Inona no fiteny nampiasain’i Jesosy? Samy manana ny heviny ireo manam-pahaizana. Hoy anefa ny Profesora Ernest Wright momba ny fiteny tany Palestina fony tetỳ an-tany i Jesosy Kristy: “Nampiasa fiteny samihafa ny olona tany amin’ireo tanàn-dehibe. Ny teny grika sy aramianina no fiteny niombonana. Mety ho nahay an’ireo fiteny ireo ny ankamaroan’ny mponina, na dia ny teny grika aza no tena nampiasain’ireo tanàna ‘maoderina’ na ‘tandrefana’ toa an’i Kaisaria sy Samaria. Niteny latinina ny miaramila sy manamboninahitra romanina, fa ny Jiosy ortodoksa kosa mety ho nifampiresaka tamin’ny teny hebreo izay fantatsika fa tsy teny hebreo tranainy na teny aramianina, na dia nitovy tamin’ireo fiteny ireo aza.” Hoy koa izy momba ny fiteny nampiasain’i Jesosy Kristy: “Misy adihevitra be hoe inona no fiteny nampiasain’i Jesosy. Tsy tena fantatsika raha niteny grika na latinina izy, fa teny aramianina na teny hebreo nifangaro teny aramianina fampiasan’ny besinimaro no nampianarany. Niteny hebreo i Paoly rehefa niresaka tamin’ilay vahoaka tao amin’ny Tempoly (As 21:40). Teny aramianina izany, hoy ny manam-pahaizana. Mety ho ny teny hebreo fampiasan’ny Jiosy koa anefa izany.”​—Arkeolojia Momba ny Baiboly, 1962, p. 243.

Milaza ny Nehemia 8:8 fa rehefa namaky ny Lalàna ny Levita, dia “nanazava ny heviny”, ary “nataon’izy ireo azon’ny olona tsara” izany. Misy àry milaza fa tsy tena azon’ny olona avy tany an-tsesitany ny teny hebreo, ka voatery nohazavaina tamin’ny teny aramianina ny zavatra sasany. Na marina izany na tsia, dia ny fanazavana ny hevitry ny Lalàna sy ny fomba nampiharana azy io no tena asongadin’io andinin-teny io.​—Ampit. Mt 13:14, 51, 52; Lk 24:27; As 8:30, 31.