Soratra Manana Heviny Manokana

“IEHOVA SIT TIBI CUSTOS”

IREO teny ireo, izay voasoratra eo amin’ny rindrina anoloana amin’ny trano naorina tamin’ny taonjato faha-17 ao Celerina, any Soisa atsinanana, dia midika hoe “Ho mpiaro anao anie i Jehovah”. Ao amin’io faritra be tendrombohitra io, dia tsy maningana ny mahita ny anaran’Andriamanitra voasokitra eo amin’ny metaly na natao hosodoko eo amin’ny trano sy fiangonana ary trano fonenan’ny pretra tranainy naharitra taonjato maro. Ahoana no nahatonga ny anaran’i Jehovah ho fanta-daza toy izany?

Nanjary provansy romana i Rhétie fahizay (mahafaoka tapany amin’i Alemaina atsimo-atsinanana sy i Autriche ary i Soisa atsinanana ankehitriny) tamin’ny 15 al.f.i. Nanjary niteny romanche, ny mponina tao. Fiteny nifototra tamin’ny fiteny latina izy io sady nivoatra ho fitenim-paritra maromaro, izay mbola ampiasain’ny sasany any amin’ireo lohasaha manamorona an’i Alpes any Soisa sy i Italia avaratra.

Rehefa nandeha ny fotoana, dia nisy ampahany tamin’ny Baiboly nadika tamin’ny fiteny romanche. Nirakitra ny Salamo sy ny Soratra Grika Kristiana ny fanontana iray, dia ny Biblia Pitschna. Tao amin’io Baiboly io, navoaka tamin’ny 1666, dia niseho imbetsaka hatramin’ny voalohany ka hatramin’ny faran’ny Salamo ny anarana hoe Iehova. Koa satria ny Baiboly no boky novakina voalohany indrindra tao an-trano, dia nanjary nifankazatra tamin’ny anaran’ilay Mpamorona ireo mpamaky ny Biblia Pitschna.

Kanefa, tsy liana tamin’ireo zavatra ara-baiboly ireo taranaka nandimby. Maro no tsy nisahirana mba hanontany ny hevitry ny teny hoe “Iehova”, no sady tsy niezaka ny hanazava azy io ny klerjy. Koa tamin’izany, dia nanjary fandravahana fotsiny nampiavaka vanim-potoana iray efa lasa ireny soratra ireny.

Tao anatin’ireo am-polony taona faramparany, dia nitranga ny fampianarana indray niavaka iray. Tonga avy tany amin’ny faritra iva toerana any Soisa ny Vavolombelon’i Jehovah, ka nandany ny fialan-tsasany tany amin’ireny lohasaha kanto ireny ary nanao fiezahana manokana mba hampianatra an’ireo mponina momba ilay Andriamanitra izay manana anarana hoe Jehovah. Nanorim-ponenana tao amin’io faritra io mihitsy aza ny Vavolombelona sasany, hany ka afaka mandany fotoana misimisy kokoa hiresahana amin’ny olona momba ny fikasana mahatalanjon’ilay Mpamorona ho an’ny tany sy ny olona, izy ireo. Araka izany, ireny soratra amin’ny teny romanche tranainy ireny dia manjary misy heviny noho ny fianaran’ny olona momba an’i Jehovah, ilay Andriamanitra marina.

[Sary, pejy 32]

IEHOVA PORTIO MEA: Anjarako Jehovah. — Jereo ny Salamo 119:57.