Né encore enn fois—Eski c’est chemin ki amenn vers enn delivrance?

COUMA ou pou reponn sa question-la: “Eski ou né encore enn fois?” Bann million chretien a travers le monde pou reponn avek enn grand “Oui!” Zot pensé ki né encore enn fois c’est enn kitsoz ki identifié tou bann vrai chretien ek ki c’est sel fason pou gagne la vie sauve. Zot accepté l’idée bann chef religieux, couma Robert Charles Sproul, ki ti ecrire: “Si enn dimoune pa né encore enn fois, . . . alors li pa enn chretien.”

Eski ou parmi sa bann dimoune ki croire ki si ou né encore enn fois, sa vedir ki ou lor chemin ki permette ou gagne la vie sauve? Si oui, pena doute ki ou envie aide ou bann famille ek ou bann camarade pou trouve sa chemin-la ek marche lor-la. Mais pou zot kapav faire sa, zot bizin konn faire difference entre enn dimoune ki né encore enn fois ek enn dimoune ki pa né encore enn fois. Couma ou pou explik zot ki sa vedir né encore enn fois?

Beaucoup pensé ki servi sa l’expression “né encore enn fois[-la]” kan pé koz lor enn dimoune ki faire enn voeu pou servi Bondié ek Christ ek, lerla sa dimoune ki ti mort lor plan spirituel-la li vinn vivant lor plan spirituel. En realité, concernant enn dimoune ki né encore enn fois, enn dictionnaire donne sa definition-la: “C’est enn chretien ki’nn renouvelé ou-soit ki’nn confirme l’engagement so la foi surtout apré ki li’nn passe par enn l’experience religieux ki’nn bien touche li.”—Merriam-Webster’s Collegiate Dictionary—Eleventh Edition.

Eski sa pou sok ou, pou aprann ki la Bible pa d’accord avek sa definition-la? Eski ou ti pou content koné ki Parole Bondié enseigné vrai-mem concernant né encore enn fois? Ou pou tire beaucoup profit si ou examine sa sujet-la plus en detail. Kifer? Parski enn connaissance exact lor seki vedir né encore enn fois pou affecté ou la vie ek seki ou pé attann pou l’avenir.

Ki la Bible enseigné?

Sel place dan la Bible kot faire mention sa l’expression “né encore enn fois[-la]” trouve dan Jean 3:1-12, ki koz lor enn conversation interessant ki ti ena entre Jésus ek enn chef religieux dan Jérusalem. Ou pou trouve sa recit biblik-la en entier dan l’encadré. Nou invite ou pou lire li avek attention.

Dan sa bann passage-la, Jésus attire nou l’attention lor plusieurs point ki concerne enn “nouveau naissance.”a Avredir, conversation Jésus aide nou pou reponn sa cinq question important-la:

◼ Ki l’importance enn nouveau naissance ena?

◼ Eski c’est nou ki decidé si nou pou gagne enn nouveau naissance?

◼ Ki so but?

◼ Couma li arrivé?

◼ Ki changement eski li amené?

Anou examine sa bann question-la enn par enn.

Enn nouveau naissance—Ki l’importance li ena?

TOUTE longue so conversation avek Nicodème, Jésus ti mette l’accent lor enn kitsoz: ki li bien important pou passe par enn nouveau naissance ou-soit né encore enn fois. Couma li’nn faire li bien comprend sa?

Dan so conversation avek Nicodème, remarké couma Jésus ti mette l’accent lor l’importance sa nouveau naissance-la. Li ti dire: “Si enn kikenn pa né encore enn fois, li pa kapav trouve royaume Bondié.” (Jean 3:3) Bann mot “si enn kikenn pa” ek “pa kapav” montré nou ki nouveau naissance li bien necessaire. Anou prend enn l’exemple. Si enn dimoune dire: “Si pena soleil, pa pou kapav ena li-jour,” sa vedir ki soleil bien important pou ki kapav ena li-jour. Pareil, Jésus ti dire ki pou trouve Royaume Bondié li bien necessaire ki enn dimoune li né encore enn fois.

Finalement, pou tire tou bann doute ki ti encore ena lor sa sujet-la, Jésus ti dire: “Zot bizin né encore enn fois.” (Jean 3:7) Li clair ki dapré Jésus, né encore enn fois li enn condition—enn kitsoz bien necessaire—pou enn dimoune “rente dan royaume Bondié.”—Jean 3:5.

Parski Jésus ti trouve enn nouveau naissance couma enn kitsoz bien important, alors, bann chretien bizin assure-zot ki zot bien comprend sa sujet-la couma bizin. Par exemple, eski ou pensé ki enn chretien kapav choisir par li-mem pou né encore enn fois?

[L’encadré lor page 5]

“Si pena soleil, pa pou kapav ena li-jour”

Enn nouveau naissance—Eski c’est enn decision personnel?

KISANNLA ki donne enn dimoune enn nouveau naissance? Kan certain predicateur encourage zot l’auditoire pou vinn bann chretien ki né encore enn fois, zot cite sa bann parole Jésus-la: “Zot bizin né encore enn fois.” (Jean 3:7) Sa bann predicateur-la servi sa bann parole-la couma enn l’ordre kan zot dire: “Bizin né encore enn fois!” Alors, zot enseigné ki chaque croyant bizin decidé pou obeir Jésus ek faire bann pas ki necessaire pou gagne enn nouveau naissance. Dapré sa raisonnement-la, gagne enn nouveau naissance li enn decision personnel. Mais eski sa li en accord avek seki Jésus ti dire Nicodème?

Kan nou lire bien bann parole Jésus, nou trouvé ki Jésus pa finn enseigné ki c’est bann zom ki kapav decidé si zot pou né encore enn fois ou-soit non. Kifer eski nou dire sa? L’expression grec ki’nn traduire par “né encore enn fois” kapav aussi traduire par “bizin né depuis la-haut.”a Alors, dapré sa lot traduction-la, enn nouveau naissance li sorti “la-haut”—setadir, li “sorti dan le-ciel,”ou-soit “kot [nou] Papa.” (Jean 19:11, note; Jacques 1:17) Oui, c’est Bondié ki faire sa.—1 Jean 3:9.

Si nou garde sa l’expression “sorti la-haut[-la]” dan nou l’esprit, li pa pou difficile pou comprend kifer enn dimoune pa kapav faire li-mem né encore enn fois. Pense lor ou naissance physik. Eski c’est ou ki’nn choisir pou né? Pa ditou! C’est ou papa ki finn donne ou la vie. Li pareil, nou kapav né encore enn fois zis si Bondié, nou Papa ki dan le ciel, donne nou enn nouveau naissance. (Jean 1:13) Alors, l’apotre Pierre ti ena raison kan li ti dire: “Nou beni Bondié ek Papa nou Seigneur Jésus Christ, parski dan so grand misericorde, Li finn donne nou enn nouveau naissance.”—1 Pierre 1:3.

Eski c’est enn l’ordre?

Malgré sa, certain kapav demann zot: ‘Si vrai-mem personne pa kapav decide par li-mem pou né encore enn fois, kifer Jésus inn donne sa l’ordre-la: “Zot bizin né encore enn fois”?’ C’est enn bon question. Apré tou, si bann parole Jésus li vrai-mem enn l’ordre, li ti pou demann nou enn kitsoz ki nou pa pou kapav faire. Mais sa li pa parette logik. Mais, ki vedir l’expression zot bizin “né encore enn fois”?

Si nou guette bien sa phrase-la dan so langue original nou trouvé ki c’est pa enn l’ordre. Au contraire c’est enn declaration. Kan Jésus ti pé dire “zot bizin né encore enn fois,” li ti pé faire enn declaration, li pa ti pé donne enn l’ordre. Li ti dire: “Li important ki zot né depuis la-haut.”—Jean 3:7, Modern Young’s Literal Translation.

Pou bien comprend difference entre enn l’ordre ek enn declaration, anou prend enn l’exemple. Maziné ki dan enn pays ena plusieurs lekol. Ek enn dan sa bann lekol-la prend zis bann zenfant ki citoyen sa pays-la. Enn jour enn garson ki sorti enn lot pays al dan sa lekol-la ek dire directeur lekol-la: “Mo envie vinn dan ou lekol.” Directeur lekol-la dire li: “Pou to vinn sa lekol-la to bizin enn citoyen sa pays-la.” Bann parole sa principal-la zot pa enn l’ordre. Li pa pé donne l’ordre sa garson-la pou, “vinn enn citoyen sa pays-la!” Principal-la inn simplement dire enn fait—enn condition pou li kapav rente dan sa lekol-la. Li pareil kan Jésus ti dire: “Zot bizin né encore enn fois,” li ti pé zis dire enn fait—enn condition pou enn dimoune kapav “rente dan royaume Bondié.”

Sa dernier pensé-la—Royaume Bondié—ena enn rapport direct avek enn lot question ki concerne enn nouveau naissance. Ki but enn nouveau naissance? Kan nou konn reponse sa question-la sa pou permette nou bien comprend ki vedir né encore enn fois.

[Note]

[Zimage lor page 6]

Ki comparaison nou kapav faire entre enn nouveau naissance ek enn naissance physik?

Enn nouveau naissance—Ki so but?

BEAUCOUP chretien pensé ki zot bizin né encore enn fois pou zot gagne la vie sauve pou touletan. Mais noté seki Jésus li-mem ti dire lor kifer bizin ena enn nouveau naissance. Li ti dire: “Si enn kikenn pa né encore enn fois, li pa pou kapav trouve royaume Bondié.” (Jean 3:3) Alors, enn dimoune bizin né encore enn fois pou li kapav rente dan Royaume Bondié, pa pou li gagne la vie sauve. ‘Mais,’ certain kapav demandé, ‘eski sa deux l’expression-la—setadir rente dan Royaume ek gagne la vie sauve—pa vedir mem zaffaire?’ Non, pa ditou. Pou comprend difference ki ena entre sa deux l’expression-la, anou guetté premierement ki sa vedir “royaume Bondié.”

Enn royaume c’est enn forme gouvernement. Alors, l’expression “royaume Bondié” vedir “gouvernement Bondié.” La Bible enseigné ki Jésus Christ, “Fils de l’homme,” li le Roi dan Royaume Bondié ek ki ena lezot dirigeant ki regné ensam avek li. (Daniel 7:1, 13, 14; Matthieu 26:63, 64) En plus, dan enn vision ki l’apotre Jean ti gagné, li ti aprann ki sa bann le roi ki pou regne avek Jésus-la zot bann dimoune ki sorti “dan tou tribu, ek langue ek peuple ek nation” ek zot pou “regne couma bann le roi ki dirige la terre.” (Révélation 5:9, 10; 20:6) Parole Bondié montré aussi ki sa bann ki pou regné avek Jésus-la zot forme enn “ti troupeau,” en tou 144,000 dimoune “ki finn acheté depuis lor la terre.”—Luc 12:32; Révélation 14:1, 3.

Kot-sa Royaume Bondié trouvé? Nou appel aussi “royaume Bondié,” “royaume ki dan le ciel,” ek sa montré ki Jésus ek bann lezot le roi ki pou avek li, pou dirigé depuis le ciel. (Luc 8:10; Matthieu 13:11) Alors, nou trouvé ki Royaume Bondié li enn gouvernement ki trouve dan le ciel ek c’est Jésus Christ avek enn groupe dirigeant ki finn choisir parmi bann dimoune ki pou regné dan sa gouvernement-la.

Mais alors, ki Jésus ti pé faire nou comprend kan li ti dire ki pou “rente dan royaume Bondié” enn dimoune bizin né encore enn fois? Sa vedir ki enn dimoune bizin né encore enn fois pou li kapav regne avek Jésus dan le ciel. Alors, pou resumé nou kapav dire ki but enn nouveau naissance c’est simplement pou prepare enn ti groupe dimoune pou regné dan le ciel.

Ziska ler, nou finn trouvé ki enn nouveau naissance li bien important, c’est Bondié ki permette sa, ek li pé prepare enn ti groupe dimoune pou regné dan le ciel. Mais couma pou ena sa nouveau naissance-la?

[Zimage lor page 7]

But enn nouveau naissance c’est pou prepare enn ti groupe dimoune pou regné dan le ciel

[Zimage lor page 7]

Jésus Christ ek enn groupe dirigeant ki finn choisir parmi bann dimoune, c’est zot ki forme Royaume Bondié

Enn nouveau naissance—Couma li arrivé?

KAN Jésus ti koz avek Nicodème, li pa ti zis dire kifer enn nouveau naissance li important, kisannla ki determine sa, ek ki so but. Li ti dire li aussi dan ki fason, ena enn nouveau naissance. Jésus ti dire: “Si enn kikenn pa né avek de l’eau ek l’esprit, li pa kapav rente dan royaume Bondié.” (Jean 3:5) Alors, c’est par de l’eau ek l’esprit saint ki enn dimoune né encore enn fois. Mais, ki l’expression “de l’eau ek l’esprit” representé?

“De l’eau ek l’esprit”—Ki zot été?

Nicodème ti enn chef religieux juif, alors pena doute ki li ti bien comprend maniere ki—seki bann dimoune appel l’Ancien Testament—ti servi l’expression “l’esprit Bondié,” setadir la force active Bondié ki kapav pousse bann dimoune pou faire bann kitsoz extraordinaire. (Genèse 41:38; Exode 31:3; 1 Samuel 10:6) Alors, kan Jésus ti servi mot “l’esprit,” Nicodème ti comprend ki li ti pé koz lor l’esprit saint, la force active Bondié.

Kan Jésus ti servi mot “de l’eau,” ki sa ti representé? Si nou guette bann evenement ki finn cité zis avant ek apré conversation ki Jésus ti gagné avek Nicodème, nou trouvé ki Jean Baptiste ek bann disciple Jésus ti pé baptise bann dimoune dan de l’eau. (Jean 1:19, 31; 3:22; 4:1-3) Dan Jérusalem bann dimoune ti bien konn sa pratik-la. Alors, kan Jésus ti koz concernant de l’eau, Nicodème ti comprend ki Jésus pa ti pé koz lor de l’eau en general mais plutot lor de l’eau bapteme.a

Baptisé “avek l’esprit saint”

Si “né avek de l’eau” vedir baptise dan de l’eau, ki sa vedir ‘né avek . . . l’esprit’? Zis avant conversation ki ti ena entre Nicodème ek Jésus, Jean Baptiste ti annoncé ki pa selman de l’eau mais l’esprit aussi ti pou joué enn role dan bapteme. Li ti dire: “Moi, mo ti baptise zot avek de l’eau, mais li [Jésus], li pou baptise zot avek l’esprit saint.” (Marc 1:7, 8) C’est Marc ki dan so l’Evangile, pou premier fois ti raconte enn bapteme coumsa. Li ti ecrire: “Dan sa bann jour-la, Jésus ti sorti Nazareth dan Galilée ek Jean ti baptise li dan Jourdain. Ek desuite couma li ti sorti dan de l’eau, li ti trouve le ciel ouvert, ek l’esprit ti desann lor li couma enn colombe.” (Marc 1:9, 10) Kan ti plonge Jésus dan Jourdain, li ti baptisé avek de l’eau. Ek kan li ti gagne l’esprit ki ti sorti dan le ciel, li ti baptisé avek l’esprit saint.

Environ trois an apré so bapteme, Jésus ti rassure so bann disciple: “Dan deux-trois jour encore zot pou baptisé avek l’esprit saint.” (Actes 1:5) Kan eski sa finn arrivé?

En l’an 33 nou lepok, jour la Pentecôte, environ 120 disciple Jésus ti reuni dan enn lakaz dan Jérusalem. “Enn coute enn tapaz couma enn di-vent bien fort ti sorti dan le ciel, ek ti rempli net sa lakaz kot zot ti pé assizé-la. Ek zot ti commence trouve bann la langue dan forme difé . . . , ek zot tou ti rempli avek l’esprit saint.” (Actes 2:1-4) Sa mem jour-la, ti encourage lezot dimoune dan Jérusalem pou baptise zot dan de l’eau. L’apotre Pierre ti dire enn la foule: “Repenti, ek sakenn parmi zot prend bapteme au nom Jésus Christ pou gagne pardon zot peché, ek zot pou gagne don gratuit l’esprit saint.” Ki ti zot reaction? “Bann ki ti accepté so parole avek tou zot leker ti’nn prend bapteme, ek sa jour-la preské trois mille nâme finn ajouté.”—Actes 2:38, 41.

Enn kitsoz ki arrivé en deux l’etape

Ki sa bann bapteme-la aprann nou concernant nouveau naissance? Sa montré ki enn nouveau naissance arrivé en deux l’etape. Remarké ki d’abord, Jésus ti prend bapteme dan de l’eau. Apré li ti gagne l’esprit saint. Li pareil pou bann premier disciple. Zot ti baptisé d’abord dan de l’eau (certain par Jean Baptiste), ek c’est apré sa ki zot ti gagne l’esprit saint. (Jean 1:26-36) Sa 3,000 nouveau disciple-la aussi, d’abord zot ti baptisé dan de l’eau, ek apré zot ti gagne l’esprit saint.

Kan nou pense seki finn passé jour la Pentecôte l’an 33 nou lepok, couma eski nouveau naissance bizin faire zordi? Pareil couma sa ti passé pou bann zapotre Jésus ek pou bann premier disciple. Avant, enn dimoune bizin repenti ar so bann peché, arrete so mauvais conduite, promette Jéhovah ki li pou adore Li ek servi Li toute longue so la vie, ek montré zot tou ki li’nn faire sa promesse-la par bapteme de l’eau. Apré, si Bondié choisir li pou regne dan So Royaume, Jéhovah pou oint li avek l’esprit saint. Alors nou trouvé ki enn nouveau naissance passe par deux l’etape. Premierement, c’est par bapteme dan de l’eau kot la dimoune-la ki decidé; ek deuxiemement, c’est par bapteme par l’esprit ek la, c’est Bondié ki decidé. Kan enn dimoune gagne toulé-deux bapteme, li’nn gagne enn nouveau naissance.

Alors, kifer eski dan so conversation avek Nicodème Jésus ti servi l’expression “né avek de l’eau ek avek l’esprit”? Pou montré ki bann ki baptisé avek de l’eau ek l’esprit pou konn enn changement extraordinaire. Dan prochain lartik nou pou examine sa point-la concernant nouveau naissance.

[Note]

[Zimage lor page 9]

Jean ti baptise bann Israélite ki ti repenti dan de l’eau

Enn nouveau naissance—Ki changement li amené?

KIFER Jésus ti servi l’expression ‘né avek l’esprit’ kan li ti koz lor bapteme avek l’esprit saint? (Jean 3:5) Dan enn sens symbolik, mot “naissance” vedir “commencement,” pareil couma dan l’expression “naissance enn nation.” Alors, l’expression “nouveau naissance” vedir enn “nouveau commencement.” Dan sa cas-la, dan enn sens symbolik mot “né” ek “nouveau naissance” montré ki pou ena enn nouveau commencement, enn changement concernant relation ki ena entre bann ki baptisé avek l’esprit saint ek Bondié. Couma eski sa changement-la passé?

Pou expliké couma Bondié prepare bann dimoune pou al regné dan le ciel, l’apotre Paul ti servi enn exemple ki existé dan la vie famille. Li ti ecrire bann chretien so lepok ki Bondié ti pou ‘adopté zot couma bann garson’ ek lerla Li ti pou kapav traite zot “couma so bann garson.” (Galates 4:5; Hébreux 12:7) L’exemple enn adoption kapav aide nou bien comprend ki bann qualité changement ki ena kan enn kikenn baptise avek l’esprit saint. Mais pou nou kapav bien comprend sa, anou reguette l’exemple sa garson etranger ki envie rente dan sa lekol ki ti prend zis bann citoyen-la.

Enn changement ki provoké par enn adoption

Dan sa l’exemple-la, sa garson-la pa ti kapav rente dan sa lekol-la parski li pa ti enn citoyen sa pays-la. Mais enn jour ena enn grand changement ki arrivé. Enn dimoune ki citoyen sa pays-la adopté sa garson-la. Ki l’effet sa ena lor sa garson-la? Parski sa missié-la inn adopté li couma so garson, asterla li ena mem droit ki lezot zenfant ki citoyen sa pays-la—li ena droit aussi pou rente dan sa lekol-la. Sa adoption-la inn change completement seki li kapav faire.

Sa montré ki arrive bann ki gagne enn nouveau naissance dan enn fason plus important. Anou guette deux-trois point ki pareil. Garson dan sa l’exemple-la pou gagne enn place dan sa lekol-la zis si li rempli bann condition, setadir, si li enn citoyen sa pays-la. Mais, par li-mem li pa kapav rempli sa condition-la. Dan mem fason, certain dimoune pou gagne enn place dan Royaume Bondié ki trouve dan le ciel, mais zis si zot rempli condition ki bizin—setadir “né encore enn fois.” Mais, par zot-mem, zot pa kapav rempli sa condition-la, parski c’est Bondié ki decidé kisannla pou gagne enn nouveau naissance.

Ki finn change situation sa garson-la? Bann demarche ki finn faire pou adopté li. Nou reconette ki sa bann demarche-la pa finn change garson-la li-mem. Apré so l’adoption li ti encore mem garson. Apré, ki ti fini faire tou bann demarche pou adopté li, garson-la ti gagne enn nouveau l’identité. Li’nn gagne enn nouveau commencement dan la vie—coumadir enn nouveau naissance. Li’nn vinn garson sa missié-la, seki ti donne li droit pou al dan sa lekol-la ek forme partie dan famille sa missié-la.

Dan mem fason, Jéhovah ti change situation enn groupe dimoune ki imparfait kan li’nn faire bann demarche legal pou adopté zot couma so bann zenfant. L’apotre Paul ki ti faire parti sa groupe-la , ti ecrire lezot chretien: “Zot inn gagne l’esprit Bondié ki’nn adopté zot couma bann garson, par sa l’esprit-la nou criyé: ‘Abba, Papa!’ Sa l’esprit-la li-mem temoigne avek nou l’esprit ki nou bann zenfant Bondié.” (Romains 8:15, 16) Oui, grace a sa l’adoption-la, sa bann chretien-la finn forme parti dan famille Bondié, ou-soit zot inn vinn “bann zenfant Bondié.”—1 Jean 3:1; 2 Corinthiens 6:18.

Bien sur, sa l’adoption ki Bondié faire-la pa’nn change bann ki finn adopté, parski zot reste imparfait. (1 Jean 1:8) Mais, pareil couma Paul ti expliké, enn fois ki tou bann demarche legal pou zot adoption inn fini, zot gagne enn nouveau l’identité. En mem temps, l’esprit Bondié mette dan zot leker enn conviction bien solide ki zot pou regne avek Christ dan le ciel. (1 Jean 3:2) Sa conviction bien solide-la faire zot trouve la vie dan enn fason bien-bien different. (2 Corinthiens 1:21, 22) Oui, pou zot c’est enn nouveau commencement dan zot la vie—enn nouveau naissance.

Concernant sa bann garson ki Bondié inn adopté-la, la Bible dire: “Zot pou vinn pretre Bondié ek Christ, ek zot pou regne couma bann le roi avek li pendant mille an.” (Révélation 20:6) Avek Christ, sa bann garson ki Bondié inn adopté-la pou regné couma le roi dan Royaume Bondié, ou-soit gouvernement ki trouve dan le ciel. L’apotre Pierre ti dire bann lezot chretien ki zot pou gagne “enn l’heritage ki pa kapav pourri, ni vinn impur, ni fletri” ki “finn reservé pou zot dan le ciel.” (1 Pierre 1:3, 4) Vrai-mem, c’est enn l’heritage ki ena enn grand valeur!

Mais, sa regne-la souleve enn question. Si bann ki né encore enn fois pou regné couma bann le roi dan le ciel, alors lor kisannla zot pou regné? Nou pou guette reponse sa question-la dan prochain lartik.

[Zimage lor page 10]

Ki Paul inn dire concernant l’adoption?

Certain pou dirigé, mais beaucoup pou gagne benediction

DEPUIS lepok bann zapotre, Bondié pé choisir parmi bann dimoune, enn ti groupe chretien fidele ek Li adopté zot couma so bann garson. Changement ki sa bann garson adoptif-la koné li tellement complet, ki Parole Bondié decrire sa couma enn nouveau naissance. Raison kifer ena sa nouveau naissance-la c’est pou prepare sa bann serviteur Bondié-la pou vinn bann dirigeant dan le ciel. (2 Timothée 2:12) Pou gagne sa privilege-la, zot bizin mort ek ressuscité pou al vive dan le ciel. (Romains 6:3-5) Ek dan le ciel, ensam avek Christ “zot pou regne couma bann le roi ki dirige la terre.”—Révélation 5:10; 11:15.

Mais, Parole Bondié dire aussi ki a part bann ki né encore enn fois, ena lezot dimoune, ki pou gagne la vie pou touletan. La Bible (ki li bann Écritures hébraïques ou-soit grecques chrétiennes) montré ki Bondié ena projet pou sauve deux groupe dimoune—enn