Tsy Mety Hitranga Izany!

“HO MORAMORA kokoa ny hidiran’ny rameva amin’ny vodi-fanjaitra noho ny hidiran’ny manan-karena amin’ny fanjakan’Andriamanitra.” (Matio 19:24). Nilaza izany i Jesosy Kristy mba hanomezana fianarana an’ireo mpianany. Vao avy nanda ny fanasana mba ho tonga mpanara-dia an’i Jesosy ka handray soa avy amin’ireo fahafahana ara-panahy mahatalanjona maro ny mpanapaka tanora nanankarena iray. Nifidy ny hifikitra tamin’ny fananany maro io lehilahy io toy izay hanaraka ny Mesia.

Tsy nilaza i Jesosy tamin’io fa hoe tsy mety hitranga mihitsy ny hahazoan’ny olona manankarena iray fiainana mandrakizay ao anatin’ny fandaharana ny amin’ilay Fanjakana, satria nisy olona nanankarena sasany tonga mpanara-dia azy. (Matio 27:57; Lioka 19:2, 9). Kanefa izany fahazoana fiainana mandrakizay izany dia tsy mety hitranga ho an’izay manankarena rehetra ka tia ny fananany mihoatra noho ny zavatra ara-panahy. Amin’ny fahatsapana fa mila zavatra ara-panahy ny tenany sy amin’ny fikatsahana ny fanampian’Andriamanitra ihany no ahafahan’ny olona toy izany hahazo ny famonjena avy amin’Andriamanitra. — Matio 5:3, NW; 19:16-26.

Tsy tokony horaisina ara-bakiteny io fanoharana ny amin’ny rameva sy ny vody fanjaitra io. Nampiasa fampitomboana fomba filaza i Jesosy teo mba hanasongadinana ny zava-tsarotra atrehan’ny olona manankarena izay miezaka ny hahazo sitraka amin’Andriamanitra no sady mifikitra amin’ny fomba fiainan’ny manankarena tia fatratra ny zavatra ara-nofo. — 1 Timoty 6:17-19.

Misy milaza fa ilay vody fanjaitra dia vavahady kely iray teo amin’ny mandan’ny tanàna iray izay nafahan’ny rameva iray niditra tamim-pahasahiranana raha nesorina taminy ny entany. Kanefa ilay teny grika hoe rha·phisʹ, izay nadika hoe ‘fanjaitra’ ao amin’ny Matio 19:24 sy Marka 10:25, dia avy amin’ny matoanteny iray midika hoe “manjaitra”. Ao amin’ny Lioka 18:25 ny teny hoe be·loʹne dia manondro fanjaitra anjairana, ary izao no vakina ao araka ny Fandikan-tenin’Izao Tontolo Izao Vaovao: “Raha ny marina, dia mora kokoa ny hidiran’ny rameva iray amin’ny vody fanjaitra anjairana iray noho ny hidiran’ny manankarena iray ao amin’ny fanjakan’Andriamanitra.” Olona manam-pahaizana samihafa no manohana io dikan-teny io. Hoy i W. E. Vine: “Ny hevitra ny amin’ny fampiharana ny ‘vody fanjaitra’ amin’ny vavahady kely dia toa maoderina; tsy misy soritra tranainy ny amin’izany.” — An Expository Dictionary of New Testament Words.

Ny rameva goavam-be iray mitady hitsofoka amin’ny vody fanjaitra madinika dia madinika iray dia “manome tsiron’ny fahaiza-manitatry ny any Atsinanana”, hoy ny boky fakàn-teny iray. Ary momba ireo kinga saina aoka izany ka toa mahavita izay toa tsy mety hitranga, dia hoy ny The Babylonian Talmud: “Misintona elefanta avy ao amin’ny vody fanjaitra iray izy ireo.” Nampiasa fampitomboana fomba filaza nahazatra sy fifanoheran-javatra mazava tsara àry i Jesosy teo mba hanasongadinana zavatra iray tsy mety hitranga. Tsy mety hitranga izany hoe rameva, na elefanta, hiditra amin’ny vody fanjaitra izany. Noho ny fanampian’Andriamanitra anefa, dia afaka mandao ny fomba fijery tia fatratra ny zavatra ara-nofo ny manankarena iray ka mikatsaka marina ny fiainana mandrakizay. Toy izany koa ny olona rehetra manana faniriana feno fahatsorana ny hianatra sy hanao ny sitrapon’i Jehovah, ilay Andriamanitra Avo Indrindra.