“Anaram-baovao” nomen’i Jehovah

 6. Inona no noeritreretin’i Jehovah homena an’i Ziona?

⁶ Inona no noeritreretin’i Jehovah homena an’i Ziona, ilay ‘vady nampakariny’ any an-danitra, izay mifanitsy amin’i Jerosalema fahiny? Hoy izy: “Ny firenena hahita ny fahamarinanao, ary ny mpanjaka rehetra hahita ny voninahitrao; dia homena anaram-baovao hianao, izay hotononin’ny vavan’i Jehovah.” (Isaia 62:2) Voatery nahita ny nitandreman’ny Isiraelita ny fahamarinana ireo firenena. Na ireo mpanjaka aza voatery nanaiky fa nampiasa an’i Jerosalema i Jehovah, ary tena tsinontsinona ny fitondran’izy ireo raha ampitahaina amin’ny Fanjakan’i Jehovah.—Isaia 49:23.

 7. Mampiseho inona ilay anarana vaovaon’i Ziona?

⁷ Nanome anaram-baovao an’i Ziona i Jehovah izao, mba hanamarinana fa niova ny toe-javatra nisy azy io. Nasehon’io anarana vaovao io fa nahazo fitahiana sy nomem-boninahitra ny zanak’i Ziona teto an-tany nanomboka tamin’ny 537 T.K.a Nasehon’izy io koa fa neken’i Jehovah ho fananany i Ziona. Mientam-po ny Isiraely ara-panahy ankehitriny, satria ankasitrahan’i Jehovah toy izany, ary miara-mifaly aminy ny ondry hafa.