Davida sy Saoly

Nataon’i Saoly lehiben’ny miaramila i Davida, rehefa avy namono an’i Goliata. Nandresy foana i Davida, ka lasa tian’ny vahoaka. Isaky ny avy niady izy, dia nitsena azy ny vehivavy, ary nandihy sady nihira hoe: ‘I Saoly nahafaty an’arivony, fa i Davida kosa nahafaty an’aliny.’ Lasa nialona an’i Davida àry i Saoly ka nitady hamono azy.

Nahay nitendry harpa i Davida. Rehefa nitendry harpa ho an’i Saoly izy indray andro, dia notorahan’i Saoly lefona. Nahay niala anefa izy, ka ny rindrina indray no voa. Nitady hamono an’i Davida foana i Saoly taorian’izay. Voatery nitsoaka i Davida tamin’ny farany, ka niafina tany amin’ny tany karakaina.

Nitondra miaramila 3 000 i Saoly ka lasa nitady an’i Davida. Niafina tao amin’ny lava-bato anankiray i Davida sy ny namany indray andro, ary sendra niditra tao koa ry Saoly. Dia hoy ny naman’i Davida: ‘Izao ianao no afaka mamono an’i Saoly.’ Nijaikojaiko nankeo amin’i Saoly i Davida, dia notapahiny ny sisin’akanjony, nefa tsy fantatr’i Saoly akory. Nanenina be anefa i Davida avy eo satria tsy nanaja ny voahosotr’i Jehovah izy. Tsy navelany hamono an’i Saoly àry ny namany. Niteny tamin’i Saoly avy teny lavidavitra izy avy eo hoe: ‘Ianao ange teo azoko novonoina fa tsy novonoiko e!’ Tsy nitady hamono an’i Davida intsony ve i Saoly taorian’izay?

Mbola nitady an’i Davida ihany i Saoly sy ny miaramilany. Indray alina anefa rehefa natory ry zareo, dia iny i Davida sy Abisay zanak’anabaviny fa nijaikojaiko nanatona. Tafatory koa tamin’izay i Abnera mpiambina an’i Saoly. Dia hoy i Abisay: ‘Ao hovonoiko i Saoly.’ Hoy anefa i Davida: ‘An an an! I Jehovah ihany no hanasazy azy. Alaivo fotsiny ny lefony sy ilay fasiany rano, dia andao handeha.’

Niakatra teo amin’ny tendrombohitra teo akaiky teo i Davida, dia niantsoantso hoe: ‘Abnera, fa naninona ianao no tsy niambina ny mpanjaka? Aiza izao ilay fasiany rano sy ny lefony?’ Fantatr’i Saoly ny feon’i Davida, dia hoy izy: ‘Afaka namono an’ahy mihitsy ianao, nefa tsy namono. Fantatro fa ianao no ho mpanjakan’ny Israely any aoriana any.’ Lasa nody i Saoly avy eo. Fantatrao ve fa nisy tia an’i Davida ihany ny havan’i Saoly?