Tsy te hilaza àry i Mosesy hoe efa nisy talohan’i Amaleka ny Amalekita, rehefa nitantara ny zava-nitranga tamin’ny andron’i Abrahama, izay velona talohan’i Amaleka, izy. Azo inoana kosa fa ilay faritra fantatry ny olona tamin’ny androny no nantsoiny hoe “faritra rehetra nisy ny Amalekita.” (Ge 14:7) Tany avaratr’i Kadesi-barnea tany an-tany efitr’i Negeba, any amin’ny faritra atsimon’i Palestina, no nisy ny Amalekita. Nisy toby nandoa hetra tamin’izy ireo anefa hatrany amin’ny Saikinosin’i Sinay ka hatrany amin’ny faritra avaratr’i Arabia. (1Sa 15:7) Mety ho nisy fotoana aza nipaka hatrany amin’ny tendrombohitr’i Efraima mihitsy ny faritra nofehezin’izy ireo.​—Mpts 12:15.

(Hazazôna-tamàra) [Tany Misolampy Misy Vatokely sy Hazo Palmie].

Tanànan’ny Amorita akaikin’ny Lemaka Ivan’i Sidima angamba. Resin’i Kedorlaomera Mpanjaka sy ny mpanjaka niaraka taminy ny Amorita tao Hazazona-tamara. (Ge 14:5-8) Tonga hanafika an’i Joda ireo miaramila avy any Moaba sy Amona ary ny faritra be tendrombohitr’i Seira, taonjato maro tatỳ aoriana. Tao “Hazazona-tamara, izany hoe En-jedy” izy ireo. (2Ta 20:2, 10, 11) Milaza ny manam-pahaizana maro fa toerana teo atsimon’i En-jedy io voalazan’ny Genesisy io. Teny nampiana tatỳ aoriana àry, hoy izy ireo, ilay hoe “izany hoe En-jedy.” Toa mbola ahitana ilay anarana hoe “Hazazona-tamara” anefa amin’ilay hoe Lohasaha Falehan-driaka Hasasa (Nahal Hazezona) (10 km eo ho eo avaratr’ilay toerana lazaina fa En-jedy io lohasaha io). Mety tsara hilazana ny faritr’i En-jedy koa ny hevitry ny hoe Hazazona-tamara. Nilaza mantsy i Josèphe fa nisy ny “hazo palmie tsara indrindra” tao amin’ilay faritra. (Rakitry ny Ela Jiosy, IX, 7 [i, 2]) Raha toerana tany atsimo kokoa àry ilay voalazan’ny Genesisy, dia mety ho toerana roa no Hazazona-tamara: Ilay nantsoina hoe En-jedy, na ilay nantsoina fotsiny hoe Tamara, tany atsimoandrefan’ny Ranomasina Maty.​—Ezk 47:19; 48:28.