Nividianana saha fandevenana ireo farantsa volafotsy 30, taorian’ny nahafatesan’i Jodasy. Iza no nividy izany? Milaza mantsy ny Matio 27:6, 7 fa nividianan’ireo lehiben’ny mpisorona saha ilay vola, satria nihevitra izy ireo fa tsy azo narotsaka tao amin’ny toerana masina fitehirizan-karena ilay izy. Hoy kosa ny Asan’ny Apostoly 1:18, 19 momba an’i Jodasy: “Nividy saha tamin’ny vola azony tamin’ny tsy fahamarinana izy.” Inona no marina? Angamba ireo mpisorona no nividy an’ilay saha, saingy azo lazaina hoe i Jodasy no nividy azy satria avy tany aminy ilay vola. Hoy i A. Edersheim: “Tsy azo natao tao amin’ny fitehirizan-karenan’ny Tempoly, mba hividianana zavatra masina, ny vola azo tamin’ny fomba tsy ara-dalàna. Nasain’ny Lalàna jiosy naverina tany amin’ny tompony ilay izy, ary raha nisisika ny hanome izany izy, dia nampirisihina hampiasa izany hanasoavana ny vahoaka. ... Raha araka ilay lalàna àry, dia mbola noheverina ho volan’i Jodasy ilay izy ary izy no nividy an’ilay antsoin’ny maro hoe ‘sahan’ny mpanefy tanimanga.’” (Ny Andron’i Jesosy Ilay Mesia sy ny Fiainany, 1906, Boky II, p. 575) Nanatanteraka an’ilay faminanian’ny Zakaria 11:13 ny nividianana an’io saha io.

Tany novidin’ny lehiben’ny mpisorona tamin’ireo farantsa volafotsy 30 natsipin’i Jodasy tao amin’ny tempoly, rehefa nanenina izy taorian’ny namadihany an’i Jesosy. Raha sekely ireo farantsa volafotsy ireo, dia mitentina 66 dolara. Novidina ilay “sahan’ny mpanefy tanimanga, mba hatao fandevenam-bahiny.” (Mt 27:3-10) Lasa nantsoina hoe Akeldama na “Sahan-dra” ilay saha. (As 1:18, 19; jereo AKELDAMA.) Efa hatramin’ny taonjato fahefatra io saha io no voalaza fa ilay toerana misolampy eo amin’ny sisiny atsimon’ny Lohasahan’i Hinoma, aloha kelin’ny hihaonany amin’ny Lohasahan’i Kidrona.

Tsy fantatra ilay “sahan’ny mpanefy tanimanga” raha sahan’olona iray mpanefy tanimanga na toerana fanefena tanimanga mihitsy taloha. Toa toerana fanefena tanimanga tokoa teo, raha marina ilay toerana lazain’ny lovantsofina. Izy io mantsy dia teo akaikin’ilay Vavahadin’ny Vakim-bilany Tanimanga resahin’ny Jeremia 19:1, 2. (Ampit. Je 18:2.) “Vavahadin’ny Mpanefy Tanimanga” no lazain’ny fanamarihana ambany pejy nataon’i J. Simons. (Jerosalema ao Amin’ny Testamenta Taloha, Leyde, 1952, p. 230) Nahitana tanimanga teny amin’ny manodidina an’io toerana io, vao haingana. Ilana rano ampy tsara koa ny fanefena tanimanga, ary akaikin’ny loharanon’i En-rogela sy ny Dobon’i Siloama ary ny rano mikoriana eo amin’ny Lohasahan’i Hinoma amin’ny ririnina ilay toerana.