NAHOMA

(Nahòma) [Mpampionona [izany hoe, mpampahery]].

1. Mpaminany israelita tamin’ny taonjato fahafito T.K., ary nanoratra ny boky mitondra ny anarany. Tany Joda angamba i Nahoma no nanoratra ny faminaniany. (Na 1:15) Elkosita izy, satria angamba mponina tany Elkosy, izay toa tanàna na tanàna kely tany Joda.​—Na 1:1; jereo ELKOSITA.

Nampahorin’ny Asyrianina ela be ny Joda. Vaovao tsara àry ilay faminanian’i Nahoma hoe ho rava tsy ho ela i Ninive. Toy ny hoe efa resy i Asyria tamin’i Nahoma nilaza hoe: “Eny an-tendrombohitra ny tongotr’ilay mitondra vaovao tsara sy manambara fiadanana. Ankalazao ireo fetinao, ry Joda ô! Efao ny voadinao, satria tsy hisy handalo eo aminao intsony ny olona tsy manjary, ary ho ringana tanteraka izy.” (Na 1:15) Tsy hohelingelenin’ny Asyrianina intsony ny Jodianina ka ho afaka hanatrika sy hankalaza an-kalalahana an’ireo fetiny. Tsy hampahory azy ireo intsony ny Asyrianina. (Ampit. Na 1:9.) “Hitehaka” na hifaly noho ny loza hanjo an’i Ninive koa ny firenen-kafa rehefa mandre hoe rava izy. Nampahory azy ireo loatra mantsy ny haratsiam-panahin’i Ninive.​—3:19.