps avant sa l’evenement-la, nou ti discute lor bann danger bann planche oui-ja dan enn reunion dan la Salle du Royaume. Alors mo ti koné ki mo ti bizin faire. Mo ti envie faire Jéhovah plaisir pareil couma la Bible dire dan Proverbes 27:11.” Li ti vrai-mem enn bon kitsoz ki Sheila ti al reunion sa jour-la ek ti ecoute bien seki ti dire!

18. Ki personnellement ou bien decidé pou faire?

¹⁸ Sakenn parmi nou, nou bizin bien decidé pou suive bann instruction ki l’organisation Bondié donne nou. Kan nou assisté reunion regulierement, nou lire la Bible, nou etudié bann publication ki basé lor la Bible, nou faire la priere, ek nou frequente bann chretien mur, nou gagne direction ek soutien ki nou bizin. Jéhovah envie ki nou reussi garde nou l’integrité, ek Li ena confiance ki nou pou contigne reste fidele envers Li. Nou ena vrai-mem enn grand privilege pou honore nom Jéhovah, pou garde nou l’integrité ek pou faire leker Jéhovah content!

Eski ou rappel?

• Ki bann condition ek bann l’epreuve Satan responsable?

• Ki pli grand di-bien nou ena?

• Lor ki kitsoz nou l’amitié avek Jéhovah basé?

• Cite certain fason couma Jéhovah soutenir nou zordi.

[Zimage lor page 15]

Nou kapav aide bann lezot chretien pou garde zot l’integrité